O Fesili ma Tali e uiga i le Soifua Maloloina o le Mafaufau

F: Pe o o’u fa’afitauli o le soifua maloloina o le mafaufau o se taunuuga o se agasala?

T: “E taua le iloa o le atuatuvale e le o se taunuuga o vaivaiga, po o se taunuuga masani foi o le agasala. … Tatou te mafai faatasi ona talepe ao o le faaesea ma le faalumaina ina ia aveesea le avega o le maasiasi ma mafai ai ona tutupu vavega o le faamalologa.”

F: Aisea ou te le o faasolo manuia ai a e o loo ou faia le mea sa’o?

T: “Aua e te mafaufau e mafai ona e faia mea uma. Ia fai na o mea e te mafaia. Afai o na mea ua na o ni nai mea iti ua manumalo ai, ia lotofaafetai mo na mea, ma ia onosai. E faatele ona tau mai i tusitusiga paia, na poloaiina e le Alii se tagata ia “tumau pea” pe “ia filemu”—ma faatali. O le tumau ona onosaia o nisi o mea o le vaega lena o lo tatou aoaoga faaletino.”

F: E mafai fa’apefea ona ou iloa o lo’o ou mauaina tali i tatalo pe a faigata i lo’u soifua maloloina o le mafaufau ona iloa?

T: I le tele o faaletonu ma luitau tatou te fetaia’i i o tatou olaga, e manaomia e le Atua i tatou ina ia faia le mea sili tatou te mafaia, e filifili ai ae le o le tau faatonuina (tagai i le 2 Nifae 2:26), ma ia faalagolago atu ia te Ia. … Tatou te ono fetaomi soo foi i luma ma le faamoemoe ma le tatalo—ae e aunoa ma se faamautinoa a’ia’i—e faapea o loo tatou faia e tusa ma le finagalo o le Atua. Ae a tatou faamamaluina a tatou feagaiga ma tausi i poloaiga, a o tatou taumafai atili e lē aunoa e faia mea lelei ma atili ona lelei, e mafai ona tatou savavali ma le mautinoa o le a taialaina e le Atua a tatou la’a.”

F: E mafai faapefea ona ou lagonaina le olioli i le talalelei pe a faigata ona lagona le olioli ona o le atuatuvale?

T: “A o outou sailiili i le afioga a le Atua mo se malamalamaaga loloto atu e uiga i le fuafuaga e faavavau a le Atua, ia talia valaaulia nei, ma tauivi e savali i Ona Ala, o le a outou lagonaina ‘le [filemu] mai le Atua, o loo silisili lava i mea uma e manatu i ai’ [Filipi 4:7], e oo lava i le lotolotoi o faanoanoaga. O le a outou lagonaina se fuataga tele atu o le alofa silisili o le Atua ua maena a’e i totonu o lou loto. O le fotu mai o le malama faaselesitila o le a suluia ma mou ai le pogisa o ou tofotofoga, ma o le a amata ai ona e tofo i mamalu ma mea ofoofogia le mafaamatalaina o le lalolagi lemavaaia, atoatoa ma faalelagi. O le a e lagonaina le siitia ese o lou agaga mai avemalolosi o lenei lalolagi.”

F: E mafai faapefea ona ou aoao e faatuatuaina ma faalagolago ia Keriso pe a ou lagona e pei e le mafai ona ou faatuatuaina a‘u lava ona o o‘u luitau o le soifua maloloina o le mafaufau?

T: “O le faateleina o lou a’oa’o e uiga i le Faaola, o le faigofie atu foi lena o le faalagolago i Lona alofa mutimutivale, Lona alofa lēmafuatia, ma Lona mana faamalosi’au, faamalolo, ma togiola. …

“… Afai o le a toilalo mea uma ma tagata uma i le lalolagi o ē e te faatuatuaina, o Iesu Keriso ma Lana Ekalesia o le a lē toilalo lava mo oe.”

F: E silafia moni ea e Keriso o‘u lagona?

T: “Atonu e leai se tagata o le aiga, uo po o se taitai perisitua—po o le a lava le nofouta ma ni faamoemoega lelei e ono i ai i tagata taitasi—e iloa lelei lava le mea o loo e lagonaina pe o i ai foi upu tonu e fesoasoani e te malolo ai. Ae ia iloa le mea lenei: o loo i ai le toatasi e malamalama atoatoa i mea o loo e aafia ai, e ‘silisili atu lona malosi i le lalolagi’ [1 Nifae 4:1] ma o lē e “mafaia ona faia o mea uma e faasilisili lava i mea [e te] ole atu ai pe mafaufau i ai [Efeso 3:20].”

F: Pe alofa pea le Atua ia te a’u e ui lava o lo’o i ai ni o’u lu’itau faalesoifua maloloina o le mafaufau?

T: “Pe atonu o i ai ni mau leo o le faalotovaivai ma le pogisa o mamafa i ou mafaufauga, ni feau o loo fai atu ia te oe ua tele naua ou manu’aga ma le fememea’i, ua e vaivai tele ma e lē o amana’iaina, e ese a oe ia pe ua e matua faaluafesasi e te maua ai le alofa faalelagi i soo se ala moni. Afai e te faalogo i na manatu, ona faamolemole lea faalogo mai i le mea lenei: ua matua’i sese lava na leo. E mafai ona tatou lafoa’ia ma le mautinoa le nutimomoia i soo se itu ua faaleagavaaina ai i tatou mai le alofa faaleatua.”

F: Aisea e le aveesea ai e le Atua lenei luitau?

T: “I le tauivi ai mo sina filemu ma le malamalama i nei tulaga faigata, e taua tele le manatuaina o loo tatou ola—ma filifili e ola—i se lalolagi pa’ū lea e tusa ai ma faamoemoega paia o le a toe tofotofoina ai ma faaosoosoina ai pea lava pea i tatou i la tatou sailiga o le faaleatua. E tusa ai ma le faamautinoaga silisili i le fuafuaga a le Atua, o lea sa folafola mai ai se Faaola, o se Togiola lea e ala i lo tatou faatuatua ia te Ia, o le a sii ae ai i tatou ma le manumalo i luga a’e o na faaosoosoga ma tofotofoga, e ui o le tau mo le faia o lena mea e lemafuatiaina mo le Tama o lē na auina maia o Ia atoa ma le Alo lea na afio mai. Ua na o le talisapaiaina lava o le alofa paia lenei o le a muamua ai ona lavātia o tatou lava puapuaga ia e itiiti ifo i lo [ō Laua puapuaga], ona sosoo ai lea ma le malamalama i ai, ma mulimuli ai togiolaina.”

F: Afai ou te iloa o le isi olaga o le a sili atu, aisea e tatau ai ona ou faaauau pea ona ola i lenei olaga?

T: “Po o a lava ou popolega po o faigata, o le oti e ala i le pule i le ola e manino lava e le o le tali lea. O le a le matuuese atu ai le tiga o loo e lagona pe atonu ua e mafaufau o loo e faapogaiina. I se lalolagi ua matua manaomia le malamalama uma e mafai ona ia maua, faamolemole aua ne’i tuuitiitia le malamalama e faavavau na tuuina e le Atua i lou agaga a o le’i i ai lenei lalolagi. Talanoa i se tasi. Fesili atu mo se fesoasoani. Ia aua ne’i faatama’iaina se ola lea na tuuina mai e Keriso Lona soifua ina ia faasaoina ai. E mafai ona e onosaia faigata o lenei olaga faitino aua o le a matou fesoasoani ia te oe e onosaia.”

“Po o a lava ou luitau o’u uso e ma tuafafine—faalemafaufau pe faalelagona pe faaletino po o le a lava—aua e te filifili e faasaga i le taua tele o le ola e ala i le faamutaina! Faalagolago i le Atua. Taofimau i Lona alofa. Ia iloa o le a i ai le aso e susulu mai ai se malamalama ma mou atu ai le pogisa o tiga faaletino.”

F: E mafai fa’apefea ona ou fesoasoani i la’u pele o lo’o feagai ma lu’itau faalesoifua maloloina o le mafaufau?

T: “O le a’oa’oina o i tatou lava e uiga i gasegase faalemafaufau e saunia ai i tatou e fesoasoani ia i tatou lava ma isi atonu o loo tauivi. O se talanoaga faasamasamanoa ma faamaoni o le tasi ma le isi o le a fesoasoani i lenei autu taua ia maua ai le gaua’iga e tatau ai. E moni lava, o faamatalaga e muamua mai i musumusuga ma faaaliga. O nei lu’itau uma e tele ina lē vaaia e mafai ona aafia ai soo se tasi, ma a tatou feagai ma i latou, e foliga mai e le mafaato’ilaloina.

“O se tasi o mea muamua e ao ona tatou iloa o le mautinoa lea e le o tuua lava na o i tatou. Ou te valaaulia outou e suesue i le autu o le soifua maloloina faalemafaufau i le vaega Fesoasoani o le Olaga i le polokalama o le Gospel Library. O le a’oa’oina o le a taitai atu ai i le malamalama atili, taliaina atili, mutimuti alofa atili, ma le alofa atili. E mafai ona faaitiitia ai faalavelave a o fesoasoani ia i tatou e ati a’e ma pulea faamoemoega maloloina ma fegalegaleaiga maloloina.”

F: O se tasi o e pele ia te a’u na maliu i le pule i le ola ona o luitau o le soifua maloloina o le mafaufau. O le a le mea o le a tupu i a i latou?

T: “O loo i ai se manatu tuai faalelotu e faapea, o le pule i le ola o se agasala ma o se tasi e [oti e ala i] le pule i le ola ua faaaunuua e faavavau i seoli. E matua sese lava lena mea. Ou te talitonu o le tele o mataupu o le a iloa ai o nei tagata na ola i ni olaga totoa ma o le pule i le ola o le a le avea ma se uiga taua o lo latou faavavau.”

Agai i Luma ma Tepa i Luga

O nisi tali e tuuina mai e le Atua ia i tatou e ese mai mea sa tatou faamoemoe i ai, ma o nisi tali o le a le oo mai i lenei olaga. E ui tatou te le iloa mea uma i le taimi nei e uiga i le mafua’aga e to’atele ai tatou o lo’o tauivi ma luitau o le soifua maloloina o le mafaufau, e mafai ona tatou lototetele i le folafolaga o le a i ai se aso o le a tatou maua ai se malamalamaaga atoatoa i mea uma. O a tatou taumafaiga—e tusa lava po o le a le leai o se fua latou te lagonaina i nisi taimi—o le a aoga uma (tagai i le Kalatia 6:9; Mataupu Faavae ma Feagaiga 58:3).).

Na aoao mai Elder Dieter F. Uchtdorf o le Korama a Aposetolo e Toasefululua: “E matagofie le faatuatua aua e tumau pea e tusa lava pe le oo mai faamanuiaga e pei ona faamoemoe i ai. E le mafai ona tatou vaai atu i le lumanai, tatou te le iloa uma ia tali, ae e mafai ona tatou faalagolago ia Iesu Keriso a o tatou agai pea i luma ma agai i luga aua o Ia o lo tatou Faaola ma le Togiola.”

A o outou, o oe ma i latou e te alofa i ai o faatautaia le lavelave o le soifua maloloina o le mafaufau, ia manatua o mea uma e le talafeagai e uiga i le olaga o le a faasa’oina ona o Iesu Keriso. Ia agai pea i luma ma agai i luga—faatasi ai ma Ia i lou itu, e mafai ona e tumau i taimi uma ma le faamoemoe.