Mai le AM Faalevaiaso
O le Aso Sili Ona Lelei i le Talafaasolopito E Sili Atu Nai Lo O Tatou Aso Uma e Sili Ona Leaga
O le Toetu o Iesu Keriso e le na o se taimi i le talafaasolopito—o se punavai o le faamoemoe mo a’u i aso taitasi.
Pe na i ai se taimi na suia atoa ai lou olaga—le ituaiga e foliga mai e faaleagaina ai mea uma? Sa tupu ia te a’u, ma sa leai se mea e mafai ona ou faia e taofia ai.
I se tasi minute, sa matou saofafai ai ma nai o’u tei i luga o le nofoa o le potu malolo, ma faatalitali filemu. O le isi mea na sosoo ai, sa pei na palasi mai lalo lo’u lalolagi atoa.
O le faamalamalamaga faasamasamanoa a lo’u tama o lana faaiuga e talosaga atu mo le tatalaina o le faaipoipoga na feteenai ma mea uma sa ou manatu sa ou iloaina. Sa ou faapea o i matou o se aiga fiafia. Sa ou manatu o le suesue i tusitusiga paia i aso taitasi ma tatalo faaleaiga sa tatau ona tuufaatasia ai i matou.
Mai lava i lena taimi, sa suia le tele o vaega. Sa amata ona oona o’u manatuaga fiafia o le olaga faatamaitiiti. Sa toe faaipoipo uma o’u matua. Sa amata ona filifili e nai o’u tei itu.
Sa ou mafaufau po o le a le mea ua tupu i lo’u olaga.
O Le Aso Na Matou Tautino Ai e Mulimuli ia Keriso
Sa matuai le talafeagai lava—aisea na faaleagaina ai lo’u olaga e se faaiuga a se isi tagata?
Pe o le mea lena na tupu? Mo sina taimi, na pei ai le tatalaga o le faaipoipoga a o’u matua o le aso aupito sili lea ona tāua o lo’u olaga. Ae o se saunoaga a Elder Dieter F. Uchtdorf o le Korama a Aposetolo e Toasefululua na ou toe mafaufau ai i lenei mea.
Sa ia aoao mai, “O le aso sili ona tāua i le talafaasolopito o tagata o le aso lea na manumalo ai Iesu Keriso, le Alo soifua o le Atua, i le oti ma le agasala mo fanau uma a le Atua.”
Ona ia faaopoopo mai lea o le aso aupito sili ona tāua i o tatou olaga o le aso lea tatou te tautino atu ai e mulimuli ia Iesu Keriso—o se aso sa ia faamoemoe o le a toe tupu “pea lava pea i o tatou olaga atoa.”
O lea la, ioe, a o suia e le tatalaga o le faaipoipoga a o’u matua lo’u olaga, o le Togiola a Iesu Keriso na suia ai le matautia o le talafaasolopito o le tagata. Ma e le na o le pau lena; Ua ou aoaoina ona o mea na tutupu i le Eseta, ua mafai ai e Keriso ona suia le faanoanoa o lo’u olaga—i aso uma.
Toefuataiina o le Faamoemoe
A o ou faatautaia le olaga ina ua mavae le tatalaga o le faaipoipoga a o’u matua, sa ou aoaoina ai o Iesu Keriso o le punavai tupito lea o le filemu ma le faamoemoe.
Na ta’ua e le Aposetolo o Paulo o Keriso “o le faitaulaga sili i mea lelei atili” (Eperu 9:11). Sa ofoina atu e faitaulaga sili i Ona luma taulaga i manu e faatusa i Lana taulaga i le lumanai. Ona ofoina mai lea e Iesu Keriso o Lona lava soifua o le taulaga togiola e le iu—e togiolaina i tatou mai le agasala ma le oti e faavavau ma faasino atu i tatou agai atu i le faamoemoe o le toetu ma le ola e faavavau. Ona o Lana taulaga, ua mafai ai ona faamautinoa mai ia i tatou o mea lelei e oo mai ia i tatou i lenei olaga ma le olaga a sau.
O lena faamautinoaga—o le a sili atu le susulu o lo’u lumanai nai lo o’u tulaga o i ai nei—na aumaia ia te a’u le faamoemoe e tatau ona ou faaauau pea. Ia te a’u, o le Eseta o se faamanatuga o lena faamoemoe.
O le aso na faasatauroina ai Keriso, na foliga mai ua mou atu le faamoemoe. Na saunoa mai Elder Joseph B. Wirthlin (1917–2008) o le Korama a Aposetolo e Toasefululua, “Ou te manatu o aso uma talu mai le amataga o le talafaasolopito o lenei lalolagi, o lena Aso Faraile o se aso aupito pogisa lea.”
Sa ia faaauau:
“O le a tofu i tatou taitoatasi ma o tatou lava Aso Faraile—o na aso e foliga mai ai ua nutimomoia le atulaulau lava ia ma o fasimea o ō tatou lalolagi o le taatitia e pei o ni lapisi e paepae o ni fasi mea i o tatou autafa. …
“Ae ou te molimau atu ia te outou i le suafa o Lē na faatoilaloina le oti—o le a oo mai le Aso Sa.”
O lena uluai Aso Sa o le Eseta na oo mai, ma lafo ese ai le pogisa o aso na muamua atu. O le Toetu o Keriso na toefuatai mai ai le faamoemoe i Ona soo i vaitausaga uma. O lenei faamoemoe e mafai ona tauaveina i o tatou olaga i aso uma.
Faamaloloina o Mea na Nutimomoia
Na aoao mai Elder Gerrit W. Gong o le Korama a Aposetolo e Toasefululua: “O loo soifua [Iesu Keriso]—e le gata i lena taimi, ae o le taimi nei; e le mo na o nisi, ae mo tagata uma. Na afio mai o Ia ma ua afio mai e faamalolo i e loto momomo, faasaoloto i latou na ave faatagataotaua, toe faapupula i e tauaso, ma faasaoloto i latou o e ua faasauaina. O i tatou taitoatasi na. O Ana folafolaga togiola e faatatau, e tusa lava po o a o tatou taimi ua tuanai, i o tatou taimi nei, po o atugaluga mo lo tatou lumanai.”
E moni le mana faamalolo o Keriso. Mo le tele o tausaga, ou te le’i talanoa ai i lo’u tama. Sa ou taumafai e faagalo le mea sa ia faia. Sa ou aioi atu mo le alofa tunoa o Keriso e fesoasoani mai ia te a’u e aveese atu ai lo’u ita. Sa fesoasoani le Agaga ia ou malamalama i le mea e fai, ma mulimuli ane, sa mafai ona ou faamagaloina o ia. O le ma mafutaga, a o toe faaleleia pea, sa faaosofia i se olaga fou.
O le Eseta o se faamanatu e faapea, e ala ia Iesu Keriso, o le a faatoilaloina e le faamoemoe le faanoanoa, o le a faatoilaloina e le ola le oti, ma o le a faatoilaloina e le malamalama le pogisa. O le filifili e mulimuli ia te Ia o le filifiliga lea ua mamanu ai lo’u olaga—e le’i faia e se isi tagata.
I le aluga o taimi, o le a tatou feagai uma lava ma taimi e suia ai le olaga. O le matagofie o le talalelei o le iloaina lea o na aso e le o aso na e sili ona tāua. O le aso aupito sili ona tāua ua uma ona tupu, ma e mafai ona tatou ola ai i aso taitasi.