ដើម្បីកម្លាំងនៃយុវជន ៖ ការធ្វើការជ្រើសរើស ៖ មេរៀនទី ១៧៣
អត្តសញ្ញាណ និងគោលបំណងដ៏ទេវភាពរបស់យើង
ខ្ញុំជាកូនរបស់ព្រះ
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
យុវនារីម្នាក់ក្នុងថ្នាក់របស់អ្នកហាក់ដូចជាចេះបន្តិចបន្តួចនូវអ្វីគ្រប់យ៉ាង ។ នាងលេងបាល់ទាត់ ទទួលបានចំណាត់ថ្នាក់ល្អ មានអ្នកតាមដាននៅលើបណ្ដាញសង្គម ហើយច្រៀងក្នុងក្រុមចម្រៀងរបស់សាសនាចក្រ ។ នៅផ្ទះនាងមើលប្អូនប្រុសរបស់នាងពេលឪពុកម្តាយនាងមិននៅ ហើយចំណាយពេលជាមួយជីដូនជីតារបស់នាង ។ នាងជាមិត្តដែលមានចិត្តអត់ធ្មត់ និងចេះយល់ចិត្ត ។ ប៉ុន្តែអ្វីដែលអ្នកមិនដឹងនោះគឺពេលខ្លះនាងមានអារម្មណ៍ច្របូកច្របល់ថានាងគឺជានរណាឲ្យពិតប្រាកដ ។ តើនាងជាកីឡាករបាល់ទាត់ ជានិសិត្ស ឬជាអ្នកមានឥទ្ធិពលលើប្រព័ន្ធផ្សព្វផ្សាយសង្គមឬ ? វាអាចជាការពិបាកដើម្បីស្វែងយល់ណាស់ ។
គិតអំពីជីវិតរបស់អ្នក ។ តើអ្នកដាក់ស្លាកអ្វីខ្លះនៅលើខ្លួនអ្នក ? វាអាចជាការល្អក្នុងការកត់ត្រាការណ៍ទាំងនេះនៅកន្លែងណាមួយ ដើម្បីអ្នកអាចមើលវានៅពេលក្រោយ ។ នៅពេលអ្នកសិក្សា សូមរកមើលរបៀបដែលព្រះអម្ចាស់ចង់ឲ្យអ្នកមើលឃើញខ្លួនឯង ។ សូមឲ្យព្រះវិញ្ញាណបរិសុទ្ធជួយអ្នកឲ្យមើលឃើញខ្លួនឯងដូចដែលព្រះវរបិតាសួគ៌ធ្វើ ។
គោលបំណងមេរៀន ៖ ដើម្បីផ្តល់ឲ្យអ្នកនូវឱកាសដើម្បីគិតពិចារណាពីអត្តសញ្ញាណ និងគោលបំណងដ៏ទេវភាពរបស់អ្នក ។
រៀនអំពីរបៀបធ្វើ
ស្លាកដែលសំខាន់បំផុត
ប្រធាន រ័សុល អិម ណិលសុន បានសរសេរអំពីសារៈសំខាន់នៃរបៀបដែលយើងដាក់ស្លាកខ្លួនយើង ៖
ស្លាកទាំងឡាយអាចមានភាពរីករាយ ហើយប្រាប់ពីការគាំទ្ររបស់ក្មួយៗចំពោះរឿងវិជ្ជមានជាច្រើន ។ ប៉ុន្តែបើមានស្លាកណាមួយជំនួសឲ្យអត្តសញ្ញាណដ៏សំខាន់បំផុតរបស់ក្មួយៗ នោះលទ្ធផលអាចជាគ្រោះថ្នាក់ខាងវិញ្ញាណ ។ ខ្ញុំជឿថា បើព្រះអម្ចាស់មានបន្ទូលទៅកាន់ក្មួយៗដោយផ្ទាល់ … រឿងដំបូងដែលទ្រង់សព្វព្រះទ័យឲ្យក្មួយៗយល់នោះគឺ អត្តសញ្ញាណពិតរបស់ក្មួយៗ ។ ឱ ក្មួយៗជាទីស្រឡាញ់ ក្មួយៗគឺជាបុត្រាបុត្រីខាងវិញ្ញាណរបស់ព្រះពិតប្រាកដមែន ។
គ្មានការកំណត់អត្តសញ្ញាណណាមួយគួរប្ដូរ ជំនួស ឬមានអាទិភាពខ្លាំងជាងងារដ៏និរន្តរ៍ទាំងបីនេះឡើយ ៖
បុត្ររបស់ព្រះ
បុត្រនៃសេចក្ដីសញ្ញា
សិស្សនៃព្រះយេស៊ូវគ្រីស្ទ
ការកំណត់អត្តសញ្ញាណណាមួយដែលមិនសមស្របនឹងងារជាគោលទាំងបីនេះ នឹងធ្វើឲ្យក្មួយអស់សង្ឃឹមនៅទីបំផុត ។ ពិតណាស់ ៖ សក្ដានុពលរបស់ក្មួយៗគឺទេវភាព ។ តាមការខិតខំស្វែងរកដ៏ឧស្សាហ៍របស់ក្មួយ នោះព្រះនឹងបំភ្លឺអំពីបុគ្គលដែលក្មួយនឹងប្រែក្លាយ ។ ( Instagramថ្ងៃទី២០ ខែកក្កដា ឆ្នាំ២០២២ នៅលើ instagram.com/russellmnelson )
សូមចងចាំថា ព្រះវិញ្ញាណបរិសុទ្ធអាចជួយអ្នកទទួលអារម្មណ៍ និងដឹងថា អ្នកគឺជាបុត្ររបស់ព្រះ ( សូមមើល រ៉ូម ៨:១៦ ) ។
កំណត់និយមន័យពាក្យ ។ ការដឹងពីអត្ថន័យនៃពាក្យ និងគំនិតទាំងឡាយអាចធ្វើឲ្យការយល់ដឹងរបស់អ្នកកាន់តែស៊ីជម្រៅ ។ សម្រាប់ហេតុផលនេះ វាអាចមានប្រយោជន៍ក្នុងការដឹងពីនិយមន័យនៃពាក្យដូចខាងក្រោមនេះ ៖
-
អត្តសញ្ញាណ ៖ ចរិតលក្ខណៈដែលកំណត់ថាអ្នកជានរណា ឬជាអ្វី
-
គោលបំណង ៖ ហេតុផលអ្វីមួយ ( ឬនរណាម្នាក់ ) ដែលបានបង្កើតឡើង ឬសម្រាប់អ្វីដែលវាមាន
យើងរៀនបន្ថែមទៀតអំពីអត្តសញ្ញាណ និងគោលបំណងដ៏ទេវភាពរបស់អ្នកពីបទពិសោធន៍ និងការបង្រៀនរបស់មនុស្សនៅក្នុងព្រះគម្ពីរសញ្ញាចាស់ ។ សូមអាន ម៉ូសេ ១:៣, ៦, ១២–១៣, ១៦–១៨ ។ សូមរកមើលពីរបៀបដែលចំណេះដឹងរបស់ម៉ូសេថា លោកគឺជាបុត្ររបស់ព្រះបានប្រាប់ការឆ្លើយតបរបស់លោក ។
សរសេរកំណត់ចំណាំមួយជាប់នឹង ខទី ២១ ។ នៅក្នុងកំណត់ចំណាំ សូមបំពេញប្រយោគខាងក្រោម ៖
-
ការដឹងថាខ្ញុំជាបុត្ររបស់ព្រះអាចជួយខ្ញុំ …
សូមអាន និងដាក់ស្លាកបួន ឬច្រើនជាងនេះ នៃវគ្គបទគម្ពីរខាងក្រោមថាជា « អត្តសញ្ញាណដ៏ទេវភាព » ។ ថ្វីបើវគ្គបទគម្ពីរទាំងនេះនិយាយអំពីមនុស្សនៅក្នុងព្រះគម្ពីរសញ្ញាចាស់ក៏ដោយ ក៏សេចក្តីពិតនេះអាចអនុវត្តចំពោះយើងផងដែរ ។
-
លោកុប្បត្តិ ១:២៦–២៧
-
នាងអេសធើរ ៤:១៤
-
ទំនុកតម្កើង ៨២:៦
-
យេរេមា ១:៥
-
ម៉ាឡាគី ២:១០
ការមើលឃើញអ្នកដទៃជាបុត្ររបស់ព្រះ
ការមើលឃើញខ្លួនឯងជាបុត្ររបស់ព្រះអាចផ្លាស់ប្តូររបៀបដែលអ្នកមើល និងប្រព្រឹត្តចំពោះខ្លួនឯង និងអ្នកដទៃ ។
ប្រធាន រ័សុល អិម ណិលសុន បានអង្វរយើងឲ្យគោរពដល់កូនចៅគ្រប់រូបរបស់ព្រះ នៅពេលលោកបានមានប្រសាសន៍ ៖
យើងម្នាក់ៗមានសក្តានុពលដ៏ទេវភាព ពីព្រោះយើងម្នាក់ៗគឺជាបុត្ររបស់ព្រះ ។ យើងម្នាក់ៗមានសិទ្ធិស្មើគ្នានៅក្នុងព្រះនេត្រទ្រង់ ។ ការបញ្ចូលសេចក្តីពិតនេះគឺមានអត្ថន័យជ្រាលជ្រៅណាស់ ។ បងប្អូនប្រុសស្រី សូមស្តាប់ដោយយកចិត្តទុកដាក់នូវអ្វីដែលខ្ញុំនឹងថ្លែងនៅពេលបន្តិចទៀតនេះ ។ ព្រះពុំបានសព្វព្រះទ័យពូជសាសន៍មួយ ជាងពូជសាសន៍មួយទៀតនោះទេ ។ គោលលទ្ធិរបស់ទ្រង់អំពីបញ្ហានេះគឺច្បាស់លាស់ណាស់ ។ ទ្រង់អញ្ជើញមនុស្ស ទាំងអស់ ឲ្យមករកទ្រង់ « ទាំងខ្មៅ និងស ទាំងបាវគេ និងសេរី ទាំងប្រុស និងស្រី » ។
ខ្ញុំសូមបញ្ជាក់ដល់អ្នកថា ជំហររបស់អ្នកចំពោះព្រះភក្រ្តព្រះគឺមិនត្រូវបានកំណត់ដោយពណ៌សម្បុររបស់អ្នកនោះឡើយ ។ ការសព្វព្រះទ័យ ឬមិនសព្វព្រះទ័យជាមួយព្រះគឺអាស្រ័យទៅលើការលះបង់របស់អ្នកចំពោះព្រះ និងបទបញ្ញត្តិរបស់ទ្រង់ ហើយមិនមែនដោយពណ៌សម្បុររបស់អ្នកនោះឡើយ ។
ខ្ញុំសោកស្តាយដែលបងប្អូនប្រុសស្រី មានស្បែកខ្មៅរបស់យើងនៅទូទាំងពិភពលោកបានស៊ូទ្រាំនឹងការឈឺចាប់ នៃការរើសអើង និងការប្រកាន់ពូជសាសន៍នេះ ។ នៅថ្ងៃនេះ ខ្ញុំសូមអំពាវនាវដល់សមាជិករបស់យើងនៅគ្រប់ទីកន្លែងឲ្យនាំមុខនៅក្នុងការបោះបង់ចោលនូវអាកប្បកិរិយា និងសកម្មភាពនៃការរើសអើងនេះ ។ ខ្ញុំសូមអង្វរបងប្អូនឲ្យលើកកម្ពស់ដល់ការគោរពបុត្រាបុត្រីរបស់ព្រះទាំងអស់ ។
សំណួរសម្រាប់យើងម្នាក់ៗគឺដូចគ្នា ដោយមិនគិតពូជសាសន៍នោះទេ ។ តើបងប្អូនស្ម័គ្រចិត្តទុកឲ្យព្រះឈ្នះនៅក្នុងជីវិតរបស់បងប្អូនដែរឬទេ ? ( « Let God Prevail » Liahona ខែវិច្ឆិកា ឆ្នាំ២០២០ ទំព័រ ៩៤ )
អត្តសញ្ញាណដ៏ទេវភាព ទុកឲ្យព្រះឈ្នះ ការគោរព
តើការមើលឃើញអ្នកដទៃថាជាបុត្ររបស់ព្រះនឹងជួយអ្នកឲ្យធ្វើតាមដំបូន្មានរបស់ព្រះអម្ចាស់ដូចដែលប្រធាន ណិលសុន បានចែកចាយដោយរបៀបណា ?
ឥឡូវត្រូវធ្វើដូចម្តេចទៀត ?
អែលឌើរ ហ្គែរី អ៊ី ស្ទីវ៉ែនសុន ក្នុងកូរ៉ុមនៃពួកសាវកដប់ពីរនាក់ បានផ្ដល់ការអញ្ជើញដូចខាងក្រោមដល់យុវវ័យ ៖
ក្មួយៗជាច្រើនចាប់ផ្តើមថ្ងៃរបស់ខ្លួនដោយការឈរនៅមុខកញ្ចក់ ។ ថ្ងៃស្អែក សប្តាហ៍នេះ ឆ្នាំនេះ ជានិច្ចកាល ចូរឈរមួយសន្ទុះ នៅពេលខ្លួនឯងមើលក្នុងកញ្ចក់នោះ ។ ចូរគិតក្នុងចិត្ត ឬបើក្មួយៗចូលចិត្ត ចូរនិយាយខ្លាំងៗថា ៖ « មើលខ្ញុំចុះ ! ខ្ញុំអស្ចារ្យណាស់ ! ខ្ញុំជាកូនរបស់ព្រះ ! ទ្រង់ស្គាល់ខ្ញុំ ! ទ្រង់ស្រឡាញ់ខ្ញុំ ! » ( « ការបំផុសគំនិតពីព្រះវិញ្ញាណ » លីអាហូណា ខែវិច្ឆិកា ឆ្នាំ២០២៣ ទំព័រ ៤៥ )
សូមពិចារណាធ្វើតាមការណែនាំរបស់អែលឌើរ ស្ទីវ៉ែនសុន ឥឡូវនេះ ! ខណៈដែលវាអាចមានអារម្មណ៍ឆ្គង ឬមិនស្រួលនៅពេលដំបូង វាមានអំណាចពិតប្រាកដក្នុងការនិយាយពីសេចក្តីពិតទាំងនេះឲ្យឮៗ ។
ការស្ដាប់ ឬអានទំនុកច្រៀងនូវបទ « ខ្ញុំជាកូនរបស់ព្រះ » ។ នៅពេលអ្នកធ្វើដូចនេះ សូមស្ដាប់ពាក្យ ឬឃ្លាដែលថ្លែងទីបន្ទាល់ថាអ្នក និងអ្នកដទៃទៀតគឺជាបុត្រជាទីស្រឡាញ់របស់ព្រះ ។ សូមសរសេរឃ្លាមួយទៀតពីបទចម្រៀងនេះ ដោយប្រើអ្វីដែលអ្នកបានរៀនពីព្រះគម្ពីរ ថ្នាក់ដឹកនាំសាសនាចក្រ និងព្រះវិញ្ញាណបរិសុទ្ធ ។
ចែកចាយគំនិតរបស់អ្នក
គោលបំណងមេរៀន ៖ ដើម្បីផ្តល់ឲ្យអ្នកនូវឱកាសដើម្បីគិតពិចារណាពីអត្តសញ្ញាណ និងគោលបំណងដ៏ទេវភាពរបស់អ្នក ។
សូមចែកចាយ អ្វីដូចខាងក្រោមនេះជាមួយនឹងគ្រូបង្រៀន ឬថ្នាក់របស់អ្នក ៖
-
ឃ្លាដែលអ្នកបានសរសេរពីបទ « ខ្ញុំជាកូនរបស់ព្រះ » ។