3 ka Kasinatian sa Pag-ampo nga Nakapausab sa Akong Relasyon sa Dios
Ang tagsulat nagpuyo sa Angers, France.
Ang akong mga kasinatian sa pag-ampo mitudlo kanako nga ang Dios anaa sa kanunay.
Sa akong pagdako, ang ehemplo sa akong mga ginikanan mitudlo kanako sa kaimportante sa pag-ampo. Kanunay kaming mag-uban sa pag-ampo isip usa ka pamilya, ug misalig ako kanila sa pagtabang kanako sa akong pagtuo.
Nasaksihan namo ang mga milagro, ug ang akong pagsalig sa Langitnong Amahan milambo. Apan sa akong pagbiya sa balay, kinahanglan nakong palamboon ang akong kaugalingon nga tinguha sa pagpangita sa tabang sa Langitnong Amahan ug sa pagpalambo sa akong kaugalingon nga hugot nga pagtuo.
Ako adunay tulo ka piho nga mga kasinatian sa pag-ampo nga labihan ka halandomon tungod kay kini miestablisar sa akong pundasyon sa pagsalig sa Dios ug gihatagan ako og kaisog sa paghimo og maisogon nga mga aksiyon bisan wala makahibalo sa sangpotanan. Kon kamo nangita og tabang o naningkamot sa pagpalambo og dugang nga pagsalig diha sa Dios, ako naglaom nga ang akong mga kasinatian makatabang kaninyo sa pag-angkon og pagsalig sa inyong kaugalingong paghimo og maisogon nga mga aksiyon bisan wala pa kamo makahibalo sa sangpotanan niini ug makaamgo sa gahom sa pag-ampo.
1. Pagkaamgo nga Ako Importante ngadto Kaniya
Sa dihang nangandam ko nga magpabunyag sa edad nga otso anyos, wala koy laing gusto kondili ang akong mga apohan nga motambong sa akong bunyag. Apan nagpuyo sila sa layo kaayo didto sa Tahiti, ug lisod alang kanila sa paghimo sa biyahe ngadto sa France sa ilang pangedaron. Niini nga punto sa ilang kinabuhi, nagtuo sila nga ang kataposang higayon nga mohimo sila sa pagbiyahe mao nga kon ang akong iyaan—kinsa dili pa minyo—magpakasal. Kini daw dili tingali mahitabo sa wala pa ang akong bunyag, apan ako nasayod nga kon ako mag-ampo, ang Langitnong Amahan motubag.
Usa ka adlaw sa simbahan, ang akong mama ug ako nakakita og usa ka lalaki nga naglingkod nga nag-inusara. Nagtinan-away kami sa usag usa ug kalit lang adunay sama nga hunahuna nga siya mahimong usa ka maayo nga pares alang sa akong iyaan! Nahitabo nga nangita usab siya og mahangtoron nga kauban, busa gisabot namo siya nga makig-ila-ila kaniya [akong iyaan].
Nagkahigugmaay sila ug nakahukom nga magminyo, ug ang akong mga apohan miadto sa France alang sa kasal ug alang sa akong bunyag!
Ang Langitnong Amahan mitubag sa akong piho nga pag-ampo sa paagi nga Siya lamang ang makahimo. Nasayod ko nga Siya dili kanunay nga motubag sa atong mga pag-ampo sa paagi nga atong gilaoman, apan Siya kanunayng motubag sa mga paagi nga nagpakita kanato kon unsa kita ka importante ngadto Kaniya.
Si Elder Taylor G. Godoy sa Seventy miingon:
“Ang Dios nakadungog sa atong mga pag-ampo ug motubag niini sa personal nga paagi. …
“Kon kita mag-ampo, kita mobati sa paghangop sa atong Langitnong Amahan.”
Ang Langitnong Amahan mamati kanato tungod kay Siya nagpakabana kanato ug sa unsay atong gihatagan og importansiya. Ang iyang mga tubag mahimong moabot sa wala damha nga mga paagi, apan kini moabot.
2. Pagkat-on sa Pagsalig sa Iyang Tukmang Panahon
Pipila ka tuig ang milabay, gibaligya sa akong mga ginikanan ang among balay. Mipadala sila og usa ka hangyo ngadto sa bangko nga hatagan kami sa kwarta nga among gikinahanglan aron makapirma sa mga papeles alang sa usa ka bag-ong balay sa laing siyudad.
Ang tanan nagpadayon sama sa giplano hangtod nga wala aprobahi sa bangko ang among hangyo. Tungod kay ang among balay karon nabaligya na, aduna na lamang kami usa ka bulan sa pagpangita sa kwarta aron makapalit og usa ka bag-ong balay, kon dili wala kami kapuy-an.
Magkauban, nagpuasa ug nag-ampo kami. Ang akong mga ginikanan miingon kanako nga kon among ibutang ang among pagsalig diha sa Dios, Siya mohatag.
Si propeta Moroni mitudlo nga, “dili kamo makadawat og pagsaksi hangtod mahuman ang pagsulay sa inyong pagtuo” (Ether 12:6).
Pinaagi niini nga pagsulay, kami adunay oportunidad sa pagsalig sa Langitnong Amahan labaw sa bisan unsa ug ni bisan kinsa. Sa kataposang adlaw sa bulan, gitugotan sa bangko ang hangyo sa akong mga ginikanan, ug among napirmahan ang mga papeles.
Kon kita makasinati og mga hagit, anaa ra kanato ang pagpakita og hugot nga pagtuo diha sa Langitnong Amahan hangtod nga Siya mopadala kanato og tubag sa Iyang panahon. Kon magpadayon kita sa pagpakita sa atong pagsalig Kaniya pinaagi sa pag-ampo, atong madapit ang Iyang impluwensiya sa atong kinabuhi.
3. Ang Pagtuo nga Siya Nakaila Kanako
Karong tuiga, kinahanglan kong mangita og usa ka internship alang sa kredito sa unibersidad. Hapit na ang deadline, apan wala koy nakit-an. Kon dili nako makit-an ang husto nga oportunidad, kinahanglan nako nga usbon ang tibuok nga tuig sa pag-eskwela. Nahilayo ako sa akong mga ginikanan, apan gitudloan nila ako kon unsa ang buhaton sa mga kahimtang nga sama niini.
Nangayo ko og tabang sa Langitnong Amahan pinaagi sa pag-ampo. Gitugyan nako ang akong kaugmaon diha sa Iyang mga kamot.
Ug tag-ana unsa? Sa paglabay sa panahon, gibutang Niya ang usa ka tawo sa akong dalan nga nagtanyag kanako og internship nga mao gayod ang akong gikinahanglan.
Ang akong mga kasinatian tingali sayon paminawon alang kaninyo, ug mura tingali kini og kanunay nakong nakakuha ang unsay akong gusto sa dihang ako nag-ampo. Apan nakahimo ako og daghang pag-ampo nga gitubag sa lahi nga paagi kay sa akong gilaoman. Ug naghulat pa gihapon ko sa uban nakong pag-ampo nga tubagon.
Apan usahay ang Dios nagpadala kanako og mga milagro nga makatabang kanako nga mopadayon ug mosalig nga ang mga butang mahimong OK ra. Busa ayaw paghunong. Salig kanunay sa Ginoo. Nasayod Siya sa unsay importante kanato, ug importante kita ngadto Kaniya.
Si Presidente Jeffrey R. Holland, Akting nga Presidente sa Korum sa Napulog Duha ka Apostoles, mitudlo, “Kon ang atong ‘pangayoon dili sayop’ [2 Nephi 4:35], walay kinutoban kon kanus-a, asa, o unsay atong iampo.”
Ang Ginoo gusto nga makadungog gikan kanato. Naghulat Siya nga kita modangop ngadto Kaniya aron Siya makatabang kanato. Tinguhaa ang Iyang tabang pinaagi sa pag-ampo, ug Siya anaa kanunay.