ដើម្បីកម្លាំងនៃយុវជន ៖ ការធ្វើការជ្រើសរើស ៖ មេរៀនទី ១៧១
សេចក្តីណែនាំដើម្បីកម្លាំងនៃយុវជន
ការភ្ជាប់ជម្រើសរបស់យើងជាមួយព្រះគ្រីស្ទ
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ប៉មភ្នំ គៀប្រាលតា មានកម្ពស់៤២៦ម៉ែត្រពីលើច្រកចូលសមុទ្រមេឌីទែរ៉ាណេ ។ ជាយូរមកហើយ គៀប្រាលតា ត្រូវបានប្រើប្រាស់ដើម្បីការពារប្រឆាំងនឹងសត្រូវដែលចូលមក និងគ្រប់គ្រងផ្លូវដឹកជញ្ជូន ។ កងកម្លាំងអង់គ្លេសបានបង្កើតផ្លូវរូងក្រោមដីប្រវែង៣៤ម៉ាយល៍ ចូលទៅក្នុងភ្នំ ដោយបង្កើតមន្ទីរពេទ្យ បន្ទាយ កន្លែងស្តុកទុក និងជាទីសុវត្ថិភាពសម្រាប់កងកម្លាំងរបស់ពួកគេ ។ អស់រាប់ពាន់ឆ្នាំមកនេះ មនុស្សបានពឹងផ្អែកលើកម្លាំងថ្ម ដើម្បីផ្តល់សុវត្ថិភាព និងការការពារ ។
សូមអានខគម្ពីរខាងក្រោម ហើយរកមើលអ្វីដែលព្យាការីពីបុរាណបានប្រៀបធៀបបន្ទាយរឹងមាំដូចជា គៀប្រាលតា ដែរ ។ សូមដាក់ស្លាកអ្វីដែលអ្នករកឃើញថា « កម្លាំង » ។
-
សាំយូអែល ទី២ ២២:២
-
ទំនុកដំកើង ១៨:១–៣
-
ទំនុកដំកើង ៦២:៥–៨
គោលបំណងមេរៀន ៖ ដើម្បីជួយអ្នកឲ្យហាត់ប្រើប្រាស់សៀវភៅ ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ( ឆ្នាំ២០២៣ ) ដើម្បីធ្វើការជ្រើសរើសដែលបំផុសគំនិត ដោយផ្អែកលើព្រះយេស៊ូវគ្រីស្ទ និងគោលលទ្ធិរបស់ទ្រង់ ។
រៀនអំពីរបៀបធ្វើ
ព្រះយេស៊ូវគ្រីស្ទគឺជាសិលារបស់ខ្ញុំ
សូមអានសេចក្តីថ្លែងការណ៍ខាងក្រោមដោយអែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ ហើយរកមើលរបៀបដែលយើងអាចធ្វើឲ្យព្រះយេស៊ូវគ្រីស្ទ ជាសិលារបស់យើង ។
រាល់ពេលដែលអ្នកធ្វើការជ្រើសរើសសុចរិតដោយផ្អែកលើសេចក្តីពិតដ៏នៅអស់កល្បជានិច្ចរបស់ព្រះអង្គសង្គ្រោះ នោះអ្នកបង្ហាញថា អ្នកចង់បានទ្រង់គង់នៅក្នុងជីវិតរបស់អ្នក ។ ការជ្រើសរើសទាំងនោះបានបើកទ្វារស្ថានសួគ៌ ហើយកម្លាំងរបស់ទ្រង់នឹងចូលមកក្នុងជីវិតរបស់អ្នក ។ …
… ស្រដៀងគ្នានេះដែរ ពេលយើងស្ថាបនាជីវិតរបស់យើង វាសំខាន់ក្នុងការធ្វើការជ្រើសរើសឲ្យបានល្អ ។ ហើយវាសំខាន់ដើម្បីយល់ពីសេចក្តីពិតដ៏នៅអស់កល្បរបស់ព្រះអង្គសង្គ្រោះ ។ ប៉ុន្តែកម្លាំងដែលយើងនឹងត្រូវការដើម្បីទប់ទល់នឹងព្យុះជីវិតកើតឡើង នៅពេលយើង ភ្ជាប់ ជម្រើសរបស់យើងជាមួយព្រះយេស៊ូវគ្រីស្ទ និងគោលលទ្ធិរបស់ទ្រង់ ។ នោះជាអ្វីដែល ដើម្បីកម្លាំងនៃយុវជន ជួយយើងធ្វើ ។ ( « ដើម្បីកម្លាំងនៃយុវជន ៖ សារលិខិតរបស់ព្រះអង្គសង្រ្គោះផ្ញើមកកាន់អ្នក » ដើម្បីកម្លាំងនៃយុវជន ខែមីនា ឆ្នាំ២០២៤ ទំព័រ ៣៨ )
សេចក្តីពិត ការសម្រេចចិត្ត
សេចក្តីពិតមួយដែលយើងអាចរៀនពីអែលឌើរ អុជដូហ្វ គឺដូចតទៅនេះ ៖ យើងទទួលកម្លាំងពីព្រះយេស៊ូវគ្រីស្ទ នៅពេលយើងភ្ជាប់ទំនាក់ទំនងជម្រើសរបស់យើងទៅនឹងទ្រង់ និងគោលលទ្ធិរបស់ទ្រង់ ។
សូមអានបទពិសោធន៍ខាងក្រោមពីសិស្សថ្នាក់សិក្ខាសាលាម្នាក់ ។ សូមកត់ចំណាំរបៀបដែលសៀវភៅណែនាំ ដើម្បីកម្លាំងនៃយុវជន បានជួយយើងឲ្យធ្វើការជ្រើសរើសល្អ ។
នៅថ្ងៃមួយ ខ្ញុំមានការពិភាក្សាមួយជាមួយឪពុកម្តាយខ្ញុំអំពីបទដ្ឋានដំណឹងល្អដែលបានលើកឡើងនៅក្នុងកូនសៀវភៅដើម្បីកម្លាំងនៃយុវជន ។ ឪពុកម្តាយខ្ញុំបានបង្កើតច្បាប់គ្រួសារដែលខ្ញុំមិនចូលចិត្ត ហើយច្បាប់នោះគឺតឹងរឹងជាងច្បាប់ដែលមិត្តភក្តិរបស់ខ្ញុំត្រូវធ្វើតាមទៅទៀត ។ បន្ទាប់ពីនិយាយអំពីច្បាប់នេះហើយ ខ្ញុំបានជម្រាបពួកគាត់ថា « ខ្ញុំប្រហែលជាមិនចូលចិត្តច្បាប់នេះទេ ខ្ញុំប្រហែលជាមិនចង់ធ្វើតាមច្បាប់នេះទេ ហើយខ្ញុំប្រហែលជាមិនយល់ពីច្បាប់នេះទេ—ប៉ុន្តែខ្ញុំនឹងធ្វើតាម » ។ ការដាក់ទំនុកចិត្តរបស់ខ្ញុំនៅលើព្រះ ព្យាការីរបស់ទ្រង់ និងឪពុកម្តាយរបស់ខ្ញុំ បានផ្តល់ឲ្យខ្ញុំនូវកម្លាំងដើម្បីគោរពប្រតិបត្តិ ។ ( ប្រីនលី ប៊ី អាយុ១៦ឆ្នាំ រដ្ឋយូថាហ៍ សហរដ្ឋអាមេរិក )
សូមគិតអំពីស្ថានភាពដែលអ្នកកំពុងប្រឈមមុខនាពេលបច្ចុប្បន្ន ឬគិតថានឹងប្រឈមមុខនាពេលអនាគត ដែលអាចតម្រូវឲ្យអ្នកធ្វើការជ្រើសរើសដ៏ពិបាក ។ សូមពិចារណាពីរបៀបដែលព្រះយេស៊ូវគ្រីស្ទ និងគោលលទ្ធិរបស់ទ្រង់អាចជួយដល់អ្នក ។
សូមស្ដាប់តាមការបំផុសគំនិតនៃព្រះវិញ្ញាណ នៅពេលអ្នកអនុវត្តការភ្ជាប់ជម្រើសរបស់អ្នកជាមួយព្រះយេស៊ូវគ្រីស្ទ ដោយមានជំនួយពីសៀវភៅណែនាំ ដើម្បីកម្លាំងនៃយុវជន ។
ការសិក្សាស៊ីជម្រៅ ៖ សូមមើលសុន្ទរកថាសន្និសីទទូទៅមកពីអែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ « ដើម្បីកម្លាំងនៃយុវជន ៖ សារលិខិតរបស់ព្រះអង្គសង្រ្គោះផ្ញើមកកាន់អ្នក » ។
រចនាសម្ព័ន្ធនៃសៀវភៅណែនាំនេះ
នៅក្នុងសៀវភៅ ដើម្បីកម្លាំងនៃយុវជន អ្នកនឹងរកឃើញការបង្រៀនជាច្រើនរបស់ព្រះយេស៊ូវគ្រីស្ទ និងពួកព្យាការីរបស់ទ្រង់ ។ ដោយមានសេចក្តីពិតទាំងនេះទុកជាការណែនាំរបស់អ្នក នោះអ្នកអាចធ្វើការជ្រើសរើសដែលបំផុសគំនិតដែលនឹងផ្តល់ពរដល់អ្នកនៅពេលនេះ និងរហូតអស់កល្បជានិច្ច ។ សៀវភៅណែនាំនេះចែកចេញជាប្រធានបទផ្សេងៗគ្នា ហើយប្រធានបទនីមួយៗមានបីផ្នែក ៖
-
សេចក្តីពិតដ៏អស់កល្បជានិច្ច ឬគោលលទ្ធិនៃដំណឹងល្អរបស់ព្រះយេស៊ូវគ្រីស្ទដែលបានស្តារឡើងវិញ
-
ការអញ្ជើញ ឲ្យធ្វើសកម្មភាពតាមសេចក្តីពិតទាំងនោះ
-
ពរជ័យដែលបានសន្យា ដែលព្រះអម្ចាស់ប្រទានដល់អស់អ្នកដែលរស់នៅតាមការបង្រៀនរបស់ទ្រង់
សូមជ្រើសរើសផ្នែកមួយនៅក្នុងសៀវភៅណែនាំនេះ ។ សូមមើលសៀវភៅណែនាំនេះ ហើយស្វែងរកផ្នែកទាំងបីនេះ ។
យ៉ូសែបប្រឆាំងនឹងភរិយារបស់ប៉ូទីផារ ដោយ ឌេល ផាសុន
ឥឡូវនេះ សូមព្យាយាមអនុវត្តគំរូនេះទៅនឹងស្ថានភាពពិត ។ អ្នកអាចប្រើគំរូនៃយ៉ូសែបនៅស្រុកអេស៊ីព្ទរត់គេចចេញពីប្រពន្ធរបស់ប៉ូទីផារ និងផ្នែក « រូបកាយរបស់អ្នកគឺពិសិដ្ឋ » នៃ ដើម្បីកម្លាំងនៃយុវជន ជាគំរូសម្រាប់របៀបប្រើប្រាស់សៀវភៅណែនាំនេះដើម្បីធ្វើការជ្រើសរើសដែលបំផុសគំនិត ។
សូមអាន លោកុប្បត្តិ ៣៩:៩–១២ ហើយរកមើលរបៀបដែលយ៉ូសែបបានភ្ជាប់ជម្រើសរបស់លោកជាមួយព្រះយេស៊ូវគ្រីស្ទ និងគោលលទ្ធិរបស់ទ្រង់ ។
ប្រធានបទ « រូបកាយរបស់អ្នកគឺពិសិដ្ឋ » នៅក្នុង ដើម្បីកម្លាំងនៃយុវជន បង្រៀនពីសេចក្តីពិតដែលទាក់ទងនឹងស្ថានភាពដូចជាស្ថានភាពដែលយ៉ូសែបបានប្រឈមមុខ ។
-
សេចក្តីពិតដ៏នៅអស់កល្បជានិច្ច ។ ច្បាប់ព្រហ្មចារីភាពចែងថា ព្រះអនុម័តសកម្មភាពខាងផ្លូវភេទរបស់យើងតែរវាងបុរស និងស្រ្តីដែលបានរៀបការហើយប៉ុណ្ណោះ ។
-
ការអញ្ជើញ ។ ការណែនាំនេះបង្រៀនថា យើងគួរតែប្រព្រឹត្តចំពោះរូបកាយរបស់យើង និងរូបកាយរបស់អ្នកដទៃដោយការគោរព ។
-
ពរជ័យដែលបានសន្យា ។ យើងទទួលបានការសន្យាថា ការរស់នៅតាមច្បាប់ព្រហ្មចារីយភាពនាំមកនូវការអនុម័តរបស់ព្រះ និងអំណាចខាងវិញ្ញាណផ្ទាល់ខ្លួន ។ យ៉ូសែបចង់បានការអនុម័តរបស់ព្រះ ( សូមមើល លោកុប្បត្តិ ៣៩:៩ ) ដូច្នេះលោកបានជ្រើសរើសធ្វើតាមច្បាប់ព្រហ្មចារីភាព ។
តើសេចក្តីពិតទាំងនេះបានដឹកនាំយ៉ូសែបឲ្យធ្វើការជ្រើសរើសដោយបំផុសគំនិតដោយរបៀបណា ?
អនុវត្ត
សូមសរសេរស្ថានភាពដែលអ្នកកំពុងប្រឈមមុខ ឬរំពឹងថានឹងប្រឈមមុខនាពេលអនាគត ដែលអាចតម្រូវឲ្យអ្នកធ្វើការជ្រើសរើសដ៏លំបាក ។ សូមហាត់ប្រើប្រាស់សៀវភៅ ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ដើម្បីភ្ជាប់ជម្រើសរបស់អ្នកជាមួយនឹងព្រះយេស៊ូវគ្រីស្ទ និងគោលលទ្ធិរបស់ទ្រង់ ។ សូមស្វែងរកផ្នែកមួយនៅក្នុងសៀវភៅណែនាំនេះ ដែលអ្នកគិតថាទាក់ទងនឹងស្ថានភាពរបស់អ្នក ។ អ្នកអាចរកឃើញប្រធានបទមួយយកមកសិក្សា ដោយការរកមើលនៅក្នុងលិបិក្រម « ចុះ ចំណែក… » នៅចុងបញ្ចប់នៃសៀវភៅណែនាំនេះ ។ បន្ទាប់មក សូមឆ្លើយសំណួរខាងក្រោមនេះ ៖
-
សេចក្តីពិតដ៏នៅអស់កល្បជានិច្ច ។ តើសេចក្តីពិតដ៏នៅអស់កល្បជានិច្ចអ្វីខ្លះអំពីព្រះយេស៊ូវគ្រីស្ទ និងគោលលទ្ធិរបស់ទ្រង់ ដែលអាចជួយអ្នកក្នុងការសម្រេចចិត្តនេះបាន ?
-
ការអញ្ជើញ ។ ដោយផ្អែកលើសេចក្តីពិតដ៏នៅអស់កល្បជានិច្ចទាំងនេះ តើការអញ្ជើញអ្វីខ្លះដែលអាចជួយអ្នកធ្វើការជ្រើសរើសដែលបំផុសគំនិតបាន ?
-
ពរជ័យដែលបានសន្យា ។ តើព្រះវរបិតាសួគ៌ និងព្រះយេស៊ូវគ្រីស្ទអាចប្រទានពរដល់អ្នក នៅពេលអ្នកខិតខំធ្វើតាមការអញ្ជើញទាំងនេះដោយរបៀបណា ?
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យហាត់ប្រើប្រាស់សៀវភៅណែនាំ ដើម្បីកម្លាំងនៃយុវជន ដើម្បីធ្វើការជ្រើសរើសដែលបំផុសគំនិត ដោយផ្អែកលើព្រះយេស៊ូវគ្រីស្ទ និងគោលលទ្ធិរបស់ទ្រង់ ។
សូមចែកចាយ អ្វីដូចខាងក្រោមនេះជាមួយនឹងគ្រូបង្រៀន ឬថ្នាក់របស់អ្នក ៖
-
អ្វីដែលអ្នកបានរៀននៅថ្ងៃនេះអំពីការភ្ជាប់ទំនាក់ទំនងជាមួយព្រះយេស៊ូវគ្រីស្ទ និងគោលលទ្ធិរបស់ទ្រង់ នៅពេលធ្វើការសម្រេចចិត្ត ។