Alang sa mga Inahan sa Gagmayng mga Bata
Sa Unsang Paagi nga ang Operasyon sa Dunggan sa Akong Anak nga Lalaki Nakatabang Nako nga Maamumahan ang Iyang Koneksiyon ngadto sa Dios
Gibati nako nga ang Manluluwas nagtudlo nako aron masayod nga Siya ang nagdumala ug nag-atiman sa akong anak nga lalaki.
Sa dihang si Jesukristo mibisita sa mga Nephita human sa Iyang Pagkabanhaw, “misugo siya nga ang ilang gagmayng mga bata dad-on ngadto kaniya.
“… Ug ang pundok sa katawhan mihatag og agianan hangtod nga silang tanan nadala ngadto kaniya” (3 Nephi 17:11–12).
Karon, sa unsang paagi nga kita “mihatag og agianan” ug gani midala sa atong gagmayng mga bata ngadto Kaniya? Tugoti ko nga mopakigbahin og usa ka istorya nga nakatabang nako nga masabtan kon unsaon nga mahimo nako kini sa moderno nga mga panahon.
Sa gamay pang bata, ang akong kinamanghorang anak nga lalaki daghan kaayo og operasyon aron ipasok ang mga tubo aron kuhaon ang mga tubig gikan sa iyang dunggan. Sa nag-edad na siya og kwatro, ang usa ka dunggan wala maayo, ug ang mga tubig miuga na. Ang usa ka kataposang operasyon sa pagbutang og tubo ang motino kon dili na ba gayod siya makadungog niana nga dunggan.
Nasayod nga kami nagkinahanglan og balaanong tabang, ang akong bana ug ako mitudlo sa among anak nga lalaki sa mas tinuoray nga paagi mahitungod sa gahom sa Dios nga ihatag pinaagi sa mga panalangin sa pagkapari, pag-ampo, ug hugot nga pagtuo, samtang makugihon usab nga nagtinguha niana nga gahom alang niya. Ang operasyon mas komplikado kaysa uban. Sa iyang pagmata, naghilak ug nagdanguyngoy sa kasakit, dili siya gusto nga akong gunitan—o gani mohikap—kaniya. Nasagmuyo ko! Apan wala madugay naayo siya, ug mipauli kami aron maghulat ug tan-awon kon ang iyang dunggan naayo na ba gayod.
Sulod sa pipila ka semana, ang among anak nga lalaki nangamuyo sa matag pag-ampo nga ang iyang dunggan mamaayo. Ang among pamilya kanunay nga nag-ampo, apan matag higayon nga siya mismo nag-ampo, mas mibati ko og kalinaw. Nahimo siya nga masaligon sa pagpangayo og tabang sa iyang Amahan sa Langit.
Gibati nako nga ang Manluluwas nagtudlo nako aron masayod nga Siya ang nagdumala ug nag-atiman sa akong anak nga lalaki. Mas importante, nakita nako nga ang akong anak nga lalaki nagsugod sa pagsabot usab niana. Siya ingon og nasayod, bisan sa kalinghod sa iyang pangedaron, nga ang Dios nag-uban kaniya. Nakita nako nga siya mibati og personal nga koneksiyon. Mibati ko og kalinaw. Bisan unsa pa ang resulta, ang Langitnong Amahan ug si Jesukristo mag-uban niya ug molig-on niya—ug sa among pamilya—sa pagdumala sa bisan unsa nga gikinahanglan niya.
Paggiya Nila ngadto sa Langitnong Amahan ug ni Jesukristo
Kini nga kasinatian nakadiskobre sa duha ka mahinungdanong mga pagkaamgo.
Una, kinahanglan ko nga mosalig sa Langitnong Amahan ug ni Jesukristo ug sa Ilang kaalam ug gugma alang sa akong anak nga lalaki.
Supak kini sa matag pagbati sa akong kasingkasing isip usa ka mama nga dili maprotektahan, masulbad, ug maluwas ang akong mga anak gikan sa ilang mga kalisdanan. Apan usahay, ang paghigugma ug paggiya nila ngadto sa ilang Langitnong Amahan ug sa ilang Manluluwas samtang nakigbisog sila sa ilang mga kalisdanan mao ang labing makapanalangin nila.
Sila adunay usa ka mahigugmaon nga Langitnong Amahan nga adunay hingpit nga plano. Ug usahay, diha sa Iyang kaalam ug gugma, Iyang tugotan ang atong mga anak nga mobati og kasakit, pag-antos, ug kaguol samtang nagpanaw niining mortal nga kasinatian ug mahimong sama Kaniya. Naamgohan nako nga kon akong kuhaon ang mga kalisod, mapugngan nako ang pipila ka oportunidad alang sa kalamboan diha sa mahimayaong buhat sa Langitnong Amahan.
Ikaduha, naamgohan nako nga usa kini ka makalipay nga panalangin ang pagtabang nga maamumahan ang koneksiyon sa atong mga anak ngadto ni Jesukristo ug sa Langitnong Amahan sa dili pa sila moabot sa saktong pangedaron sa paghimo og mga pakigsaad ngadto Kanila.
Pagmugna og Kalamboan
Si Elder Neil L. Andersen sa Korum sa Napulog Duha ka Apostoles miingon, “Ang atong hagit isip mga ginikanan ug mga magtutudlo dili mao ang pagmugna og kalamboan sa ilang pagka-espirituhanon diha sa ilang mga kalag kondili mao ang pagpadayon sa kalamboan sa ilang pagka-espirituhanon nga anaa na tungod sa ilang hugot nga pagtuo nga ilang napalambo didto sa kinabuhi nga wala pa dinhi sa yuta.”
Kita makamugna nianang kalamboan sa pagtuo diha sa ginagmay ug yano nga mga paagi, lakip na sa pagtudlo sa tulo ka importante nga mga baroganan ngadto sa atong mga anak:
Pag-ampo aron Makahibalo nga ang Dios Anaa
Sa pagtudlo sa atong mga anak nga magpasalamat ug mangayo alang sa mga panalangin, mahimo natong ikonsiderar ang yano nga tambag ni Presidente Susan H. Porter, Kinatibuk-ang Presidente sa Primary, nga gihatag ngadto sa mga anak “pag-ampo aron makahibalo … ‘Amahan namo, naa ba gyod ka?’”
Kon atong tabangan ang mga anak sa pagbu-bo sa ilang mga kasingkasing ug sa pagpaminaw sa unsay ilang gibati ug sa mga hunahuna nga misantop sa ilang alimpatakan, sila “makahimo sa pagkahibalo alang sa [ilang] kaugalingon nga Siya anaa ug nga Siya nahigugma [nila].”
Dayon, kita makatabang sa pagkonektar sa atong mga anak ngadto Kaniya kon sila magkinahanglan sa pagkat-on sa usa ka bag-ong butang. Ang pagpadangop sa ilang linghod nga mga kasingkasing ngadto Kaniya mahimong usa ka natural nga sundanan sa paglambo.
Moila sa Espiritu Santo
Kon atong makita nga ang usa ka anak mibati sa impluwensya sa Espiritu Santo, kita mahimong mangutana, “Unsay imong gibati? Sa imong hunahuna asa gikan kadto nga mga pagbati? Sa imong hunahuna unsa ang gusto sa Langitnong Amahan nga imong mahibaloan?” Sa kalit lang, ang imong anak nagtudlo nimo mahitungod sa Espiritu Santo.
Sabta ang Kasagrado sa Pulong sa Dios
Bisan kon ang mga anak bata pa kaayo aron mobasa, mahimo sila nga magkat-on pinaagi sa imong ehemplo nga ang pulong sa Dios sagrado ug kita mapanalanginan kon kita mosunod sa Iyang mga pulong.
Nakakita ko og tres anyos nga mga bata nga naggakos sa mga kasulatan ug mahinamon nga mimarka sa mga bersikulo ug “nagbasa” sa ilang kaugalingong mga kopya. Bisan kon ang mga pulong nabaligtad, sila nakakat-on nga importante nga magmaya sa pulong sa Dios!
Mogiya Nila aron Mabati ang Iyang Presensya
Mahimo nimong pangutan-on ang inyong mga anak og pangutana nga ganahan nakong ipangutana sa Primary: “Sa unsang paagi nga kamo napanalanginan tungod ni Jesukristo?” Ang ilang mga tubag mahimong makapahingangha ninyo.
Ang mga anak makakat-on sa pagsalig Kaniya alang sa kahupayan, kalig-on, ug kahibalo. Kita “makahatag og agianan” alang nila aron makita, mabati, ug mahibalo sa Iyang gahom ug presensya sa ilang kabatan-on.
Ang among anak nga lalaki napanalanginan og hingpit nga pagkaayo ug naulian ang iyang pandungog, ug bisan kon wala pa Niya ayoha, nakakat-on gihapon ko kon unsaon pagtabang ang akong anak nga makonektar ngadto ni Jesukristo ug sa Langitnong Amahan.
Pinaagi sa ginagmay ug yano nga mga paagi, ang kalamboan sa iyang pagka-espirituhanon misugod sa pagdan-ag.