Panimalay ni Hiram ug Sarah Granger Kimball

Samtang ang Panimalay ni Hiram ug Sarah Granger Kimball dili usa ka dapit diin si Propeta Joseph Smith nakadawat og mga pagpadayag o mihatag og dinasig nga mga wali, nagpahinumdom kini kon sa unsang paagi nga ang mga propeta usahay nakaandam sa pagdawat sa pulong sa Ginoo tungod kay una silang nakakat-onan gikan sa mga pulong ug mga ehemplo sa uban. Sugod niini nga panimalay, ang dili hinakog nga pagserbisyo sa gamay nga grupo sa mga babaye nga mga Santos sa Ulahing mga Adlaw nakatabang sa pagdasig ni Joseph Smith sa pagdawat sa kabubut-on sa Dios sa paghimo og organisasyon alang sa mga babaye sa Simbahan.

Si Hiram ug Sarah mibalhin niini nga balay mga pito ka bulan human maminyo. Si Hiram, kinsa dili miyembro sa gipahiuli nga Simbahan ni Jesukristo hangtod 1843, nagpuyo sa Commerce, Illinois, sa wala pa moabot ang mga Santos sa Ulahing mga Adlaw ug giusab og Nauvoo ang ngalan sa siyudad. Ang mga Kimball mao ang usa sa pipila ka adunahan nga pamilya sa Nauvoo, tungod sa mga negosyo ni Hiram ug pagpanag-iya og yuta. Si Hiram ug Sarah dugay nga nagpabilin sa Nauvoo kaysa sa kadaghanan mga Santos sa Ulahing mga Adlaw, mibiya niini nga balay ug mibalhin ngadto sa Walog sa Salt Lake niadtong 1851.

Ang Panimalay sa Kimball halangdon tungod sa usa ka pagbinayloay og mga hunahuna nga nahitabo sulod sa mga bongbong niini. Si Margaret Cook, nga usa ka sastre nga nagtrabaho alang ni Sarah, gusto nga motabang sa pagtukod sa Templo sa Nauvoo pinaagi sa pagtahi og mga sinina alang sa mga tigtukod. Usa ka adlaw niadtong 1842, ang duha ka babaye naghisgot nga magtukod og kapunongan sa mananahi aron motabang sa paningkamot, ug paglabay sa pipila ka adlaw mga usa ka dosena ka laing mga babaye sa kasilinganan nagmiting sa sala niini nga balay alang sa unang miting sa kapunongan. Gikan niining gamay nga kapunongan sa pagtahi nga ang Relief Society sa mga Babaye sa Nauvoo naporma. Sa kataposan kini nga grupo nahimong tibuok kalibotan nga organisasyon sa mga babaye nga yanong nailhan nga Relief Society.

Basaha ang mahitungod ni Sarah Granger Kimball ug ang organisasyon a Nauvoo Female Relief Society diha sa Mga Santos, Volume 1, Kapitulo 37.

360° nga Pag-aninaw sa Tibuok Palibot