Mo Tamaiti: O le a se Mea e Mafai ona Ou Faia pe a Faafalepuipuiina se Tasi Ou Te Alofa I Ai?

E mafai ona faigata pe a faafalepuipuiina se tasi e te alofa i ai. Atonu e te le malamalama i mafuaaga uma ua tupu ai lenei mea, ae e te iloa ua e misia o ia, ma atonu e te lagona le faanoanoa ona ua toesea o ia. E tāua ou lagona. Atonu e te lagonaina le fefe, ita, pe le mautonu. Pe a e faasoa atu ou lagona i isi, o le a fesoasoani ia te oe e te maua ai se lagona lelei.

O nisi taimi e faia ai e tagata ni filifiliga leaga, ae o na filifiliga le lelei e le otometi ona avea ai i latou ma tagata leaga. E alofa le Atua i Ana fanau uma, e aofia ai tagata uma o e ua faafalepuipuiina. O le a Ia fesoasoani ia i latou ma oe i aso uma. Na aoao mai Iesu, “O mai ia ia te au, … ou te avatu foi ia te outou le malologa” (Mataio 11:28). O lona uiga a tatou mulimuli i aoaoga a Iesu Keriso, o le a Ia fesoasoani ia i tatou i o tatou faafitauli. Tatalo i le Tama Faalelagi ma ole atu ia te Ia mo se fesoasoani. O le a Ia fesoasoani ia te oe e lagonaina Lona alofa ma le filemu.

Pe na e iloa o isi tamaiti sa i ai se tasi e pele na faafalepuipuiina foi? O nisi nei o mea na latou oo i ai:

• Sa manatu se tasi tamaitiiti (14 tausaga) e na o tagata leaga e o i le falepuipui ae na iloa ai e mafai foi e tagata lelei ona faia ni filifiliga sese.

• O le isi tamaitiiti (12 tausaga) sa fefe mo lona tama na faafalepuipuiina—sa le mautinoa pe o le a manuia lona tama pe mafai ona asiasi mai.

• O se tasi teineitiiti (10 tausaga) o lona tina na alu i le falepuipui na misia o ia i aso uma. O le asiasi atu i lona tina i nisi taimi na toe faanoanoa ai o ia. Ae sa ia iloaina e alofa lona tina ia te ia ma o le a vave ona la toe faatasia.

• O le isi tamaitiiti (16 tausaga) sa i ai lona tama i le falepuipui sa tatalo mo ia i po uma. Sa ia iloaina sa tatalo foi lona tama mo ia ma sa fesoasoani le Tama Faalelagi i lo latou aiga ina ia saogalemu.

1:15