3 ka Sugyot nga Makatabang Kanimo nga Makatakda og Makab-ot nga mga Tumong
Kon nakigbisog ka sa paghimo ug pagtuman og mga tumong, kini alang kaninyo!
Ang pagtakda og usa ka tumong sama sa pagtanom og usa ka binhi. Ang usa ka binhi nagkinahanglan og makanunayon nga tubig ug kahayag sa adlaw aron motubo sa paglabay sa panahon. Diha sa Doktrina ug mga Pakigsaad, atong nakat-onan nga si Kristo “wala niya madawat ang kahingpitan sa sinugdanan, apan nagpadayon gikan sa ginagmay nga mga grasya, hangtod nga nadawat niya ang kahingpitan” (Doktrina ug mga Pakigsaad 93:13). Kita mahimong mosunod sa ehemplo ni Kristo sa paglambo ngadto sa kahingpitan. Kita mahimong motubo ug molambo pinaagi sa pagtanom og “mga binhi” o pagtakda og mga tumong nga makatabang kanato nga motubo nga makanunayon matag adlaw, imbes nga magdahom nga kini mahitabo dihadiha dayon.
1. Hibaloa ang Hinungdan ug Katuyoan sa Inyong Pagtakda og Tumong
Ang pagtakda og tumong usahay ingon og bug-at kaayo. Makakaplag kita og kadasig pinaagi sa paghinumdom kon nganong nagtakda kita og mga tumong.
Si Presidente Dallin H. Oaks, Unang Magtatambag sa Unang Kapangulohan, mitudlo, “Sukwahi sa mga institusyon sa kalibotan, nga nagtudlo kanato nga mahibalo og mga butang, ang ebanghelyo ni Jesukristo naghagit kanato sa pagkahimong angay kon unsa kita.
Usa ka dako nga bahin sa pagtakda og tumong mao ang paggamit sa unsay atong nahibaloan ug pagkat-on kon unsaon nga mahimong mas maayo—aron mahimong mas mahisama ni Jesukristo.
2. Paghimo og Plano
Usa ka lakang sa pagmugna og usa ka epektibo nga tumong mao ang pagsabot sa kalainan tali sa mga tumong ug sa mga plano. Si Presidente M. Russell Ballard (1928–2023) kausa miingon: “Ang pagtakda og tumong magsugod nga maghunahuna sa kataposan. Ug ang pagplano mao ang paghimo og paagi aron moabot niana nga kataposan.”
Pananglitan, ang regular nga pagtambong sa templo usa ka tumong. Apan ang plano nga inyong himoon aron makaadto didto maglakip sa mga butang sama sa ngano, kanus-a, asa, ug unsaon ninyo sa pagtambong sa templo. Ang pagbahin-bahin sa imong tumong ngadto sa gagmay nga mga bahin maghimo niini nga mas madumala.
3. Hinay-hinay Lang—sa Kaalam ug Kahusay
Ang inyong mga tumong mahimong daw sayon sa dihang una ninyo kining himoon. Apan importante nga hinumdoman nga sa dihang nagtanom kamo og binhi, kinahanglan dili kamo magdahom nga kini motubo human lang sa usa ka tibuok gabii.
Kon maghimo kamo sa inyong plano, kinahanglang buhaton ninyo kini “sa kaalam ug kahusay; kay wala kinahanglana nga ang tawo modagan labaw pa kay sa iyang kusog” (Mosiah 4:27).
Ang pagbaton og kaalam ug kahusay samtang magplano kamo kon unsaon sa pagkab-ot ang inyong mga tumong usa ka mas malungtarong pamaagi. Motabang kini kaninyo sa pagkab-ot niini bisan human nga nawala na ang inyong pasiuna nga kadasig.
Sa dihang naghisgot mahitungod sa hugot nga pagtuo, si Alma mipasabot nga “kon ang usa ka liso motubo kini maayo, apan kon dili kini motubo, tan-awa dili kini maayo, busa ilabay kini” (Alma 32:32).
Magamit nato kana sa pagtakda og mga tumong. Sama sa mga binhi, kon ang inyong mga tumong molambo ug makakaplag kamo og kalamposan, mahibal-an ninyo nga kamo adunay usa ka maayong plano nga epektibo. Kon dili, mahimo kamong mohunong ug maghunahuna, mosusi pag-usab, ug ayohon kon unsay dili epektibo. Ug OK ra kana!
Ang Gagmay nga mga Lakang Mopalambo og Pagkamakanunayon
Kon kita man nagtanom og binhi o nagtakda og tumong, kinahanglan natong hinumdoman ang tambag ni Elder Michael A. Dunn sa Seventy: “kinahanglan nga adunay makanunayon, inadlaw-adlaw nga paningkamot. Ug bisan lagmit dili kita mahimong hingpit, kinahanglang determinado kita nga himoong managsama ang atong pagkamalahutayon sa pagpailob.”
Nagkinahanglan kini og panahon aron motubo ang mga binhi, ug mao usab ang atong personal nga pagtubo. Ang pagkamakanunayon motabang kanato nga mopadayon sa atong mga tumong.
Kon atong “himoong managsama ang atong pagkamalahutayon sa pagpailob,” atong makaplagan ang hingpit nga kalipay diha kang Kristo nga atong gipangita, samtang inanay kitang mosunod Kaniya sa matag higayon.