Andam Ka na alang sa Komperensiya, apan ang Imong mga Pangutana Wala pa Matubag. Karon Unsa Na?
Unsa ang inyong buhaton kon kamo mahunahunaon nga nag-andam og mga pangutana alang sa kinatibuk-ang komperensiya apan wala kini matubag?
Kanunay kitang gidasig sa pagpangandam alang sa kinatibuk-ang komperensiya pinaagi sa paghunahuna sa kinasingkasing nga mga pangutana nga gusto natong matubag. Daghan kanato ang makugihon nga nagtuon sa pagtino sa mga pangutana sa atong mga kalag nga itanyag aron makakuha og direksiyon. Ang kinatibuk-ang komperensiya mahimong usa ka mapadayagon nga kasinatian, ug kita gitudloan sa pagpaabot og mga tubag ug mga milagro.
Apan unsay mahitabo kon ang atong mga pangutana wala matubag?
Nakahinumdom ko sa unang higayon nga ako miadto sa komperensiya nga tinud-anay nga andam ug naminaw alang sa tubag nga akong gihunahuna nga ako garantisado nga makadawat—apan naabot lamang sa kataposan sa hinapos sa semana nga adunay dugang pa nga mga pangutana!
Dili ba gusto sa Dios nga motubag kanako? Dili ba igo ang akong kamatinud-anon? Dili ba magsilbi ang pagpadayag alang kanako?
Una, hinumdomi nga ang Dios nahigugma kaninyo.
Kon mibiya kamo sa komperensiya nga adunay wala matubag nga mga pangutana, hunong ug hinumdomi ang usa sa mahinungdanong mga kamatuoran sa ebanghelyo: Ang Dios nahigugma kaninyo.
Si Elder Karl D. Hirst sa Seventy miingon:
“Nasayop ka sa paghunahuna nga imong nabutang ang imong kaugalingon nga lapas na sa maabot sa gugma sa Dios. …
“Kon kita dili makabati sa kainit sa balaan nga gugma, wala kini mawala.”
Bisan unsa pa man ang inyong gibati niining higayona, hibaloi nga kamo gihigugma. Samtang kamo mopadayon sa unahan nga adunay mga pangutana diha sa inyong kasingkasing, hinumdomi nga ang Dios nahigugma kaninyo ug sa kanunay motuman sa Iyang mga saad. Pangita og paglaom niana nga kahibalo samtang maghulat kamo alang sa mga tubag ug sa dugang nga kahibalo nga moabot.
Sunod, padayon sa paglihok.
Apan unsaon man ninyo sa pagpadayon?
Ayaw walaa ang kadasig nga inyong naangkon gikan sa pagpangandam ug pagpaminaw alang sa kinatibuk-ang komperensiya. Padayon sa paglihok.
Si Elder Dieter F. Uchtdorf sa Korum sa Napulog Duha ka Apostoles mitudlo:
“Ayaw kasagmuyo kon ikaw adunay mga pagsulay sa pagtuo o wala matubag nga mga pangutana.
“Dili kita angay nga magdahom nga makasabot sa tanan sa dili pa kita molihok. … Kon dili kita molihok hangtod nga ang tanan natong mga pangutana matubag, labihan ang atong pagpugong sa maayo nga atong mahimo, ug atong gilimitahan ang gahom sa atong [hugot nga] pagtuo.”
Ania ang pipila ka sugyot alang sa pagpadayon sa paglihok inubanan sa hugot nga pagtuo aron makakaplag og mga tubag sa inyong mga pangutana:
-
Rebyoha ang mga pakigpulong sa komperensiya. Tingali adunay mga tubag nga wala ninyo nadungog o namatikdi sa unang higayon.
-
Mainampoong tun-i ang mga kasulatan.
-
Tambong sa templo.
-
Paghimo og makab-ot nga mga tumong aron sa paggamit sa mga pagtulun-an gikan sa komperensiya ngadto sa inyong kinabuhi.
-
Pangayo og panalangin sa pagkapari sa tambag ug kahupayan.
-
Pangita og mga gutlo nga mahimong magmalinawon ug tugoti ang Espiritu nga mamulong nganha kaninyo.
Hinumdomi ang gahom sa inyong hugot nga pagtuo.
Tingali matintal kamo sa paghunahuna nga ang inyong hugot nga pagtuo dili igo ang kalig-on aron sa pagdawat og pagpadayag gikan sa Dios. Maayo na lang, si Presidente Russell M. Nelson mipahupay niini nga kahadlok:
“Kita maghunahuna kon makalikom ba kaha kita og igong hugot nga pagtuo aron makadawat sa mga panalangin nga ato kaayong gikinahanglan. …
“… Kon kita “may pagtuo sama sa liso sa mustasa,” atong “ingnon kining bukira, Balhin ngadto,’ ug kini mobalhin; ug walay dili mahimo ngari [kanato]’ [Mateo 17:20].”
Kitang tanan padayong makapalambo sa atong hugot nga pagtuo, apan ang gidak-on sa hugot nga pagtuo nga anaa gayod kanato dili kanunay motino kon kanus-a o sa unsang paagi kita tubagon sa Dios. Kon inyong gibuhat ang tanan nga inyong mahimo sa pagdapit og pagpadayag sa inyong kinabuhi, hinumdomi nga mosalig Kaniya ug sa Iyang tukma nga panahon. Sa pagkakaron, ang pagsalig Kaniya mahimong magpasabot lang nga maghulat Kaniya.
Tingali lisod usahay, apan sa pagbuhat ninyo sa ingon, inyong makita ang inyong kabubut-on nga mahiuyon sa Iyang kabubut-on. Makapalambo kamo og pailob aron madawat ang mga tubag sa Dios alang kaninyo.
Sa kataposan, ayaw og “atras.”
Diha sa mga kasulatan, ang Manluluwas mihulagway sa pag-antos nga Iyang nasinati sa Getsemani, nag-ingon, “Kansang pag-antos mihimo sa akong kaugalingon, gani ang Dios, nga labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antos sa lawas ug sa espiritu—ug nanghinaot nga ako dili moinom sa mapait nga kopa, ug dili na mopadayon” (Doktrina ug mga Pakigsaad 19:18).
Si Elder David A. Bednar sa Korum sa Napulog Duha ka Apostoles mitudlo:
“Ug ako nasayod nga usa sa labing dako nga mga panalangin sa pagka-mortal mao ang dili pag-atras ug sa pagtugot sa atong indibidwal nga kabubut-on nga ‘[ma]tuhop ngadto sa kabubut-on sa Amahan’ (Mosiah 15:7).
“… Sa inyong pagpadayon sa inyong mga kinabuhi uban sa makanunayon nga hugot nga pagtuo diha kang Kristo, kamo makabaton sa kapasidad nga dili moatras.”
Samtang kamo mopadayon sa unahan uban sa hugot nga pagtuo diha kang Kristo, ayaw og atras! Magiyahan kamo samtang tugotan ninyo ang kabubut-on sa Dios nga mopatigbabaw sa inyong kaugalingong kabubut-on. Siya mopanalangin kaninyo sa mga tubag nga inyong gikinahanglan.