Ang makasaysayanon nga Nauvoo ug Bilanggoan sa Carthage mao ang mga dapit nga may mahinungdanong kasaysayan sa Ang Simbahan ni Jesukristo sa mga Santos sa Ulahing mga Adlaw.
“Ang mga henerasyon nga wala pa mahimugso makig-uban sa talagsaon nga kalipay diha sa mga panghitabo nga atong naagian, ang mga kalisdanan nga atong gilahutay; walay hunong nga kadasig nga atong gipakita, ang tanan apan lisod buntogon nga mga kalisdanan nga atong nabuntog sa pagtukod sa pundasyon sa usa ka buluhaton nga magdala sa himaya ug panalangin nga ila unya nga makab-ot.”
Ang makasaysayanon nga Nauvoo, nga nahimutang sa kasadpang central Illinois sa Estados Unidos sa Amerika, usa ka mahinungdanong makasaysayanon nga dapit sa Ang Simbahan ni Jesukristo sa mga Santos sa Ulahing mga Adlaw. Atol sa tingtugnaw sa 1838–1839, ang mga Santos sa Ulahing mga Adlaw gipalayas gikan sa ilang mga panimalay sa Missouri, ug daghan sa kataposan ang nakakaplag sa ilang dalan ngadto sa dapit ug libot sa unsay gihatagan og laing ngalan nga siyudad sa Nauvoo. Pinaagi sa pagpadayag, nanawagan si Jesukristo sa mga tawo sa Nauvoo nga mahimong “tukoranan nga bato sa Zion,” magsangkap og lig-on nga pundasyon diin ang Simbahan molambo. Ang labing mahinungdanon nga talan-awon sa kinabuhi sa mga Santos sa Ulahing mga Adlaw mao ang Templo sa Nauvoo. Ubos sa propetikanhong pagpangulo ni Joseph Smith ug Brigham Young, kining Santos sa Ulahing mga Adlaw nga komunidad nagpundok dili lamang sa pagtukod niini nga siyudad sa templo apan sa paghimo usab og sagrado nga mga pakigsaad sa Dios ug sa usag usa pinaagi sa mga ordinansa sa templo.
Bilanggoan sa Carthage
Ang Bilanggoan sa Carthage, nga nahimutang mga 20 ka milya sa habagatang sidlakan sa Nauvoo, mao napahiuli nga makasaysayanon nga dapit diin gipatay ang Propeta nga si Joseph Smith ug ang igsoon niyang si Hyrum pinaagi sa manggugubot niadtong Hunyo 27, 1844. Ang pagpatay sa Propeta ug sa Patriyarka nakapahugno pag-ayo sa Mga Santos sa Ulahing mga Adlaw. Bisan pa man, samtang ang mga Santos nagbangotan niining labihang pagkawala, gisunod usab nila ang buhing apostoles nga mangulo sa pagpadayon sa buhat sa pagpahiuli sa ebanghelyo ni Jesukristo sa ulahing mga adlaw.
Sulod sa duha ka tuig human sa pagmartir, nahuman sa mga Santos ang pagtukod sa Templo sa Nauvoo ug mihimo og sagradong mga ordinansa nga nagbugkos kanila ngadto sa Dios ug sa usag usa. Apan nasayod sila ang ilang panahon sulod sa gipangga nila nga siyudad sa templo nagkapupos na. Dapit sa kataposan sa 1846, liboan ka Santos ang mibiya sa Nauvoo uban sa panghinaot nga makatukod sila og mas malinawon nga Zion didto sa kasadpan.
Ang Templo sa Nauvoo
Ang makasaysayanon nga Nauvoo ug Bilanggoan sa Carthage managsama og sukaranang mga gutlo sa gipahiuli nga ebanghelyo ni Jesukristo nga padayong nag-impluwensiya sa Simbahan karon. Didto sa Nauvoo, nakadawat si Joseph Smith og mahinungdanong mga pagpadayag gikan sa Ginoo—lakip sa mga ordinansa sa templo mahitungod sa bunyag alang sa mga patay, ang pagtuga [endowment], ug mahangtorong pamilya nga mga pagselyo; ang apostoles mibiya alang sa gawas nga mga nasod nga mga misyon; ang mga tawong negosyante mipalambo og bag-ong sistema sa ekonomiya nga makasuporta sa pagtukod sa templo; ug natukod ang Relief Society sa mga Babaye alang sa pag-atiman sa nanginahanglan. Sa Bilanggoan sa Carthage, natapos ni Joseph Smith ang iyang mortal nga pangalagad, nagbilin og dili matarog nga pagpamatuod mahitungod sa buhi nga Manluluwas nga si Jesukristo.
Karon, ang mga bisita sa Makasaysayanon nga Nauvoo ug Bilanggoan sa Carthage, moadto man sila sa personal o sa online, makadiskobre og mga sugilanon mahitungod sa pagtuo, serbisyo, buhat, debosyon, trahedya, paglaom, ug kalinaw. Kini nga mga dapit ug mga sugilanon makadasig sa mga tawo aron mapalig-on ang kaugalingon nilang pagtuo ni Jesukristo, mohimo ug maghupot og mga pakigsaad sa Dios, mopakigbahin sa ebanghelyo ni Jesukristo ngadto sa uban, ug mopalig-on sa mga komunidad kon asa sila nagpuyo.
