5 ka Paagi sa Pagproseso sa Bisan Unsa nga Dili Kaayo Malipayon nga mga Panumdoman sa Misyon
Ang pagpauli gikan sa usa ka misyon usa ka mahinungdanong kausaban, ug normal ra nga mobati nga wala mahimutang.
Kon atong ihulagway ang misyon, tingali maghunahuna kita og makapausab sa kinabuhi nga mga gutlo, kinasingkasing nga pagserbisyo, ug lawom nga espirituwal nga pagtubo. Ug tingali maghunahuna usab kita og pipila ka lisod nga panahon—nga atong mahulagway ang atong kaugalingon nga sa walay pagpaningkamot makasugakod ra.
Apan unsay mahitabo kon ang imong misyon wala mahitabo sa paagi sa imong giplano? Unsa kaha kon ikaw mopauli nga mobati og kasagmuyo, kalibog, o gani dili na kaayo masaligon sama kaniadto?
Ania ang kamatuoran: Ang pipila ka misyon dili mahitabo sa hingpit nga paagi sama sa gidahoman (hinuon ang grabe nga mga sitwasyon panagsa ra kaayo). Gani, tungod sa komplikado nga kinaiyahan sa mga misyon, komon na sa mipauli na nga mga misyonaryo nga mag-atubang og komplikado nga mga pangutana.
Ang uban tingali maghunahuna:
“Igo ba ang akong nahimo?”
“Nganong mas mibati man ko og kawalay kaseguroan kaysa kaniadto?”
O gani, “Ngano man, nga human sa labihan nga pagsakripisyo, dili ko ingon ka malipayon sama sa akong gidahoman?”
Kon ang kinabuhi human sa misyon lisod, tingali makapangutana usab ka, “Sa unsang paagi nga akong makaplagan ang gisaad nga mga panalangin gikan sa akong pagserbisyo?”
Kini nga mga pagbati balido, ug wala ka mag-inusara. Ania ang pipila ka ideya nga ikonsiderar samtang magproseso ka sa bisan unsa nga dili kaayo malipayon nga mga kasinatian sa misyon:
1. Pangayo og Giya gikan sa Husto nga mga Tawo
Importante nga makig-istorya ngadto sa usa ka tawo nga makatabang nimo sa pagproseso sa imong kasinatian sa maayo nga paagi ug modangop ngadto ni Jesukristo—sama sa kasaligan nga mga higala, mga lider sa Simbahan, o sa usa ka magtatambag.
Likayi kadtong tingali mohukom sa imong mga pagbati o kadtong mobutang sa tanang pagmahay diha sa imong misyon mismo. Apan, pangita og usa ka tawo nga mohatag og makatabang nga pagbalanse—usa ka tawo nga motabang nimo sa pagpamalandong sa imong mga kasinatian nga dili mopakaulaw samtang nag-awhag og personal nga kabubut-on ug responsibilidad.
Si Presidente Russell M. Nelson mitudlo: “Ipaabot ang inyong mga pangutana ngadto sa Ginoo ug sa ubang katuohan nga mga kapanguhaan. Magtuon dala ang tinguha nga motuo kay sa maglaom nga inyong makit-an ang sipyat.”
Uban sa Manluluwas, makamugma ka og kahulogan gikan sa imong misyon, bisan unsa pa kalisod sa imong mga kasinatian nga nasinati. Nakig-istorya ko sa mipauli na nga mga misyonaryo nga nagpaabot og pipila ka tuig sa pagproseso ug pagsugakod sa lisod nga mga kasinatian sa misyon. Apan ang pagtiner sa kasakit dili kinahanglanon—ayaw paghulat og pipila ka tuig aron magsugod. Makasugod ka sa pagkaayo karon pinaagi sa Pag-ula ni Jesukristo.
2. Tugoti ang Imong Kaugalingon nga Magsubo
OK ra nga mobati og kaguol kon ang imong misyon wala mahitabo sa paagi nga imong gidahoman niini. Kini nga matang sa kasubo—pag-ila sa unsay wala mahitabo sumala sa giplano—mahimong makaayo. Ang mga hunahuna sama sa “Wala kana mahitabo sa paagi nga akong gidahoman, ug OK ra kana” makatabang nimo sa pagdawat sa reyalidad, sa pagbati ug pagproseso sa kaguol, ug mopadayon.
Sa laing bahin, ang mga hunahuna sama sa “Tingali adunay sayop nako” mahimong magdala ngadto sa kasagmuyo ug dili ka makapadayon. Ang pagdawat sa imong kasinatian ug mga emosyon kon unsa kini, nga walay pagpasangil, moabli sa pultahan sa pagkaayo.
Si Elder Dieter F. Uchtdorf sa Korum sa Napulog Duha ka Apostoles mipamatuod, “Nahibaloan nako nga kon mopaduol kita sa Dios ug mokab-ot sa paghikap Kaniya, makakaplag kita og kaayohan, kalinaw, ug kalipay.”
3. Moako sa Imong mga Hunahuna ug mga Pagbati
Kon unsa ang imong pamati sa imong misyon gihulma kini sa mga hunahuna nga imong gitutokan. Sulayi ang pagsulat sa imong mga hunahuna mahitungod sa imong misyon. Hain niini ang naghatag nimo og kalinaw? Hain niini ang naghatag nimo og kawalay kadasig?
Ang imong kabubut-on naglakip dili lang sa mga binuhatan apan sa imong mga hunahuna usab. Pinaagi sa hinay-hinay nga pag-usab sa paagi sa imong paghunahuna mahitungod sa imong misyon, mahimo nimong mabalhin ang imong gibati mahitungod niini. Ang pagkaayo magsugod niining kausaban sa kahiladman—usa ka hunahuna sa usa ka higayon, apan kon ikaw andam lamang.
4. Pilia ang Gugmang Putli ug Pagpasaylo
Tingali makahinabi ka og mga tawo—mga kompanyon, mga lider, o uban pa—kansang mga binuhatan nakasagmuyo o nakapasakit. Importante nga hinumdoman nga ang ilang batasan nagpakita sa ilang kaugalingong mga panlimbasog, dili sa imong bili. Ang tanan nakasinati og kakapoy, pagpamugos, ug mga emosyon nga mosangpot ngadto sa dili maayo nga batasan. Bisan og dili kini angay himoong rason, ang pag-ila nga ang ilang mga binuhatan walay kalabotan nimo makatabang nimo sa pagsalikway sa kasuko. Ang paghimo niini makahimo nimong gawasnon nga magpadayon uban sa kalinaw.
Si Presidente Nelson mitudlo usab: “Dapiton ko kamo sa pagtinguha nga taposon ang usa ka personal nga kasungian nga nagpabug-at kaninyo. Aduna pa bay mas haom nga buhat sa pasalamat ngadto kang Jesukristo alang sa Iyang Pag-ula? Kon ang kapasayloan sa karon ingon og imposible, pangayo og gahom pinaagi sa makatubos nga dugo ni Jesukristo sa pagtabang kaninyo. Kon kini inyong buhaton, mosaad ko og personal nga kalinaw ug usa ka kusog nga espirituhanong paglambo.”
5. Magmabination sa Imong Kaugalingon
Ang pagpauli gikan sa usa ka misyon usa ka mahinungdanong kausaban, ug normal ra nga mobati nga wala mahimutang. Ang imong gibati masabtan ra. Mao nga imbes hukman ang imong kaugalingon, praktisa ang kaluoy sa imong kaugalingon. Magmapailobon sa imong kaugalingon, ug mosalig nga kon ikaw modangop sa Manluluwas ug mogamit sa gahom nga Iyang gihatag nimo aron mausab ug motubo, Siya motabang nimo nga makaplagan ang pagkaayo ug pagtapos nga imong gitinguha.
Hinumdomi, kasagaran diha sa wala damha nga mga gutlo nga ang mas lawom nga pagtubo mahitabo. Samtang mangayo ka og tabang, pagkat-on sa pagpailob sa imong kaugalingon ug sa uban, ug “ayaw gayod pagsalig sa imong kaalam” (Mga Panultihon 3:5), ang kalinaw maanaa nimo.
Ang Langitnong Amahan ug si Jesukristo nagsalig nimo, ug ikaw makasalig Kanila ug sa Ilang plano sa kalipay, nga sa kanunay naglakip sa makapalambo sa kalag ug mahagiton nga mga gutlo.
Makakat-on ka sa pagpamenos sa kasagmuyo pinaagi sa pagbati og pagsabot, kamabination, ug kaluoy—sama sa pagsabot, kamabination, ug kaluoy sa atong Manluluwas alang nimo.