“Faatomuaga,” Auaunaga i le Falepuipui (2023)
“Faatomuaga,” Auaunaga i le Falepuipui
Faatomuaga
O le i ai o se tasi e pele ua faafalepuipuiina e mafai ona avea o se aafiaga mata’utia. Atonu e te lagonaina le tuuatoatasi, tauivi e ola i mea tautupe, pe popole i le lumanai (tagai Isaia 41:10). E silafia e le Tama Faalelagi ma Iesu Keriso ou manaoga ma e finagalo e faamafanafana ia te oe. O se tasi o auala e auina mai ai e le Atua le fesoasoani o le ala mai lea i isi. Atonu e te tiga ma maasiasi, ma atonu e te manao e faaesea oe lava mai isi. Ae peitai, o le faatagaina o isi e tuuina atu le fesoasoani o se auala lea e faaali atu ai i le Atua e te faafetai mo Lona alofa. Siomia oe lava i tagata e te faatuatuaina ma tagata tomai faapitoa e mafai ona fesoasoani atu.
Na aoao mai Elder Jeffrey R. Holland, o le Korama a Aposetolo e Toasefululua i Le Ekalesia a Iesu Keriso o le Au Paia o Aso e Gata Ai: “O loo faatalitali ma le naunautai le Atua mo le avanoa e tali mai ai i au tatalo ma faataunuu au miti, e pei lava ona Ia faia i taimi uma. Ae e le mafai ona Ia faia pe afai e te le tatalo, ma e le mafai pe afai e te le moemiti. I se faapuupuuga, e le mafai ona Ia faia pe afai e te le talitonu” (“Terror, Triumph, and a Wedding Feast” [faigalotu a le Iunivesite o Polika Iaga, 12 Sete., 2004], 3, speeches.byu.edu).
Sa tuuina mai e Sister Reyna I. Aburto, o se taitai i le faalapotopotoga a tamaitai o le Ekalesia, se faamalosiauga faaopoopo a o ia aoao atu: “Afai e te lagona e le mafai ona e toe faia se isi laasaga se tasi, faamolemole fesili atu mo se fesoasoani. O la’u aioiga ia te outou o le aua le fiu. E iai le faamoemoe. E iai le faamalologa. E iai le olioli. O loo siomia oe i le alofa. Faamolemole liliu atu i le alofa tunoa togiola o le Alii ma liliu atu i tagata o loo siomia oe. Aua le fiu. Faamolemole aua le fiu” (i le “Sister to Sister Conversation” [Konafesi a Tamaitai o le Iunivesite o Polika Iaga, 1 Me, 2020], ChurchofJesusChrist.org).