Gikan sa YA Matag Semana
3 Ka Paagi nga Imong Mahimo ang Imong Ward nga Imong Pamilya
Kon nagpangita ka og mga higala ug koneksiyon, pangita diha sa inyong mga miyembro sa ward.
Ang koneksiyon ug panaghigalaay usahay morag lisod kab-oton.
Apan kon nagpangita ka man og mohangtod nga paghigalaay, makadawat og espirituwal nga kalig-on, o mopakigbahin sa imong mga talento, makatukod ka og usa ka komunidad sa pagsuporta diha sa imong ward family.
Si Elder David L. Buckner sa Seventy miingon: Nakasabot ko sa deklarasyon sa Manluluwas ‘kamo ang akong mga higala’ usa ka klaro nga mensahe sa pagpalambo og mas halangdon ug mas balaan nga mga relasyon taliwala sa tanang anak sa Dios ‘nga kita magkahiusa’ [3 Nephi 19:23]. Mabuhat nato kini kon kita magtambayayong nga magtinguha og mga oportunidad sa paghiusa ug usa ka pagbati nga nahisakop alang sa tanan.’”
Aduna kitay gahom sa pagmugna og mas taas ug mas balaan nga mga kasinatian ug mga pakigrelasyon tali sa atong ward family.
Sa paghunahuna niana, aniay tulo ka paagi nga ikaw makatukod og sama og pamilya nga komunidad diha sa mga sakop sa inyong ward.
1. Maningkamot sa Pagpakig-istorya
Kon mibati ka og kasubo diha sa inyong ward, malagmit dili kay ikaw ra ang nagsinati niini. Ang koneksiyon maoy tambal sa kasubo, maong makig-istorya ka ug pakigkonektar sa mga tawo sa imong palibot. Kon mosimba ka ug moapil og mga kalihokan sa ward, pangitaa ang uban nga ingon og nagmasulob-on usab. Gamita ang mga Tools nga app aron mahibalo sa mga ngalan sa imong mga kamiyembro sa ward ug panid-i kon kinsa ang wala magtambong kanunay og mga kalihokan. Paningkamot sa pagpakig-istorya kanila ug dapita sila sa pag-apil kauban nimo. Bisan gani ang usa ka pahiyom o usa ka pagkaway sa kamot makahimo og kalainan sa mga pagbati sa usa ka tawo nga sila nahisakop.
Si Presidente Henry B. Eyring, Ikaduhang Magtatambag sa Unang Kapangulohan, miingon: “Atong nasayran gikan sa kasinatian nga ang hingpit nga kalipay moabot kon kita mapanalanginan og panaghiusa. Ang Langitnong Amahan dili mohatag niini ngari kanato isip mga indibidwal. Ang hingpit nga kalipay nga gusto kaayo Niyang ihatag kanato isip indibidwal dili ang pag-inusara. Kinahanglan ato kining tinguhaoni ug mokwalipay alang niini kuyog sa uban.”
Samtang maninguha ka sa pagpakig-istorya sa uban, ayaw kalimot sa pagpakig-istorya sa Langitnong Amahan ug mangayo sa Iyang tabang samtang maningkamot ka nga makonekta sa imong ward ug mangita og mga tawo kinsa mahimong pamilya nga imong gikinahanglan. Paglabay sa panahon, ang imong mga koneksiyon molambo ngadto sa mahangtoron nga paghigalaay.
2. Moserbisyo
Ang pagserbisyo mokonekta kanato ngadto sa uban sa espesyal nga paagi. Magtabang kini kanato nga mahimong mas mahisama kang Kristo, kinsa kanunay nga nagserbisyo niadtong mga anaa sa Iyang palibot. Si Sister Bonnie L. Oscarson, kanhi Kinatibuk-ang Presidente sa Young Women mitudlo, “Mahimong gibutang sa Langitnong Amahan kadtong nanginahanglan kanato diha sa atong duol, nakahibalo nga kita ang labing angayan nga makahimo sa pagkab-ot sa ilang mga panginahanglan.”
Wala ka diha sa inyong ward sa sulagma lamang. Ang Langitnong Amahan nasayod sa mga panginahanglan ug sa mga talento sa Iyang tanan nga anak ug mipahimutang sa inyong mga miyembro sa ward nga magkauban alang sa usa ka espesyal nga katuyoan. Samtang mangalagad ka sa inyong mga miyembro sa ward, imong makita nga dunay tawo nga nagkinahanglan kanimo ug sa imong piho nga mga gasa.
Ang sinsero nga pagserbisyo og usa ka tawo sa imong ward moabli og opurtunidad sa usa ka relasyon sa gugma, pagsalig, ug suporta.
3. Pangita og Mentor
Ang usa ka mentor moabot sa daghan nga matang ug makatabang kanimo sa pagdumala sa mga maayo ug sa mga dili maayo sa pagka-young adult. Pagkonsidera og usa ka tawo diha sa imong ward nga imong gitamod o gihimong panig-ingnan. Unsa nga mga kasinatian o mga kinaiya ang anaa kanila nga gusto nimong maangkon sa imong kinabuhi? Unsay imong makat-onan gikan kanila?
Si Elder Ronald A. Rasband sa Korum sa Napuog Duha ka Apostoles miingon: “Ang mas eksperyensyado, kasaligang indibidwal magsilbi nga epektibong giya ug tigtambag sa dili kaayo eksperyensyado nga tawo, sa pagtabang nga mahulma ang panabot nianang tawhana ug sa pagtudlo og mga baroganan nga maghimo kaniyang mas epektibo, mas lig-on, mas maalamon, ug mas bililhong sulugoon sa Dios.”
Samtang magkonsiderar ka niining mga tawhana sa imong kinabuhi, pag-ampo aron mahibaloan nimo kon kinsay imong mahangyo nga mahimo nimong mentor. Kon makahukom ka na, pagtakda og panahon sa pakigkita kanila. Moadto ka nga magdala sa mga pangutana o mga tumong nga gusto nimong makab-ot ug pangutan-a sila kon andam ba silang mag-mentor sa imoha ug motabang nimo sa pagkab-ot sa imong mga tumong.
Panagkahiusa kang Kristo
Si Elder Quentin L. Cook sa Korum sa Napulog Duha ka Apostoles mitudlo, “Ang sukaranang kinaiya sa tinuod nga pagkahisakop mao ang pagkausa ngadto ni Kristo.”
Bisan unsa pa ang mga kalainan tali kanimo ug sa ubang mga miyembro sa ward, isip mga tigtuman sa pakigsaad, makapaningkamot kang mahimong mahiusa sa usag usa ug kang Kristo.