Mai le Misiona
Sauni mo le Valaau: Fautuaga mai Faifeautalai i le Saunia e Auauna Atu
Sa matou aapa atu i faifeautalai e toalima ina ia maua mai a latou fautuaga i le auala e amata sauniuni ai mo se misiona.
O le sauni e auauna atu i se misiona o se taimi fiafia tele lea! O loo e taulai atu i le aoaoina o le aoaoga faavae a Iesu Keriso, fuafuaina pe faapefea ona talanoa atu le Agaga ia te oe, ma saunia faalemafaufau e tuuto atu lou taimi i le fausiaina o le malo o le Atua.
O le a tele ni mea fou e fetuunai i lau misiona, ma e ui e le mafai ona e saunia mo tulaga faataitai uma, ae e i ai mea e mafai ona e faia o le a faigofie teisi ai le suiga.
Sa matou fesili atu i nisi o faifeautalai o i ai nei ma i latou o loo sauniuni e auauna atu i mea o le a latou fautuaina mai pe a oo i le sauniuniga mo lau misiona. O le mea lenei sa latou fai mai ai:
Saili Ia Iloa le Faaola
Maimau pe ana ou saili moni lava ia iloa Keriso a o lei alu la’u misiona. E mautinoa lava sa ou iloa e uiga ia te Ia—sa ou tuputupu ae i le faitauina o tusitusiga faavae, toatasi ma faatasi ai ma lo’u aiga. Sa ou iloa tala ia Iesu ma mau tauloto i aoaoga faavae. Ou te faafetai mo lena malamalama faaleagaga sa ou faaaluina se olaga atoa e maua ai. Ae afai e mafai ona ou suia se mea se tasi na ou faia i masina e tau atu i la’u misiona, o le a ou toe foi i tua ma taumafai ia iloa le Faaola.
O Ia lava na folafola mai, “Saili, ona outou maua ai lea” (Mataio 7:7). A o tatou sailia Iesu Keriso, e mafai ona tatou maua o Ia i le Tusi a Mamona, i le malumalu, i le faamanatuga, ma i le anoanoai o auala laiti ma faatauvaa e aapa mai ai o Ia ia i tatou i aso taitasi ma aso uma. Ua ou vaai i le tele o vavega i la’u misiona nai lo se isi lava taimi muamua i lo’u olaga, ma ou te manatu o le mea sili lena ona o loo ou saili ma faafetai i le Atua mo i latou e sili atu nai lo se isi lava taimi muamua.
Sister Julia Collings, Misiona a Hamburg Siamani
Alu i le Saunia mo le Misiona ma Suesue i Tusitusiga Paia
Ina ia saunia mo la’u misiona, sa ou auai i se vasega sauniuni mo le misiona i la’u uarota. Sa matou faitau le Tala’i La’u Talalelei ma talanoa e uiga i le auala e faaaoga ai ona mataupu faavae.
Ma le isi, sa ou faamautinoa e faitau mai i le Tusi a Mamona i aso uma! Sa ou faaaluina foi se taimi i vaiaso taitasi e suesue ai le Tusi Paia, aemaise lava le Mataio, Mareko, Luka, ma le Ioane. Sa ou manao ia mautinoa sa i ai sa’u molimau i upumoni o le talalelei o le a ou aoao atu ma maua le faavae faatusi paia e aoao atu ai i latou.
Elder Rickard DeMille, Misiona a Orem Iuta
Suesue i le Tusi a Mamona ma Aoao ia Alofa Atu i Isi e Ala i le Auauna Atu
O auala sili ona taua e lua sa ou saunia ai mo la’u misiona o le suesue ma le auauna atu. Sa ou faitauina le Tusi a Mamona i aso uma, e sili atu ona maelega nai lo le taimi muamua, ma taumafai e sue mea e faatatau i lo’u olaga. O savali i na itulau na foliga sa tuusao mai ia te au, ma o iina sa ou aoaoina ai le tele o lo’u manaomia o le Togiola a Iesu Keriso ma le naunau o Ia e tuuina mai Lona mana. O le faaaogaina o tusitusiga paia e manaomia ai le faataitai ma le galue malosi, ae sa tauia e faavavau mo au.
O le isi, auauna atu. O tausaga uma lava, e taia ai aai tumatafaga i Florida, ISA, i afa. O matagi ma lologa e mafua ai le tele o le faaleagaina o fanua, ma e masani lava ona faigata pe taugata mo tagata i nei eria ona maua le fesoasoani vave latou te manaomia. Ina ua 12 o’u tausaga, sa ou le malamalama pe aisea na matou o ai i se faaiuga o le vaiaso e la’u lala laau. O le mea na ou aoaoina a o ou faia lenei mea i tausaga taitasi o le tele o le olioli e mafai ona maua i le galue malosi e auauna atu i se isi. O loo ou galue pea ia sili atu ona agaalofa, ae ou te iloa afai e manaomia ona ou alofa atili i se tasi, pau le mea e tatau ona ou faia o le auauna atu lea ia i latou!
Elder Joseph Lowry, Misiona a Orem Iuta
Suesue i le Tala’i La’u Talalelei ma Auai i le Malumalu
E i ai ni nai auala faigofie e saunia ai mo se misiona. Muamua, ou te fautua atu ia e faitau ma suesue le mataupu 3 i le Tala’i La’u Talalelei. Afai ua uma ona e iloa mea o le a e aoaoina ae e te lei alu atu i le galuega, e mafai ona e taulai atili atu i le auala e aoao atu ai ma le Agaga.
Ou te fautua atu foi ia te oe ia maua ou lava faaeega paia ma auai soo atu i le malumalu i le tele e te mafaia ai. E fesoasoani le malumalu ia i tatou e tausia se vaaiga e faavavau ma e mafai ona fesoasoani ia te oe e taulai atu ai ia Iesu Keriso.
O le auala mulimuli o le a ou fautuaina atu ai le saunia mo se misiona o le faitau ma iloa le Tusi a Mamona. O le meafaigaluega aupito sili lena e faafesootai ai oe lava ma isi ia Iesu Keriso i lau misiona ma mo lou olaga atoa!
Elder Rugby Taylor, Misiona a Everett Uosigitone
Atiina Ae Ni Tomai Faaagafesootai Lelei Atu
Ina ia saunia mo se misiona, e taua le faateleina o lou malamalama i le talalelei, ae o le a manaomia foi ona e saunia ou tomai faaletagata. Ou te fautua atu e amata ona alu ese mai lou sone mafanafana i fegalegaleaiga faaagafesootai. Fai se taumafaiga e talanoa atu i tagata e le masani ona e faia.
Sa ou aoaoina o le aoaoina atu o le talalelei e manaomia ai na tomai faaletagata . O na tomai faaagafesootai o le a e atiina ae ma faamalosia i lau misiona o ni tomai ia o le a fesoasoani ia te oe i lau galuega i le lumanai, tafaoga faamasani, aoga, ma i a outou sootaga ma isi!
Elder Emerson Taylor, Misiona a Manaseta New Hampshire