Ua Faafalepuipuiina Lo’u Toalua. O Le a Nei La’u Mea A Fai?

E tulaga ese tulaga uma lava, ma e leai se tali faigofie i lenei fesili. O filifiliga e uiga i lou lumanai o filifiliga ia o le a fesoasoani le Atua ia te oe e fai. Ia tatalo, ma talanoa i uo ma faufautua faatuatuaina a o e faia ni faaiuga. Atonu o le a aoga manatu o loo i lalo.

Pe a oo se ulugalii i le valavala, e tatau ona la sailia ni auala fou e fesootai ai ma lagolagoina e le tasi le isi. O le tausia o manaoga o le tasi ma le isi o le a foliga eseese ma atonu e manaomia ai se taumafaiga sili atu. E mafai e ulugalii ona taumafai i mea nei e faatumauina ai le malosi o le la mafutaga:

• Saili ni auala e tuputupu ae ai oe lava ia. Faaaoga lenei taimi o le valavala mai lou toalua e tausia ai oe lava i le faaletino, faalelagona, ma le faaleagaga. Suesue i tusitusiga paia ma aoao atili e uiga i le faamoemoega o le Alii mo lou olaga (tagai Filipi 4:13). Auai i sauniga lotu ma faalatalata atu i aiga faatuatuaina, uo, ma taitai mo se fesoasoani.

• Alofa i lou toalua. Ia faailoa atu i lou toalua e te popole ma ua misia o ia. Tatalo mo ia i aso uma. Tusi ni tusi, fai ni telefoni, ma asiasi i lou toalua pe a e mafaia. O le tusiaina o tusi e mafai ona fesoasoani ia te oe e fesootai ai i se auala e faalatalata atili ai oe ma faalauiloa ai le faamalologa. Ia faailoa atu i lau fanau ia suiga po o mea e faaleleia i le lua mafutaga.

• Tuuina atu faamalosiau. Atonu e lotovaivai lou toalua a o faafalepuipuiina. Faaali atu le agaalofa ma faamanatu atu ia te ia lou alofa. Uunaia lou toalua e faaaoga soo se vasega o loo maua ma faaalu se taimi e faaleleia ai lona olaga.

• Ofo atu le lagolagosua faaleagaga. E mafai ona tuputupu ae aiga faaleagaga e tusa lava pe o vavaeeseina. Faasoa atu ou lagona ma molimau e uiga i le talalelei. Suesue i tusitusiga paia, lauga mai taitai, Sau, Mulimuli Mai ia te Au lesona, ma tusiga o mekasini a le Ekalesia. Fesoasoani i lou toalua e fesootai ma taitai i le lotoifale ma alualu i luma i le faagasologa o le salamo (tagai i le Sue le Falelotu). Afai e mafai ona faia ni telefoni, ia faaaofia ai le tatalo po o le tatalo faaleaiga o se vaega o telefoni.

• Saunia mo le Lumanai. Fesoasoani i lou toalua e saunia mo le olaga pe a uma ona faafalepuipuiina. Fefautuaai faatasi ma faatu ni sini anoa. Faatulaga se fuafuaga e aofia ai le tuputupu ae faifai pea faaleagaga, toe foi atu i le Ekalesia, galuega, ma le toe faaleleia faifai pea ma suiga.

5:48