3 ka Baroganan sa Ebanghelyo nga Motabang sa Paggiya Kanimo sa mga App sa Pakig-date
Nakasulay ka na ba sa paggamit og app sa pakig-date aron mangita sa imong mahangtorong kompanyon?
Ang pakig-date makahinam ug makalingaw kaayo! Hinuon, lisod kaayo nga makahimamat og tawo nga parehas nimo og mga hiyas—ilabi kon wala ka magpuyo duol sa daghang miyembro sa Ang Simbahan ni Jesukristo sa mga Santos sa Ulahing mga Adlaw (o tingali nakaila na kaayo nimo ang tanan diha sa imong dapit). Sa akong sitwasyon, ang labing malamposon nga himan sa pakig-date nga nakatabang nako sa pagkonektar sa uban mao ang usa ka app.
Sa sinugdanan, nagpanagana ug nagduhaduha ko nga makahimamat og usa ka tawo niini nga paagi. Ug lisod kaayo kadto! Nasugamak ko og daghang pagsalikway. Apan nakamugna usab ko og makahuloganong mga koneksiyon.
Sa dihang miapil ko sa usa ka app sa pakig-date, kining tulo ka baroganan migiya nako. Kon ikaw modesisyon nga mogamit sa usa ka app sa pakig-date, hinaot nga makagiya usab kini kanimo!
“Kami nagtuo sa pagkamatinuoron.”
Ang pagkamatinuoron usa ka maanindot nga unang impresyon, ug usa kini ka lig-on nga pundasyon alang sa mahangtorong kaminyoon.
Si Sister Ann M. Dibb, kanhi Ikaduhang Magtatambag sa Kinatibuk-ang Kapangulohan sa Young Women, mitudlo: “Kon kita matinuoron sa tanang mga butang, sa dinagko ug sa ginagmay, atong masinati ang kalinaw sa hunahuna ug kalimpyo sa konsensya. Ang atong mga relasyon molambo tungod kay kini nakabase sa pagsalig. Ug ang labing mahinungdanong panalangin nga moabot gikan sa pagkamatinuoron mao nga kita makabaton sa pakig-uban sa Espiritu Santo.”
Importante nga magmatinuoron sa imong profile ug mga pakighinabi sa uban. Ania ang pipila ka paagi nga ikaw mahimong matinuoron:
-
Ipakita ang tinuod, kasamtangan nga mga litrato sa imong kaugalingon.
-
Magmatinuoron sa imong edad.
-
Kon dili ka interesado sa usa ka tawo, pagmatinuoron imbes mobiya nga walay pahibalo nila o mosakay-sakay nila.
-
Ayaw pamakak mahitungod sa imong edukasyon, gitas-on, ubp. Kon ikaw matinuoron mahitungod sa imong kaugalingon, ang imong ka-date modayeg nga sila makasalig kanimo.
“Ang bili sa mga kalag mahinungdanon sa panan-aw sa Dios.”
Magmahimong bukas ug andam nga makig-ilaila sa lainlaing mga tawo. Adunay daghan kaayo nga mas importante nga mga butang kaysa pisikal nga panagway ug kaibog. Basin sa kadugayan malingaw ka sa usa ka tawo nga dili maoy sagad nimong gitan-aw. Motutok sa espirituwal nga mga kinaiya, parehas nga mga hiyas, ug kon giunsa ka pagtratar (ug ang uban!).
Si Elder Dieter F. Uchtdorf sa Korum sa Napulog Duha ka Apostoles miingon, “Diha sa plano sa Dios alang sa kalipay, wala kita mangita og hingpit nga tawo apan sa usa ka tawo kinsa, sa tibuok kinabuhi, atong makatambayayong sa paningkamot sa pagmugna og usa ka mahigugmaon, mahangtoron, ug hingpit nga relasyon.”
Hatagi ang mga tawo og kahigayonan. Basin makagusto ka sa tawo nga wala nimo gidahom! Ang akong bana wala gayod mohaom sa eksaktong lalaki nga akong gipangandoy. Naghunahuna ko nga magminyo ko og dili maulawon sama nako, apan, naminyo ko og maulawon. Si Gavin adunay pailob, dili daling masuko, ug kalmado nga presensya; Siya mobalanse nako.
Himoa nga bukas ang hunahuna ug kasingkasing—wala ka gayod masayod kon kinsa ang imong ikasinabot.
“Salig niana nga Espiritu nga naggiya sa paghimo og maayo.”
Bisan kon ang mga app sa pakig-date makatabang, adunay mga pasidaan alang sa seguridad nga angay nga ikonsiderar.
Nakasulay ko og pipila ka pakig-date nga nakahatag nako og pagbati nga dili komportable. Kausa mibati ko og kabalaka sa wala pa ko moadto, ug mibati ko nga kinahanglan nakong ikanselar; hinuon, nahadlok ko nga makapasakit sa pagbati sa akong ka-date, mao nga miadto na lang ko.
Wala madugay naklaro nga ang tawo wala motahod sa akong mga utlanan. Mihimo siya og mga komentaryo nga mipabati nako nga dili komportable, ug nagmahay nga naminaw unta ko sa pag-aghat nga akong nadawat nga ikanselar ang pakig-date.
Kon mobati ka nga dili luwas o dili komportable ni bisan kinsa, OK ra nga mobiya og sayo o ikanselar ang pakig-date. Kinahanglan nga nahiuyon ka sa Espiritu ug magmahimong andam nga mosunod sa pagpadayag nga imong madawat.
Ania ang pipila ka paagi nga imong mapaneguro nga luwas ang imong pakig-date:
-
Makigkita sa publiko nga dapit imbes ang imong ka-date ang mokuha nimo gikan sa imong panimalay.
-
Pahibaloa ang usa ka tawo kon asa ka moadto ug unsa ka dugay ka mawala.
-
Adunay usa ka higala nga imong mahimong kontakon kon anaa ka sa delikado nga sitwasyon.
Ang pagsalig sa Espiritu mahimo usab nga nagpasabot nga ang pagkasayod kon kinahanglan pa ba nimong ipadayon ang usa ka relasyon. Bisan kon kini mabination nga ikonsiderar ang mga pagbati sa uban, dili kini maalamon nga dili tumanon ang imong personal nga pagpadayag tungod sa kaikog.
Hinumdomi: ang Ginoo ganahan og paningkamot.
Kon mobati ka nga ang pagsulay sa app sa pakig-date usa ka paagi alang nimo nga makahimamat sa mga tawo, hibaloi nga ang kasinatian sa matag usa managlahi. Basin imong makaplagan ang imong mahangtorong kompanyon. O tingali magkat-on ka nga mas modumala pa sa mga relasyon ug mosinati og bag-ong mga kasinatian gawas sa imong naandan.
Bisan unsa pa man ang mahitabo, ang Dios nahigugma kanimo. Nasayod Siya sa imong kasingkasing. Si Sister Joy D. Jones, kanhi Kinatibuk-ang Presidente sa Primary, miingon: “Ang Ginoo ganahan og paningkamot, tungod kay ang paningkamot maghatag og mga ganti. Kita magpadayon sa pagbansay. Kita kanunay nga mouswag samtang kita maningkamot sa pagsunod sa Ginoo.”
Ang pakig-date pinaagi sa mga app mahimong lisod, apan kon gamiton sa matarong nga paagi, kini makakonektar nimo ngadto sa maayo nga mga tawo. Ang mga panalangin moabot samtang imong sundon kini nga mga baroganan sa ebanghelyo ug mobuhat sa imong labing maayo nga mahimong Kristohanon samtang nangita sa imong mahangtorong kompanyon.