Gikan sa YA Matag Semana
4 Ka Butang nga Hinumdoman Kon Magsinati Ka og Kamabalak-on sa Pakigrelasyon
Akong naamgohan nga bisan og nahadlok ko, ang Dios misalig kanako sa paghimo og desisyon nga magminyo.
Dili kini maoy akong gihunahuna kon unsay bation kon masayoran.
Ang akong pamanhonon usa ka matarong, takos, ug buotan. Mainampoon namong gikonsiderar ang desisyon nga magminyo. Apan bisan unsay akong buhaton, dili nako mabaliwala ang hilabihan kamabalak-on nga pagbati.
“Unsa kaha kon dili siya ang tawo nga alang kanako?” Naghunahuna ko. “Unsa kaha kon akong maguba ang plano sa Langitnong Amahan alang kanako pinaagi sa paghimo og sayop nga pagpili?”
Sa ubang adlaw ang pagkabalaka ingon og labihan ka lisod nga latason.
Kon ang pakigminyo sa akong pamanhonon maoy husto, nganong mibati man ko og ingon niini? Buot ba sa Dios nga mosulti kanako nga kinahanglan dili ko makigminyo kaniya?
Sa kadugayan akong nahibaloan nga nagsinati ko og kamabalak-on sa pakigrelasyon, nga naghimong lisod sa pagbati og kalinaw mahitungod sa akong pagpili. Kon mahimo lang akong mobalik ug makig-istorya sa akong mabalak-on, gisayoran nga kaugalingon, aniay pipila ka butang nga akong isulti.
Ang matag sugilanon sa paghigugmaay managlahi, ug OK ra kana.
Nahinumdom ko nga mibati nga nagmahay nga mibasa sa mga post sa social media sa akong mga higala mahitungod sa ilang pagkasinayoran. “Labing sayon nga pangutana sukad!” miingon sila. “Wala gyod ko magduha-duha bisag kadiyot lang nga siya ang tawo para sa akoa!”
Kinahanglan kong magkat-on nga ang pagpanlimbasog sa kamabalak-on wala magpasabot nga ang among paghigugmaay dili tinuod—o nga ang Dios wala maggiya kanamo.
Sa kataposan dili maoy mahinungdanon kon sa unsa kadali kaming nagkahigugmaay o unsa kasayon namong gihimo ang desisyon nga magminyo. Ang mahinungdanon mao nga kon sa unsang paagi kami milambo latas sa lisod nga mga panahon. Ug ang makakita sa akong pamanhonon nga nahigugma nako diha sa labing lisod, mabalak-ong panahon sa akong kinabuhi nagmatuod nga siya tinuoray ug mapasaligon gayod.
Ang mga pagbati sa kahadlok ug kabalaka wala maggikan sa Espiritu.
Ang pipila ka butang nga nakatabang kanako sa pagpadayon mao ang pagkat-on unsaon sa pag-ila kon kanus-a ang Espiritu nakigsulti kanako—ug kon kanus-a ang kamabalak-on nagtanom og mga ideya sa akong hunahuna. Dihang mibati ko nga wala mahimutang kabahin sa pagpakasal sa akong pamanhonon, naggikan ba kana sa Dios? O gikan lang ba sa kaugalingon nakong mga kahadlok?
Ang Mga Taga-Galacia 5:22 nag-ingon, “Ang bunga sa Espiritu mao ang gugma, kalipay, kalinaw, pailob, pagkamapuangoron, pagkamaayo, pagkamatinumanon” Kon maghunahuna ko sa mga panahon sa akong kinabuhi dihang ang Dios nakigsulti kanako pinaagi sa Iyang Espiritu, kanunay kining giubanan sa mga pagbati sa pag-awhag, kamalinawon, ug kadasig. Wala gayod siya mohimo kanako nga mahadlok o mataranta.
Nahibaloan sab nako nga ang padayon nakong gibati nga pagka dili mahimutang usa diay ka sintoma sa klinikal nga pagkamabalak-on. Ug samtang ang espirituhanong mga pag-aghat sa kasagaran hilom ra ug kalma, ang akong kamabalak-on labihan ang kalanog. Pinaagi sa paggamit sa pangbuntog nga mga estratehiya sa pagkontrola sa mabalak-on nakong mga hunahuna, mas maayo nakong nahimo ang pagpakalma sa akong hunahuna ug namatikdan ang hilom nga mga pag-aghat ug kapaneguroan sa Espiritu Santo.
Bisan og kadtong mga gutlo sa kalinaw usahay talagsa ra, ang pagsulat niini nakatabang. Usahay magbutang ko og ipapilit sa samin nga pahinumdom sa akong kaligoanan nga sulatan og kasulatan nga maghatag nako og kahupayan. Sa ubang panahon isulat nako sa akong journal ang mahitungod sa espesyal nga kakalma nga akong gibati human sa kinasingkasing nga pag-ampo. Ang akong pamanhonon ug ako gani mirekord og mga bidyo diin naghisgot kami mahitungod sa mga gutlo dihang kaming duha mibati og kalinaw mahitungod sa pagminyo. Kon nahadlok ko, tan-awon namo kini aron mahinumdom giunsa kami sa paggiya sa Dios sa among nahimutangan.
Ayaw kahadlok sa pagpangayo og tabang.
Dihang ang akong kamabalak-on misangpot na sa labihan kagrabe, akong nahinumdoman ang pagbati nga ingon og ang Langitnong Amahan mitalikod kanako. Nagbasa ko sa mga kasulatan, miadto sa templo, nagpuasa, ug nag-ampo, bisan pa mibati gihapon ko og kahadlok. Nganong wala man ako Niya tabangi og mas labaw pa?
Sa paghinumdom, akong nakita nga Siya mitabang kanako—apan sa kasagaran pinaagi sa uban. Gitabangan Niya ako pinaagi sa akong maalamon nga bishop kinsa naminaw ug misugyot nga makigkita ko og usa ka magtatambag sa mental nga kahimsog. Gitabangan ako sa Dios pinaagi sa akong terapista, kinsa mihatag og propesyonal nga mga panglantaw ug mga paagi nga akong magamit sa pagsugakod. Wala madugay, nakadawat ko og tabang pinaagi sa usa ka doktor kinsa mirekomendar nga sulayan nako ang medikasyon alang sa akong kamabalak-on.
Ang Dios mitabang sab kanako pinaagi sa mga sakop sa pamilya kinsa nakaila ug nahigugma kanako. Dihang nakigsulti ko sa akong pamanhonon mahitungod sa akong pagbati, nakadawat ko og paghupay gikan sa iyang pagsabot ug pagsuporta usab. Ug nakakaplag ko og kahupayan nga nahibalo nga ang akong Manluluwas nakasabot kanako sa hingpit gayod ug anaa alang kanako atol sa akong labing lisod nga mga panahon.
Ang Dios misalig kanimo sa pagpili.
Bisan pa sa tanang hilom nga mga pag-aghat sa kaseguroan, ang akong kamabalak-on nagduot kanako sa panghinaot nga unta duna koy mas klarong tubag. Sa gihapon akong makita ang akong kaugalingon nga mag-ampo nga ang kalangitan moabli ug nga ang Dios mopadala og dili masaypan nga timailhan nga ang akong pamanhonon mao ang husto nga tawo nga pakaslan.
Apan wala kana mahitabo.
Kondili, akong nakat-onan nga ang Dios misalig kanako sa paghimo sa desisyon. Bisan unsa man kadako ang akong gusto nga sultihan na lang ko Niya unsay buhaton, ang pagpili mag-agad ra gihapon kanako.
Si Presidente Thomas S. Monson sa makausa mipakigbahin niini nga tambag: “Pilia ang imong higugmaon; higugmaa ang imong gipili.”
Sa kataposan akong gipili nga magpakasal sa akong pamanhonon. Naselyo kami sa templo sa usa ka matahom nga panahon sa ting-init.
Pangpaguba nga pahimatngon: Ang akong kamabalak-on wala dayon mawala sama sa madyik.
Padayon kong nakigkita sa akong terapista, nagtumar sa akong tambal, nagtinguha og espirituwal nga giya, ug nakigsulti sa akong bana mahitungod sa akong mga hagit. Ug paglabay sa panahon, mas maayo na ang akong gibati.
Ganahan ko niini nga mga pulong gikan ni Elder David A. Bednar sa Korum sa Napulog Duha ka Apostoles: “Kon kamo ug ang inyong asawa pabiling magmakanunayon diha sa dalan sa pakigsaad, makaangkon kamo og langitnong tabang sa pagmugna sa kaminyoon nga inyong gipanghinaot nga maangkon.”
Ang akong bana ug ako karon naminyo na sulod sa lima ka tuig. Ang kinabuhi dili hingpit, apan malipayon kaayo kami. Mapasalamaton kaayo ko nga akong gipili nga molihok ako uban sa pagtuo bisan sa akong kamabalak-on.
Kon ikaw nagsinati og kamabalak-on sa pakigrelasyon, duol ngadto sa Ginoo, sa propetikanhong giya, sa inyong mga lider sa Simbahan, ug kon gikinahanglan, sa propesyonal nga mga kapanguhaan alang sa tabang. Ang Langitnong Amahan dili gayod motalikod kanimo. Siya mogiya kanimo. Ug samtang maningkamot ka sa pagsunod Kaniya, Siya mohatag kanimo sa kaisog sa pagsalig sa imong abilidad sa paghimo og maayong mga desisyon.