Mai le AM Faalevaiaso
E Faigata le Aoga. O Le Mea Lenei Ou te Finafinau Ai Pea (ma le Faamoemoe)
E le o oe o se mea faitino—na foafoaina oe e faatino, avea, ma manumalo.
Ata pue mai faaaloaloga a le tusitala
O nisi taimi ou te mafaufau ai pe o le a avea moni a’u ma tagata ou te faamoemoe e avea ai. E masani lava ona ou faia le miti e suesue le paiolo, alu i le aoga faafomai, ma toe foi atu i le fale e auauna atu i lo’u nuu i Tahiti o se fomai.
Ae ina ua ou siitia atu i Hawaii, ISA, e amata i le kolisi, sa ou mafaufau pe o lena ala o le mea moni lea na finagalo ai le Tama Faalelagi mo a’u.
O le kolisi o se aafiaga maoae, ae o le faapaleniina o vasega, galuega, ma le taimi e malolo ai e faigata. E masani ona ou lagonaina le lotovaivai ona o tulaga lē mautonu uma.
A o ou tauivi ma nei lagona, na ou maua le faamoemoe e ala i ni nai faiga masani aoga.
Aoao e Faatino i le Faatuatua
Na faamalamalama mai e Elder David A. Bednar o le Korama a Aposetolo e Toasefululua i se taimi le faitalia i se lesona faatino mamana. Ao uuina i luga ana tusitusiga paia, sa ia faapea mai ai o tusitusiga paia o se mea faitino. Sa ia aoao mai e leai so latou malosi e minoi ai sei vagana ua ia faaminoiina i latou. Ona ia faaopoopo mai lea, “‘Peitai, o oe ma a’u, o ni sui. Ua ia i tatou le mana i totonu o i tatou e galulue ai, ae le na o le tau galueaiina.’”
Sa amata ona ou malamalama i lo’u faitalia e filifili le faatuatua ina ua amata ona ou faigaluega o se taiala vaa i le Nofoaga Autu o Aganuu Polenisia. I le taimi muamua, sa ou popole tele. E mamafa vaa, e tatafe tele le vaitafe, ma e tatau ona e taialaina ma faafiafia malo, e aunoa ma le faaletonu!
I le amataga o lenei galuega, sa ou popole. Ona ou faitauina lea o le mau lenei: “Ona … ua togiolaina i latou mai le pa’ū ua latou saoloto ai e faavavau, … e fai mo i latou lava ae lē faamalosia” (2 Nifae 2:26).
O lenei mau na aumaia ia te a’u le filemu. O le Togiola a Iesu Keriso e le na o le togiolaina o i tatou mai agasala—E tuuina mai foi e Ia ia i tatou le malosi. Sa ou iloaina e le manaomia ona ou faatali ia “lagona le saunia” pe ia iloa lelei mea uma. Sa na ona ou manaomia lava ona faatino i le faatuatua ma manatua e mafai ona ou faia ni mea faigata, aemaise lava faatasi ma Keriso i o’u autafa.
A o ou faatino i le faatuatua ma faaauau pea ona galue e ala atu i mea sese ma luitau, sa ou matauina ai faaleleia atili o’u tomai faaalovaa ma lo’u faalagolago i le Alii. Sa ou iloaina na silafia a’u e le Atua, sa alofa ia te a’u, ma o le a fesoasoani ia te a’u i mea uma sa ou taumafai e ausia.
Pe a ou lagona le lotovaivai—pe i le galuega, i se tamoega, a o suesue, po o taimi o le masalosalo—ou te faamanatu ia te a’u lava ia e le o a’u o se mea faitino. O a’u o se sui e mafai ona galue i le faatuatua.
Tuuina Atu i le Alii o le Taimi Tutusa
I le avea ai ma fanau a le Tama Faalelagi, e le faapea o i tatou o ni tagata maimoa i o tatou olaga. E finagalo o Ia ia tatou suia, ia avea atili, ma ia filifili o Ia.
Pe a faigata le aoga ma mamafa ia tiutetauave, ua ou iloa ai o le faamuamuaina o le taimi mo le Alii e fesoasoani ia te a’u e ausia ai isi mea uma. Na faasoa mai e Elder Ronald A. Rasband o le Korama a Aposetolo e Toasefululua le folafolaga lenei: “A o e tuuina atu i le Alii le taimi tutusa a o e tulitulimatagauina au aoaoga maualuluga atu, o le a faaleleia e le Agaga au taumafaiga faaleaoaoga. O le a e iloa ai e i ai sou taimi faaopoopo ma le gafatia mo au kosi, ma o le a tatalaina faitotoa mo oe atonu na tapunia.”
O lena folafolaga ou te maua ai le mafanafana a o ou galue pea agai i a’u sini.
Vaai Atu i le Atua
Ua ou lagonaina le tele o le taitaiga mai le Alii e suesue i le vaega faafomai, ae o loo lagonaina pea le lē mautonu i le ala o i luma atu. Ua ou iloaina e le oo mai le filemu pe a mou atu uma le lē mautonu; e mafai ona sau mai le Atua i soo se tulaga. Na aoao mai Peresitene D. Todd Christofferson, Fesoasoani Lua i le Au Peresitene Sili, “I le vaai atu i le Atua, e mafai ona tatou maua le filemu i faigata, ma e mafai ona faaauau pea ona tuputupu ae lo tatou faatuatua e oo lava i taimi o le masalosalo ma luitau faaleagaga.”
E ui lava ou te le iloa pe faape’i lo’u lumanai i le aoga faafomai, ae ou te iloa o loo taialaina a’u e le Atua. E tusa lava pe le mafai ona manino la’u vaai i Ana faamanuiaga, o le manatuaina e le o tuua na o a’u i la’u malaga e aumaia ia te a’u le faamoemoe.
Afai e te le o mautinoa lou lumanai po o masalosalo i ou gafatia, faamolemole aua e te fiu. Filifili e faatino i le faatuatua e tusa lava pe o lona uiga o le faia o se laa itiiti e tasi.
Ona o loo soifua Keriso, e mafai ona e taumafai pea. E mafai ona e fuafuaina ni mea. Talitonu e mafai ona Ia fesoasoani ia te oe i soo se le mautonu o loo feagai ma oe.