Ikaw ba Naggahin og Taas Kaayo nga Oras nga Mag-inusara?
Nagtuo ko nga ang pagpalayo sa akong kaugalingon makahatag nako og kalinaw.
Gusto ko nga mag-inusara. Bisan og ako usa ka tawo nga hilig sa pakigsosyal, ang paggahin og panahon ng mag-inusara makapanindot sa akong adlaw ug sa akong mga emosyon.
Apan kon bati ang akong adlaw, kalagmitan ipalayo nako ang akong kaugalingon pinaagi sa pag-adto sa higdaanan, pagbira sa habol aron tabonan ang akong ulo, ug sa pag-scroll sa akong selpon. Makapawagtang kini sa akong hunahuna sa mga butang nga nakapalabaka nako.
Apan akong namatikdan nga kon mas kanunay ko nga magbuhat niini, mas lisod kini hunongon. Ug kon kanunay ko nga magpalayo sa akong kaugalingon, kalagmitan mobati ko nga mas mosamot kalisod kaysa sauna.
Dili pa lang dugay, kini nga kinaiya mikatap ngadto sa akong espirituwal nga kinabuhi ug mipabati nako nga hingpit nga nalayo sa Langitnong Amahan. Ug mihimo usab sa akong kahimsog sa pangisip nga mas dili maayo. Gusto nakong putlon kining batasan sa pagpalayo, mao nga nakadesisyon ko nga magtuon kon unsay solusyon sa kamasulub-on. Gusto ko nga masayod kon unsaon pagpalambo sa akong kahimsog sa pangisip ug sa espirituwal.
Ania ang pipila ka butang nga akong nakaplagan.
Ang Kaimportante sa Maayo nga mga Koneksiyon
Samtang nagkat-on pa og dugang mahitungod sa kamasulub-on, nakaplagan nako ang usa ka pagtuon nga nagtutok sa unsay mogiya ngadto sa tibuok kinabuhi nga kalipay. Ang mga tigsiksik nakadiskobre nga ang pagbaton og suod, malipayon nga mga relasyon makapalambo sa atong kalidad sa kinabuhi. Gani, ang paghangop sa komunidad makahimo natong mas malipayon ug mas taas nga kinabuhi.
Ang pagbasa mahitungod niini nga pagtuon nakapahinumdom nako kon sa unsang paagi nga si Jesukristo miserbisyo sa uban sa Iyang mortal nga pangalagad. Matag koneksiyon nga Iyang gihimo pinaagi sa pagpangalagad tinuoray ug makahuloganon. Siya ang hingpit nga ehemplo sa taas og kalidad nga koneksiyon.
Si Elder Ian S. Ardern sa Seventy mihulagway sa malumo ug mabination nga kinaiya sa Manluluwas: “Ang kamanggiluy-on usa ka hiyas ni Kristo. Naggikan kini sa gugma alang sa uban ug walay utlanan. Si Jesus, ang Manluluwas sa kalibotan, mao ang ehemplo sa pagkamanggiluy-on.”
Kini nga kinutlo nakadasig nako nga mosunod sa ehemplo ni Jesukristo ug tinuoray nga motabang sa uban. Sa trabaho man, sa eskwelahan, o sa akong pamilya, nakadesisyon ko nga motutok sa mga butang dili lang sa kaugalingon samtang nagsugakod sa akong adlaw. Nakapangutana ko sa akong kaugalingon kon aduna bay si bisan kinsa nga mahimo nakong tabangan, si bisan kinsa nga mahimo nakong higala, o si bisan kinsa nga nagkinahanglan og gamayng pagpakita og gugma.
Kon mas moserbisyo ko, mas nindot ang akong bation sa espirituwal nga paagi.
Kanus-a nga ang Panahon nga Mag-inusara usa ka Maayo nga Ideya?
Maayo ang paggahin og panahon nga mag-inusara aron magrelaks ug mag-obserbar sa atong mga hunahuna, ilabi na kon nagkinahanglan kita nga mamalandong ug maminaw sa Espiritu. Apan kon kita mag-inusara sa tanan nga panahon, mosangpot kini ngadto sa pagpatuyang sa kaugalingon, ug mataligam-an nato ang mga oportunidad alang sa koneksiyon.
Samtang naningkamot ko sa paghunahuna kon unsaon nga mabalanse ang panahon nga mag-inusara ug ang panahon kuyog sa uban, nagtuon ko sa mga kasulatan ug sa kinabuhi sa Manluluwas ug nag-ampo alang sa tubag.
Ang Manluluwas “miadto sa mga dapit nga awaaw ug didto nag-ampo siya” (Lucas 5:16). Lagmit gusto Siya og panahon nga mag-inusara aron makigsulti sa Iyang Amahan. Sama ni Kristo, kita usab makagamit sa atong panahon nga mag-inusara aron mokonektar pag-usab ngadto sa atong Langitnong Amahan, nga makatabang nato sa pagdapit sa Espiritu Santo sa atong kinabuhi.
Pagpangita og Balanse
Kon naghunahuna ka kon naggahin ka ba og taas kaayo nga panahon nga mag-inusara, pakigtambag sa Langitnong Amahan. Hatagi og pagtagad ang imong sosyal ug emosyonal nga mga panginahanglan. Kon ikaw mibati nga masulub-on, pangayo og tabang! Ayaw na paggahin og dugang nga panahon nga mag-inusara. Praktisa ang pagbaton og tukmang pagbalanse sa imong panahon ug hibaloi ang mga kalagmitan sa pagpalayo sa imong kaugalingon.
Si Presidente Jeffrey R. Holland, Akting nga Presidente sa Korum sa Napulog Duha ka Apostoles, mitudlo:
“Walay usa nga lig-on kaayo nga dili sila mobati og kakapoy o makahibalo sa panginahanglan sa pag-atiman sa ilang kaugalingon. …
“… Dili ka makatabang sa uban kon ikaw walay kalagsik sa pagbuhat sa ingon.”
Ang Langitnong Amahan nahibalo sa atong mga kahimtang. Nasayod Siya sa atong mga kabalaka, atong mga tinguha, ug atong mga panginahanglan. Nasayod usab Siya sa atong mga personalidad—ug nga ang pipila nato tingali mas nagkinahanglang og panahon sa pag-inusara aron mopahulay og kadali gikan sa kalibotan kaysa uban. Ug OK ra kana!
Kon kita mosalig Kaniya sa paggiya nato, kita makasabot kon kanus-a kita magkinahanglan og panahon nga mag-inusara ug kon kanus-a kita magkinahanglan og koneksiyon ngadto sa uban.