Mai le AM Faalevaiaso
Mo Tagata Uma E Lagona e Pei Ua Latou Pauu i Tua i le Olaga
E ui lava ou te lei ausia mea taua sa ou faatulagaina mo au lava ia, ae sa ou tuputupu ae pea ma aoaoina i le taimi atoa.
Pe i ai se taimi e te lagona ai ua e i ai i tua i le olaga?
Sa ou faaaluina le tele o lo’u luasefulu tausaga i le fuaina o le alualu i luma i se auala faapitoa lava. Sa i ai ni mea taua ma ni mea na tutupu i le olaga na fuafuaina faapea sa ou faalagolago e faaali mai ia te au sa ou faataunuuina mea uma sa ou manao i ai i le olaga.
Ia, faatoa atoa lo’u 30 i lenei tausaga, ma o le tele o na mea taua e lei tutupu lava, aemaise lava i la’u galuega. Ma ona o lena mea, ou te tauivi ai ma le lagona e pei ua ou pau i tua—i tua atu o a’u uo, i tua atu o le mea na faamoemoe tagata uma ou te i ai, ma sili ona tiga, i tua atu o le mea sa ou manatu o le a ou i ai.
Ua ou iloa sa ou manao e avea ma se fomai talu mai lo’u talavou, ma o se mea sa ou galue agai i ai mo le tele o tausaga. Afai ou te toe foi i tua ma ta’u atu i lo’u talavou le mamao i tua atu o la’u fuafuaga, atonu o le a fefe o ia.
Ae o le tala fiafia lenei: O lo’u tagata e 30 tausaga le matua e i ai se vaaiga sili atu i le olaga.
O Se Taamilosaga e Lē Gata
Ina ua 18 o’u tausaga, sa manaia mea uma. Sa ou siitia atu i se isi atunuu e amata ai le iunivesite ma sa faamanuiaina i le faatautaiga o le olaga i se nofoaga fou, sa ou amataina le aoga o loo faia e isi tamaiti aoga na siomia au, ma sa ou teuina o’u togi.
Sa faaauau pea ona lelei mea uma a o taofi a’u aoaoga e auauna atu i se misiona, sau i le fale, ma faaipoipo i ni nai tausaga mulimuli ane.
Ae o le tulaga lea na amata ai ona faigata teisi atu mea uma.
Muamua, sa ou faaaluina se tausaga mo le va aua o lo’u toalua sa na o ni nai tausaga e laitiiti ifo ia te a’u ma sa manaomia ona faauma lana aoga. O le tausaga na sosoo ai, sa ou talosaga ai ma taliaina i se aoga i lo’u atunuu—ae sa taofia le ofo ona o tapuniga o tuaoi o le KOVITI-19 ma le avanoa faalegaluega e lei faamoemoeina a lo’u toalua. O le tausaga na sosoo ai sa ou toe talosaga ai, o le taimi lea i le atunuu sa ou nofo ai i le taimi lea, ae sa itiiti se faamanuiaina aua sa le o au o se tagata nofomau i lena atunuu.
E oo ane i le taimi o lo’u aso fanau lona 27, sa matuai ou lotovaivai lava. Sa tatau ona ou i ai i le afa o le aoga faafomai i le taimi nei! O uo sa matou aooga ma faauu sa agai pea i luma i o latou olaga, a o ou tumau ai i le lagona e pei o se taamilosaga e le muta o talosaga ma le teenaina.
Auala Eseese o le Faia ma le Fuaina o le Alualu i Luma
Mai lo’u manatu, sa ou mau ma sa ou le alualu i luma. O le leai o se ausia o mea taua sa ou otootoina a o ou talavou na ou lagona ai le gafa ma le le fiafia ia te au lava ia.
Ae o le mea lenei—e tele auala eseese e faia ai ma fuaina le alualu i luma. Ma i le faaiteite, ua ou iloa ai sa ou tuputupu ae ma aoaoina i le taimi atoa.
O le avanoa o le tausaga muamua? O se avanoa lena mo a’u e faaali atu ai i lo’u toalua e taua lana aoga ia te a’u ma ia faaauau pea ona maua se aafiaga o le a fesoasoani ia te a’u e avea ai ma se fomai e sili atu ona lelei.
O le tausaga lona lua lena, ina ua ou teena se ofo? O se avanoa lena mo i matou e tatalo ai ma fefautuaai faatasi e uiga i le auala e faapaleni ai mea e faamuamua e faatautava ai ma fausia ai le olaga sa matou mananao i ai.
Ma i lena tausaga mulimuli, ina ua ou lagonaina le leai o se faamoemoe e uiga i mea sa le mafai ona ou puleaina? O lena mea sei ou sailia faaaliga faaletagata lava ia ma maua le faamautinoaga sa ou manaomia mai le Tama Faalelagi sa ou i ai i le ala sa’o, e tusa lava pe sa ou lotovaivai ma sa le mafai ona ou iloa atu le lumanai.
Ou te le fia faafoliga e pei o na tausaga o le faatalitali sa faigofie. A o ou ola ai, sa masani ona ou lagonaina le le fiafia, le toa, ma le lotovaivai. Ae tou te iloa? Na iu ina sili atu le lelei o le lumanai nai lo le mea sa mafai ona ou mafaufauina. O loo ou i ai i lo’u tausaga lona lua i le aoga faafomai, a o faigaluega lo’u toalua i lana galuega na miti i ai ma mafai ona lagolagoina i matou i mea tautupe. I le mavae ai o tausaga o le faamuamuaina o lana galuega ma le a’otauina, ua saunia o ia e lagolagoina au, ma e i ai le ituaiga sootaga e mafai ona tumau le malosi i aso faigata o aoaoga faafomai.
Manatua Mea e Aupito Sili ona Taua
Ou te tulimatai atu pea i le aso e mafai ai ona ou ta’ua a’u lava o se fomai. Ae e pei ona aoao mai Peresitene Russell M. Nelson, o se fomai lava ia, e i ai faasinomaga e sili atu ona taua nai lo lena.
Ma o le manatuaina o lo’u faasinomaga o se atalii o le Atua, o se atalii o le feagaiga, ma se soo o Keriso e fesoasoani ia te a’u i taimi ou te manao ai e faaigoa a’u lava o le “pa’ū i tua,” o se mea ou te manatu o le toatele o i tatou e naunau e fai i le taimi o le talavou matua.
Atonu e te pei o au ma ua e faaigoaina oe lava o se toilalo ona o le alofia o galuega. Pe atonu o loo sologa lelei lau galuega ae e te taulimaina le faailoga o le “nofofua,” “tauivi ma se gasegase faalemafaufau,” po o se isi lava mea.
Po o le a lava lou tulaga, ia iloa e tele auala e tuputupu ae ai ma aoao ma alualu i luma. Aua e te fuaina oe lava i le olaga po o faamoemoega o se isi tagata—po o ou faamoemoega ua tuanai.
Nai lo lena, ia manatua le mea e sili ona taua: “O a tatou sootaga ma le Tama Faalelagi ma Lona Alo Pele, o tatou aiga, ma o tatou tuaoi, ma le faatagaina o le Agaga o le Alii e taiala i tatou i na sootaga.”
Atonu e le o avea nei au ma se fomai, ae o au o se atalii o le Atua. O au o se tagata tausi feagaiga. O au o se tasi e taumafai malosi e avea ma se tane lelei.
Ma e sili atu ona taua lena mea nai lo faasologa o taimi tuufau.