Nagatuo Ako
Dihang ang Akong Perpekto nga Plano Nabungkag, Gitabangan Ako ni Kristo nga Maayo
Abi nako og ang akong pagkahugno wala nay pagkaayo, apan anaa si Kristo nga miayo kanako.
Miyembro ko sa Ang Simbahan ni Jesukristo sa mga Santos sa Ulahing mga Adlaw sa tibuok nakong kinabuhi, apan wala gayod kaayo ako makaila kon kinsa si Kristo hangtod niadtong pipila ka tuig pa lamang ang nilabay.
Sa kadaghanang panahon sa akong kabatan-on sa Simbahan, nagtuo ko nga kinahanglan ko nga maperpekto. Nagtutok ko sa mga buhat sa pagpakabuhi subay sa ebanghelyo, apan ang akong kasingkasing wala diha niini.
Mao nga dihang nauli ko og sayo sa akong pagmisyon, mibati ko og kaulaw. Samtang nagkahingkod ko, nagsugod ko sa pagpugos sa akong kaugalingon aron ang akong kinabuhi makita nga walay sayop.
Apan samtang nagpadayon ang akong kinabuhi, ang akong perpekto nga plano nagsugod sa pagkabungkag, hangtod nga ang tanang nahibilin mao ako ug ang akong Manluluwas.
Ug akong nahibaloan nga Siya ra diay maoy akong bugtong gikinahanglan.
Napalayo gikan sa Kamatuoran
Ang usa ka bahin sa perpektong kinabuhi nga akong gihunahuna mao ang mabulokon nga pagminyo sa templo. Dihang nahimamat nako ang umaabot nakong pamanhonon, parehas kaming aktibo sa Simbahan, maong nagtuo kami nga ang tanan mamaayo ra. Nagpakasal dayon kami, nga walay daghang pagsumpaki.
Human sa kasal, nalahi na kaayo siya nga tawo kay sa akong gihunahuna. Magsimba gihapon siya apan abusado siya sa emosyonal nga paagi ug dili matinuoron diha sa panimalay.
Niini nga panahon, sa wala tuyoa nakasugat ko og mga materyal nga supak sa Simbahan ug napuno ako sa pagduhaduha ug kapungot mahitungod sa ebanghelyo.
Nanaad ko nga dili na gyod ko mosimba, dili na mobasa sa Basahon ni Mormon, dili na moadto sa templo, ug dili na makigsulti pa og balik sa usa ka lider sa pagkapari. Nahimo ko kining tanan sa tibuok nakong kinabuhi, ug tan-awa kon unsay resulta niini!
Nasayod na ako karon nga dali ra akong napaling tungod kay ang akong pagpamatuod nagsukad sa akong mga ekpektasyon sa akong kinabuhi, dili ngadto ni Jesukristo.
Nakaamgo nga Kinahanglan Ko nga Mag-usab
Adunay duha ka lisod nga hitabo sa akong kinabuhi nga nagpaamgo kanako nga kinahanglan ako nga mag-usab.
Una, usa ka pinalangga nga ig-agaw namatay. Didto sa iyang haya, mibati ko sa Espiritu nga nag-ingon kanako nga panahon na nga mobalik sa Simbahan. Dili ko gusto! Apan duna koy kusog nga pagbati nga ang akong ig-agaw nag-ingon usab kanako sa pagbalik sa akong tinuohan.
Ikaduha, samtang ang emosyonal nga pag-abuso nagpadayon, ang akong bana ug ako nagbulag. Mibati ko nga giprotektahan sa mga anghel sa tibuok namong pagdiborsiyo. Nakalitan ako nga nakasaksi og mga milagro dihang nagsinati ako sa labing pait nga mga butang nga nahitabo kanako sukad.
Sulod sa unang higayon sa taas nga panahon, nag-ampo ko ug mihangyo sa Langitnong Amahan kon unsay gusto Niya nga akong buhaton, nangamuyo Kaniya sa pagluwas kanako gikan sa kasakit sa akong kasingkasing ug sa dili maayong mga pagpili.
Ug mao kadtong higayon nga sa kataposan akong naamgohan nga kinahanglan akong makaila ni Jesukristo.
Pagpili kang Kristo
Ang pagbalik sa simbahan dili sayon. Sa sinugdanan, mibati ko nga wala ko mahisakop didto.
Akong gibati ang sama sa gihulagway ni Sister Kristin M. Yee, Ikaduhang Magtatambag sa Kinatibuk-ang Kapangulohan sa Relief Society, dihang gisulayan niya sa pagpinta ang litrato sa Manluluwas. Naghunahuna nga ang pintal uga na, gibuboan niya og varnish ang ibabaw. Apan ang pintal basa pa diay, ug nakatag ang daghan sa iyang gitrabaho ug napapas.
Akong gibati ang susama nga kadismaya ug kawalay paglaom sa akong sitwasyon nga iyang gibati mahitungod sa iyang painting—sama nga ako dili na maulian.
Apan ang mama ni Sister Yee miingon kaniya, “‘Dili na nimo mabakwi ang nawala na, apan buhata ang kutob sa imong mahimo sa unsay anaa nimo.’”
Mao kana ang gibuhat ni Jesukristo sa matag usa kanato. Mahimo Siyang makigkita kanato kon asa man kita ug motabang kanato nga mahimong butang nga matahom.
Pinaagi sa giya sa akong bishop, nagsugod ko sa tinuoray nga pagtuon ug pagkat-on mahitungod ni Jesukristo sa unang higayon. Akong gibati ang Manluluwas nga nagtudlo kanako sa matag lakang sa dalan.
Akong nakat-onan nga ang tanan naguba sa pipila ka paagi. Apan si Jesukristo makaayo sa tanan kanato—lakip kanako ug sa akong kanhi bana.
Ang pagkat-on mahitungod sa pagpasaylo ug gugma sa akong Manluluwas naghimo kanakong magtinguha niini alang sa akong kaugalingon, ug samtang nagpaayo ako, nagsugod usab ako sa pagtinguha niini alang sa akong kanhi bana. Paglabay sa panahon, napasaylo na nako siya.
Mobayaw Siya sa Nahugno
Dihang mibalik ko sa templo, nasorprisa ko sa gugma nga akong gibati. Aduna akoy labihan ka lahi nga kasinatian sa pag-adto sa templo alang sa akong kaugalingon ug pagtutok sa akong Manunubos, kaysa moadto lang aron makita nga naa ko didto.
Kon kini nga kasinatian nakatudlo kanako og bisan unsa, kana mao nga si Jesukristo buhi. Mobayaw Siya sa nahugno. Siya ug ang atong Langitnong Amahan maminaw sa atong labihan ka masub-anong mga pangamuyo sa kagabhion kon walay bisan usa nga nasayod sa kasakit nga dili nato malikayan. Kanunay Siyang naghulat kanato nga mobalik ngadto Kaniya.
Miingon usab si Sister Yee, “Ang makatubos nga gahom ni Jesukristo usa sa labing dako nga gisaad nga mga panalangin sa atong mga pakigsaad.”
Bisan unsa pa man ang inyong gisagubang, saligi ako kon moingon ako nga ang pagkatubos dili lamang usa ka matahom nga pagtapos sa usa ka hinimo-himo nga sugilanon. Tinuod kini. Ikaw matubos. Ikaw makapahiuli sa imong pagtuo.
Mao kini ang mahitabo kon ikaw hingpit, tinuoray, ug andam kaayong motugot kang Jesukristo nga mosulod sa imong kinabuhi.
Mao kanay Iyang gibuhat kanako.