Paggamit sa Doktrina ug mga Pakigsaad nganha sa Inyong Kinabuhi
Nabalaka Mahitungod sa Ikaduhang Pag-anhi? Ania Kon Nganong Dili Ka Kinahanglang Mabalaka
Kita makapangandam ug makapaabot sa pagbalik sa Manluluwas nga malipayon.
Isip mga young adult, daghan kaayo kita og mga oportunidad sa umaabot. Ug kalagmitan, wala kita masayod kon unsa kini.
Unsa kaha nga matang sa trabaho ang akong sangpotan? Unsa kaha ang akong umaabot nga pamilya? Asa kaha ko magpuyo? Unsa kaha nga mga panimpalad ang akong mahimo? Unsa kaha nga mga hagit ang akong atubangon?
Sa akong hunahunaa kitang tanan mouyon nga ang paghunahuna mahitungod sa umaabot maglakip sa mga aspeto sa kahadlok ug kahinam, kakulba ug pagdahom. Sa akong kaugalingon ganahan ko sa ideya nga pipila sa akong labing maayo nga mga handomanan wala pa mamugna. Nakahatag gayod kana nako og kahinam nga magpaabot!
Apan adunay usa ka butang sa umaabot nga kanunay nakapakulba nako kaysa uban—ang Ikaduhang Pag-anhi ni Jesukristo.
Ang Mahinungdanon ug Makalilisang nga Adlaw
Nahibalo na kamo sa unsay akong gisulti. Tanan niadtong makahahadlok paminawon nga mga timailhan sa mga panahon nga atong nadungog. Ang “mahinungdanon ug makalilisang nga adlaw”? (Doktrina ug mga Pakigsaad 110:16). Dili tinuod nga mga propeta ug pagpanglingla, “mga gubat ug mga balita mahitungod sa gubat,” “mga kagutom, ug mga kamatay, ug mga linog” (Mateo 24:6–7). Mga kabukiran “napatag” (Doktrina ug mga Pakigsaad 49:23), “mga balod sa dagat nga mobanlas sa ilang mga kaugalingon lapas sa kabaybayonan niini” (Doktrina ug mga Pakigsaad 88:90), ug ang mga bituon mangatagak ug ang adlaw dili na mohayag (tan-awa sa Mateo 24:3–7, 29).
Ug kanang tanan ingon og makahahadlok paminawon. Mao ba gayod kana ang mga kahimtang sa pagbalik sa Manluluwas?
Samtang naguol ko nga naghunahuna sa mga panghitabo sa Ikaduhang Pag-anhi, kanunay ko nga modangop sa mga kasulatan ug sa mga pulong sa mga propeta alang sa kalinaw ug kaseguroan. Ug unsay akong nakaplagan mao nga bisan kon ang Iyang pagbalik adunay daghang wala pa mahibaloi nga mahitabo, usa ka butang ang segurado:
Kon atong gihimo ang atong labing maayo sa pagsunod sa ebanghelyo, kita dili gayod kinahanglang mahadlok.
Mao nga imbes maghunahuna sa makahahadlok nga mga butang nga atong gilambigit sa pagbalik sa Manluluwas, maghunahuna kita kon unsaon nato sa pagpangandam alang niana nga adlaw.
Pagpangandam alang sa Iyang Pag-anhi
Hunahunaa og balik ang imong unang adlaw sa kolehiyo o bag-ong trabaho. Nahinumdom ka ba kon unsa ang imong kakulba ug pagpanagana? Alang nako, akong nahinumdoman kon sa unsang paagi nga ang tanang wala pa mahibaloi natigom nga nag-anam og ka bug-at nga misangpot sa hilabihan nga kabalaka.
Apan bisan kon ang paghunahuna mahitungod sa Ikaduhang Pag-anhi nagdala niining sama nga mga pagbati, kita gitudloan kon unsaon nga kita makapangandam. Sa bag-ohay nga kinatibuk-ang komperensiya, si Elder Steven D. Shumway sa Seventy mitudlo nato nga ang pagserbisyo sa Simbahan ug pagtuman sa atong mga calling makatabang nato nga maandam sa pagsugat sa Manluluwas:
“Kon kita moapil sa buhat sa Dios, atong giandam ang atong kaugalingon ug ang uban sa pagbalik ni Kristo. Ang saad sa Ginoo maaghaton nga ang mga calling, pagpangalagad, pagsimba diha sa templo, pagsunod sa mga pag-aghat, ug uban pang mga paagi nga atong gisugdan ang buhat sa Dios talagsaong nag-andam kanato sa pagsugat sa Manluluwas. …
“Sa mahinangpon nga pagtinguha sa pagrepresentar sa Manluluwas, kita mas mahisama Kaniya. Kana ang labing maayong pagpangandam alang sa sagradong takna kon ang matag usa kanato moluhod ug mokumpisal nga si Jesus mao ang Kristo.”
Kanunay ko nga nadasig sa kamatuoran nga ang ebanghelyo nagtabang nato nga mahimong mas mahisama ni Kristo aron kita mas makaila Kaniya kon Siya moanhi pag-usab (tan-awa sa 1 Juan 3:2).
Nakat-onan nato diha sa mga kasulatan nga ang “gugmang putli mao ang tiunay nga gugma ni Kristo” nga “gitugyan diha sa tanan kinsa tinuod nga mga sumusunod … ni Jesukristo.” Ug tungod kay kita adunay abilidad sa pag-ampo ug sa pagdawat niini nga matang sa gugma, “kon siya moabot kita mahisama kaniya, kay kita makakita kaniya nga mao gihapon; nga kita makabaton niini nga paglaom; aron mahimo kitang putli sama nga siya putli” (Moroni 7:47, 48).
Si Presidente Russell M. Nelson mitudlo: “Ang kanunay nga pagsimba diha sa balay sa Ginoo magdugang sa atong kapasidad alang sa hiyas ug gugmang putli. … Ang pagdugang og panahon diha sa templo makatabang kanato nga maandam alang sa Ikaduhang Pag-anhi sa atong Manluluwas, si Jesukristo. Wala kita masayod sa adlaw o takna sa Iyang pag-abot. Apan ako nasayod nga ang Ginoo nag-aghat kanako sa pag-awhag kanato nga mangandam alang nianang “mahinungdanon ug makalilisang nga adlaw’ [Malaquias 4:5].”
Ang Mahinungdanon nga Adlaw
Klaro, kana nga adlaw moabot, bisan unsa pa ang atong gibati mahitungod niini. Apan wala gyod ko maghunahuna nga kana nga adlaw mahimong makalilisang niadtong nagpaabot uban sa hugot nga pagtuo diha ni Jesukristo.
Niana nga adlaw, kita makadungog sa Iyang tingog (tan-awa sa Doktrina ug mga Pakigsaad 133:21–22).
Kita makakita Kaniya ingon nga Siya mao gayod, hilabihan ka puno sa himaya “nga ang adlaw motago sa iyang nawong sa kaulaw, ug ang bulan magdumili sa pagsiga” (tan-awa sa Doktrina ug mga Pakigsaad 133:49).
Kita makahinumdom kon giunsa Niya kita pagluwas ug pagtubos “pinaagi sa iyang gugma” (Doktrina ug mga Pakigsaad 133:53).
Ang matinud-anon “moluhod ug koronahan sa himaya,” (Doktrina ug mga Pakigsaad 133:32).
Kita “mapuno sa mga awit sa walay kataposan nga kalipay” (Doktrina ug mga Pakigsaad 133:33).
Ang “ebanghelyo isangyaw ngadto sa matag kanasoran ug kaliwatan, ug pinulongan, ug katawhan” (Doktrina ug mga Pakigsaad 133:37).
Kadtong matinud-anon nga mga Santos nga nakalahutay mabuhi pag-usab ug moawit og mga pagdayeg, “adlaw ug gabii” (Doktrina ug mga Pakigsaad 133:56).
Siya “mobarog taliwala sa iyang katawhan, ug mohari sa tanang tawo” (Doktrina ug mga Pakigsaad 133:25).
Wala koy mahunahunaan nga mas mahinungdanon nga adlaw kaysa niana!
Si Elder Dale G. Renlund sa Korum sa Napulog Duha ka Apostoles mitudlo: “Ang labing maayo nga tambag alang [niadtong nahadlok] kaniya, alang kaninyo, ug alang kanako mao ang pagsunod sa mga pagtulun-an sa Manluluwas. Ang Iyang mga instruksiyon dili misteryoso ni komplikado. Kon mosunod kita niini, kita dili kinahanglang mahadlok o mabalaka.”
Mao nga sa sunod higayon nga mobati ka og kahadlok o kabalaka kon unsay mahitabo atol sa Ikaduhang Pag-anhi—o sa mga panghitabo sa paingon ngadto niini—hinumdomi lang nga ang mahinungdanon mas mopatigbabaw kaysa makalilisang alang niadtong naningkamot nga mahisama Kaniya.
“Kinsa ang makalahutay sa adlaw sa iyang pag-anhi”? (Doktrina ug mga Pakigsaad 128:24).
Pinaagi sa pagsalig diha ni Jesukristo, kita makahimo.