Gikan sa YA Matag Semana

Sa Unsang Paagi ang Pagbati sa Gugma sa Dios Makausab sa Inyong Pamaagi sa Pagsulod sa Pagpakig-date

Ni Julie Balkman

Ang sama kang Kristo nga gugma makatabang kanato sa paghigugma sa atong kaugalingon, nga makatabang kanato sa mas maayo nga paghigugma sa uban.

usa ka paghulagway sa usa ka babaye nga nagpahiyom ug naggunit og kasingkasing

Kon hisgotan ang pagpakig-date, sugdi sa gugma.

Maingon og bali kini, di ba? Ang gugma mosunod ra!

Apan daghang mga tawo nga gustong nang mosinati sa pakig-date kinahanglan nga moila nga sila gihigugma sa Langitnong Amahan. Dayon mas masangkapan na sila sa pagpakita og gugma ngadto sa uban.

Pagdawat sa Iyang Gugma

Atol sa labing lisod nga punto sa akong kinabuhi, mihalad ko og mapangaliyupoong pag-ampo sa Langitnong Amahan. Nakadawat ako og makatingala nga tubag: “Gusto ko nga madawat nimo ang Akong gugma.”

Sa kalit lang ug sa hilabihan akong nasayran ang Iyang gugma. Anaa lang kini sa akong palibot!

Sa wala madugay, samtang nagbasa ko sa mga kasulatan mahitungod sa gugmang putli ug sa putli nga gugma ni Kristo, miabot ako sa bag-ong panabot: “Kon kamo walay gugmang putli, kamo walay kapuslanan” (Moroni 7:46). Nianang higayona, nakaamgo ko nga kinahanglan nakong makadawat ug mopakigbahin sa gugma sa Dios.

Kon tinuoray kang nasayod nga ikaw gihigugma sa Dios, tingali makahimo ka sa pag-adto sa maong pakig-date nga menos ang kabalaka. Tingale makaangkon ka og dugang nga seguridad sa pagkahibalo nga ikaw gihigugma nang daan. Imbis makig-date tungod sa kahadlok o kawalay kaseguroan, tingali mobati ka nga sa emosyonal nga paagi anaa ka aron makipag-ilaila sa usa ka tawo.

Ang pagbati nga gihigugma makatabang nimo sa pag-usab sa pamaagi sa imong pagpakig-date. Makatabang kini kanimo sa pagbag-o sa imong kinaiya nga naghunahuna lang sa kaugalingon nga nag-ingon nga “importante kanako kon unsay imong gipabati kanako” ngadto sa mahigugmaong, kinaiya nga gustong makig-ila-ila nga nag-ingon “importante kanako kon unsay imong gibati.”

Nakita ba ninyo ang kalainan tali niining duha ka kinaiya?

Ang gugma sa Dios magdala og kamasaligon, kalinaw, ug katin-awan sa kanunayng komplikado ug makalibog nga kalibotan sa pakig-date. Ang usa ka tawo nga puno sa gugma sa Dios mas makaila niadtong ilang gika-date.

usa ka paghulagway sa usa ka babaye nga nagpahiyom ug nagtunol og usa ka kasingkasing ngadto sa usa ka tawo

Pagpakigbahin og Kristohanon nga Gugma

Ang pagpakigbahin sa Kristohanon nga gugma tingali kiwaw sa sinugdanan—daghan nga single adult naglaom na daan nga sukdon sila diha sa pagpakig-date, di dayon higugmaon ug dawaton. Ang uban nagtuo nga kinahanglan silang maghago aron higugmaon ug dawaton, nga maoy maghimo niana nga gugma ug pagdawat nga may kondisyon ug may balos.

Apan gidisenyo kamo nga mahimong tigdawat ug tighatag sa gugma.

Si Elder Patrick Kearon sa Korum sa Napulog Duha ka Apostoles mitudlo: “Ang atong mahigugmaon nga Amahan midumala sa Paglalang niini gayod nga yuta alang sa pagpadayag sa katuyoan sa paghatag og oportunidad alang kaninyo ug alang kanako … sa paggamit sa atong hinatag sa Dios nga moral nga kabubut-on sa pagpili Kaniya, aron makakat-on ug molambo, sa paghimo og mga sayop, sa paghinulsol, sa paghigugma sa Dios ug sa atong silingan, ug aron usa ka adlaw mobalik pauli ngadto Kaniya.”

Kita “nagpili Kaniya” kon kita nagpakigbahin sa Iyang gugma.

Pagpakigbahin og Balaanong Gugma atol sa Pagpakig-date

Busa karon nahibalo ka na sa gahom sa pamaagi sa pagsulod sa pagpakig-date gamit ang Kristohanon nga gugma. Apan, kon naglibog ka kon unsaon sa paghimo niana sa aktwal, aniay pipila ka makatabang nga paagi sa pagsugod:

Mopahayag og tinuoray nga interes ug maminaw sa unsay isulti sa imong ka-date.
Mopahayag og pasalamat sa kaandam sa imong ka-date nga makigkita ug mogahin og panahon nga magkauban.
Pagmabination ug pagmatinahoron sa inyong tibuok nga pag-date.
Magbaton og tinguha nga makapalambo og gugmang putli ug mag-ampo alang sa tabang nga “kamo unta mapuno niini nga gugma” (Moroni 7:48).
Pagmatinuoron mahitungod kon si kinsa ka. Pipila ka butang nga makatabang nga motubo ug molambo ang gugma aron mas mahimong tinuod. Wala kini magpasabot nga ihisgot ang tibuok sugilanon sa imong kinabuhi ngadto ni bisan kinsa nga maminaw, apan isulti lang ang kamatuoran mahitungod sa imong kaugalingon kon ang kahigayonan moabot. Ayaw pamakak nga ganahan ka og sushi kon dili ka ganahan niini, o magpakaaron ingnon nga kalma kon sa tinuod ginerbyos ka, o ipaila ang imong kaugalingon sama sa usa ka tawo nga dili man ikaw. Ang kamatinuoron moagni og kamatinuoron. Ang balaanon nga gugma maghatag kanimo og kaisog sa pagpakatinuod sa imong kaugalingon.

Si Elder Ulisses Soares sa Korum sa Napulog Duha ka Apostoles mitudlo: “Usa sa labing klaro nga mga timailhan nga kita mas nagpaduol ngadto sa Manluluwas ug mas mahisama Kaniya mao ang mahigugmaon, mapailobon, ug mabination nga paagi nga kita motagad sa atong isigkatawo, bisan unsa pa ang mga kahimtang.”

Kon dugangan nimo ang imong abilidad sa pagbati og gugma ug gugmang putli sa imong kaugalingon ug sa uban, ikaw mahimo nga mas maayong disipulo ni Jesukristo. Mag-awas-awas ang imong gugma, ug ang imong mga pakigrelasyon mamarkahan sa Kristohanong gugma.