Mga Pundasyon sa Relief Society

Ang Relief Society, ang organisasyon sa Simbahan alang sa hamtong nga mga babaye, nga nagsugod sa Nauvoo isip paagi sa pagserbisyo niadtong nanginahanglan, mitubo ngadto sa tibuok kalibotan nga panag-igsoonay sa mga miyembro nga nagpuyo sa labaw sa 100 ka mga nasod. Duha ka gipahiuli nga panimalay sa Nauvoo nagtabang sa pagsaysay sa mga istorya sa talagsaong mga babaye kinsa mga kabahin nianang istorya bahin sa gigikanan: Sarah Granger Kimball ug Lucy Mack Smith. Ang mga inter-aksiyon ni Sarah Granger Kimball uban ni Joseph Smith nagpakita kanato kon sa unsang paagi ang gamay nga grupo sa mga babaye nga Santos sa Ulahing mga Adlaw mitabang sa pag-andam sa propeta sa pagdawat sa kabubut-on sa Ginoo ug sa paghimo og organisasyon alang sa mga babaye sa Simbahan. Ang inahan ni Joseph, si Lucy Mack Smith, nahimong sayo ug prominenteng miyembro sa Relief Society sa mga Babaye sa Nauvoo. Ang iyang impluwensya sa iyang anak ug sa Pagpahiuli dili masukod. Kanunay niyang gisuportahan ang propetikanhong misyon sa iyang anak sa tibuok niyang kinabuhi.

Sa sayong bahin sa 1842, si Sarah Kimball misulat nga “Ang Simbahan ni Jesukristo sa mga Santos sa Ulahing mga Adlaw kabos sa kalibotanong mga butang ug matinguhaon sa debosyon sa mga buluhaton nga gikinahanglan.”¹ Ang tabang gikinahanglan ilabi na sa pagtukod sa templo, nga tulo lang ka pye ang gitas-on niadtong panahona ug makita ni Sarah sa bungtod sa dihang mitan-aw siya gikan sa bintana sa iyang sala.

Usa ka adlaw, nakigsulti si Sarah kang Margaret Cook, usa ka mananahi nga nagtrabaho alang sa mga Kimball. Ang mga lider sa Simbahan bag-o lang mihimo og mga panawagan alang sa “mga probisyon, sinina, higdaanan ug kinatibuk-ang mga suplay alang sa mga trabahante [sa dapit nga gitukoran sa templo] ug sa ilang mga pamilya.”² Mipahayag si Margaret og tinguha sa paghimo sa gimbuhaton sa pagtahi; si Sarah mitanyag nga mohatag sa panapton. Ilang naamgohan nga tingali ang uban gustong mosalmot ug naghisgot sa pag-organisar og usa ka kapunongan sa pagpanahi aron “motabang sa pagtukod sa Templo.”³ Paglabay sa pipila ka adlaw adunay mga usa ka dosena ka babaye nga nagpundok sa sala ni Sarah. Ilang gipili si Eliza R. Snow nga mosulat og mga pamalaod ug konstitusyon alang sa ilang bag-ong gisugdan nga organisasyon, sa pagkahuman ilang gihangyo si Propeta Joseph sa pagrebyo niini.

Dihang nabasa ni Joseph ang konstitusyon ug mga lagda, mikomentaryo siya nga kadto “ang labing nindot nga sukad iyang nakita.” Apan hinuon, midugang dayon siya, “Dili kini maoy inyong gusto.” Gipahibalo ni Joseph ang mga sister nga ang ilang mga halad gidawat sa Ginoo, ug Siya adunay butang nga mas maayo alang kanila. Gani, ang Ginoo misugo ni Joseph sa “pag-organisar sa mga babaye ubos sa pagkapari subay sa sumbanan sa pagkapari.”⁴

Hangtod niining puntoha, ang mga estruktura sa organisasyon nga gipadayag ngadto ni Joseph nakatutok sa mga korum sa pagkapari ug sa mga katungdanan nga gihuptan sa mga lalaki sa Simbahan. Sa dili madugay, ang mga babaye hatagan ug katungdanan sa ilang kaugalingong tanan-babaye nga organisasyon. Pinaagi sa pag-organisar sa mga babaye ug lalaki “sumala sa balaod sa Langit,” giandam ang mga Santos sa pagdawat og dugang nga kahayag ug kahibalo sulod sa templo.⁵ Dili sama sa Kirtland, ang mga lalaki ug mga babaye parehong miapil sa mga ordinansa sa templo nga gipaila sa Nauvoo. Ang dinasig nga mga aksiyon nila ni Sarah ug Margaret sa tinuod wala lamang mag-andam sa templo alang sa mga tawo apan usab sa mga tawo alang sa templo.

Niadtong Marso 17, 1842, 20 ka babaye, lakip ni Sarah Kimball ug Margaret Cook, nagkita sa taas nga andana sa Pulang Bika nga Tindahan ni Joseph ug Emma. Ang propeta nangulo sa ilang miting, inabagan sa duha ka sakop sa Korum sa Napulog Duha ka Apostoles. Niining inisyal nga miting sa Relief Society, si Emma Smith ang gipili nga Presidente pinaagi sa hiniusa nga pagboto. Mipasabot si Joseph nga ang pagkatawag ni Emma mao ang katumanan sa pagpadayag nga iyang nadawat 12 ka tuig na ang milabay—nga karon girekord diha sa Doktrina ug mga Pakigsaad 25.

Ang gidaghanon sa mga sakop sa mga Babaye nga Relief Society sa Nauvoo misaka sa gidaghanon. Kanunay sila nga magmiting, lakip sa lima nga nadugang nga mga miting uban ni Joseph Smith, kinsa mihatag og mapanagnaon nga tambag ngadto sa kapunongan. Gitudlo niya nga ang katuyoan sa mga sister “dili lamang aron sa paghupay sa kabos, apan sa pagluwas og mga kalag.”⁶ Karon, isip mga sakop sa tibuok kalibotan nga Relief Society, ang Ulahing Adlaw nga mga Santos nga kababayen-an padayong nagkahiusa sa pagtabang sa nanginahanglan ug sa pagluwas og mga kalag.

Ang laing babaye nga adunay dakong impluwensiya sa Ulahing Adlaw nga mga Santos mao si Lucy Mack Smith, inahan ni Joseph Smith Jr. Mibalhin siya sa panimalay sa Nauvoo nga karon nagdala sa iyang ngalan niadtong Abril 1846, sa dihang 70 anyos na siya ug human ang daghang mga residente sa Nauvoo mibiya padulong sa kasadpan. Gihalad ni Lucy ang dakong bahin sa iyang kataposang mga tuig sa pagpreserbar sa handomanan sa iyang anak nga si Joseph ug sa pagpamatuod sa iyang propetikanhong katungod.

Ang lig-on nga suporta ni Lucy sa iyang anak nga si Joseph ug sa Simbahan nga iyang gitukod nakadasig sa uban sa pagtawag kaniya nga Mama Smith atol sa iyang panahon sa Nauvoo. Agig dugang, si Mama Smith gikonsiderar usab nga usa ka “inahan sa Israel.”⁷ Niadtong 1833, usa ka panalangin gikan sa iyang anak nga si Joseph mihatag niini nga titulo ngadto kang Lucy: “Ug bulahan usab, ang akong inahan, kay siya usa ka inahan sa Israel. … Kay ang iyang kalag kanunay nga napuno sa pagkamaayo ug pagkamanggihatagon; ug bisan pa sa iyang edad, siya makadawat pa ug kusog ug pagalipayon sa taliwala sa iyang balay: ug mao kini ang giingon sa Ginoo, Siya makabaton og kinabuhing dayon.”⁸

Ang talagsaon nga ngalan nagpabilin kang Lucy bisan human sa kamatayon ni Joseph. Atol sa Oktubre 1845 nga kinatibuk-ang Komperensiya sa Simbahan, mihangyo si Lucy og oportunidad nga mamulong sa kongregasyon. Niini, nga unang asoy sa usa ka babaye nga namulong sa kinatibuk-ang komperensiya, giawhag niya ang mga Santos sa paggiya sa ilang mga anak sa kamatuoran pinaagi sa gugma ug pagkamabination. Dayon iyang gipangutana ang kongregasyon kon giisip ba nila siya nga inahan sa Israel. Mibarog si Brigham Young ug mibotar sa pangutana ug “usa ka unibersal nga ‘oo’ milanog” sa wala pa mahuman nga Templo sa Nauvoo diin sila nagtigom.⁹

Si Lucy Mack Smith mao ang nag-una sa talagsaong mga babaye kansang pagpangulo, espirituhanong mga gasa, ug kalig-on sa kinaiya nakatabang sa pagpahitabo sa Pagpahiuli sa Simbahan ni Jesukristo. Sa ikalimang miting sa Relief Society sa mga Babaye sa Nauvoo, si Lucy Mack Smith usa ka aktibong miyembro sa organisasyon. Siya ug ang ubang mga babaye sa Nauvoo mitabang sa pagpahiluna og pundasyon sa pagkamatarong alang sa Simbahan, sa usa ka bahin nagtuman sa balaanong tawag sa pagtukod sa Nauvoo isip usa ka tukoranan nga bato sa Zion. Ang istorya sa Relief Society nagpakita kon sa unsang paagi ang mga babaye sa Simbahan nahimong usa ka pwersa alang sa kaayohan gikan sa unang mga adlaw niini, padayon nga nag-amuma sa matahom nga talan-awon sa pagtuo sa mga Santos sa Ulahing mga Adlaw.