Mai le AM Faalevaiaso
Lē Fiafia i le Aganuu o Tafaoga Faamasani i Ona Po Nei? O Mea e 3 e Tatau ona E Iloa
E alala le tusitala i Montréal, Québec, Kanata.
Ua ou aoaoina ni nai togafiti e mafai ona fesoasoani ia i tatou e tafafao faamasani ai ma le alofa ae le o le fefe.
Ou te fiafia e tafao faamasani. Ou te fiafia i le alofa.
Ma o le talalelei o se fuafuaga o le alofa ma le fiafia. Ae o nisi taimi, pe a taumafai e tafafao faamasani ma su’e le tagata sa’o e faaipoipo i ai, o le aganuu o tafaoga faamasani e mafai ona mafua ai ni vaega faalavefau.
Mo se faataitaiga, iinei i Montréal, o loo i ai se matou vaega vavalalata o talavou matutua. Afai e te alu i se tafaoga faamasani se tasi ma se tasi, e talanoa i ai isi, ma e faigata ona faamasani ma alofa faamama’i i tagata e aunoa ma le manatu loloto i ai.
A o ou tafao faamasani ma tagata eseese, sa ou faalogo i tala feaveai e pei o le, “O loo su’e se toalua o Nina. O le a pa i le fia faaipoipo!” Ae e le moni lena mea—sa na ona ou taumafai lava ia sili atu ona faamoemoeina i le lalolagi o tafaoga faamasani. O le fausia o se aiga o se tasi lea o a’u faamuamua i le olaga.
O le tafao faamasani ma le loto i ai e le faapea o loo e matua naunau—ae e faatatau i le tuu o se taumafaiga e iloa ai po o a sootaga e mafai ona taitai atu i ai oe e le Tama Faalelagi. E pei ona saunoa mai Peresitene Russell M. Nelson (1924–2025), “E fiafia le Alii i taumafaiga.”
Afai na e lagonaina le pei e poloka pe a oo i le tafao faamasani, e le o tuua na o oe. O ni mea nei se tolu e fai a o e taumafai e fai ma le loto i ai au tafaoga faamasani:
1. Iloa Po o Ai Oe
Ou te lagona e pei o nisi o i tatou e le iloa po o ai i tatou. Tatou te le iloa pe faapefea ona avea ma o tatou lava tagata, po o a a tatou sini, po o le auala e faia ai faaiuga ma le mautinoa. O le ituaiga tagata tatou te i ai e mamanu ai o tatou olaga, mea tatou te faamuamua, ma o tatou tulaga faatauaina.
Na fesili mai Elder Ronald A. Rasband o le Korama a Aposetolo e Toasefululua:
“‘O a mea e te mafaufau loloto i ai?’ ‘O a mea e tāua moni lava ia te oe?’ ‘O a mea o lou agaga?’
“O mea o o tatou agaga e masani ona faamaninoina ma faalolotoina e ala i le faia o fesili.”
I le taimi o le kolisi, sa aoaoina ai a’u e a’u vasega o fefaatauaiga faaagafesootai e uiga i le sailia o la’u aofia ma le fausiaina o le faailoga o sa’u oloa. E mafai foi ona faatatau lenei mea i le olaga! E le faapea la o le fatuina o se tagata faafoliga—o lona uiga o lou avea ma oe lava, tuputupu ae, ma le aoao pe mafai faapefea ona e fesootai moni ma isi.
Pe a tatou ola o ni soo o Iesu Keriso, ua tatou iloa o tatou tulaga faatauaina. Tatou te osia uma lava feagaiga e tasi ma mulimuli i poloaiga lava e tasi. Ma o le mea e manaia ai lenei mea, tuu ese uiga ma mea e fiafia i ai, pe a tatou fefaasoaai tulaga faatauaina i se lalolagi e tumu i mea eseese e fiafia i ai ma manatu, e mafai ona tatou galulue faatasi ma isi soo o Keriso i tafaoga faamasani.
A e faataga lou faasinomaga paia e mamanu lou olaga, o le a e maua isi o loo faia foi faapea.
2. Iloa Le Mea E Te Manao Ai
Ou te tafao faamasani ma le faamoemoe auā e i ai sa’u sini ia faaipoipo mulimuli ane.
Na uunaia i tatou e Peresitene Nelson “ia amata faatasi ma le faaiuga i le mafaufau.” O le amata faatasi ma le faaiuga i le mafaufau i tafaoga faamasani o lona uiga o le iloaina o au sini. O le a le faamoemoega o se tafaoga faamasani? E faamoemoe e iloa ai pe e te vaaia le gafatia mo se sootaga lea e mafai ona taitai atu ai i le faaipoipoga. Ae o faasoa atu au sini? Pe o tutusa o lua uiga ma mea e fiafia i ai? Fesili ifo ia te oe lava i nei ituaiga o fesili!
Ina ia fuafua po o a agava’a e vaavaai i ai, atiina ae na vaega ia te oe lava, taulai atu i le Tama Faalelagi, ma tutu i nofoaga lea o le a i ai isi tagata paia (e pei o le inisitituti, lotu, gaoioiga ma konafesi a le AM).
Na tuuina atu e Elder Jeremy R. Jaggi o le Fitugafulu i le autalavou matutua le fautuaga lenei: “Afai tatou te sailia [le Atua], o le a tosina atu i tatou i isi o loo sailia foi o Ia. E tāua lenei mea i le atiina ae o faauoga ma faaipoipoga malolosi ma tumau.”
3. Iloa pe Faapefea ona Fegalegaleai ma Isi
I lenei lalolagi tuufua faaagafesootai, ou te fiafia e manatua le fautuaga na tuuina atu i faifeautalai ia pupula sao atu i mata, ataata i tagata, ma fai atu i isi fesili e uiga ia i latou lava.
O le pipii mau i telefoni ua aafia ai le ala tatou te fegalegaleai ai ma isi. Ma e tusa lava pe e te manao e talanoa i tagata, o le popole ma le fefe e mafai ona fai ma faalavefau.
Na saunoa mai Elder Neil L. Andersen o le Korama a Aposetolo e Toasefululua: “O la’u fautuaga muamua lava ia te oe ia lototele. Uunai oe lava e atiina ae ni faigauo taitoatasi. E le manaomia ona e mafaufau o faauoga uma o le a faapea ona atiina ae i le alofa, ae o le a tele mea o le a maua i fegalegaleaiga taitoatasi.”
O le faamasani i isi tagata e mafai ona taufaafefe, ae o le naunau e laa ese mai lou sone ua e masani ai o le a iu lava ina fesoasoani ia te oe e maua ai le o loo e sailia.
O loo o’u lagona le olioli tele i le nofofua i le taimi nei, ae e ui ina fiafia i lo’u olaga, e i ai manaoga amiotonu o loo ou galue agai i ai—o se tasi o le faaipoipoga e faavavau. Ou te iloa a o ou atinae pea sootaga ma isi, fai filifiliga o le a taitai atu ai i se lumanai lelei, ma faalagolago i le Alii, o le a faataunuuina o’u manaoga amiotonu.