Paggamit sa Doktrina ug mga Pakigsaad nganha sa Inyong Kinabuhi
Unsay Akong Buhaton Kon Ako “Mahunong ” diha sa Usa ka Pangutana sa Ebanghelyo?
Pinaagi sa pagpili aron sa pag-angkon og pailob sa unsay wala pa nato hisabti, atong gitugotan ang Espritu sa pag-usab sa atong mga kasingkasing.
Bisan unsa pa ikaw kamaayo, dili malikayan nga masugatan nimo ang mga butang nga dili gyod nimo masabtan.
Usa ka makalipat nga problema sa math. Usa ka komplikadong tudling sa literaryo. Ang hinungdan kon nganong dunay nagkagulkol sa imong sakyanan. Ang lista nagpadayon.
Usahay, sa gamay lang nga buhat sa paningkamot, makakaplag ka na og tubag. Apan usahay, ingon og kon ang pangutana palabihan nimo sa pagtuon ug pag-ugkat, mas mominos ang imong masabtan. Mao kanang higayona nga mobati ka nga mahunong.
Ang ingon niana nahitabo na ba kanimo sukad sa ebanghelyo? Tingali sa usa ka doktrina nga naglisod ka, o sa palisiya nga ingon og walay hinungdan kanimo, o gani sa usa ka reyalidad sa kaugalingon nimong kinabuhi nga ingon og dili haom sa unsay imong nahibaloan mahitungod sa Dios ug sa Iyang plano. Usahay ang usa ka ideya ingon og lisod kaayong sabton o dawaton. Sama sa usa ka ingkit nga dako ra kaayong lamyon.
Ingon gayod niini ang unsay nasugatan sa pipila ka sakop sa Simbahan dihang nadawat nila ang pagpadayag nga gihatag diha sa Doktrina ug mga Pakigsaad 76 mahitungod sa mga ang-ang sa himaya. Kadaghanan kanila nagtubo nga adunay klaro kaayong konsepto sa kalainan sa langit ug impyerno. Alang kanila, ang ideya nga hapit tanan kanila mabanhaw ngadto sa gingharian sa himaya ingon og dili patas. Wala kini mohaom sa ilang konsepto bahin sa kinaiyahan sa Dios. Gani si Brigham Young naglisod sa maong pagpadayag tungod kay “sukwahi kaayo kini ug supak sa [iyang] kanhi edukasyon” ug “nagkinahanglan kini og kaugalingon [niyang] pagpamalandong.”
Paghimo og Importanteng Desisyon kabahin sa Pangutana
Kon “mahunong” kita diha sa usa ka pangutana sa ebanghelyo, moabot kita sa punto sa atong kinabuhi nga nanginahanglang mohimo og importanteng desisyon kabahin sa atong pagtuo.
Alang niadtong nanag-unang mga Santos, ang pagpadayag usa ka hitabo alang sa pagduhaduha. Sama sa mga disipulo sa Manluluwas kinsa wala makaagwanta sa pagpamati sa “labihan kalisod nga gitudlo,” sila “mibiya ug wala na mokuyog kaniya” (Juan 6:60, 66).
Apan ang uban kinsa sa sinugdanan nagmaduhaduhaon midawat niining bag-ong kahibalo uban sa kalipay. Busa unsay naghimo og kalainan? Ngano man nga kini nga pagpadayag miguba sa pagtuo sa ubang tawo apan milig-on sa uban?
Kining tanan mag-agad kon giunsa niadtong mga tawhana sa pagpili kon unsaon sa pagsanong kon hagiton ang ilang espiritwal nga panabot. Dihang nadungog niya sa unang higayon ang mahitungod sa pagpadayag, miingon si Brigham Young, “Hulat lang og kadiyot. Wala ko kini isalikway; apan wala ko makasabot niini.” Pinaagi sa pag-ampo, pagtuon, ug pagpili sa pagbaton og pailob sa unsay wala pa niya hisabti, gitugotan niya ang Espiritu sa pag-usab sa iyang kasingkasing ug sa pagpamatuod sa kamatuoran.
Sa Basahon ni Mormon, gikumpara ni Alma ang pulong sa Dios ngadto sa usa ka binhi. Kon dawaton nato kini nga binhi sulod sa atong mga kasingkasing, makapili kita nga kini “ilabay tungod sa [atong] pagkawalay pagtuo” o maghulat lang og kadiyot, sama ni Brigham Young, ug tan-awon “kon kini usa ka tinuod nga liso, o usa ka maayo nga liso” (Alma 32:28). Misaad si Alma nga kon kita mogamit sa atong pagtuo ug magpaabot, niana ang liso motubo sa sulod kanato ug “[mopalambo] sa [atong kalag],” “modan-ag sa [atong] salabotan,” ug “pagpahimuot” kanato.
Mao kini ang kasinatian sa daghang matinud-anong mga Santos kinsa mipili sa pagtinguha sa giya sa Ginoo. Gihulagway ni Brigham Young kon sa unsang paagi human sa daghang pagpamalandong ug pag-ampo, sa kataposan iyang “nasayran ug hingpit nga nasabtan kini sa [iyang kaugalingon].” Sa usa ka hingpit nga ehemplo bahin sa pagtulun-an ni Moroni diha sa Ether 12:6: nakadawat siya og usa ka pagsaksi human sa pagsulay sa iyang pagtuo.
“Pangayo kamo, ug Hatagan Kamo”
Ang Ginoo nagsaad, “Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan” (Mateo 7:7). Dili kini kay usa lamang ka sugyot: usa kini ka sugo sa Ginoo, ug naggikan kini sa segurado nga saad nga Siya motubag.
Kini ug ang susamang mga sugo gibalikbalik sa tibuok mga kasulatan. Ang Ginoo padayon nga nagdapit kanato sa pagdala sa atong labing lisod nga mga pangutana ngadto Kaniya. Wala Siya mohangyo kanato nga basta lamang dawaton ang unsay wala nato hisabti. Kon kita mobuhat niini uban sa pailob ug patuo ug padayon nga moserbisyo sa Ginoo, misaad Siya nga “mopadayag sa tanang misteryo, … gani [sa] mga kahibulongan bahin sa kahangtoran” (Doktrina ug mga Pakigsaad 76:7–8).
Sa personal, may dagko akong mga pangutana nga sa gihapon ako walay mga tubag, bisan human sa mga katuigan sa pag-ampo ug matinguhaong pasiksik. Apan wala kana magpasabot nga ang Dios mibaliwala sa akong pagpanuktok. Akong makita ang Iyang kahayag diha sa mga pagtulun-an nga Iyaha nang gipadayag. Akô Siyang mabatyagan uban kanako, nagtabang sa pagsakwat sa mga kabug-at, sa panahon nga malisod na ang pagsakwat nga mag-inusara.
Samtang padayon akong naghangyo, nagsiksik, ug nanuktok, mabatyagan nako ang gamayng liso nga migitib sulod sa akong kasingkasing. Ang akong mga pangutana miinat kanako, usahay sa sakit nga paagi, apan naghatag kana kanako og mas dugang nga lawak sa pagtubo—sa panabot, sa kaalam, sa pagtuo, sa kasuod ngadto sa akong Amahan sa Langit. Wala ako sa tanang tubag, apan wala ko mobati nga nahunong. Mibati ko og paglaom “sa kanindot sa kabubut-on [sa Ginoo],” ug nagasalig ako nga kon ako andam na, siya mohatag kanako “niini nga kahigayonan sa pagtan-aw ug pagkahibalo alang sa [akong kaugalingon]” (Doktrina ug mga Pakigsaad 76:7, 117).