Fakaʻilekitulōnika Pē: Kakai Lalahi Kei Talavoú
Founga Naʻe Tākiekina Ai ʻEku Tui ki he ʻOtuá ʻe ha Fakamoʻoni ʻo Siosefa Sāmita
Naʻe mole meiate au ʻeku tui ki he ʻOtuá. Pe koau naʻe molé?
ʻI he ngaahi taʻu lahi kuo hilí, naʻá ku taʻetui ʻOtua.
Naʻe fāʻeleʻi au ʻi he Katoliká, kae talu mei hoku taʻu hongofulu tupú ki hoku taʻu 25, naʻá ku ongoʻi ha fuʻu vā mamaʻo fakalaumālie ʻi loto ʻiate au. Naʻá ku feinga ke maʻulotu ʻi ha ngaahi siasi kehekehe, ka naʻe ʻikai ha siasi ke fakafonu ʻa e vā mamaʻo fakalaumālié. Naʻá ku fakakaukau hili ha kiʻi taimi ʻe faingofua ange ke tukuange ʻeku tui ki he ʻOtuá ʻi haʻaku kei feinga ke ʻilo ʻa e siasi totonú.
Naʻá ku fuofua ako fekauʻaki mo e Tohi ʻa Molomoná mo Siosefa Sāmita mei ha polokalama televīsone fekauʻaki mo e kakai ʻoku nau fefakatauʻaki ʻa e ngaahi koloa fakakuongamuʻá mo ha ngaahi koloa mahuʻinga kehe ʻoku nau tānaki. Naʻe ʻomi ʻe ha taha ʻi he polokalama naʻá ku mamataʻí ha tatau motuʻa ʻo e Tohi ʻa Molomoná ke fakatau.
ʻI hono fakamatalaʻi ʻe ha mataotao ʻa e meʻa naʻá ne ʻai ke mahuʻinga ʻa e tohí, naʻá ne fakamatala nounou fekauʻaki mo e hisitōlia ʻo e Siasí mo e tohí. Naʻe talaange ʻe he mataotaó ki he tokotaha fai polokalamá, “Ko e tohi mahuʻinga taha eni kuó ke ʻomi ke u fakafuofuaʻi hono mahuʻingá.”
Naʻá ku mālieʻia ʻi he tohí mo e talanoá, peá u fakakaukau ke ako lahi ange ki ai.
Tataki ki he Moʻoní
Naʻá ku fakahoko ha ngaahi fakatotolo, pea ko e lahi ange ʻeku ako fekauʻaki mo Siosefa Sāmitá, ko e lahi ange ia ʻeku fakaʻapaʻapaʻi ia mo ongoʻi fepikitaki mo iá.
Naʻá ku fekumi foki mo au ki he moʻoní pea naʻe ʻikai ke u ʻilo ʻa e feituʻu ke maʻu ai iá.
Naʻá ku ʻalu foki mo au ki ha ngaahi siasi taʻefaʻalaua ʻo fekumi ki he siasi totonú pea naʻe teʻeki ai ke u maʻu ia.
ʻI haʻaku pae kimui ange ʻi he Facebook, naʻe ʻasi hake ha peesi naʻe ui ko e “Haʻu kia Kalaisi.” Naʻe ʻikai ke u fuʻu fakakaukau lahi ki ai. Ka neongo iá, naʻe ʻi ai ha meʻa naʻá ne maʻu ʻeku tokangá peá u ʻoatu ʻeku fika telefoní ki he peesi ʻinitanetí.
Hili ha lau māhina siʻi mei ai, naʻá ku maʻu ha telefoni mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Naʻe ʻikai ke u tali ia.
Hili haʻaku fekumi vave ʻi he Google, naʻá ku fakakaukau leva ke toe fetuʻutaki ki he fika naʻe tā maí. Naʻe fakamatalaʻi mai ʻe he ongo faifekaú naʻá na maʻu ʻeku fakamatala fetuʻutakí mei he uepisaiti Haʻu kia Kalaisí, pea fakafokifā pē ʻene mahino ʻa e meʻa kotoa. Naʻá ku kau ʻi he taʻeʻilo atu ke maʻu ha fakamatala mei he Siasi tonu pē naʻá ku ako fekauʻaki mo iá.
Ko Ha Fakapapau Fakaʻosi
Naʻe kamata ke u fetaulaki mo e ongo faifekaú pea ako lahi ange. Naʻe kamata ke fakafonu ʻa e ongoʻi mamaʻo fakalaumālie ʻi loto ʻiate aú. ʻI he taimi naʻá ku fakakaukau ai ke papitaisó, naʻe fakaafeʻi au ʻe ha ngaahi kaungāmeʻa Kalisitiane ki he taha ʻo ʻenau ngaahi kemi fakasiasí.
Lolotonga ʻa e malanga fakaʻosi ʻi he ʻaho fakaʻosi ʻo e kemí, naʻá ku lotu ki he ʻOtuá ke fakapapauʻi mai kiate au naʻe moʻoni ʻa e Tohi ʻa Molomoná. ʻI he momeniti tonu pē ko iá, naʻe toʻo hake ʻe ha tokotaha ako malanga ʻa e Tohi ʻa Molomoná ʻo pehē mai, “Fēfē ke tau laukonga mei he tohi ko ʻení? ʻOku fekauʻaki kotoa ʻa e tohí ni mo Sīsū Kalaisi pea ʻoku fehoanaki mālie ia mo e Tohi Tapú.” Naʻe fakalongolongo ʻa e matangá. ʻOku ou tui fakapapau ko ha tali ʻeni ki heʻeku lotú.
Hili ʻeku fanongo mei he tokotaha ako ko iá, naʻá ku ongoʻi hono fakapapauʻi mai ʻe he Laumālié kiate au ko e tohí ko e fakamoʻoni ia ʻe taha ʻo Sīsū Kalaisi. Naʻe papitaiso au ʻi ha taimi nounou mei ai.
ʻOku Ou ʻOfa ʻI He Siasí Ni
Talu mei heʻeku kau ki he Siasí, mo hono fakafonu ʻa e vā mamaʻo fakalaumālie ʻi loto ʻiate aú, pea kuo hokohoko atu pē ʻa e tupulaki ʻeku fakamoʻoni ki he Palōfita ko Siosefa Sāmitá mo e Tohi ʻa Molomoná.
Kuo tokoniʻi au ʻe he Tamai Hēvaní ke u ʻiloʻi ʻi he lotú mo Hono Laumālié, ko e Siasi ʻeni ʻo Sīsū Kalaisí. Ko hono moʻoní, ʻoku ou fakaʻamu naʻe lava ke u ʻilo fekauʻaki mo e Siasí ʻi heʻeku kei siʻí. ʻOku ou ʻofa ʻi he Siasí ni. Ko e Siasi moʻoni ia ʻo Sīsū Kalaisi ʻi he māmaní ʻi he ʻahó ni.