Pasiuna sa Makasaysayanong mga Dapit sa New York ug Pennsylvania
Ang mga dapit nga mahinungdanon sa kasaysayan sa Ang Simbahan ni Jesukristo sa mga Santos sa Ulahing mga Adlaw makita sa New York ug Pennsylvania.
“Ako nakakita og usa ka gilis sa kahayag ibabaw gayud sa akong ulo, labaw sa kahayag sa adlaw, nga nag-anam og paubos hangtud kini midapat kanako…Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan, ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!”
– Joseph Smith
Sa usa ka adlaw sa tingpamulak niadtong 1820, ang katorse anyos nga si Joseph Smith Jr. miadto sa kakahoyan duol sa iyang panimalay sa Palmyra, New York aron mag-ampo. Agig tubag sa iyang pag-ampo, ang Dios Amahan ug ang Iyang Anak, nga si Jesukristo, mipakita ngadto ni Joseph Smith ug namulong ngadto kaniya. Kini nga tubag nakapausab sa kinabuhi ni Joseph ug migiya kaniya sa usa ka dalan sa pagpahiuli sa ebanghelyo ni Jesukristo.
Artistic depiction of the First Vision [Artistic nga paghulagway sa Unang Panan-awon].
Paglabay sa tulo ka tuig, usa ka anghel mipakita ngadto ni Joseph didto sa ibabaw nga lawak sa balay nga hinimo sa troso sa iyang pamilya. Ang anghel mipaila sa iyang kaugalingon nga si Moroni, usa ka makasaysayanong propeta kinsa misulti ni Joseph mahitungod sa usa ka karaan nga rekord nga naglangkob sa kahingpitan sa ebanghelyo ni Jesukristo. Gipadayag ni Moroni ang lokasyon ngadto ni Joseph, apan upat pa ka tuig una si Joseph andam nga modawat niini.
Sa taas nga lawak sa Balay sa Pagkabata ni Joseph.
Nianang panahona, si Joseph mibalhin ngadto sa Pennsylvania ug migahin og panahon sa pagtrabaho sa usa ka tawo nga ginganlan og Josiah Stowell. Samtang didto siya, nahimamat niya ug naminyo ni Emma Hale Smith . Human sa ilang kaminyoon, si Joseph gitugotan sa pagkuha sa rekord gikan ni anghel Moroni. Siya mibiyahe ngadto sa Bungtod sa Cumorah aron sa pagkuha niini ug misugod sa buhat sa paghubad. Usa ka magtutudlo sa eskwelahan nga ginganlan og Oliver Cowdery nakadungog sa proyekto ug mibiyahe aron makigkita ni Joseph Smith nga naglaom nga moserbisyo isip tigsulat ni Joseph. Mituo siya sa buhat nga gihimo ni Joseph, ug si Oliver nahimong tigsulat alang ni Joseph samtang iyang gihubad ang Basahon ni Mormon. Ang duha mipadayon sa paghubad didto sa panimalay ni Joseph ug Emma sa Harmony, Pennsylvania. Niini usab nga panahon nga mas daghang langitnong mensahero ang mipakita ug mipahiuli sa pagkapari, ang gahom ug awtoridad sa Dios, nganhi sa yuta. Si Joseph ug Oliver dayon nagbunyag sa usag usa didto sa Suba sa Susquehanna .
Ang Panimalay ni Joseph ug Emma Smith didto sa Dapit sa Pagpahiuli sa Pagkapari.
Samtang mikaylap ang balita niining ‘bulawan nga mga palid’ si Joseph misugod sa pag-atubang sa pagpanggukod nga mipahinay sa proseso sa paghubad. Si Joseph ug Oliver mihukom nga mobalhin sa buhat sa paghubad ngadto sa Fayette, New York sa Umahan sa mga Whitmer . Ang pamilya Whitmer mituo nga gipahiuli ni Joseph ang ebanghelyo ni Jesukristo ug mitanyag sa ilang tabang. Didto sa Umahan sa mga Whitmer, si Joseph ug Oliver nakahimo sa pagkompleto sa paghubad sa Basahon ni Mormon.
Mga aktor nga naghulagway sa paghubad sa Basahon ni Mormon.
Si Joseph Smith dayon nangita og tawo nga momantala sa basahon. Usa ka andam nga tig-imprinta nga ginganlan og Egbert B. Grandin nakit-an sa Palmyra, NY. Miuyon si Grandin sa pag-typeset, pagprinta, ug pagbugkos sa 5,000 ka mga kopya sa Basahon ni Mormon. Uban sa pinansyal nga suporta gikan ni Martin Harris nga miprenda sa iyang umahan , ang Basahon ni Mormon nahimong reyalidad ug unang gipahibalo nga ibaligya sa tindahan ni Grandin.
Mga aktor nga naghulagway sa pagprinta sa Basahon ni Mormon.
Samtang ang Basahon ni Mormon mikaylap daghang mga tawo ang nahimong interesado sa mga pagtulun-an sa gipahiuli nga ebanghelyo. Niadtong Abril 6, 1830, gibana-bana nga singkwenta ka tawo ang nagpundok sa balay nga hinimo sa troso sa mga Whitmer ug ang gipahiuli nga Simbahan ni Jesukristo opisyal nga giorganisar .
Usa ka gitukod pag-usab nga balay nga hinimo sa troso didto sa Umahan sa mga Whitmer.
Karon ang mga dapit diin nahitabo kining makasaysayanong mga panghitabo gipreserbar. Giabi-abi ang mga bisita nga makasinati niini nga mga dapit ug makat-on bahin sa mga butang nga nahitabo dinhi sa personal man o online. Ang makasaysayanong mga dapit sa New York ug Pennsylvania nagsaysay og istorya sa hugot nga pagtuo, paglahutay, ug paglaom. Kini nga mga dapit makadasig sa mga tawo sa pagkat-on og dugang mahitungod sa Ang Simbahan ni Jesukristo sa mga Santos sa Ulahing mga Adlaw ug makalig-on sa ilang pagtuo kang Jesukristo.