E Faapefea Ona Ou Tausia Ou Manaoga Vave pe a Mavae le Faafalepuipuiina o se Tagata o le Aiga?

Pe a faafalepuipuiina se tasi e pele ia te oe, o se mea masani mo tagata o le aiga le oo i se lagona ua tele naua avega faalelagona, leai o se puleaina, ma le le mafai ona taulimaina lea tulaga. E oo foi i le autalavou ma tamaiti nei lagona, lea e mafai ona taitai atu ai i mafatiaga tumau. O le sailia o le fesoasoani mai uo faatuatuaina ma tagata o le Ekalesia o se laasaga lelei muamua lea. Afai e tumau pea lagona o le faanoanoa, saili le fesoasoani a tagata tomai faapitoa i le soifua maloloina faafomai ma le mafaufau. Afai e te le iloa le mea e amata ai, ia feutagai ma taitai o le Ekalesia ma lau inisiua faafomai e uiga i tagata tomai faapitoa i lo outou eria e mafai ona tuuina atu le lagolago e te manaomia. O le tatalo, suesue i tusitusiga paia, mulimuli i aoaoga a perofeta soifua, auai i le lotu, ma le auai i le malumalu o le a fesoasoani e siitia ai oe ma faatumulia ai oe i le filemu i taimi faigata.

Saili se lagolago faapolofesa faaletulafono, tautupe, faafomai, po o vaifofo. Ae o le mea sili, ia faalatalata atu i le Atua. E silafia e Ia ou manaoga ma e alofa ia te oe. Tatalo soo ma vaavaai mo le tele o auala o loo tali mai ai le Atua i au tatalo. Siomia oe lava i tagata lelei e mafai ona fesoasoani. Afai pe a talafeagai ai, talanoa i aiga lautele, uo faatuatuaina, ma tagata faatuatuaina o le Ekalesia e uiga i lou tulaga. Aoao e talanoa e uiga i ou aafiaga i auala e fesoasoani ia te oe ma i latou e te faatuatuaina. Tau atu ia i latou mea e te manaomia, ma faataga i latou e auauna atu.

E mafai ona faigata le fesoota’i atu i se faamasinoga o solitulafono. E tele tulafono ma faiga faavae o le a manaomia ona e malamalama i ai. Mafaufau e feutagai ma lou lava sui faaletulafono pe a e feagai ma ni faafitauli taua faaletulafono. Ia mautinoa ua e malamalama i aafiaga uma mo se taimi umi o au faaiuga.

Pe a faafalepuipuiina se tasi e pele ia te oe, e mafai ona matuā tāua le aafiaga tautupe i le aiga. O le leai o se tupe maua ma pili o faamasinoga ma faaletulafono e mafai ona oo atu ai i le leai o se tausiga faalesoifua maloloina, fale, ma teugatupe. E taua le talanoaina o nei faafitauli i se taimi vave lava ma se faufautua faatuatuaina.

A o faagasolo taimi, o le a manaomia ona toe foi lou aiga i se faiga masani i aso taitasi. E manaomia ona o tamaiti i le aoga, fegalegaleai ma uo, ma fiafia i o latou olaga. E ui lava ina e misia se tasi e pele ia te oe o loo faafalepuipuiina, ae e le afaina le lagona fiafia. Faaaoga le taimi lenei e atiina ae ai oe lava ma saunia ai mo le lumanai.