ʻOku Fiemaʻu Moʻoni Nai ʻe he ʻOtuá ʻEku Tokoní?

ʻI heʻeku ngāue fakafaifekaú, naʻá ku ongoʻi taʻefeʻunga ke akoʻi ʻa e niʻihi kehé ki he ongoongoleleí.

Naʻá ku ongoʻi fuʻu kei siʻi, taʻetaukei, mo taʻehaohaoa ke fakahoko ha liliu moʻoni ʻi he moʻui ʻa ha taha pē. Naʻá ku fiemaʻu ke tataki hoku ngaahi kaungāmeʻá kia Sīsū Kalaisi, ka ʻe founga fēfē?

ʻI ha ʻaho ʻe taha, naʻá ku ako ʻa e Tokāteline mo e Ngaahi Fuakavá peá u lau ai ʻa e veesi ko ʻení: “Koeʻuhí ke lava ʻo malanga ʻaki hono kakato ʻo ʻeku ongoongoleleí ʻe he kau vaivaí mo e kau māʻulaló ki he ngaahi ngataʻanga ʻo e māmaní, pea ʻi he ʻao ʻo e ngaahi tuʻí mo e kau pulé,” (Tokāteline mo e Ngaahi Fuakava 1:23).

Naʻe fakafonu ʻe he veesi ko ʻení hoku laumālié ʻaki ʻa e ʻamanaki lelei mo e fiefia. Naʻe ʻikai folofola mai ʻa e ʻEikí naʻá Ne finangalo ke fakahoko ʻEne ngāué ʻe ha kakai haohaoa. Ka ʻokú Ne ui ha kakai taʻehaohaoa mo ha ivi malava taʻefakangatangata—kakai hangē ko au mo koé.

Kuo fakaʻau ke u ʻofeina moʻoni ʻa e talanoa ʻo e tokoua ʻo Sēletí. Naʻe ʻoange ʻe he ʻEikí ha faingamālie ki he tokoua ʻo Sēletí ke fakaʻaongaʻi ʻene tauʻatāina ke filí mo e mohu foungá ʻaki hono fehuʻi ange pe ko e hā ʻa e founga ʻoku totonu ke maʻu ai ʻe he kau Sēletí ha maama ʻi honau ngaahi vaka fakapoʻulí, lolotonga ʻenau fononga ki he fonua ʻo e talaʻofá. Naʻe faʻu ʻe he tokoua ʻo Sēletí ha ngaahi foʻi maka hamolemole mei he maká pea kole ki he ʻEikí ke fakamaama ʻa e ngaahi foʻi maká. Naʻe mafao mai ʻa e toʻukupu ʻo e Fakamoʻuí ki he foʻi maka takitaha ʻo ngaohi ke nau ulo (ʻEta 2:25; 3:1–6).

ʻI he founga tatau, ko e taimi ʻoku tau ʻomi ai hotau lelei tahá ki he ʻOtuá, ʻokú Ne fakalahi kinautolu pea aʻu pē ʻo fakahoko ha ngaahi meʻa maʻongoʻonga ange ʻi he meʻa naʻa tau fakakaukau ki aí. ʻOku fakahoko ʻe he ʻOtuá ʻa e maná, kae ʻikai ko kitautolu.

Naʻe pehē ʻe ʻEletā Veni P. Sitenifili ʻo e Kau Fitungofulú, “Kuo pau ke tau manatuʻi neongo pe ko e hā ʻetau foaki lelei taha kae ʻikai haohaoá, ʻe lava ʻe he Fakamoʻuí ʻo fakahaohaoaʻi ia. Neongo ʻa e ngali ʻikai mahuʻinga ʻetau ngaahi feingá, ka kuo pau ke ʻoua naʻa tau teitei fakasiʻia e mālohi ʻa e Fakamoʻuí.”

Te u talaatu ha kiʻi fakapulipuli: mahalo ʻoku lelei ange hoʻo ngāué ʻi he meʻa ʻokú ke fakakaukau ki aí. Naʻe pehē ʻe Palesiteni Lāsolo M. Nalesoni, “ʻOku fiemaʻu ke tau manatuʻi kotoa: ʻoku ʻi ai e faʻahinga ʻo e tangatá ke nau maʻu e fiefiá—kae ʻikai ko e fononga loto halaiá! [vakai, 2 Nīfai 2:25].”

Ko e founga ʻe taha ke tau fakalaka atu ai ʻi he ngaahi fononga loto halaiá ko e fekumi ki he haohaoá ʻo fakafou ʻi he ʻaloʻofa ʻa Sīsū Kalaisí (vakai, Molonai 10:32) kae ʻikai ko ʻetau ngaahi ngāué.

Naʻe pehē ʻe ʻEletā Sitenifili, “Ko e hoko ʻo haohaoa ʻia Kalaisí … ʻoku fakaʻatā ai kitautolu mei he ngaahi mafasia ʻo e halaiá mo e taʻetāú, ʻo fakamamafaʻi mai maʻu pē ko hai kitautolu ʻi he ʻao ʻo e ʻOtuá.”

Neongo ʻoku ou kei fefaʻuhi pē mo e ngaahi ongoʻi taʻefeʻungá, ka ʻoku ou ako ke fakakau ʻa e ʻEikí ʻi heʻeku fakalakalaka fakafoʻituituí. ʻI heʻeku fakavaivaiʻi aú, kuó Ne liliu hoku ngaahi vaivaí ki ha ngaahi mālohinga (vakai, ʻEta 12:27).