Paggamit sa Doktrina ug mga Pakigsaad nganha sa Inyong Kinabuhi
Pagkabalaan: Unsaon Nato sa Pagpanalipod ang Atong Kaugalingon Gikan sa mga Hagit Niining Kalibotan
Ang pag-usbaw sa pagkabalaan makatabang kanato nga magpabilin nga konektado ngadto ni Jesukristo niining dili balaan nga kalibotan.
Kami nakabaton og kahigayonan sa pagserbisyo isip mga lider sa misyon didto sa Chile 10 ka tuig nang milabay. Bag-ohay lang, usa sa among mga misyonaryo mibisita namo samtang nagbiyahe sa Utah uban sa iyang pamilya. Mahinamon kami nga makakita kaniya pag-usab ug mahimamat ang iyang pamilya. Sa dihang nanglingkod kami, gisugdan namo pagsaysay ang among mga nahinumdoman nga mga leksiyon nga nakat-onan ug ang mga panalangin nga gihatag sulod sa duha ka tuig nga kami nag-uban sa pagserbisyo.
Sa hapit nang matapos ang panag-istorya, among gihisgotan ang usa sa labing talagsaong mga leksiyon nga among nakat-onan: ang panginahanglan sa “pagbarog diha sa balaan nga mga dapit” (Doktrina ug mga Pakigsaad 45:32)—ang panginahanglan sa pagpanalipod sa atong mga kinabuhi gikan sa mga tintasyon ug mga impluwensiya sa dautan nga nagpalibot kanatong tanan sa matag habig ug sa pagtukod og personal nga santuwaryo ug mga kadangpang alang sa atong mga kinabuhi.
Dinhi niini nga hilisgotan nga ang among minahal nga misyonaryo nangutana og importanteng pangutana. Miingon siya:
“Ingon ka bililhon isip usa ka full-time nga misyonaryo ang pagtutok lang diha sa pagtulun-an sa doktrina ni Kristo ug sa pagserbisyo sa uban. Apan karon, ang pagpuyo sa nagkadautan nga kalibotan nga puno sa kasungian, kasilag, ug tintasyon, mas nagkalisod ang pagpangita og usa ka balaan nga dapit, labi pa gyod ka lisod ang pagbarog niini, ilabi na nga duna nay pamilya nga atimanon. Ingon og walay paagi nga makalingkawas sa dautan nga naglibot kanato. Gibati nako nga natanggong, walay paagi nga makagawas sa kasamok sa kalibotan karon.
“Unsaon nako sa pagpanalipod sa akong pamilya gikan sa dautan diha sa kalibotan kon ang balaan nga mga dapit lisod kaayo nga makit-an? Unsaon nako sila sa pagtudlo aron mamahimong mga disipulo ni Kristo—mosunod sa Espiritu ug mobarog diha sa balaan nga mga dapit?”
Niining puntoha sa panag-istorya, gibati namo ang kadasig.
Ang Kapasilongan sa usa ka Panimalay ug sa Pamilya
Mihangyo kami sa among kanhi misyonaryo ug sa iyang pamilya sa pagkuyog kanamo nga molakaw og kadiyot libot sa among nataran. Gipakita namo sila sa usa ka gamay nga kahoy, hapit tulo ka pye ang gitas-on, ug mipasabot nga ang gamayng kahoy nabantang sa tanang bugnawng hangin ug nyebe nga mahimong mahapak niini gikan sa bukid. Tungod niana nga rason, ang tubo niini nasawot, ug ang dagway niini gusbaton ug laspag.
Dayon milakaw kami ngadto sa usa ka dapit sa among nataran nga protektado gikan sa mga unos pinaagi sa lig-on nga mga paril sa among panimalay. Ang among panimalay nagsilbing panalipod gikan sa mga unos ug mga alimpulos sa milabay nga katuigan, nagtugot sa mga kahoy ug mga bulak sa paglipang ug paglambo. Ang labihan nga nakapamulak nga kahoy niining bahin sa nataran, uban sa maanindot nga mga sanga ug namukhad nga mga buwak, susama sa laspag, daut nga kahoy sa dihang amoa pa kining gitanom nianang samang adlaw kapin na sa duha ka dekada.
Ang kapasilongan sa usa ka panimalay ug pamilya mahimong maglangkob sa usa ka “balaan nga dapit” nga gikinahanglan natong tanan. Kami nagpamatuod nga ang panimalay, hugot nga pagtuo, ug ang pamilya makasangkap og mga oportunidad alang sa paglambo ug kaugmaran nga nasinati sa matahom nga kahoy diha sa among atubangan. Ang unoson nga mga panahon seguradong moabot, apan kon kita ug ang atong mga pamilya adunay usa ka kapasilongan ug santuwaryo sa hugot nga pagtuo diha ni Jesukristo ug sa Iyang gipahiuli nga ebanghelyo, kita molipang ug molambo ug kita “dili mabalhin” (Doktrina ug mga Pakigsaad 45:32).
Kadangpan gikan sa Kagubot ug Tintasyon
Si Elder Gerrit W. Gong sa Korum sa Napulog Duha ka Apostoles mipakigbahin og makapadasig nga mga hunahuna mahitungod sa kaimportante sa pagdala og kabalaan diha sa atong mga kinabuhi. Miingon siya: “Ang atoa mao ang ebanghelyo sa hingpit nga kalipay ug pagkabalaan sa matag adlaw nga kinabuhi. Ang pagkabaalaan mopahimutang sa mga butang alang sa sagrado nga katuyoan. Apan ang pagkabalaan nagdapit usab kanato sa paggamit sa inadlaw nga pagpakabuhi kauban sa sagrado—sa pagmaya sa inadlaw nga panalangin, sama sa mana, taliwala niining mga problema ug mga hagit sa kalibotan.”
Kon kamo gustong molipang, seguroa nga inyong gitagamtam ang panalipod nga gihatag pinaagi sa dalan sa pakigsaad sa Ginoo. Siya kanunay nga mogiya kaninyo sa pagbarog diha sa balaan nga mga dapit, pinaagi sa kalihokan sa simbahan, makahuluganong mga serbisyo, ug sa templo. Ang unoson nga panahon sa politikanhong kagubot ug ang mga pagsakit sa tintasyon mopadayon sa pagtuyok sa inyong palibot, apan kamo makakaplag og kadangpan diha sa giya sa mga propeta, manalagna, ug tigpadayag ug sa Balaang Espiritu.
Tinuod gayod, ang “panagpundok nganha sa yuta sa Zion, ug sa iyang mga stake, alang sa usa ka panalipod, ug alang sa usa ka dangpanan gikan sa unos, ug gikan sa kaligutgut sa higayon nga ibu-bo kini nga walay pagpugong diha sa tibuok yuta” (Doktrina ug mga Pakigsaad 115:6).
Kon dapiton ninyo ang Ginoo ug ang Iyang pagkabalaan diha sa inyong kinabuhi, kamo walay angay nga kahadlokan.