Nagatuo Ako
Pagpili sa Hugot nga Pagtuo Kon ang Uban Wala Nagbuhat sa Ingon
Ang tagsulat nagpuyo sa Taiwan.
Sa higayon nga ako nakaangkon sa akong kaugalingong pagpamatuod sa ebanghelyo ni Jesukristo, sayon nalang kadto ang pagpili sa pagpabilin diha sa Simbahan sa dihang ang uban nga naglibot kanako nangbiya.
Ang Simbahan ni Jesukristo sa mga Santos sa Ulahing mga Adlaw nahimong kanunayng kabahin sa akong kinabuhi, apan ako wala gyod nakaangkon sa akong kaugalingong pagpamatuod hangtod nga ako nag-tenedyer.
Ang akong amahan kanunayng pabalhin balhin og trabaho sa dihang nagbata ko, maong ang akong pamilya kinahanglang mobalhin sa matag pipila ka bulan. Wala ako nakaangkon og kahigayonan nga makabaton og suod nga higala, ug wala mobati nga nahisakop. Sa Taiwan, kadaghanan sa mga tawo adunay usa o duha ka anak ug nagsunod sa mga tradisyon sa Daoism o Buddhism. Ang akong pamilya adunay lima ka anak ug nahisakop ngadto sa Simbahan ni Jesukristo.
Ang mabuhi nga sama niini isip usa ka bata lisod, ug ako usahay mibati og kaulaw mahitungod sa pagkamiyembro sa Simbahan.
Ang Pundasyon sa Akong Pagpamatuod
Sa dihang nagtenedyer ko, misulay ko sa pagbasa sa Basahon ni Mormon sa pipila ka higayon. Ang unang duha ka higayon, wala ko mobati og bisan unsa. Ang akong kasingkasing walay pagbati niini. Apan sa ikatulo nga higayon, nakabaton ko og lahi nga kasinatian.
Samtang sinsero nakong gibasa ug gipamalandongan ang istorya ni Ammon nga nagtudlo ni Hari Lamoni—usa ka Lamanita nga hari kinsa andam nga mobiya sa tanang tradisyon nga kanunay niyang gisunod aron mosunod ni Kristo—misugod ko sa pagbati og lawom nga ang basahon tinuod. Akong gibati nga nadasig sa kalipay ni Lamoni samtang siya mipili nga magpakabuhi nga lahi ug mosunod ni Kristo (tan-awa sa Alma 19:13).
Sa dihang akong gibasa ang imbitasyon ni Moroni nga “mangutana sa Dios, ang Amahan sa Kahangtoran, sa ngalan ni Kristo, kon kini nga mga butang dili ba tinuod” (Moroni 10:4), akong gibati ang kamatuoran sa ebanghelyo sa tibuok kong kasingkasing. Ang Espiritu mikompirmar niini ngari kanako ug mipuno sa akong kinabuhi sa bag-ong kaplag nga katuyoan.
Kini nga kasinatian nakapatubo sa mga gamot sa akong pagpamatuod sa ebanghelyo ni Jesukristo, diin mipadayon sa pagtubo samtang ako nagtinguha og dugang espirituhanong kasinatian. Ang akong pagpamatuod naghatag kanako og paglaom ug kalipay sa dihang ang ubang naglibot kanako nagduha-duha.
Nakagamot nga Hugot nga Pagtuo
Wala madugay human nako nasugdan ang pagpalawom sa akong pagtuo, ang akong mga ginikanan nadeborsiyo. Isip ang kinamagulangang anak, nahimo ko nga nag-unang tigsangkap sa panginahanglan sa akong mama ug mga igsoon ug nagtrabaho og maayo sa pagsuporta sa akong pamilya ug naghatag sa akong mga igsoon og mas maayong kinabuhi. Akong gibuhat kutob sa akong mahimo nga makatambong sa institute, sa mga kalihokan sa young adult ug makasimba aron mapalig-on ang akong pagpamatuod, ug kini milig-on kanako ug mitabang kanako sa pagbati og hingpit nga kalipay, bisan kon hilabihan ang akong pagsakripisyo alang sa akong pamilya.
Sa paglabay sa katuigan, mas daghan sa akong mga igsoon ug mga higala mibiya sa Simbahan. Midesisyon sila nga dili sila gusto nga magpakabuhi nga lahi gikan sa mga tawo nga naglibot kanila. Lisod kadto nga makita nga ang akong mga minahal mibiya sa ebanghelyo nga akong gipangga, apan tungod sa akong personal nga espirituhanong mga kasinatian, gipili nako nga magpabilin diha sa akong hugot nga pagtuo diha ni Jesukristo.
Si Elder F. Ucthdorf sa Korum sa Napulog Duha ka Apostoles mipakigbahin og mga panabot kabahin niining baroganan nga nag-ingon: “Kinahanglang mangutana kita sa atong kaugalingon: Ang akong pagpamatuod ba gibase sa unsay akong gilaoman nga mahitabo sa akong kinabuhi? Nagdepende ba kini sa mga binuhatan o sa kinaiya sa uban? O lig-on ba kining natukod diha ni Jesukristo, “nakagamot ug nakabarog ug nalig-on diha sa pagtuo sumala sa gitudlo kaninyo,’ [Mga Taga-Colosas 2:7], bisan pa sa mausabon nga mga sirkumstansiya sa kinabuhi?”
Ang pagbati sa kamatuoran sa ebanghelyo nga migamot sa akong kasingkasing nakapahimo niining sayon sa pagpili sa hugot nga pagtuo.
Nasulayan nga Hugot nga Pagtuo Mao ang Lig-on nga Pagtuo
Samtang ako nagpadayon sa pag-amuma sa akong pagpamatuod, Ang Simbahan ni Jesukristo sa mga Santos sa Ulahing mga Adlaw nahimong labaw pa kay sa ako lang relihiyon—kini mao ang akong tibuok kinabuhi. Ang akong pagpamatuod mao ang labing importanteng butang sa akong kinabuhi ug nagtabang kanako sa higayon nga ang akong hugot nga pagtuo sulayan.
Si Elder Uchtdorf nagtudlo usab:
“Lig-on ang pagtuo kon aduna kini lawom nga mga gamot sa personal nga kasinatian, personal nga pasalig ngadto ni Jesukristo, wala magdepende kon unsa ang atong mga tradisyon o kon unsay isulti o buhaton sa uban.
“Ang atong pagpamatuod sukdon ug sulayan. Ang pagtuo dili pagtuo kon dili gayod masukod. Ang pagtuo dili lig-on kon dili gayod maatbangan. Mao nga ayaw kasagmuyo kon ikaw adunay mga pagsulay sa pagtuo o wala matubag nga mga pangutana. …
“… Makasalig kita ni Jesukristo samtang magpadayon kita sa unahan ug pag-usbaw tungod kay Siya ang atong Manluluwas ug Manunubos.”
Kon ugaling aduna kay mga pangutana o panglimbasog sa paghupot diha sa imong hugot nga pagtuo, tinguha si Jesukristo uban sa usa ka tinguha nga motuo diha Kaniya ug sa Iyang ebanghelyo. Ang Ginoo misaad sa pagpakita kanimo sa kamatuoran kon ikaw modangop ngadto Kaniya. Ug samtang ikaw mopalig-on sa imong pagpamatuod, kini makatabang sa imong hugot nga pagtuo nga molahutay, bisan unsa pay imong atubangon.