O Le Auala Na Ave Ai e La’u Sootaga ma le Atua A’u mai se Olaga Faatamaitiiti Faigata i le Faatinoina o le Matafaioi a Keriso

A o ma nonofo ai i se malutaga mo tagata e leai ni fale, sa faailoa atu ai i ma’ua i le O Le Ekalesia a Iesu Keriso o le Au Paia o Aso e Gata Ai. Sa ou fiafia i le talalelei. E ui lava sa ma tauivi pea i nai tausaga na sosoo ai, ae o le tele lava o lo’u taulai atu i le atinaeina o la’u sootaga ma le Atua, o le mama foi lea o a’u avega.

Sa le’i i ai sa’u fesootaiga ma lo’u tama, ma ona sa tauivi lo’u tina ma ni gasegase faalemafaufau, sa masani ona i ai le ita i lo ma aiga.

Sa le mafai ona ou pulea o’u luitau, ae sa mafai lava ona ou maua i taimi uma le sulufaiga i la’u sootaga ma le Atua ma Iesu Keriso. O se avanoa lena e leai se mea i le lalolagi e mafai ona osofaia. Sa ou faatauaina taimi filemu i le tatalo, faitauina o tusitusiga paia, ma tusitusi i la’u api talaaga, ma a oo ina faigata tele mea uma i le aiga, ou te alu atu i se vaega filemu o le siosiomaga.

E pei ona aoao mai Elder Sandino Roma o le Fitugafulu:

“Tatalo i lou Tama Faalelagi e pei o le taimi muamua lea. Faailoa atu lou alofa ma le lotofaafetai mo Ana faamanuiaga. …

“Afai e te faamaoni ma lotomaualalo, o le a e faalogo i Lana tali ma amata se sootaga patino ma tumau ma le Tama Faalelagi ma Iesu Keriso.”

Ina ua ou faaaluina le taimi ma le Atua, sa mafai ona ou iloa ni vaaiga o Lona aao i lo’u olaga, ma sa avea lena ma punavai o lo’u faamoemoe. O nisi taimi pe a lagona le tiga o le ma sootaga ma lo’u tina ma sa foliga faaletonu lo’u lumanai, ou te tatalo mo se fesoasoani, ma o le a faamautinoa mai e le Agaga ia te a’u.

O lena sootaga paia na avea ma se malosiaga agai i luma mo lo’u olaga, e aofia ai la’u faatinoga. Ina ua 12 ou tausaga, sa uunaia a’u e taumafai mo le vaega a Iesu talavou i Vitio o le Tusi Paia. Sa ou manao, e sili atu nai lo se isi lava mea, e faaalia atu le Faaola sa ou alofa i ai. Sa ou pueina la’u faataitaiga i luga o se meapueata faaeletonika ua malepe, ao ofuina le ofutaele piniki o lo’u tina, ma auina atu loa.

Ou te le’i maua le vaega sa ou manao ai, ae ou te le’i lafoaia lava le faamoemoe e mafai lava ona ou auauna atu i le Alii e ala i le faatino ata tifaga. Sa ou faafetai i le i ai o ni matafaioi laiti i isi galuega faatino a le Ekalesia. Mulimuli ane, sa ou faataitai e toe fai ma Faaola—i le taimi lenei o se talavou matua mo le faalauiloaga a le Ekalesia o le Eseta o le “Alofa Tele”.

A o o’u anapogi ma saunia faaleagaga mo la’u faataitaiga, sa ou mafaufau i mea uma na faia e le Faaola mo a’u. Sa ou tuuina atu la’u faauigaga sili o le tagata sa i ai pea le Faaola ia te a’u, ma taulai atu i le olioli, alofa, filemu, ma le lē manatu faapito ou te iloa o loo Ia faailoa atoatoa mai.

Ma sa ou maua le vaega. Sa o se taimi tāua lea o le manatuaga o se aafiaga lea pe a ou manatu i le auala na uunaia ai a’u e taumafai mo le isi matafaioi a o ou laitiiti. Sa mafai ona ou vaai i le ala na i ai le Tama Faalelagi i auiliiliga o lo’u olaga, ma taialaina a’u i taimi uma e agai i luma.

O la’u sootaga ma le Faaola na uunaia ai le ala na ou faaalia ai o Ia—auā ua ou iloa o Ia. E finagalo o Ia e aumaia le filemu ma le faamalologa ia i latou o e mafatia ma manaomia Lona malamalama.

Sa ou iloaina o la’u faatinoga o le Faaola sa le faatatau ia te a’u. Sa ou fesoasoani i tagata ia vaai ma iloa Iesu Keriso i se auala ou te faamoemoe e faamumū ai lo latou talitonuga ma le faamoemoe ia te Ia, le Alii o le Filemu.

O luitau o le olaga e mafai ona e lagona ai le leai o se faamoemoe ma aveesea mai lou faamoemoega maualuga atu. Ae afai e te manatua lou faasinomaga paia ma le sootaga ma Keriso, o fegalegaleaiga uma e te faia ma isi, o galuega faatino uma e te galue ai, ma laasaga uma e te faia e mafai ona e latalata atili atu ai i le Faaola.

E tusa lava pe le tusa ai ma oe, pe a e fesootai atu i le Tama Faalelagi ma Iesu Keriso, e mafai ona e maua le olioli, uiga, ma le taitaiga i soo se tulaga. E mafai ona e maua se “susulu atoatoa o le faamoemoe” (2 Nifae 31:20). E alolofa atoatoa i Laua ia te oe. Ma o loo Laua savavali faatasi ma oe.

O le ala lena na faaali mai ai e le Tama Faalelagi ma Iesu Keriso i taimi uma mo a’u. Ma ou te iloa ona o i Laua, o le a lelei ai mea uma.