Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko Hotau Fatongia Fakafuakava ke Vahevahe ʻa e Ongoongoleleí: “ʻE Monūʻia ʻIate Koe mo Ho Hakó ʻa e Ngaahi Faʻahinga Kotoa Pē ʻo Māmaní”

“Ko Hotau Fatongia Fakafuakava ke Vahevahe ʻa e Ongoongoleleí: ʻʻE Monūʻia ʻIate Koe mo Ho Hakó ʻa e Ngaahi Faʻahinga Kotoa Pē ʻo Māmaní,’” Fuakava Motuʻá – Tohi Lēsoni ʻa e Faiako Seminelí (2026)

Teuteu Ngāue Fakafaifekaú: Lēsoni 196

Ko Hotau Fatongia Fakafuakava ke Vahevahe ʻa e Ongoongoleleí

“ʻE Monūʻia ʻIate Koe mo Ho Hakó ʻa e Ngaahi Faʻahinga Kotoa Pē ʻo Māmaní”

Missionaries teaching about the Temple to a new member outside the Seoul Korea Temple.

ʻI heʻetau fili ke muimui ki he Fakamoʻuí mo ʻaʻeva ʻi he hala ʻo e fuakavá, ʻokú Ne talaʻofa mai ai ʻa e ngaahi tāpuaki tatau naʻá Ne foaki kia ʻĒpalahamé. ʻOku kau ʻi he ngaahi tāpuaki ko ʻení ʻa e mālohi ʻo e lakanga fakataulaʻeikí, ngaahi fāmili taʻengatá, mo ha tofiʻa ʻi he puleʻanga fakasilesitialé. Ko e konga ʻo e fuakava ko ʻení, ʻoku tau maʻu ai ʻa e fatongia toputapu ʻo hono vahevahe ʻa e ongoongolelei ʻo e Fakamoʻuí ʻi he kotoa ʻo e māmaní ke lava ʻa e tokotaha kotoa ʻo maʻu e ngaahi tāpuaki fakaofó ni. ʻE lava ke tokoni ʻa e lēsoni ko ʻení ke fakaloloto e mahino ʻa e kau akó fekauʻaki mo honau fatongia ʻi he fuakava ke vahevahe ʻa e ongoongolelei ʻo Sīsū Kalaisí mo e niʻihi kehé.

Teuteu ʻa e tokotaha akó: Fakaafeʻi e kau akó ke fakaʻaongaʻi ha ngaahi miniti siʻi ʻo ʻenau ako folofola fakatāutahá ʻo kumi e ngaahi tāpuaki mo e ngaahi fatongia ʻo e fuakava faka-ʻĒpalahamé. Te nau lava ʻo ako ʻa e potufolofola fakataukei fakatokāteline ʻĒpalahame 2:9–11 pe kumi ʻa e “Fuakava Faka-ʻĒpalahamé” ʻi he Gospel Library. Lolotonga e lēsoní, te ke lava ʻo fakaafeʻi kinautolu ke vahevahe e ngaahi meʻa ne nau akó pe ngaahi fehuʻi ʻoku nau maʻú.

Ngaahi ʻEkitivitī Ako ʻOku Ala Fakahokó

Ngaahi fāmili ʻo e māmaní

Fili ʻe he kulupú ha taha ʻo e ngaahi tā ʻo ha tokotaha ʻi homou ʻū konga pāsoló pea faʻu ha fakamatala nounou kau ki he tokotaha ko iá. ʻE lava ke kau heni ʻa e:

Hingoa
Feituʻu ʻoku haʻu mei aí
Ngaahi fakaikiiki fekauʻaki mo hono fāmilí
Ngaahi meʻa ʻoku lelei ʻi heʻene moʻuí
Ngaahi faingataʻa ʻoku fehangahangai mo iá

Fakaafeʻi e kulupu takitaha ke vahevahe mo e kalasí ʻa e ngaahi fakaikiiki naʻa nau faʻu ki he tokotaha ne nau fili mei heʻenau ʻū konga pāsoló. Hili ʻenau vahevahé, fakaafeʻi e kau akó ke sio ʻi he lēsoní ki he meʻa kuo kole mai ʻe he ʻEikí ke tau fakahoko ke tāpuekina ʻaki e kakai ʻi he māmaní, ʻo hangē ko kinautolu ne fakamatalaʻi ʻe he kulupu takitaha. Fakamatalaʻi ange ʻe fakakakato fakataha ʻe he kau akó ʻa e pāsoló kātoa ʻamui ange ʻi he lēsoní.

Fakakaukau ke fakaafeʻi e kau akó ke ako ʻa e potufolofola ko ʻení mo ʻenau ngaahi kulupú.

Lau ʻa e ʻĒpalahame 2:9–11, ʻo kumi e meʻa naʻe fakahā ʻe he ʻEikí kia ʻĒpalahame te Ne fakahoko ke tāpuakiʻi ai e ngaahi puleʻanga mo e ngaahi fāmili ʻo e māmaní. Fakatokangaʻi ange: ʻOku kau ʻi he ngaahi veesi ko ʻení ha konga ʻo e meʻa ʻoku ʻiloa ko e fuaka faka-ʻĒpalahamé.

Ko hai ʻa e hako ʻo ʻĒpalahamé? (Vakai, veesi 10–11.)
Ko e hā ha ngaahi founga ʻe lava ke tāpuekina ai ʻe he ʻEikí ʻa e ngaahi fāmili ʻo e māmaní ʻo fakafou ʻi he hako ʻo ʻĒpalahamé?

ʻE lava ke vahevahe ʻa e fakamatala ko ʻení ke poupouʻi pe tānaki atu ki he ngaahi tali ʻa e kau akó.

Naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni fekauʻaki mo e hako ʻo ʻĒpalahamé:

Ko e hako kitautolu ʻo ʻĒpalahame. …

Ko e ngāue fakafaifekaú ko hono fakahaaʻi fakalaumālie ia pe ko hai kitautolu mo hotau tukufakaholó. Ne tomuʻa fakanofo kitautolu ʻi he maama fakalaumālié pea fāʻeleʻi ki he matelié ke fakahoko e fuakava mo e talaʻofa ne fai ʻe he ʻOtuá kia ʻĒpalahamé. ʻOku tau ʻi heni ʻi he māmaní ʻi he kuongá ni ke poupouʻi e lakanga fakataulaʻeikí pea malanga ʻaki e ongoongoleleí. Ko hotau tuʻungá ia pea ko e ‘uhinga ia ‘oku tau ‘i heni ai—ʻi he ‘ahó ni pea ‘i he taimi kotoa pē. (“Becoming a Missionary,” Liahona, Nov. 2005, 47)

Te ke fakamatalaʻi fakanounou fēfē nai ʻa e fakamatala ko ʻení?

ʻE ala talaatu ʻe he kau akó ha meʻa hangē ko ʻení, ʻi heʻetau hoko ko e hako ʻo ʻĒpalahamé, ʻoku ʻi ai hotau fatongia fakafuakava ke vahevahe ʻa e ongoongolelei ʻo Sīsū Kalaisí ʻi hono kotoa ʻo e māmaní. Fakakaukau ke fakaʻaongaʻi e ngaahi lea ʻa e kau akó ke hiki ʻa e foʻi moʻoni ko ʻení ʻi he palakipoé.

Ke mahino lelei ange ʻa e mahuʻinga ʻo e fatongiá ni, ʻe lava ke fakaafeʻi ʻa e kau akó ke nau lau ʻa e ʻuluaki palakalafi ʻe tolu ʻi he peesi 1 ʻo e Malanga ʻAki ʻEku Ongoongoleleí ʻi he ʻuluʻi tohi “Ko Ho Tufakanga ke Akoʻi e Ongoongolelei ʻo Sīsū Kalaisi Kuo Fakafoki Maí.”

Ko e hā ka vēkeveke ai ha kakai ʻe niʻihi ki he fatongia ko ʻení? Ko e hā ka momou ai ha niʻihi?
ʻOkú ke pehē ʻe tāpuekina fēfē ʻe he ongoongolelei ʻo Sīsū Kalaisí ʻa e kakai hangē ko ia naʻá ke fakamatalaʻi ʻi homou ʻū konga pāsoló?

Ke tokoni ke vakai ʻa e kau akó ki he mahuʻinga ʻo hono vahevahe ʻa e ongoongoleleí, te ke lava ʻo ʻeke ange pe ko e hā ʻoku nau manatuʻi fekauʻaki mo e fuakava faka-ʻĒpalahamé pe fakamatalaʻi ʻa e meʻa ko ʻení “Lēsoni 23: ‘Sēnesi 12; 17’” mo e “Lēsoni 24: ‘ʻĒpalahame 2:9–11’”):

Ko e konga ʻo e fuakava faka-ʻĒpalahamé, kuo talaʻofa mai ʻe he ʻOtuá ʻa e ngaahi tāpuaki ʻo ʻEne lakanga fakataulaʻeikí, ngaahi fāmili taʻengatá, mo ha tofiʻa ʻi he puleʻanga fakasilesitialé. Ko e ngaahi tāpuaki ʻeni ʻokú Ne finangalo ki he kotoa ʻo ʻEne fānaú, pea ʻoku tau maʻu ʻa e faingamālie mo e fatongia ki hono vahevahe ia mo e māmaní.

ʻOku fakaʻaiʻai fēfē kitautolu ʻi hono manatuʻi e ngaahi tāpuaki ko ʻení ke tau vahevahe ʻa e ongoongolelei ʻo Sīsū Kalaisí mo e niʻihi kehé?

Fakakaukau ki hoʻo ngaahi ongo fakataautaha fekauʻaki mo hono vahevahe ʻa e ongoongoleleí mo e niʻihi kehé. Hokohoko atu ke kumi ha ngaahi fakakaukau ʻe lava ʻo tokoni ke mahino lelei ange kiate koe ʻa e ngaahi tāpuaki mo e faingamālie ʻo e fatongia toputapú ni.

Ko hono fakahoko hotau fatongia fakafuakavá

ʻOku ʻi he ʻĪsaia 49 ha ngaahi kikite ki hono tānaki ʻo ʻIsileli ʻi he ngaahi ʻaho fakaʻosí, kau ai hono malangaʻi ʻo e ongoongoleleí. Naʻe fakamatalaʻi ʻe Nīfai ko e palōfita ʻi he Tohi ʻa Molomoná ko e ngaahi kikite ko ʻení ko ha fakamanatu ia ʻe tauhi ʻe he ʻOtuá ʻEne fuakava ke tāpuakiʻi e ngaahi fāmili ʻo e māmaní ʻo fakafou ʻi he hako ʻo ʻĒpalahamé (vakai, 1 Nīfai 22:7–9). Fakatokangaʻi ange: Ko e tamaioʻeiki naʻe lau ki ai ʻi he ʻĪsaia 49:3 mo e 5 ʻe lava ke ne fakamatalaʻi e niʻihi fakafoʻituitui ʻoku nau taki ʻa e kakaí kia Kalaisí, kau ai e kau mēmipa ʻo e fale ʻo ʻIsilelí, kau palōfitá, mo e Fakamoʻuí Tonu.

Fakaʻaliʻali e ngaahi fakahinohino ko ʻení. ʻE lava ke fakakakato ʻeni ʻe he kau akó mo ʻenau kulupú.

Ako fekauʻaki mo e ngaahi kikite ʻa ʻĪsaiá ʻaki hono lau e ngaahi potufolofola mo e lea ʻi mui ʻi homou ʻū kongokonga pāsoló. Aleaʻi pea teuteu ke vahevahe ʻeni mo e kalasí:

Ngaahi meʻa ʻokú ke ako fekauʻaki mo hotau fatongia fakafuakava ke vahevahe ʻa e ongoongoleleí.
Ngaahi founga ʻe lava ai ʻe he Tamai Hēvaní mo Sīsū Kalaisi ʻo tokoniʻi kitautolu ʻi heʻetau fakahoko e fatongia ko ʻení.
Ngaahi sīpinga ʻo e founga ʻe lava ai ʻo fakaʻaongaʻi ʻeni ʻe he kau faifekaú mo e kau mēmipa kehe ʻo e Siasi ʻo e ʻEikí.

Fakaʻosí

Fakakakato ha fakamatala ʻe taha pe lahi ange mei he ngaahi fakamatala ko ʻení ʻi hoʻo tohinoa akó ʻi heʻene fekauʻaki mo hotau fatongia fakafuakava ke vahevahe ʻa e ongoongoleleí:

Naʻá ku ako he ʻahó ni ko e kakai ko ia ʻi he funga ʻo e māmaní …

Naʻá ku ako he ʻahó ni ʻoku ou …

Naʻá ku ako he ʻahó ni ko e Fakamoʻuí …

Fakaafeʻi ha niʻihi ke nau vahevahe ʻa e meʻa naʻa nau tohí. Fakaʻosi ʻaki hano vahevahe hoʻo ngaahi ongo fekauʻaki mo hotau fatongia fakafuakava ke vahevahe ʻa e ongoongolelei ʻo Sīsū Kalaisí mo e niʻihi kehé. Fakamanatu ki he kau akó ko e ngāue ʻeni ʻa e Fakamoʻuí, pea te Ne tokoniʻi kinautolu ʻi heʻenau ngaahi feingá.

Ngaahi Maʻuʻanga Tokoni Kehe

Ko e hā hono ʻuhinga ʻoku ou maʻu ai ʻa e fatongia ke vahevahe ʻa e ongoongolelei ʻo Sīsū Kalaisí?

Naʻe akonaki ʻa Palesiteni Lāsolo M. Nalesoni ʻo pehē:

5:34

Kuo fai ʻe he tokotaha kotoa pē ha fuakava mo e ʻOtuá ke tokanga ki he niʻihi kehé mo tokoniʻi ʻa kinautolu ʻoku faingataʻaʻiá. Te tau lava ʻo fakahaaʻi e tui ki he ʻOtuá mo mateuteu maʻu pē ke tali ki he taha kotoa pē ‘okú ne fehuʻia “ʻa e ʻamanaki lelei ʻoku ʻiate [kitautolú]” (1 Pita 3:15). ʻOku ʻi ai hotau fatongia takitaha ki hono tānaki ʻo ʻIsilelí. (“Malangaʻi e Ongoongolelei ʻo e Melinó,” Liahona, Mē 2022, 6) (taimi 2:26 ki he 2:50)

ʻOku tāpuekina fēfē ʻe he Fakamoʻuí ʻa e niʻihi kehé ʻo fakafou ʻiate au?

Naʻe fakamatala ʻa Palesiteni Kamila N. Sionisoni, ko e Palesiteni Lahi ʻo e Fineʻofá, ʻo pehē:

10:19

Ko hotau tāpuaki fakafuakavá ke ngāue fakataha mo Sīsū Kalaisi ʻi hono fai ha fakafiemālie, fakatuʻasino mo fakalaumālie fakatouʻosi, ki he fānau kotoa ʻa e ʻOtuá. ʻOku tau hoko ko ha founga ʻokú Ne ʻomi ai ʻa e fakafiemālié.

Pea hangē ko e ngaahi kaungāmeʻa ʻo e tangata mahaki teté, ʻoku tau “tokoniʻi ʻa e vaivaí, hiki hake ʻa e ngaahi nima ʻoku tautau ki laló, pea fakamālohi ʻa e ngaahi tui ʻoku vaivaí” (Tokāteline mo e Ngaahi Fuakava 81:5). ʻOku tau “fefuaʻaki [ʻetau] kavengá pea fakamoʻoni ai ki he fono ʻa Kalaisí” (Kalētia 6:2). ʻI heʻetau fai iá, ʻoku tau ʻiloʻi ai Ia, hoko ʻo hangē ko Iá, pea maʻu ʻEne fakafiemālié. (“Ko Sīsū Kalaisi ʻa e Fakafiemālié,” Liahona, Mē 2023, 83) (taimi 8:16 ki he 8:50)

Fēfē kapau ʻoku ou fie vahevahe ʻa e ongoongolelei ʻo Sīsū Kalaisí ka ʻoku ʻikai ke u fakapapauʻi e founga ke fakahoko ai iá?

Ki ha ngaahi fakakaukau fekauʻaki mo hono vahevahe ʻa e ongoongoleleí, vakai ki he “Ngaahi Founga ke Vahevahe ai ʻa e Ongoongoleleí” ʻi he Gospel Library.

Fēfē kapau ʻoku ou ongoʻi manavasiʻi fekauʻaki mo hono vahevahe ʻa e ongoongoleleí?

ʻOku ʻomi ʻe he Malanga ʻAki ʻEku Ongoongoleleí ʻa e faleʻi ko ʻení:

Te ke ala ongoʻi tailiili pe taʻetaau ʻi ha taimi ʻe niʻihi. Mahalo ʻokú ke hohaʻa na ʻoku ʻikai ke feʻunga hoʻo ʻiló pe ʻoku ʻikai feʻunga hoʻo taukeí.

Naʻe ui koe ʻe hoʻo Tamai Hēvaní, ʻa ia ʻokú Ne ʻafioʻi kakato koé, koeʻuhí ko e meʻa te ke lava ʻo fai ko ha muimui moʻoni ʻo Sīsū Kalaisí. He ʻikai ke Ne liʻaki koe. Falala ʻe faitokonia ʻe he Laumālié hoʻo meʻa ʻoku lavá mo akoʻi ʻa e moʻoní kiate kinautolu ʻoku ongongofuá. (Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí [2023], 205)

Ngaahi ʻEkitivitī Fakalahi ki he Akó

Ngaahi tāpuaki ʻo e fuakava faka-ʻĒpalahamé

Ke tokoni ke mahino lelei ange ki he kau akó ʻa e ngaahi tāpuaki ʻo e fuakava faka-ʻĒpalahamé, toe vakaiʻi ʻa e konga “Ko e hā ʻoku mahuʻinga ai ʻa e fuakava faka-ʻĒpalahamé kiate aú?” ʻi he “Lēsoni 23: ‘Sēnesi 12; 17’.” Fakaafeʻi leva e kau akó ke nau aleaʻi e ʻuhinga te nau fie vahevahe ai ʻa e ngaahi tāpuaki kuo talaʻofa mai ko ʻení pea mo e fānau ʻa e ʻOtuá ʻi he māmaní.

Fili lahi ange ki he akó

Kapau ʻokú ke ongoʻi ʻe lelei ke faʻu ha kulupu fika nima, te ke lava ʻo ʻoange ki he kulupu nimá ʻa e naunau ko ʻení ke nau ako. Te ke lava ʻo faʻu ha pāsolo kehe ʻoku konga tolu ʻaki hono hiki e ngaahi fakamoʻoni folofola ko ʻení ʻi mui ʻi ha laʻitā ʻo ha faifekau pe ko ha laʻitā kehe ʻe feʻunga ki ai.

Fafanga ʻa e fiekaia fakalaumālié

ʻĪsaia 49:10

Sione 6:35; 3 Nīfai 20:7–8

Naʻe pehē ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻI he leʻo mo e loto pē ʻe taha, ʻoku tau fakamoʻoni ai ko e ongoongolelei pē ʻo Sīsū Kalaisí ʻa e founga ke fakafiemālieʻi ai ʻa e fiekaia mo e fieinua fakalaumālie vivili tahá. (“He Hath Filled the Hungry with Good Things,” Liahona, Nov. 1997, 65)

Malanga ʻAki ʻEku Ongoongoleleí

ʻE lava ke fakaʻaongaʻi ʻa e Malanga ʻAki ʻEku Ongoongoleleí ʻe he kau mēmipa kotoa ʻo e Siasí ke tokoniʻi kinautolu ke “fakahoko honau fatongia fuakava ke vahevahe ʻa e ongoongoleleí ʻaki hono moʻui ʻaki ʻa e tefitoʻi moʻoni ʻo e ʻofá, vahevahé, mo e fakaafé” (Malanga ʻAki ʻEku Ongoongoleleí, ix).

Te ke lava ʻo fakaafeʻi e kulupu takitaha ke nau ako ha ngaahi konga ʻo e Malanga ʻAki ʻEku Ongoongoleleí, kae ʻikai fakaafeʻi e kau akó ke nau ako e ngaahi potufolofola mo e lea ʻi mui ʻi heʻenau ʻū kongokonga pāsoló. Hangē ko ʻení, te nau lava ʻo ako ʻa e “Poupouʻi ʻa e Kāingalotú ʻi Heʻenau Feinga ke Vahevaheʻa e Ongoongoleleí” pe “Ngaahi Tāpuaki Kuo Talaʻofa ki Hono Vahevahe ʻo e Ongoongoleleí” ʻi he vahe 9. Fakaafeʻi ʻa e kulupu takitaha ke nau teuteu ke vahevahe ʻa e meʻa naʻa nau ako ʻe lava ʻo tokoni ke tau fakahoko hotau fatongia fakafuakava ke vahevahe ʻa e ongoongolelei ʻo Sīsū Kalaisí mo e niʻihi kehé.