E Manaomia le Taliaina Lelei Faaleagaga? Taumafai e Fatufatu le Filemu i Lou Olaga

I se taimi ua mavae, sa ou faalogologo ai i se lauga lea na saunoa atu ai Peresitene M. Russell Ballard (1928–2023) i le autalavou matutua. Sa ia fai mai se tala na matua taia ai a’u:

“E i ai sou taimi filemu patino? Sa ou mafaufau pe o i latou o e na ola i le taimi ua tuanai na tele atu lo latou avanoa nai lo i tatou i le taimi nei e vaai, lagona, ma iloa le faatasi mai o le Agaga i o latou olaga.

“E foliga mai, a o faasolo ina susulu, leotele, ma pisi tele lo tatou lalolagi, ua i ai so tatou luitau sili atu o le lagonaina o le Agaga i o tatou olaga. Afai e leai se taimi filemu i lou olaga, pe e te amata ea …ona saili mo se filemu?”

Faatali, ea?

Mai mea uma ua talosagaina i tatou e fai, e taua ea le filemu? Sa ou fia iloa, o lea sa ou fia iloa ai le saunoaga a Peresitene Russell M. Nelson e uiga foi i taimi filemu. Sa ia aoao mai:

“E mafai ona tatou faaaogaina lo tatou taimi e faalogo ai i le siufofoga o le Alii o loo musumusu mai Lana taitaiga, faamafanafanaga, ma le filemu. O taimi filemu o taimi paia ia—taimi o le a faafaigofie ai faaaliga faaletagata lava ia ma faatumauina ai le filemu.

“Ia e faautauta oe lava ia ia faia se taimi na o oe ma [se taimi e] faatasi ai ma ē pele ia te oe. Tatala atu lou loto i le Atua i le tatalo. Faaalu se taimi e faatofu ai oe lava i tusitusiga paia ma tapuai atu i totonu o le malumalu.”

O lea la o taimi filemu o le ki lea. E faapefea na aoga?

Sa i ai so’u vaitaimi i lo’u olaga na ou lagona ai le le toe fesootai mai le Tama Faalelagi. E ui lava sa ou alu i le malumalu, tatalo, ma faitau tusitusiga paia, ae sa ou lagonaina pea le lofituina. Sa ou iloaina sa ou faia ni mea taua faaleagaga, ae sa ou le faatagaina se taimi filemu i lo’u olaga e mafaufau loloto moni ai i la’u sootaga ma le Tama Faalelagi. Sa ou filifili e taumafai e manatunatu loloto—e fai se malologa mai le lalolagi ma ia faalolotoina lo’u nofouta i le Agaga.

Ina ua amata ona ou faataatia ese se taimi filemu e mafaufau loloto ai ma taumafai e fesootai ma le Tama Faalelagi ma Iesu Keriso, sa ou lagonaina se eseesega tele i lo’u tomai e iloa ai le La taitaiga i lo’u olaga. Sa ou lagonaina foi le filemu ma le olioli sili atu i o’u tulaga.

Na molimau mai Epikopo L. Todd Budge, Fesoasoani Lua i le Au Epikopo Pulefaamalumalu, “O Le filemu … e manaomia ai le sili atu nai lo le na o le faaavanoaina o le taimi mo le Alii—e manaomia ai le lafoai o o tatou mafaufauga masalosalo ma le fefe ma taulai atu o tatou loto ma mafaufau ia te Ia.”

Afai e te manao e faaopoopo atili le filemu i lou olaga ma fesootai ma le Tama Faalelagi ma Iesu Keriso, mafaufau loloto i au tusitusiga paia, faaaluina o le taimi i le malumalu, ma o tatalo i aso taitasi o ni auala matagofie ia e faalogo ai ia i Laua. E mafai foi ona e faaaluina isi taimi i le filemu e ala i faiga faapenei:

• Amata laitiiti: Saili se nofoaga filemu lea o le a le faalavelaveina ai oe, ma nofo ai mo na o ni nai minute, ma taulai lemu atu i le manava.

• Filifili se mau e sili ona fiafia i ai: Liliu le mau i se fasifuaitau faigofie e toe fai i lou mafaufau a o e manava loloto.

• Ta se musika malu: Faaaoga le leo toafimalie e fesoasoani ai ia te oe e faatoafilemu lou tino ma faafilemu lou mafaufau.

• Faaalu se taimi e le toe fesootai ai i le lalolagi: Savalivali pe nofo i le natura e aunoa ma le faalogologo i soo se musika, faasalalauga, po o tusi faalogologo. Tau lava o le taulai atu i le vaaia o foafoaga matagofie a le Atua, mafaufau loloto, ma le tatalo.

Afai e te lagona e pei o loo e tauivi e faalogo i le siufofoga o le Alii, manatua—o nisi taimi tatou te le o i ai i se nofoaga o le filemu, faalemafaufau pe faaletino, e faalogo manino ai ia te Ia. Ma o isi taimi, e oo lava i le faateleina o le filemu, o nisi taimi e manaomia ai e le Tama Faalelagi ona tatou faatalitali ma le onosai mo Lona finagalo. Po o le a lava, o le taimi filemu e mafai ona fesoasoani e faaleleia atili ai lo tatou taliaina o Ia ma fesoasoani ia i tatou ia tuputupu ae ma le mautinoa i lo tatou faasinomaga paia, lo tatou faamoemoega, ma lo tatou faatuatua.

E masani ona tatou manaomia sina taimi filemu e iloa ai le taitaiga a le Alii. Faaalu se taimi e aumaia ai le filemu i lou loto ma lou mafaufau ina ia mafai ona e faalogo ia te Ia.