ជំនាញសិក្សាព្រះគម្ពីរ ៖ មេរៀនទី ១៦៦
ការផ្ដោតទៅលើព្រះយេស៊ូវគ្រីស្ទនៅក្នុងព្រះគម្ពីរ
ការស្វែងរកនិមិត្តសញ្ញា និងគុណលក្ខណៈរបស់ព្រះអង្គសង្គ្រោះ
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
អ្នកបាញ់កាំភ្លើងអូឡាំពិចដែលមានឈ្មោះថា ម៉ាធ្យូ អ៊ិមម៉ុនស៍ បានមេដាយក្នុងព្រឹត្តិការណ៍បាញ់កាំភ្លើងផ្សេងៗ ។ ទោះជាយ៉ាងណាក៏ដោយ ក្នុងអំឡុងពេលព្រឹត្តិការណ៍មួយ អ៊ិមម៉ុនស៍បានជួបប្រទះនឹងបញ្ហា ។ គាត់នៅចំណាត់ថ្នាក់លេខមួយ ហើយគ្រាន់តែត្រូវការការបាញ់ដ៏ល្អមួយប៉ុណ្ណោះដើម្បីឈ្នះ ។ ការតម្រង់បាញ់របស់គាត់គឺល្អឥតខ្ចោះ ។ ការបាញ់នោះបានទម្លុះចំកណ្តាលផ្ទាំងស៊ីបដូចបំណង ។ គួរឲ្យស្ដាយ អ៊ិមម៉ុនស៍ បានកំណត់គោលដៅខុស ។ ជំនួសឲ្យការកត់ត្រាថាជាការបាញ់ចំគោលដៅ គ្រាប់ដែលបាញ់ទៅនោះបានកត់ត្រាថាបាញ់ខុស ដោយទម្លាក់ អ៊ិមម៉ុនស៍ ចេញពីចំណាត់ថ្នាក់លេខមួយ ។
ការកំណត់គោលដៅត្រឹមត្រូវអាចជួយអ្នកឲ្យសម្រេចបាននូវគោលដៅរបស់អ្នក ។ តើអ្នកមានគោលបំណងអ្វី ពេលអ្នកសិក្សាព្រះគម្ពីរ ? តើអ្នកសង្ឃឹមចង់បានអ្វីខ្លះពីការសិក្សានេះ ? នៅពេលអ្នកសិក្សានៅថ្ងៃនេះ សូមយាងអញ្ជើញព្រះវិញ្ញាណបរិសុទ្ធឲ្យជួយអ្នករៀនបានច្រើនពីការសិក្សាព្រះគម្ពីររបស់អ្នក ។
គោលបំណងមេរៀន ៖ ដើម្បីជួយអ្នកឲ្យផ្ដោតទៅលើព្រះអង្គសង្រ្គោះ ខណៈដែលកំពុងសិក្សាព្រះគម្ពីរ ។
រៀនអំពីរបៀបធ្វើ
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានកំណត់គោលបំណងដ៏សំខាន់នៃព្រះគម្ពីរ ។ សូមអានសេចក្តីថ្លែងការណ៍ ឬមើលវីដេអូពីសុន្ទរកថា « The Blessing of Scripture » ។
នៅទីបញ្ចប់នេះ គោលបំណងដ៏សំខាន់បំផុតរបស់ព្រះគម្ពីរទាំងអស់គឺ ដើម្បីបំពេញព្រលឹងយើងដោយសេចក្ដីជំនឿលើព្រះ ជាព្រះវរបិតា និងលើព្រះរាជបុត្រារបស់ទ្រង់គឺព្រះយេស៊ូវគ្រីស្ទ—សេចក្ដីជំនឿដែលថា គឺពិតជាមានទ្រង់ទាំងទ្វេ ជាសេចក្ដីជំនឿលើផែនការរបស់ព្រះវរបិតាសម្រាប់ជីវិតអមតៈ និងជីវិតដ៏នៅអស់កល្បជានិច្ចរបស់យើង ជាសេចក្ដីជំនឿលើដង្វាយធួន និងការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ដែលធ្វើឲ្យផែនការនៃសុភមង្គលអាចកើតឡើង ជាសេចក្ដីជំនឿដើម្បីធ្វើឲ្យដំណឹងល្អរបស់ព្រះយេស៊ូវគ្រីស្ទក្លាយជាផ្លូវនៃជីវិតរបស់យើង និងជាសេចក្ដីជំនឿដើម្បីមកស្គាល់ « ព្រះពិតតែមួយ និងព្រះយេស៊ូវគ្រីស្ទដែល [ ទ្រង់បាន ] ចាត់ឲ្យមកផង » ( យ៉ូហាន ១៧:៣ ) ។ ( « The Blessing of Scripture » Liahona ខែឧសភា ឆ្នាំ២០១០ ទំព័រ ៣៤ )
ព្រះគម្ពីរ សេចក្តីជំនឿ
មេរៀននេះបង្រៀនអ្នកពីរបៀបផ្តោតលើការសិក្សាព្រះគម្ពីររបស់អ្នកអំពីព្រះយេស៊ូវគ្រីស្ទ ។ ដោយសារព្រះវរបិតាសួគ៌ និងព្រះយេស៊ូវគ្រីស្ទបានរួបរួមគ្នាយ៉ាងល្អឥតខ្ចោះ នោះគុណលក្ខណៈរបស់ព្រះគ្រីស្ទក៏អនុវត្តចំពោះព្រះវរបិតាសួគ៌ផងដែរ ( សូមមើល យ៉ូហាន ៦:៣៨; ១០:៣០; ១៤:៧–៩ ) ។ សម្រាប់ជំនាញនីមួយៗ អ្នកនឹងរៀនអំពីជំនាញនោះ មើលឧទាហរណ៍ ហើយបន្ទាប់មកមានឱកាសអនុវត្តវា ។
សូមកត់ត្រាជំនាញនីមួយៗនៅក្នុងសៀវភៅកត់ចំណាំ ដើម្បីអ្នកអាចយោងទៅលើវានៅពេលក្រោយ ។
ព្រះនាម និងព្រះបរមងាររបស់ព្រះយេស៊ូវគ្រីស្ទ ។ ខណៈដែលអ្នកមិនអនុវត្តវានៅថ្ងៃនេះ របៀបមួយទៀតដើម្បីផ្ដោតលើព្រះយេស៊ូវគ្រីស្ទនៅក្នុងព្រះគម្ពីរ គឺស្វែងរកព្រះនាម និងព្រះបរមងារដែលមនុស្សប្រើសម្រាប់ទ្រង់នៅក្នុងព្រះគម្ពីរ ។ ព្រះនាម និងព្រះបរមងារទាំងនេះជួយយើងរៀនអំពីបុគ្គលិកលក្ខណៈ និងគុណលក្ខណៈរបស់ទ្រង់ ។
ជំនាញ ៖ រកមើលនិមិត្តសញ្ញានៃព្រះអង្គសង្គ្រោះ ហើយពិចារណាពីអត្ថន័យរបស់វា
ព្រះគម្ពីរមាននិមិត្តសញ្ញានៃព្រះអង្គសង្គ្រោះជាច្រើន ។ និមិត្តសញ្ញានៃព្រះអង្គសង្គ្រោះគឺជាវត្ថុ ឬរបស់របរដែលអាចរំឭកយើងអំពីតួនាទីរបស់ព្រះអង្គសង្គ្រោះនៅក្នុងជីវិតរបស់យើង ។ សម្រាប់ជំនាញនេះ សូមរកមើលទីសម្គាល់ដែលរំឭកអ្នកអំពីព្រះអង្គសង្គ្រោះ ហើយសួរ ៖
-
តើព្រះអង្គសង្គ្រោះដូចជានិមិត្តសញ្ញានេះយ៉ាងដូចម្ដេច ?
-
តើការប្រៀបធៀបព្រះអង្គសង្គ្រោះទៅនឹងនិមិត្តសញ្ញានេះជួយខ្ញុំឲ្យយល់ពីរបៀបដែលព្រះអង្គសង្គ្រោះអាចជួយខ្ញុំក្នុងជីវិតរបស់ខ្ញុំយ៉ាងដូចម្តេច ?
ឧទាហរណ៍
តាមរយៈព្យាការីយេរេមា ព្រះអម្ចាស់បានប្រើនិមិត្តសញ្ញាដ៏មានឥទ្ធិពល ដើម្បីបង្រៀនយើងអំពីទ្រង់ ។ សូមអាន យេរេមា ២:១៣; ១៧:១៣ ហើយស្វែងរកនិមិត្តរូបមួយអំពីព្រះអង្គសង្គ្រោះ ។
នៅក្នុងវគ្គបទគម្ពីរនេះ ប្រភពទឹកនៃទឹករស់ត្រូវបានប្រើជានិមិត្តរូបនៃព្រះយេស៊ូវគ្រីស្ទ ។ សូមគិតអំពីអ្វីដែលនិមិត្តរូបនេះអាចជួយអ្នកឲ្យយល់អំពីទ្រង់ ។ អ្នកអាចពិចារណាសំណួរដូចតទៅនេះ ៖ តើទឹកប្រើប្រាស់សម្រាប់អ្វីខ្លះ ? តើព្រះអង្គសង្គ្រោះប្រៀបដូចជាទឹកតាមវិធីទាំងនេះយ៉ាងដូចម្ដេច ? តើព្រះអង្គសង្គ្រោះមានសារៈសំខាន់ដូចទឹកយ៉ាងដូចម្ដេច ? ហេតុអ្វីបានជាយើងអាចត្រូវការទ្រង់ញឹកញាប់ដូចជាយើងត្រូវការទឹក ?
នៅជិតនឹងខគម្ពីរមួយក្នុងចំណោមខគម្ពីរដែលនិយាយអំពីទឹក សូមសរសេរកំណត់ចំណាំដែលពន្យល់ពីរបៀបដែលប្រភពទឹកនៃទឹករស់តំណាងឲ្យព្រះយេស៊ូវគ្រីស្ទ ឬអ្នកអាចដាក់ស្លាកវគ្គបទគម្ពីរនោះថាជា « និមិត្តរូបនៃព្រះយេស៊ូវគ្រីស្ទ » ។
អនុវត្ត
សូមអាន បទគម្ពីរមួយដូចខាងក្រោម ។ សូមស្វែងរកនិមិត្តរូបនៃព្រះអង្គសង្គ្រោះ ហើយសួរខ្លួនឯងនូវសំណួរពីរដែលបានលើកឡើងពីមុន ។
-
សាំយូអែល ទី២ ២២:២–៤
-
អេសាយ ២៥:៤ ( ចំណាំ ៖ ពាក្យ ទ្រង់ សំដៅលើព្រះអម្ចាស់ ) ។
-
ម៉ាទ្បាគី ៣:២–៣
សូមដាក់ស្លាកវគ្គបទគម្ពីរនេះជាមួយនឹង « និមិត្តរូបនៃព្រះយេស៊ូវគ្រីស្ទ » ឬសរសេរកំណត់ចំណាំពន្យល់អំពីអ្វីដែលអ្នកបានរៀនអំពីព្រះយេស៊ូវគ្រីស្ទពីនិមិត្តរូបនេះ ។
ជំនាញ ៖ រកមើលអ្វីដែលយើងអាចរៀនអំពីព្រះអង្គសង្គ្រោះពីសកម្មភាព និងព្រះបន្ទូលរបស់ទ្រង់
យើងក៏អាចផ្ដោតលើព្រះអង្គសង្គ្រោះផងដែរ នៅពេលយើងសិក្សាព្រះគម្ពីរដោយរកមើលសកម្មភាព និងព្រះបន្ទូលរបស់ទ្រង់នៅក្នុងព្រះគម្ពីរ ។ នៅពេលអ្នកអានព្រះគម្ពីរ សូមសួរខ្លួនឯងនូវសំណួរដូចខាងក្រោមនេះ ៖
-
តើព្រះបន្ធូល ឬសកម្មភាពទាំងនេះបង្រៀនខ្ញុំអ្វីខ្លះអំពីព្រះអង្គសង្គ្រោះ ?
-
តើព្រះបន្ទូល ឬសកម្មភាពទាំងនេះជួយខ្ញុំឲ្យយល់ពីរបៀបដែលព្រះអង្គសង្គ្រោះអាចជួយខ្ញុំក្នុងជីវិតរបស់ខ្ញុំបានដោយរបៀបណា ?
ឧទាហរណ៍
យើងអាចរៀនអំពីព្រះអង្គសង្គ្រោះដោយសិក្សាដំណើររឿងរបស់សាដ្រាក់ មែសាក់ និងអ័បេឌ-នេកោ ។ បុរសសុចរិតទាំងបីនាក់នេះត្រូវបានគេបោះចូលក្នុងគុកភ្លើង ដោយសារពួកគេបដិសេធមិនគោរពបូជារូបមាសដែលស្តេចនេប៊ូក្នេសាបានបង្កើត ( សូមមើល ដានីយ៉ែល ៣:១៣–២២ ) ។
សូមអាន ដានីយ៉ែល ៣:២៣–២៥ ហើយរកមើលអ្វីដែលព្រះអង្គសង្គ្រោះបានធ្វើនៅក្នុងខគម្ពីរទាំងនេះ ។ ( កំណត់ចំណាំ ៖ មនុស្សទីបួននៅក្នុងឡគឺព្រះយេស៊ូវគ្រីស្ទ ) ។
សូមគិតអំពីសកម្មភាពរបស់ព្រះអង្គសង្គ្រោះ ។ ហេតុអ្វីបានជាទ្រង់ធ្វើកិច្ចការនេះ ? តើទង្វើរបស់ទ្រង់បង្រៀនអ្នកអ្វីខ្លះអំពីទ្រង់ ? ទង្វើរបស់ព្រះអង្គសង្រ្គោះជួយអ្នកឲ្យមើលឃើញថា ព្រះយេស៊ូវគ្រីស្ទស្រឡាញ់យើង និងគង់នៅជាមួយយើងនៅក្នុងជីវិតនេះ ។
អនុវត្ត
សូមអានវគ្គបទគម្ពីរមួយ ខាងក្រោម ។ សូមគូសចំណាំអ្វីដែលព្រះអម្ចាស់បានមានបន្ទូល ឬបានធ្វើ ។ នៅជិតនឹងវគ្គបទគម្ពីរនេះ សូមសរសេរកំណត់ចំណាំមួយ ដែលរួមបញ្ចូលនូវអ្វីដែលអ្នកបានរៀនអំពីព្រះយេស៊ូវគ្រីស្ទ ចេញពីអ្វីដែលទ្រង់បានធ្វើ ឬបានមានបន្ទូល ។
-
សាំយូអែល ទី១ ១៦:៦–៧ ។ សាំយូអែលកំពុងព្យាយាមស្វែងរកស្តេចថ្មីរបស់អ៊ីស្រាអែល ។
-
អេសាយ ១:១៦–១៨ ។ ប្រជាជនអ៊ីស្រាអែលបានធ្លាក់ក្នុងអំពើបាប ។
-
អេសាយ ៥៣:៣–៥ ។ ការព្យាករអំពីដង្វាយធួនរបស់ព្រះអង្គសង្គ្រោះ ។
ចែកចាយគំនិតរបស់អ្នក
គោលបំណងមេរៀន ៖ មេរៀននេះមានគោលបំណងជួយអ្នកឲ្យផ្ដោតទៅលើព្រះអង្គសង្រ្គោះ ខណៈដែលកំពុងសិក្សាព្រះគម្ពីរ ។
សូមចែកចាយ អ្វីដូចខាងក្រោមនេះជាមួយនឹងគ្រូបង្រៀន ឬថ្នាក់របស់អ្នក ៖
-
អ្វីដែលអ្នកបានរៀនអំពីព្រះយេស៊ូវគ្រីស្ទ នៅពេលអ្នកអនុវត្តជំនាញទាំងឡាយ ។