Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sēnesi 12; 17: Ko e Fuakava Faka-ʻĒpalahamé

“Sēnesi 12; 17: Ko e Fuakava Faka-ʻĒpalahamé,” Fuakava Motuʻá – Tohi Lēsoni ʻa e Faiako Seminelí (2026)

“Sēnesi 12; 17: Ko e Fuakava Faka-ʻĒpalahamé,” Fuakava Motuʻá – Tohi Lēsoni ʻa e Faiako Seminelí

Sēnesi 12–17; ʻĒpalahame 1–2: Lēsoni 23

Sēnesi 12; 17

Ko e Fuakava Faka-ʻĒpalahamé

The Old Testament prophet Abraham kneeling in prayer on the plains of Mamre. Abraham's wife, Sarah, is standing in the doorway of a tent in the background. Sarah is watching Abraham. There is desert scenery in the background.

Naʻe fakahoko ʻe he ʻEikí mo ʻĒpalahame ha fuakava ʻoku ʻiloa he taimí ni ko e fuakava faka-ʻĒpalahamé. ʻI heʻetau fakahoko mo tauhi e ngaahi fuakava mo e ʻOtuá he ʻaho ní, te tau lava ʻo maʻu ʻa e ngaahi tāpuaki tatau meiate Ia ʻo hangē ko ia ne maʻu ‘e ʻĒpalahamé. ʻE lava ke tokoni ʻa e lēsoni ko ʻení ke fakamatalaʻi ʻe he kau akó ʻa e fuakava faka-ʻĒpalahamé mo e founga ʻoku fekauʻaki ai mo kinautolú.

Teuteu ʻa e tokotaha akó: Fakaafeʻi e kau akó ke kumi ʻa e “Fuakava Faka-ʻĒpalahamé” ʻi he Gospel Library pe Fakahinohino ki he Ngaahi Folofolá, pea omi mateuteu ke vahevahe ʻa e meʻa ne nau maʻú.

Ngaahi ʻEkitivitī Ako ʻOku Ala Fakahokó

Ko e fuakava faka-ʻĒpalahamé

Fakaafeʻi e kau akó ke nau fakakaukauloto naʻe kole ange ke nau fai ha lea ʻi he houalotu sākalamēnití fekauʻaki mo e fuakava faka-ʻĒpalahamé. Ke tokoni ke siviʻi ʻenau tuʻunga mateuteu ke fai ʻení, fakaafeʻi kinautolu ke hiki pea tali ʻa e ngaahi fehuʻi ko ʻení ʻi heʻenau tohinoa akó.

Ko e hā ʻa e fuakava faka-ʻĒpalahame?
Te u lava fēfē ʻo maʻu ʻa e fuakava faka-ʻĒpalahamé?
Ko e hā e ʻuhinga ʻoku mahuʻinga ai ʻa e fuakava faka-ʻĒpalahamé kiate aú?

Fakapapauʻi ki he kau akó ʻoku sai pē kapau ʻoku ʻikai lahi ʻenau ʻilo ki he fuakava faka-ʻĒpalahamé. ʻAi ke nau ʻilo te nau lava ʻo tānaki ki heʻenau ngaahi talí lolotonga e kalasí. Poupouʻi kinautolu ke fekumi ki ha fakapapau mei he Laumālie Māʻoniʻoní fekauʻaki mo hono moʻoni ʻo e meʻa ʻoku nau akó.

Fakatokangaʻi ange: ʻOku nofotaha ʻa e lēsoni ko ʻení ʻi he ngaahi tāpuaki ʻo e fuakava faka-ʻĒpalahamé pea mo e ʻuhinga ʻoku mahuʻinga ai kiate kitautolú. ʻE nofotaha ʻa e Lēsoni 24: “ʻĒpalahame 2:9–11” ʻi hotau ngaahi fatongia ʻi he fuakava faka-ʻĒpalahamé.

Ko e hā ʻa e fuakava faka-ʻĒpalahame?

Manatuʻi naʻe fiemaʻu ʻe ʻĒpalahame ʻa e “ngaahi tāpuaki ʻo e ngaahi tamaí” pea ke hoko ko ha “tokotaha muimui ki he māʻoniʻoní” (ʻĒpalahame 1:2). Naʻe talaʻofa ʻe he ʻEikí te Ne ʻai Hono huafá kia ʻĒpalahame pea foaki kiate ia ʻa e lakanga fakataulaʻeikí (vakai, ʻĒpalahame 1:18).

Fakakaukau ke faʻu ʻa e saati ko ʻení ʻi he palakipoé. Fakaafeʻi e kau akó ke ako ʻa e ngaahi veesi ʻi he kōlomu ʻuluakí pea hiki e ngaahi tāpuaki te nau maʻú ʻi he tafaʻaki ʻo e ngaahi veesi ʻoku fekauʻaki mo ia ʻi he palakipoé. Te nau ako ʻa e ngaahi veesi ʻi he kōlomu hono uá ʻamui ange ʻi he lēsoní.

Ko e ngaahi tāpuaki ʻa e ʻEikí naʻe talaʻofa kia ʻĒpalahamé

Ko e ngaahi tāpuaki ʻa e ʻEikí naʻe talaʻofa maʻakú

Sēnesi 12:2; 17:1–2, 4–6

Sēnesi 12:3; 17:7

Sēnesi 12:7; 17:8

ʻĒpalahame 2:11

Tokāteline mo e Ngaahi Fuakava 132:19–22, 30–31

ʻĒpalahame 2:9–11

Tokāteline mo e Ngaahi Fuakava 88:18–20

Tokāteline mo e Ngaahi Fuakava 84:33–38

Lau ʻa e Sēnesi 12:2–3, 7; 17:1–8; ʻĒpalahame 2:11, ʻo kumi e ngaahi tāpuaki naʻe folofola ʻe he ʻOtuá kia ʻĒpalahamé.

ʻI hono lau ʻe he kau akó ʻa e folofolá, fakakaukau ke lue takai holo ʻi he lokí. ʻOku ʻi ai ha kau ako ʻoku ngalingali te nau fai ha ngaahi fehuʻi ʻi he taimi ʻoku ofi mai ai ha faiakó, ko ia ai, ʻe lava ʻe hoʻo ngaʻunu takai holo ʻi he loki akó lolotonga e laukonga ʻa e kau akó ʻo fakafaingofuaʻi ange ki ha kau ako ʻe niʻihi ke nau kole tokoni atu. ʻI he ʻosi ʻa e kau akó, fakaafeʻi kinautolu ke vahevahe ʻa e meʻa naʻa nau akó.

Ko e hā e meʻa naʻá ke maʻú?
Ko e hā e meʻa ʻoku akoʻi atu ʻe he ngaahi talaʻofa ko ʻení fekauʻaki mo e ʻOtuá?

Ko ha lisi ʻeni ʻo ha niʻihi ʻo e ngaahi tāpuaki ʻe ala maʻu ʻe he kau akó:

Sēnesi 12:2; 17:1–2, 4–6: tamai ki he ngaahi puleʻanga lahi; fakatokolahi ʻaupito; tupu ʻo tokolahi ʻaupito (ʻI he lea faka-Hepeluú, ʻoku ʻuhinga ʻa e hingoa ʻĒpalamé ki he “tamai kuo hakeakiʻi,” pea mo e hingoa ʻĒpalahamé ki he “tamai ʻa e tokolahi.”)
Sēnesi 12:3; 17:7: tāpuekina ʻa e ngaahi fāmili kotoa ʻo e māmaní ʻaki hono hakó; fuakava ʻa e ʻOtuá ke hokohoko atu e hako ʻo ʻĒpalahamé
Sēnesi 12:7; 17:8: fonua ko Kēnaní
ʻĒpalahame 2:11: lakanga fakataulaʻeikí

ʻE lava foki ke ʻilo ʻe he kau akó ʻa e kupuʻi lea “tupu ʻa e ngaahi tuʻí ʻiate koe” (Sēnesi 17:6). ʻOku ʻuhinga ʻeni ki he ngaahi tuʻi te nau puleʻi ʻa ʻIsileli mo Siutá; kae hiliō aí, ʻoku ʻuhinga ia kia Sīsū Kalaisi (vakai, Mātiu 1:1; Fakahā 19:16).

Mahalo te ke fie fakamahinoʻi ange ʻoku ʻiloa ʻa e fuakava naʻe fai ʻe he ʻOtuá mo ʻĒpalahamé ko e fuakava faka-ʻĒpalahamé. Fakamatalaʻi ange ko e founga ia ʻoku foaki ai ʻe he ʻOtuá ʻEne ngaahi tāpuaki maʻongoʻonga tahá ki Heʻene fānaú. Naʻe toutou fakapapauʻi ʻe he ʻOtuá ʻa e fuakava ko ʻení mo ʻĒpalahame ʻi heʻene moʻuí (vakai, Sēnesi 13:14–17; 15:5, 18; 22:15–18; ʻĒpalahame 2:8–12; 3:14).

Te u lava fēfē ʻo maʻu ʻa e fuakava faka-ʻĒpalahamé?

Vahevahe ʻa e lea ko ʻeni meia Palesiteni Nalesoni ke tokoni ke vakai ʻa e kau akó ki he founga ʻoku fekauʻaki ai ʻa e fuakava faka-ʻĒpalahamé mo kinautolú (vakai foki, Kalētia 3:27–29; ʻĒpalahame 2:10).

Naʻe akoʻi ʻe Palesiteni Lāsolo M. Nalesoni ʻa e founga ʻe lava ke tau takitaha maʻu ai ʻa e ngaahi tāpuaki tatau ko ʻeni naʻe talaʻofa ʻe he ʻOtuá kia ʻĒpalahamé:

Ko e taimi ʻoku tau tali ai ʻa e ongoongoleleí pea papitaisó, ʻoku tau toʻo kiate kitautolu ʻa e huafa toputapu ʻo Sīsū Kalaisí. Ko e papitaisó ʻa e matapā ʻoku fakatau ki he hoko ko e kaungā ʻea-hoko ki he ngaahi talaʻofa kotoa naʻe fai ʻe he ʻEikí ʻi he kuonga muʻá kia ʻĒpalahame, ʻAisake, Sēkope, mo honau hakó.

ʻOku tatau pē ʻa e “fuakava foʻou mo taʻengatá” (Tokāteline mo e Ngaahi Fuakava 132:6) mo e fuakava faka-ʻĒpalahamé—ko ha founga ʻe ua ʻo hono ui ʻo e fuakava naʻe fai ʻe he ʻOtuá mo e kakai tangata mo fafine fakamatelié ʻi ha ngaahi taimi kehekehe. …

… Naʻá ta hū fakataautaha ki he hala ʻo e fuakavá ʻi he papitaisó. Pea ta hū kakato leva ki ai ʻi he temipalé. ʻOku maʻu e ngaahi tāpuaki ʻo e fuakava faka-ʻĒpalahamé ʻi he ngaahi temipale toputapú. ʻOku fakaʻatā kitautolu ʻe he ngaahi tāpuaki ko ʻení, ʻi he toetuʻú, ke “maʻu ʻa e ngaahi taloni, ngaahi puleʻanga, ngaahi pule fakapilinisi, mo e ngaahi mālohi, ki hotau ʻhākeakiʻí mo e nāunau ʻi he ngaahi meʻa kotoa pē’ [Tokāteline mo e Ngaahi Fuakava 132:19].” (“Ko e Fuakava Taʻengatá,” Liahona, ʻOkatopa 2022, 4, 6)

Te ke fakamatalaʻi fakanounou fēfē nai ʻa e meʻa ʻe lava ke tau ako meia Palesiteni Nalesoni fekauʻaki mo e ngaahi tāpuaki ʻo ʻĒpalahamé?

Tokoni ke ʻiloʻi ʻe he kau akó ha moʻoni hangē ko ʻení: ʻI heʻetau fakahoko mo tauhi e ngaahi fuakava mo e ʻOtuá, ʻoku tau hoko ai ko e kau ʻea-hoko ki he ngaahi tāpuaki naʻe foaki kia ʻĒpalahamé.

Ko e hā e ʻuhinga ʻoku mahuʻinga ai ʻa e fuakava faka-ʻĒpalahamé kiate aú?

Fakaafeʻi e kau akó ke ako e ngaahi potufolofola ʻi he kōlomu hono uá pea hiki ʻi heʻenau tohinoa akó e founga ʻoku talaʻofa ange foki ai kiate kinautolu e ngaahi tāpuaki ne talaʻofa kia ʻĒpalahamé. ʻE lava ke hoko ʻa e ʻū veesi ko ʻení ko e lelei taha ke ako ʻe he kau akó ʻi ha ngaahi hoa pe ngaahi kulupu iiki.

Ko ha niʻihi ʻeni ʻo e ngaahi tāpuaki ʻe ala maʻu ʻe he kau akó:

Tokāteline mo e Ngaahi Fuakava 132:19–22, 30–31: ngaahi fāmili taʻengatá (“hokohoko atu … ʻo e ngaahi hakó” mo e “hokohoko atu ʻo e ngaahi moʻuí”)
ʻĒpalahame 2:9–11: vahevahe ʻa e ongoongoleleí mo e ngaahi fāmili kotoa ʻo e māmaní; fakamoʻuí mo e hakeakiʻí
Tokāteline mo e Ngaahi Fuakava 88:18–20 (ʻoku ʻuhinga ʻa e “iá” ki he māmaní): ko e tofiʻa ʻi he puleʻanga fakasilesitialé (vakai foki, Hepelū 11:8, 13–16)
Tokāteline mo e Ngaahi Fuakava 84:33–38: ko e ngaahi tāpuaki ʻo e lakanga fakataulaʻeikí, kau ai e meʻa kotoa ʻoku maʻu ʻe he Tamaí

Ko e hā ha ngaahi founga ʻoku mahuʻingamālie ai kiate koe ʻa e ngaahi tāpuaki ko ʻeni kuo talaʻofa maí?
Ko e hā ha meʻa ʻoku akoʻi atu ʻe he ngaahi tāpuaki ko ʻení fekauʻaki mo e ongo ʻa e ʻOtuá kiate koé?

Ke fokotuʻu ʻa e fuakava faka-ʻĒpalahamé ʻi he puipuituʻa ʻo e palani ʻa e Tamai Hēvaní, mahalo te ke fie ʻeke ki he kau akó pe ko e hā ha meʻa ʻokú ne ʻai ke tau malava ai ʻo maʻu ʻa e ngaahi tāpuaki naʻa nau lisí. ʻE lava ke fakalaulauloto pe vahevahe ʻe he kau akó ha niʻihi ʻo ʻenau ngaahi fakakaukaú. Te ke lava foki ʻo vahevahe ʻa e fakamatala ko ʻení meia Palesiteni Nalesoni.

Naʻe fakamahinoʻi ʻe Palesiteni Lāsolo M. Nalesoni ʻa e meʻa ʻokú ne ʻai ke tau malava ai ʻo maʻu e ngaahi tāpuaki ʻo e fuakava faka-ʻĒpalahamé:

Naʻe malava ʻe he feilaulau fakalelei ʻa e Fakamoʻuí ke fakahoko ʻe he Tamaí ʻEne ngaahi talaʻofa naʻe fai ki Heʻene fānaú. … ʻOku malava hono fakahoko ʻo e fuakava faka-ʻĒpalahamé koeʻuhí ko e Fakalelei ʻa hotau Fakamoʻuí, ʻa e ʻEiki ko Sīsū Kalaisí. Ko Sīsū Kalaisi ʻa e uho ʻo e fuakava faka-ʻĒpalahamé. (“Ko e Fuakava Taʻengatá,” Liahona, ʻOkatopa 2022, 7).

Fakamatalaʻi ʻa e fuakava faka-ʻĒpalahamé

Fakaafeʻi e kau akó ke tānaki atu ki heʻenau ngaahi tali mei he kamataʻanga ʻo e kalasí:

Ko e hā ʻa e fuakava faka-ʻĒpalahame?
Te u lava fēfē ʻo maʻu ʻa e fuakava faka-ʻĒpalahamé?
Ko e hā e ʻuhinga ʻoku mahuʻinga ai ʻa e fuakava faka-ʻĒpalahamé kiate aú?

Ke fakamālohia ʻenau mahinó, fakakaukau ke fakaafeʻi e kau akó ke nau tauhoa pea fefakamatalaʻaki ʻa e fuakava faka-ʻĒpalahamé. Poupouʻi kinautolu ke vakai pe te nau lava ʻo fakanounouʻi kae kakato pē ʻenau ngaahi talí. ʻE lava ke tokoni hono fakamatalaʻi ʻo e fuakava ko ʻení ʻi he nounou taha ʻe ala lavá ke tokoni ke mahino lelei ange ki he kau akó.

Fakamoʻoni ki he ngaahi tāpuaki mo e ngaahi talaʻofa ʻoku foaki mai ʻe he ʻOtuá kiate kitautolu ʻo fakafou ʻi he fuakava faka-ʻĒpalahamé.

Ngaahi Maʻuʻanga Tokoni Kehé

Ko e hā ʻa e ngaahi talaʻofa ʻo e fuakava faka-ʻĒpalahamé?

Naʻe pehē ‘e Palesiteni Lāsolo M. Nalesoni:

14:20

Ko e fuakava naʻe fai ʻe he ʻOtuá mo ʻĒpalahamé pea toe fakahoko kimui ange mo ʻAisake mo Sēkopé ʻoku matuʻaki mahuʻinga ia. ʻOku kau ai ha ngaahi talaʻofa lahi:

ʻE ʻaloʻi ʻa Sīsū Kalaisi ʻi he hako ʻo ʻĒpalahamé.

ʻE tokolahi e hako ʻo ʻĒpalahamé, pea te nau maʻu e totonu ke nau tupu tokolahi he taʻengatá pea maʻu mo e lakanga fakataulaʻeikí.

ʻE hoko ʻa ʻĒpalahame ko ha tamai ki he ngaahi puleʻanga lahi.

ʻE maʻu ʻe hono hakó ha ngaahi fonua pau.

ʻE tāpuekina ʻe hono hakó e puleʻanga kotoa pē ʻo e māmaní.

Pea ʻe taʻengata e fuakava ko iá—ʻo aʻu “ki he toʻu tangata ʻe lauiafe.”

(“Ngaahi Fuakavá,” Liahona, Nōvema 2011, 87)

Te tau lava nai ʻo fai ʻa e ngaahi fuakava tatau mo e ʻOtuá ʻo hangē ko ia naʻe fai ʻe ʻĒpalahamé?

Naʻe akonaki ʻa Palesiteni Lāsolo M. Nalesoni ʻo pehē:

Naʻe fakahoko ʻe ʻĀtama mo ʻIvi, Noa mo hono uaifí, ʻĒpalahame mo Sela, Līhai mo Selaia, pea mo e kau ākonga faimāteaki kotoa ʻa Sīsū Kalaisi—talu mei hono faʻu ʻo e māmaní—ʻa e ngaahi fuakava tatau mo e ʻOtuá. Kuo nau maʻu e ngaahi ouau tatau [kuo] tau [fakahoko] ko e kāingalotu he ʻahó ni ʻo e Siasi ʻo e ʻEikí kuo fakafoki maí, [ʻa e ngaahi fuakava ko ia ʻoku tau maʻu] ʻi heʻetau papitaisó pea ʻi he temipalé. (“Haʻu, ʻo Muimui ʻIate Au,” Liahona, Mē 2019, 89)

ʻOku fekauʻaki fēfē ʻa hono fakahā ʻo e hakó ʻi hoku tāpuaki fakapēteliaké mo e fuakava faka-ʻĒpalahamé?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Tatau ai pē pe ko e hako totonú pe ohí, [ʻoku tau] hoko ko e [kau] ʻea-hoko totonu ki he ngaahi talaʻofa naʻe fai ʻe he ʻOtuá kia ʻĒpalahamé. Ko e hako kitautolu ʻo ʻĒpalahame. Ko e taha ʻo e ngaahi tefitoʻi ʻuhinga ʻoku tau maʻu ai ha tāpuaki fakapēteliaké ko hono tokoniʻi kitautolu ke mahino kakato ange pe ko hai kitautolu ʻi heʻetau hoko ko e hako ʻo ʻĒpalahamé pea ke tau ʻiloʻi ʻa e fatongia ʻoku hilifaki kiate kitautolú. (“Becoming a Missionary,” Liahona, Nōvema 2005, 47)

Naʻe akoʻi ʻe ʻEletā Kasuko Iāmasita ʻo e Kau Fitungofulú:

ʻI hono fakahā atu ko ia hoʻo hakó, te ke ʻilo ai ʻokú ke ʻo e fale ʻo ʻIsilelí mo e hako ʻo ʻĒpalahamé. Ke mahino hono mahuʻinga ʻo e meʻá ni, tokanga taha ki he ngaahi talaʻofa naʻe fai ʻe he ʻEikí ki he fale ʻo ʻIsilelí ʻo fakafou ʻia ʻĒpalahamé. (“Taimi ke Maʻu ai Hoʻo Tāpuaki Fakapēteliaké,” Liahona, Mē 2023, 89)

Ngaahi ʻEkitivitī Fakalahi ki he Akó

Ko e fatongia ʻo e ngaahi fuakavá ʻi he ongoongolelei ʻo Sīsū Kalaisí

Kapau ʻoku fiemaʻu tokoni ʻa e kau akó ki hono fakafehokotaki ʻo e fuakava faka-ʻĒpalahamé mo e ngaahi fuakava ʻoku tau fai ʻi he ongoongolelei ʻo Sīsū Kalaisí, fakakaukau ke mamata ʻi he foʻi vitiō “Elder Nelson Talks about Covenants” (4:45). Kole ki he kau akó ke nau kumi e ʻuhinga ʻoku fuʻu mahuʻinga ai e ngaahi fuakavá ʻi he palani ʻa e ʻOtuá.

4:45

Sēnesi 17:8. “Te u ʻiate kinautolu ko honau ʻOtua”

Ke tokoni ke mahino lahi ange ki he kau akó honau vā fetuʻutaki fakafuakava mo e ʻOtuá, te ke lava ʻo fakamahinoʻi ange ha fakakaukau ʻoku toutou ʻasi ʻi he Sēnesi 17:7–8. ʻOku talaʻofa ʻa e ʻEikí “ke u ʻiate koe ko e ʻOtua” (veesi 7) pea folofola, “te u ʻiate kinautolu ko honau ʻOtua” (veesi 8). Fakaafeʻi e kau akó ke fakafekauʻaki ʻa e ʻĒpalahame 1:18 mo e Saame 48:14 ʻi heʻenau folofolá pe fakafehokotaki kinautolu ʻi he polokalama Gospel Library. ʻI heʻenau lau kotoa e ngaahi veesi ʻe tolú, poupouʻi e kau akó ke kumi e ngaahi foʻi lea mo e kupuʻi lea ʻoku tokoni ke mahino kiate kinautolu e ʻuhinga ʻo e hoko ʻa e ʻEikí ko hotau ʻOtuá. ʻE lava ke ke ʻeke ange ha ngaahi fehuʻi hangē ko ʻení:

ʻOkú ke pehē ʻoku ʻuhinga ki he hā ʻa ʻEne folofola “ke u ʻiate koe ko e ʻOtuá”?
Ko e hā ha ngaahi meʻa kehe ʻi heʻetau moʻuí ʻe ala ʻahiʻahiʻi ai kitautolu ke tau ngaohi ko hotau ʻotua?
Ko e hā e ʻuhinga ʻokú ke fili ai ke ngaohi e ʻEikí ko ho ʻOtuá?

Fakaafeʻi e kau akó ke kumi e ngaahi ola pe nunuʻa ʻo hono fili pe fakafisingaʻi e ʻEikí ko hotau ʻOtuá ʻi heʻenau ako e Fuakava Motuʻá he taʻu ní.