Gikan sa Natad sa Misyon
Unsa ang Gisulti sa mga Propeta Mahitungod sa Pagserbisyo og Misyon?
Ang mga Propeta ma bag-o man ug daan naghatag og gibug-aton sa kaimportante sa pagpakigbahin sa ebanghelyo. Ang ilang tambag ug mga pagtulun-an makatabang kaninyo diha sa inyong misyonaryo nga buhat.
Ang mga propeta kanunayng mihatag og gibug-aton sa kaimportante sa pagsangyaw sa ebanghelyo, nagsulti usab sa tawag sa Manluluwas: “Panglakaw kamo sa tibuok kalibotan ug isangyaw kining maayong balita ngadto sa tanang mga tawo” (Marcos 16:15). Gikan sa karaang mga propeta hangtod ni Presidente Russell M. Nelson, atong makat-onan ang mahitungod sa mga panalangin sa pagtudlo ug pagpakigbahin sa ebanghelyo ni Kristo.
Mahimong kasamtangan kamong nagserbisyo, naghunahuna og misyon, o nagpaabot alang sa usa ka tawag, ang mga pulong sa mga propeta mahimong usa ka kompas alang kaninyo samtang kamo maghago diha sa ubasan sa Ginoo. Ania ang pipila lang sa unsay gisulti sa mga propeta mahitungod sa pagpakigbahin sa ebanghelyo isip usa ka misyonaryo:
Isaias—Pagmantala sa Pakigdait
“Pagkatahom sa mga tiil niadtong milatas sa kabukiran aron pagwali sa maayong balita, pagmantala sa pakigdait, pagdalag kalipay ug pagsangyaw sa kaluwasan ug miingon sa Sion, Naghari ang imong Dios!” (Isaias 52:7).
Pablo—Nagwali mahitungod ni Jesukristo
“Kay ang giwali namo dili ang among kaugalingon kondili ang Ginoo nga si Jesukristo” (2 Mga Taga-Corinto 4:5).
Alma nga Batan-on—Ang Imong Kalag Mapuno sa Hingpit nga Kalipay
“Ako nasayod niana diin ang Ginoo nagsugo kanako, ug ako naghimaya niini. Ako wala maghimaya sa akong kaugalingon, apan ako naghimaya niana diin ang Ginoo nagsugo kanako; oo, ug kini mao ang akong himaya, nga unta mahimo ako nga instrumento sa mga kamot sa Dios aron sa pagdala sa pipila ka mga kalag ngadto sa paghinulsol; ug mao kini ang akong kamaya.
“Ug tan-awa, kon makita nako ang kadaghanan sa akong mga kaigsoonan nga matinud-anon nga naghinulsol, ug moduol sa Ginoo nga ilang Dios, niana ang akong kalag mapuno sa kamaya” (Alma 29:9–10).
Brigham Young—Ang Dios Motabang Kanimo sa Imong Dalan
“Malipayon ako kon ako makahibalo nga. …ang mga tawo sa matag isla ug sa dakong yuta, sa taas ug sa ubos, ang walay kahibalo ug ang may salabutan, makadawat sa mga pulong sa kinabuhing dayon, ug ihatag diha kanila ang gahom sa mahangtorong Pagkapari sa Anak sa Dios. …
“Lakaw ug isangyaw ang Ebanghelyo, sinatia, pagkat-on og kaalam, ug lakaw nga mapainubsanon sa atubangan sa inyong Dios, aron kamo makadawat sa Espiritu Santo sa paggiya ug sa pagdumala kaninyo, ug sa pagtudlo kaninyo sa tanang mga butang nga nangagi, karon, ug sa umaabot.
“Salig sa Dios, ug padayon sa pagsalig kaniya, ug siya moabli sa inyong agianan ug mopilopilo sa inyong mga panalangin nganha kaninyo, ug ang inyong kalag matagbaw sa iyang mga kaayo.”
Ezra Taft Benson—Ang Pagkugi Makadala sa Espiritu
“Walay laing mas makalipay o makatagbaw kaysa masayod, human sa tibuok adlaw nga pagtrabaho, nga atong nabuhat ang atong pinakamaayo.
“Kanunay kong moingon nga usa sa labing mahinungdanong mga sekreto sa misyonaryo nga buhat mao ang pagtrabaho! Kon ang usa ka misyonaryo magtrabaho, makabaton siya sa Espiritu; kon makabaton siya sa Espiritu, magtudlo siya pinaagi sa Espiritu; ug kon magtudlo siya pinaagi sa Espiritu, matandog niya ang mga kasingkasing sa mga tawo ug magmalipayon siya.”
Thomas S. Monson—OK ra nga Mabug-atan
“Ang misyonaryo nga buhat usa ka lisod nga buhat. Ang misyonaryo nga serbisyo daghan og angayng buhaton ug nagkinahanglan og taas nga oras sa pagtuon ug pagpangandam, nga ang misyonaryo mismo mohaom sa balaan nga mensahe nga iyang gipahayag. Kini usa ka paghago sa gugma apan sakripisyo usab ug debosyon ngadto sa katungdanan. …
“Ang pagsulod sa natad sa misyon usahay makaluya ug makahadlok nga kasinatian. Si Presidente Harold B. Lee nakig-istorya nako usa ka adlaw kalabot niadtong kinsa mibati og kakulang ug nabalaka sa dihang sila nakadawat og usa ka buluhaton diha sa Simbahan. Siya mitambag, ‘Hinumdomi nga kon si kinsa ang tawagon sa Ginoo, ang Ginoo mohimo kaniyang sarang.”
Russell M. Nelson—Ang Kahayag ni Jesukristo Gikinahanglan Karon
“Ang matag usa kaninyo importante ngadto sa Ginoo. Siya migahin kaninyo hangtod niining higayona aron sa pagtabang sa pagpundok sa Israel. Ang inyong desisyon sa pagserbisyo og misyon, pangsangyaw man o pangserbisyo nga misyon, makapanalangin kaninyo ug sa daghan pang uban. …
“… Ang espirituhanon nga kangitngit sa kalibotan nakapahimo sa kahayag ni Jesukristo nga wala pa sukad mas gikinahanglan kaysa karon. Ang tanan angayan nga hatagan og kahigayonan nga mahibalo bahin sa gipahiuli nga ebanghelyo ni Jesukristo. Ang matag tawo angayan nga makahibalo asa sila makakaplag sa paglaom ug sa kalinaw nga ‘[molapas] sa salabotan sa tawo’ [Mga Taga-Filipos 4:7].”
Ang pagpili sa pagserbisyo og full-time nga misyon tali ra kanimo ug sa Langitnong Amahan. Samtang ikaw mamalandong sa mga pulong sa mga propeta, hunahunaa kon unsaon nimo nga mahimong usa ka kahayag ni Kristo. Ang imong talagsaong mga gasa ug kaandam sa pagpakigbahin sa ebanghelyo makatabang sa pagdala sa uban ngadto sa ebanghelyo. Sa panahon diin daghan kaayo ang nangita alang sa katuyoan, ang imong mga paningkamot sa pagpakigbahin sa gugma ug mga pagtulun-an sa Manluluwas makahimo og usa ka lawom—ug mahangtoron—nga kalainan sa kinabuhi sa usa ka tawo.