The Grand Council [ ក្រុមប្រឹក្សាដ៏ធំមហិមា ] ដោយ រ៉ូប៊ើត ធី បារែត
ជំនាញសិក្សាព្រះគម្ពីរ ៖ មេរៀនទី ១៧០
ការធ្វើការប្រៀបធៀប
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ធ្វើការប្រៀបធៀបទៅនឹងសេចក្តីពិតដែលបង្កប់ន័យដែលបានរកឃើញពីក្នុងព្រះគម្ពីរ
ទេវតាបានប្រាប់ទៅនីហ្វៃថា ព្រះគម្ពីរមាននូវសេចក្តីពិត « ដ៏ច្បាស់ និងពិសេសៗ » ( នីហ្វទី១ ១៣:២៦ ) ។ ទោះជាយ៉ាងណាក៏ដោយ ពេលខ្លះវាអាចជាការលំបាកក្នុងការស្វែងរកសេចក្តីពិតទាំងនេះ ឬពិបាកមានអារម្មណ៍ថា បទគម្ពីរនេះប្រកបដោយអត្ថន័យ ។ មានជំនាញដែលអាចជួយអ្នកឲ្យស្វែងរកសេចក្តីពិតដែលបានលាក់នៅក្នុងព្រះគម្ពីរ ។
តើអ្នកអាចប្រាប់ពីអ្វីដែលមាននៅក្នុងចានទាំងនេះបានទេ ?
ចាននៅខាងឆ្វេងមានអំបិល ។ ចាននៅខាងស្តាំមានស្ករ ។ សូមស្រមៃថា អ្នកអាចប៉ះ និងភ្លក់រសជាតិវាបាន ។ តើការប្រៀបធៀបតាមរបៀបនេះ អាចជួយអ្នកឲ្យដឹងថាពួកវាជាអ្វីដែរឬទេ ?
ស្រដៀងគ្នានេះដែរ នៅពេលយើងធ្វើការប្រៀបធៀបនៅក្នុងព្រះគម្ពីរ យើងអាចយល់កាន់តែច្បាស់ និងមានអំណរគុណចំពោះការបង្រៀនដ៏មានតម្លៃជាច្រើនរបស់ព្រះអង្គសង្គ្រោះ ។ យើងអាចមើលឃើញយ៉ាងច្បាស់ពីរបៀបដែលទ្រង់ប្រទានពរដល់ជីវិតរបស់យើង នៅពេលយើងរស់នៅតាមការបង្រៀនទាំងនេះ ។
នៅពេលអ្នករៀនអំពីឧបករណ៍សិក្សាព្រះគម្ពីរនេះ សូមបើកចិត្តចំពោះចំណាប់អារម្មណ៍មកពីព្រះវិញ្ញាណបរិសុទ្ធ ដែលអាចជួយអ្នកឲ្យស្គាល់ពីរបៀបដែលអ្នកអាចធ្វើឲ្យការសិក្សាព្រះគម្ពីររបស់អ្នកកាន់តែមានអត្ថន័យ ។
គោលបំណងមេរៀន ៖ ដើម្បីជួយអ្នកឲ្យធ្វើការប្រៀបធៀបនៅក្នុងព្រះគម្ពីរ ដើម្បីស្វែងរកសេចក្តីពិតដែលបង្កប់ន័យ ។
រៀនអំពីរបៀបធ្វើ
ជំនាញ ៖ ការធ្វើការប្រៀបធៀប
ការធ្វើការប្រៀបធៀបនៅក្នុងព្រះគម្ពីរមានន័យថា កត់សម្គាល់ពីភាពស្រដៀងគ្នា និងភាពខុសគ្នារវាងដំណើររឿង គំនិត ឬមនុស្ស ។ ការប្រៀបធៀបទាំងនេះអាចជួយអ្នកឲ្យរកឃើញសេចក្តីពិតដែលបានបង្កប់ន័យ ( សេចក្តីពិតដែលបើមិនធ្វើការប្រៀបធៀបទេ នោះយើងមិនអាចយល់បានឡើយ ) ។ អ្នកអាចធ្វើការប្រៀបធៀបនៅក្នុងខគម្ពីរមួយ នៅក្នុងជំពូកមួយ ឬនៅក្នុងគម្ពីរជាច្រើន ។ ការធ្វើបែបនេះអាចធ្វើឲ្យការសិក្សាព្រះគម្ពីរផ្ទាល់ខ្លួនរបស់អ្នកបានរីកចម្រើនឡើង ។ ការណ៍នេះអាចជួយឲ្យការយល់ដឹងរបស់អ្នកអំពីព្រះយេស៊ូវគ្រីស្ទ និងដំណឹងល្អរបស់ទ្រង់មានកាន់តែស៊ីជម្រៅ ។
ការសិក្សាស៊ីជម្រៅ ៖ ជាការរំឭកថាអ្វីទៅជាគោលការណ៍ទាំងឡាយ សូមមើល « ការទទួលបានចំណេះដឹងខាងវិញ្ញាណ » ដោយអែលឌើរ រីឆាដ ជី ស្កត ( ឆ្នាំ១៩២៨–២០១៥ ) ។
ការសួរខ្លួនឯងនូវសំណួរខាងក្រោមអាចជួយអ្នកធ្វើការប្រៀបធៀប ។ អ្នកប្រហែលជាចង់កត់ត្រាវានៅក្នុងសៀវភៅកត់ចំណាំរបស់អ្នកដោយមានចំណងជើងថា « ជំនាញសិក្សាព្រះគម្ពីរ ៖ ការធ្វើការប្រៀបធៀប » ។
-
តើដំណើររឿង គំនិត ឬមនុស្សនៅក្នុងដំណើររឿងនេះស្រដៀងគ្នាយ៉ាងដូចម្តេច ? តើវាខុសគ្នាយ៉ាងដូចម្ដេច ?
-
តើយើងអាចរៀនអ្វីខ្លះចេញមកពីការប្រៀបធៀបនេះ ?
-
តើអ្វីដែលខ្ញុំរៀនពីការប្រៀបធៀបនេះ អាចជួយដល់ខ្ញុំនៅសព្វថ្ងៃនេះបានយ៉ាងដូចម្តេច ?
-
តើអ្វីដែលខ្ញុំរៀនអាចជួយខ្ញុំឲ្យស្រឡាញ់ ឬធ្វើតាមព្រះអម្ចាស់បន្ថែមទៀតដោយរបៀបណា ?
ឧទាហរណ៍
ការធ្វើការប្រៀបធៀបអាចជួយឲ្យការយល់ដឹងរបស់អ្នកអំពីព្រះវរបិតាសួគ៌ និងព្រះយេស៊ូវគ្រីស្ទកាន់តែស៊ីជម្រៅ ។ សូមមើលការពិពណ៌នាខាងក្រោមនៃក្រុមប្រឹក្សានៅស្ថានសួគ៌ ។ មុនពេលផែនដីបានបង្កើតឡើង នោះព្រះវរបិតាសួគ៌បានចែកចាយផែនការរបស់ទ្រង់សម្រាប់យើង ( សូមមើល អ័ប្រាហាំ ៣:២១–២៦ ) ។ ប៉ុន្តែត្រូវតែមានព្រះអង្គសង្គ្រោះមួយអង្គ ។ ព្រះយេស៊ូវគ្រីស្ទ ( ព្រះយេហូវ៉ា ) បានស្ម័គ្រព្រះទ័យធ្វើជាព្រះអង្គសង្រ្គោះរបស់យើង ( សូមមើល អ័ប្រាហាំ ៣:២៧ ) ហើយព្រះវរបិតាសួគ៌បានជ្រើសរើសទ្រង់ ។ សាតាំង ( លូស៊ីហ្វើរ ) បានជ្រើសរើសបះបោរប្រឆាំងនឹងផែនការរបស់ព្រះវរបិតា ( សូមមើល ម៉ូសេ ៤:៣–៤ ) ។ យើងអាចប្រៀបធៀបទង្វើរបស់ព្រះយេស៊ូវ និងលូស៊ីហ្វើរ ដើម្បីស្វែងយល់បន្ថែមអំពីព្រះយេស៊ូវគ្រីស្ទ ។
សូមអាន ម៉ូសេ ៤:១–៤ ហើយរកមើលរបៀបដែលព្រះយេស៊ូវគ្រីស្ទ និងសាតាំងបានឆ្លើយតបទៅកាន់ព្រះ ។ សូមពិនិត្យមើលចម្លើយដែលអាចមានចំពោះសំណួរដែលបានរៀបរាប់ខាងលើ ។ អ្នកអាចធ្វើការកត់ចំណាំនៅជិតនឹង ម៉ូសេ ៤:១–៤ ហើយសង្ខេបអ្វីដែលអ្នកបានរៀន ។
-
តើដំណើររឿង គំនិត ឬមនុស្សនៅក្នុងដំណើររឿងនេះស្រដៀងគ្នាយ៉ាងដូចម្តេច ? តើវាខុសគ្នាយ៉ាងដូចម្ដេច ?
ភាពខុសគ្នា ៖ ព្រះយេស៊ូវចង់ធ្វើតាមព្រះ ហើយថ្វាយសិរីល្អដល់ទ្រង់ ។ សាតាំងចង់បានសិរីល្អសម្រាប់ខ្លួនឯង ។
-
តើយើងអាចរៀនអ្វីខ្លះចេញមកពីការប្រៀបធៀបនេះ ?
ព្រះយេស៊ូវគ្រីស្ទស្រឡាញ់ព្រះ ហើយចង់ឲ្យព្រះហឫទ័យទ្រង់បានសម្រេច ។ សាតាំងបានបះបោរប្រឆាំងនឹងព្រះ និងផែនការរបស់ទ្រង់ ហើយវាចង់ឲ្យយើងមានទុក្ខវេទនាដូចជាវាដែរ ( សូមមើល នីហ្វៃទី២ ២:២៧ ) ។
-
តើអ្វីដែលខ្ញុំរៀនពីការប្រៀបធៀបនេះ អាចជួយដល់ខ្ញុំនៅសព្វថ្ងៃនេះបានយ៉ាងដូចម្តេច ?
ព្រះវរបិតាសួគ៌ និងព្រះយេស៊ូវគ្រីស្ទចង់បានអ្វីដែលល្អបំផុតសម្រាប់ខ្ញុំ ។ សាតាំងចង់ឲ្យខ្ញុំមិនគោរពតាមបទបញ្ញត្តិរបស់ព្រះ ហើយក្លាយជាឈ្លើយដូចវាដែរ ។
-
តើអ្វីដែលខ្ញុំរៀនអាចជួយខ្ញុំឲ្យស្រឡាញ់ ឬធ្វើតាមព្រះអម្ចាស់បន្ថែមទៀតដោយរបៀបណា ?
ការមើលឃើញទង្វើរបស់ព្រះយេស៊ូវគ្រីស្ទជួយខ្ញុំឲ្យដឹងថា ទ្រង់ស្រឡាញ់ព្រះវរបិតាសួគ៌ ហើយទ្រង់ទាំងទ្វេចង់បានអ្វីដែលល្អបំផុតសម្រាប់ខ្ញុំ ។
អនុវត្ត
ឥឡូវនេះជាឱកាសរបស់អ្នកដើម្បីអនុវត្តការប្រៀបធៀប !
-
សូមជ្រើសរើសដំណើររឿងព្រះគម្ពីរមួយ ដូចខាងក្រោម ។
-
សូមអនុវត្តការប្រៀបធៀបដោយឆ្លើយសំណួរដែលបានសរសេរនៅខាងលើ ក៏ដូចជាសំណួរផ្សេងទៀតដែលព្រះវិញ្ញាណបំផុសគំនិតអ្នកឲ្យទូលសួរផងដែរ ។
-
សូមកត់ត្រានៅក្នុងសៀវភៅកត់ចំណាំរបស់អ្នកនូវអ្វីដែលអ្នកបានរៀន នៅពេលអ្នកសិក្សា ។
របាយការណ៍របស់អ្នកស៊ើបការណ៍១២នាក់ ។ ម៉ូសេបានបញ្ជូនអ្នកស៊ើបការណ៍១២នាក់ ឲ្យទៅសិក្សាពីដែនដីនៃសាសន៍កាណាន ដើម្បីមើលថាតើដែនដី និងប្រជាជននេះយ៉ាងណាដែរ ( សូមមើល ជនគណនា ១៣:១៧–២០ ) ។ នៅពេលពួកគេត្រឡប់ទៅវិញ អ្នកស៊ើបការណ៍១០នាក់ បានផ្ដល់របាយការណ៍ផ្សេងពីរបាយការណ៍ដែលកាលែប និងយ៉ូស្វេ ( អ្នកស៊ើបការណ៍ពីរនាក់ទៀត) បានផ្ដល់ ។ សូមអាន ជនគណនា ១៣:២៦–៣៣; ១៤:៦–៩ ដោយប្រៀបធៀបរបាយការណ៍ផ្សេងគ្នាទាំងនេះ ។
នៅពេលអ្នកសិក្សា អ្នកអាចគូសសម្គាល់ព័ត៌មានលម្អិតសំខាន់ៗដែលជួយអ្នកធ្វើការប្រៀបធៀប ។
Solomon’s Wisdom [ ប្រាជ្ញារបស់សាឡូម៉ូន ] ដោយ ស៊ីវ៉ឺរីណូ ប៉ារ៉ាលឌី
រជ្ជកាលនៃស្តេចសាឡូម៉ូន ។ ស្តេចសាឡូម៉ូនបានធ្វើជាស្តេចបន្ទាប់ ក្រោយពីបិតារបស់ទ្រង់ ដាវីឌបានសុគត ។ បំណងប្រាថ្នារបស់សាឡូម៉ូន និងការសន្យារបស់ព្រះអម្ចាស់ចំពោះទ្រង់បានផ្លាស់ប្តូរបន្តិចម្តងៗ ។ សូមអាន ពង្សាវតាក្សត្រ ទី១ ៣:៣, ៧–១២; ១១:៤–៦, ៩–១១ ដែលប្រៀបធៀបបំណងប្រាថ្នារបស់សាឡូម៉ូន និងការសន្យារបស់ព្រះអម្ចាស់ចំពោះទ្រង់នៅដើម និងនៅក្រោយរជ្ជកាលរបស់ទ្រង់ ។
នៅពេលអ្នកសិក្សា អ្នកអាចដាក់ស្លាកវគ្គបទគម្ពីរទាំងឡាយថា « បំណងប្រាថ្នា » ។
Annunciation to the Shepherds [ ការប្រកាសដំណឹងទៅកាន់អ្នកគង្វាល ] ដោយ ឌេល ផាសុន
ពួកអ្នកគង្វាលនៃសាសន៍អ៊ីស្រាអែល ។ តាមរយៈព្យាការីរបស់ទ្រង់ អេសេគាល ព្រះអម្ចាស់បានប្រឹក្សាអ្នកដឹកនាំអ៊ីស្រាអែល ហៅពួកគេថា « ពួកអ្នកគង្វាលនៃសាសន៍អ៊ីស្រាអែល » ( អេសេគាល ៣៤:២ ) ។ សូមអាន អេសេគាល ៣៤:២–៦, ១១–១៦ ហើយប្រៀបធៀបពួកអ្នកគង្វាលនៃសាសន៍អ៊ីស្រាអែល ដែលជាអ្នកគង្វាលល្អរបស់យើង ។
នៅពេលអ្នកសិក្សា អ្នកអាចដាក់ស្លាកវគ្គបទគម្ពីរថា « ព្រះបរមងាររបស់ព្រះយេស៊ូវគ្រីស្ទ » ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យធ្វើការប្រៀបធៀបនៅក្នុងព្រះគម្ពីរ ដើម្បីស្វែងរកសេចក្តីពិតដែលបង្កប់ន័យ ។
សូមចែកចាយ អ្វីដូចខាងក្រោមនេះជាមួយនឹងគ្រូបង្រៀន ឬថ្នាក់របស់អ្នក ៖
-
បទពិសោធន៍របស់អ្នកក្នុងការធ្វើការប្រៀបធៀប នៅពេលអ្នកសិក្សាព្រះគម្ពីរ ។ អ្នកអាចដាក់បញ្ចូលនូវអ្វីដែលមានប្រយោជន៍ និងបញ្ហាប្រឈមណាមួយដែលអ្នកបានប្រឈមមុខ ។