Human Nakasinati og Truma, Unsaon Nako nga Makakat-on sa Pagtan-aw sa Sekswalidad isip usa ka Gasa gikan sa Dios?
Ingon og imposible nga makita ang maayo diha sa sekswalidad human ko nakasinati og kadaot pinaagi sa sekswal nga pag-abuso ug pornograpiya.
Ang tagsulat nagpuyo sa Nevada, USA.
Kaniadto nagtuo ko nga ang sekswalidad usa ka balaanong gasa ngadto sa tanang anak sa Dios—gawas sa akong kaugalingon.
Nakakita ko og pornograpiya samtang bata pa ug usa ko ka biktima sa sekswal nga pag-abuso. Samtang nagdako ko, nanglimbasog ko sa truma nga akong nasinati sa bata pa. Midangop ko ngadto sa makadaot nga mga pamatasan aron makasugakod sa akong mga pagbati.
Ang akong panaw sa pagpaayo dili sayon, wala pa kini mahuman, apan layo-layo na ko subay sa dalan aron maulian. Sa mga gutlo sa kalinaw, ingon nga mobati ko nga ang akong kalibog ug kasakit gipulihan sa Dios og kalinaw ug kapahulayan. Nagkinahanglan kini og pailob sa daghang Kristohanon nga katawhan, balaanong mga kapanguhaan, ug Pag-ula ni Kristo aron makaplagan ang pagkaayo.
Ania ang pipila ka butang nga akong nakat-onan nga nakatabang nako ug mahimong makatabang nimo nga masabtan ang mga katuyoan sa Ginoo alang sa sekswalidad.
Pag-ampo Mahitungod sa Imong mga Panlimbasog
Sulod sa taas nga panahon, wala ko maghunahuna nga ang Dios nagpakabana sa akong mga panlimbasog sa sekswalidad. Apan kini nga kinutlo gikan ni Presidente Russell M. Nelson nakatabang nako nga makaamgo nga ang Dios nahibalo sa tanan natong mga hagit: “Ako mopaniguro kaninyo nga ang atong Langitnong Amahan ug ang Iyang Pinalanggang Anak, si Jesukristo, nahigugma kaninyo. Sila personal gayod nga nakahibalo sa inyong mga sirkumstansiya, sa inyong kaayo, sa inyong mga panginahanglan, ug sa inyong mga pag-ampo alang sa panabang.”
Ang Dios nahibalo sa epekto sa tanang problema sa atong kinabuhi, bisan unsa pa ka komplikado. Gusto Siya nga maminaw sa atong mga kabalaka ug mga pangutana, bisan unsa pa ang hilisgotan. Ang uban nagtuo nga dili maayo nga mosulti ngadto sa Dios mahitungod sa mga isyu kalabot sa sekswalidad, apan gusto Siya nga kita mosulti ngadto Kaniya mahitungod sa tanang butang.
Samtang nagtinguha ko og tabang gikan sa Langitnong Amahan, ang akong mga pagsulay nagtugot nako nga mas makasabot sa Pag-ula sa atong Manluluwas ug sa Iyang makaayo nga gahom. Nasayod ko nga Siya nakasabot sa akong mga panlimbasog, nga nakahimo niining sayon nga modangop ngadto Kaniya.
Pakigtambag sa Kasaligan nga mga Indibidwal
Ang pakigsulti ngadto sa kasaligan nga mga indibidwal sama sa relihiyoso nga mga lider, mga propesyonal alang sa kahimsog sa pangisip, ug mga sakop sa pamilya mahitungod sa lisod nga mga hilisgotan lisod kaayo, apan ang ilang giya makahatag og kahupayan.
Human sa akong misyon, nakigtambag ko sa akong lokal nga bishop mahitungod sa akong truma. Ang among mga panaghisgot, giniyahan sa Espiritu Santo, nakatabang nako sa pagpasiugda og mas positibo nga panglantaw. Nahimo usab ko nga mas bukas ngadto sa akong mga ginikanan, nga naghatag og tambag gikan sa mga katuigan nga kaalam. Nakabenepisyo ko og dako sa gikan sa pagpakigbahin sa akong mga hagit ngadto sa sinsero, intelihente sa espirituwal nga paagi, ug masinabtanon nga mga tawo sa akong kinabuhi nga mitudlo nako kon unsa gayod ang kahulogan sa “mopas-an sa mga alantoson sa usag usa,” ug “pagbangotan uban niadtong nagbangotan” (Mosiah 18:8, 9).
Dugang pa, ang tukma nga mga consultant ug mga therapist alang sa kahimsog sa pangisip mahinungdanon kaayo sa panaw sa akong pagkaayo. Kon ang usa ka tawo nakasinati og sekswal nga truma, ang lainlaing malungtarong mga epekto kasagaran gumikan niini. Ang mga propesyonal gibansay aron sa pagtubag sa psychological nga kadaot ug sa paghatag nato og tukma nga mga himan aron mamaayo.
Paghimo og mga Pagpili sa Media nga Gihunahuna Pag-ayo
Sa therapy nakat-onan nako nga ang pasidaan ug ang giya sa Espiritu makatabang nato sa pagpili sa media. Ang dili maayo, kalibotanong mga paghulagway sa sekswalidad makadaot tungod sa sayop nga impormasyon nga motuis sa kasagrado sa sekswalidad ug sekswal nga kasuod.
Si Presidente M. Russell Ballard (1928–2023) kausa miingon: “Kadaghanan sa mga kataw-anan nga mga salida, mga drama, ug mga salida sa tinuod nga sitwasyon ug mga tawo adunay imoralidad … ug malinglahon nga pagtamay sa tradisyonal nga mga hiyas ug tradisyonal nga mga pamilya. Matag tuig ang bag-ong mga salida ingon og nagkagrabe, naglugway sa mga utlanan sa unsay madawat sa publiko.”
Nakakat-on usab ko mahitungod sa balaanong katuyoan sa hinatag sa Dios nga sekswal nga mga pagbati ug nga kini ipahayag uban sa pagtahod ug kalumo diha sa utlanan nga Iyang gipahimutang: kaminyoon tali sa usa ka lalaki ug usa ka babaye. Kini nakapausab kanako.
Maningkamot sa Pagtan-aw sa Tanan Pinaagi sa mga Mata sa Dios (Lakip sa Imong Kaugalingon)
Kaniadto naghambin ko og kasuko niadtong nakapasakit sa uban, sa pisikal man, sa emosyonal, sa espirituwal, o sa sekswal. Ang kasuko usa ka normal nga pagbati, ilabi na kon ikaw usa ka biktima sa truma o pag-abuso, ug ako nakigbisog sa negatibong panan-aw sa kadaotan sa kalibotan.
Mibati ko nga makataronganon sa akong gihunahuna, apan ang pagpuyo nga adunay kasilag dili mobunga og positibo nga mga resulta. Ang pagpili sa kasuko nakababag sa akong pagkaayo. Apan, naningkamot ko sa pagpakita og gugma ngadto sa tanan, lakip sa akong kaugalingon.
Sama sa gitudlo ni Elder Patrick Kearon sa Korum sa Napulog Duha ka Apostoles: “Uban sa gituyhad nga mga bukton, ang Manluluwas nagtanyag sa gasa sa pagkaayo ngadto kaninyo. Uban sa kaisog, pailob, ug matinud-anon nga pagtutok Kaniya, sa dili madugay kamo hingpit nga makadawat niini nga gasa. Mahimo ninyong buhian ang inyong kasakit ug ibilin kini diha sa Iyang tiilan.”
Ako mopamatuod nga ang atong Langitnong Amahan ug ang Manluluwas nga si Jesukristo nahibalo sa atong mga kahimtang. Sila manginlabot sa atong kinabuhi ug gusto nga kita makakaplag og pagkaayo gikan sa kasakit nga atong gipas-an. Adunay pagkaayo, kalinaw, ug kapahulayan alang sa tanan. Kita dili kinahanglan nga mopas-an sa atong mga palas-anon nga mag-inusara.
Bisan unsa pa ang atong gisagubang, pinaagi sa tabang sa Manluluwas, kita makakat-on sa pagtan-aw sa atong sekswal nga mga pagbati isip usa ka hinatag sa Dios nga gasa.