E Mafai Faapefea Ona Ou Maua le Olioli Ina ua Ou Vaivai i le Atuatuvale?

E masani lava o le mea mulimuli ou te manao e fai pe a ou faanoanoa o le talanoa po o le mafaufau i ou lagona. Ae peitai, ua ou matauina o le taliaina o o’u lagona e masani ona fesoasoani ia te au e maua ai le toomaga. E aofia ai i lenei mea le taliaina o le a ou lagona le leaga i nisi taimi a o ou taliaina foi ua faatagaina au e lagona le olioli.

Sa ou aoaoina talu ai nei se metotia sa faaaoga i le taoina o potoi falaoa e ta’ua o togi. O faifalaoa e fatuina ni mamanu matagofie i le vaega i fafo o le paluga ua saunia a o lei taoina. O mamanu na faia i le paluga e mafai ai e se nofoaga masani mo ausa ona saoese ma mo le falaoa e fefete i le taimi o le faagasologa o le taoina. E aunoa ma le togi, o le a vaeluaina le falaoa ma pa atu i nofoaga e le manaomia.

E pei o se papafalaoa e lei togia, o le taofia o lagona tiga e mafua mai i le atuatuvale (po o le ausa), e mafua ai ona nutimomoia o’u lagona ma iu ai ina pa. A aunoa ma se nofoaga maloloina e faateaese ai, o nei lagona e mafua ai le tiga ma le faaleagaina ia te a’u lava ma isi, ma faalauteleina ai le taamilosaga le lelei, ma le vaivai o le atuatuvale.

E pei lava o le togiina o le falaoa, sa tatau ona ou maua ni auala lelei e faamatuu atu ai lagona—a le o le talanoa e uiga i ai, tatalo, faamalositino, faatufugaga, auai i le malumalu, po o isi auala. E mafai ona tiga—e pei o le tatalaina o manu’a ou te manao e tapunia—ae o le faia o lena mea e mafai ai ona ou faagasolo lagona ou te lagonaina, faasaolotoina au mai ia i latou. E na o le pau lena o le taimi e foliga mai ai ua matala le vaivai. Ua amata ona ou toe lagonaina le olioli o le olaga.

O le tatalaina o lagona e mafai ona lagona ai le le mafai pe a taofia oe e le atuatuvale i lona lofituina. Ae faatasi ai ma le fesoasoani a le Faaola, e mafai ai ona tuu ese le faanoanoa ma le atuatuvale ma faaavanoa se avanoa mo le olioli. E pei ona saunoa mai Peresitene Jeffrey R. Holland, Sui Peresitene o le Korama a Aposetolo e Toasefululua, “Faamolemole ia manatua taeao, ma aso uma pe a mavae lena, e faamanuia e le Alii i latou o e e mananao e faaleleia atili.” O le manao faigofie ia maua le olioli o se nofoaga maoae e amata ai.

Pe a ou lagonaina le ao o le atuatuvale o loo tautau mai ia te au, e masani ona ou liliu atu i le 2 Nifae 2:25: “Ua i ai tagata, ina ia latou maua le olioli.”

Ua lelei, o lea ua tatou i ai iinei ia maua le olioli. Ae e foliga mai e le mafanafana tele lena mea pe a faigata ona lagonaina ona o le atuatuvale. Peitai, i le amataga o le mataupu, ua tatou aoao ai e aunoa ma le faafeagai o le a tatou “tumau e pei ua mate, ua leai se ola po o se mate, po o se pala po o se le pala, fiafia po o le pagatia” (2 Nifae 2:11).

O lea o le a tatou le iloa le lelei e aunoa ma le oo i le leaga. O le mea moni, a aunoa ma le faafeagai, o le a tatou le lagonaina se mea. O le a tatou vaivai e faavavau. O na taimi faigata e manaomia mo i tatou ina ia maua ma iloa ai le olioli.

E faigata ona talitonu i na aafiaga tiga atonu e aoga—ae o le a ou le manao e faaalu le faavavau i se tulaga o le tumau ai e le gata e aunoa ma se alualu i luma. O o’u taimi o le faanoanoa, tiga, ma le vaivai o le mea tonu lava lea e mafai ai ona ou olioli pe a ou lagonaina le olioli faatasi ma lo’u aiga, tietie uila i le mauga, faitau, po o le salamo i aso taitasi.

Na aoao mai Peresitene Bonnie H. Cordon, o le sa avea muamua ma Peresitene Aoao o Tamaitai Talavou, “E silafia e [Iesu Keriso] o tatou mafatiaga … ma valaau mai, Aumai i luma le popole ma le atuatuvale, o e vaivai, o e faamaualuga ma lē malamalama, o e ua tuuatoatasi, po o i latou o e ua ‘puapuagatia i soo se ala.’”

Ou te alofa i lo’u Faaola. Ou te iloa na puapuagatia o Ia ma maliu mo a’u lava ia. O le liliu atu ia te Ia o le a mafai ai ona e faatoilaloina soo se mea e te feagai—e oo lava i popolega lofituina e mafai ona aumaia e le atuatuvale. Atonu e te manatu ua tuua na o oe i nisi taimi, ae o le a le faagaloina oe e Keriso, aua ua ia “taia oe i [ona] alofilima” (Isaia 49:16). Sa Ia ositaulagaina Lona soifua mo oe, ma sa atoatoa o Ia. Afai e lava Lona talitonu ia te oe e faia ai lena mea, o lona uiga e mautinoa lava o loo i ai le faamoemoe o le a oo mai le olioli.

Afai e te lagona o le a le muta lava le pogisa, faamolemole ia manatua upu a Peresitene Holland: “I se lalolagi ua matua manaomia ai lava le malamalama uma e mafai ona ia maua, faamolemole aua nei faaitiitia le malamalama e faavavau na tuu e le Atua i lou agaga a o lei i ai lenei lalolagi. Talanoa i se tasi. Fesili atu mo se fesoasoani. … O loo maua le fesoasoani, mai i isi aemaise lava mai le Atua. E alofaina ma taua ma manaomia oe.”

Mo au, o le ole atu i le Atua mo se fesoasoani e masani lava o le laasaga muamua lea e aluese ai mai le taamilosaga o le atuatuvale, ma e pei o le a’e i se mauga, o nisi taimi e tatau ona ou taulai atu i le isi laasaga. Ou te iloa e ala ia Keriso o le a ou toe lagonaina ai le olioli pe afai ou te faaauau pea ona faia laasaga i luga o le ala o le avea ma soo.