Alang sa mga Inahan sa Gagmayng mga Bata
Naghunahuna ko nga Dili Ko Makahisgot mahitungod sa Akong mga Hagit Tungod kay Adunay Pipila “Nga Nagsagubang og Mas Labaw Pa Niini”
Ang pagpahayag ba sa mga kalisdanan sa akong pagmabdos maghimo kanakong dili mapasalamaton?
Ang pagsuka-suka nahitabo kanako mga dapit sa ikalimang semana sa akong pagmabdos. Gawas lang nga dili lang kini kay mabuntag lang mahitabo.
Padayon gayod kini. Ang bugtong nakong kahupayan mao ang panahon nga ako matulog na.
Apan susama sa kalisod sa pisikal nga akong giatubang mao usab ang kalisod sa mental nga akong gisagubang.
Ang pagbati ba nga miserable ug kadili malipayon naghimo ba kanakong dili mapasalamaton alang sa nagtubo nga masuso diri sa sulod kanako? Pwede ba ako nga magtinguhang matapos ang akong pag-antos samtang ang ubang kababayen-an nga akong nailhan dili gani makaanak o nag-antos nga mamatyan?
Mibati akong sad-an sa pagpahayag og bisan unsang pagbati sa kasakit, kalisod, o kaluya—sa pisikal o emosyonal—kon akong ikompara ang akong mga hagit ngadto sa uban.
Apan wala madugay akong naamgohan nga sayop ang tanan nakong pagsabot sa mga butang.
Ang Kagul-anan agig Pagkompara
Usa sa labing lisod nga mga butang mahitungod sa pagkainahan niining mga panahona mao ang padayon nga pagpamugos sa pagkahingpit, nga maghatod kanato sa pagkomparahay sa usag usa. Ang nagkompetensiyahay nga mga tingog gikan sa media, mga silingan, o pamilya modala kanato sa pagduda sa atong bili o potensiyal isip mga inahan, sa pagtan-aw sa atong mga kaugalingon nga mas ubos tungod kay dili kita sama og sumbanan sa uban, ug sa kataposan dili mohatag og bili sa gugma ug paningkamot nga atong gigahin sa pagkainahan.
Apan kinahanglan nga motuo ako nga dili kini mao ang gusto sa atong balaan nga Tiglalang alang kanato.
Si Presidente Jeffrey R. Holland, Akting nga Presidente sa Korum sa Napulog Duha ka Apostoles, nagpahinumdom kanato, “Wala kita sa kontest kon si kinsa ang pinakadato o ang pinakadaghan og talento o pinaka maanyag o gani ang pinakadaghan og panalangin.”
Wala usab kita sa usa ka kompetisyon sa pagsusi kon si kinsay adunay labing ngil-ad! Atol sa subo nga mga oras sa akong pagmabdos, mibati ko nga makasulti lamang og kalipay ug kapositibo ngadto sa mga nanglimbasog nga akong nahukman nga mas grabe kay sa akoa. Sa tinuod, mibati ko og kasubo ug kawalay paglaom, naghunahuna kon igo ba ang akong kalig-on nga mahimong inahan. Kini nga pagkompara naghimo kanakong mas masub-anon.
Apan sigon sa giingon ni Elder Claudio D. Zivic sa Seventy: “Managlahi ang atong mga kinabuhi. Kitang tanan adunay panahon sa pagsulay, sa kalipay, sa pagdesisyon, sa pagbuntog sa mga babag, ug pagpahimulos sa mga oportunidad.”
Ang atong mga kasinatian managlahi ug busa malisod sa managlahi nga paagi. Atong maila ang kalisod sa atong sitwasyon ug sa uban nga walay pagsukod kanila batok sa usag usa.
Mahimo Kamong Mobati sa Duha
Mihukom ko nga ihisgot ang akong mga pagbati ngadto sa usa ka terapista, ug natudloan niya ako og usa ka makausab sa kinabuhi nga kamatuoran mahitungod sa mga emosyon:
Mahimo kitang mobati og daghan nga emosyon sa sama nga higayon.
Human makasaksi og mga gubat ug panagbingkil tali sa mga Nephita ug mga Lamanita, si propeta Alma misulat, “Ug sa ingon kita nakasabot sa dako nga katarongan sa kasubo, ug usab sa paglipay—kasubo tungod sa kamatayon ug kalaglagan taliwala sa mga tawo, ug hingpit nga kalipay tungod sa kahayag ni Kristo ngadto sa kinabuhi” (Alma 28:14).
Ang mga Nephita nagsinati og mga pagbati sa kasubo ug kalipay.
Akong naamgohan nga posible kanako nga mobati og kasagmuyo mahitungod sa akong mga pagsulay samtang mobati usab og kamapasalamaton nga ako mabdos.
Si Elder Dieter F. Uchtdorf sa Korum sa Napulog Duha ka Apostoles mitudlo:
“Kon kita magmapasalamaton sa Dios diha sa atong mga kahimtang, makasinati kita og kalinaw taliwala sa kalisdanan. Sa kasubo, makabayaw gihapon kita sa atong kasingkasing diha sa pagdayeg. Sa kasakit, kita makahimaya diha sa Pag-ula ni Kristo. …
“Ang pagkamapasalamaton panahon sa kasakit wala magpasabot nga nahimuot kita sa atong mga kahimtang. Nagpasabot kini nga pinaagi sa mga mata sa hugot nga pagtuo naglantaw kita lapas sa atong mga hagit karon.”
Matugotan nato ang atong mga kaugalingon nga mobati sa atong tanan nga emosyon samtang ikapahayag usab nato ang pasalamat sa Dios sa Iyang mga panalangin ug kaluoy.
Ang Manluluwas Nag-antos alang Kanatong Tanan
Dihang ang Manluluwas nag-antos atol sa Iyang Pag-ula, wala siya magpili gikan sa tanan nga pagsulay ug mga kasinatian nga atong maagian, wala pilia ang sa Iyang hunahuna labing lisod, ug mao lamang ang antoson. Iyang giantos ang tanan niini.
Naglakip kini, sigon sa giingon ni Elder Zivic, “sa atong mga sala, kasakit, depresyon, kaguol, balatian, ug kahadlok, ug busa Siya nasayod unsaon sa pagtabang kanato, unsaon sa pagdasig kanato, unsaon sa paghupay kanato, ug unsaon sa paglig-on kanato aron kita makalahutay ug makabaton og korona nga gitagana alang niadtong kinsa wala nabuntog.”
Ang Pag-ula ni Jesukristo walay kinutoban. Samtang sagubangon nato ang mga kalisdanan sa kinabuhi ug ang mga maayo ug mga dili maayo sa pagkainahan, atong ipahayag ang walay utlanang pasalamat ngadto sa atong Manluluwas, ubanan man sa mga luha o sa kalipay, ug modasig sa uban.