Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻĒpalahame 2:9–11: Ko Hotau Ngaahi Fatongia ʻi he Fuakava Faka-ʻĒpalahamé

“ʻĒpalahame 2:9–11: Ko Hotau Ngaahi Fatongia ʻi he Fuakava Faka-ʻĒpalahamé,” Fuakava Motuʻá – Tohi Lēsoni ʻa e Faiako Seminelí (2026)

“ʻĒpalahame 2:9–11: Ko Hotau Ngaahi Fatongia ʻi he Fuakava Faka-ʻĒpalahamé,” Fuakava Motuʻá – Tohi Lēsoni ʻa e Faiako Seminelí

Sēnesi 12–17; ʻĒpalahame 1–2: Lēsoni 24

ʻĒpalahame 2:9–11

Ko Hotau Ngaahi Fatongia ʻi he Fuakava Faka-ʻĒpalahamé

A young man in a black shirt standing and showing an open Book of Mormon to another young man standing beside him.

Naʻe fai ʻe he ʻEikí ha fuakava mo ʻĒpalahame mo hono hakó. ʻI heʻetau hoko ko e hako ʻo ʻĒpalahamé, ʻoku ʻi ai hotau fatongia fakafuakava ke ʻomi e ngaahi tāpuaki ʻo e ongoongolelei ʻa e Fakamoʻuí ki he ngaahi fāmili kotoa pē ʻo e māmaní. ʻE tokoni e lēsoni ko ʻení ki he kau akó ke nau ngāueʻi e ngaahi fatongia kuo foaki ange ʻe he ʻEikí kiate kinautolu ko e hako ʻo ʻĒpalahamé.

Teuteu ʻa e tokotaha akó: Fakaafeʻi e kau akó ke fakakaukau ki he ngaahi fehuʻi ko ʻení pea aleaʻi kinautolu mo ha mēmipa ʻo e fāmilí: Ko e hā e ʻuhinga ʻoku mahuʻinga ai kiate koe ʻa e ongoongolelei ʻo Sīsū Kalaisí? ʻOkú ke pehē ko e hā e ʻuhinga ʻoku fiemaʻu ai ia ʻe he kakai kotoa pē?

Ngaahi ʻEkitivitī Ako ʻOku Ala Fakahokó

Ko e hako ʻo ʻĒpalahamé

Te ke lava ʻo kamata e kalasí ʻaki hano ʻoange ki he kau akó ha sekoni ʻe 30 ke nau lisi ki he lahi tahá ʻa e ngaahi foʻi lea te nau lava ʻo fakamatalaʻi ʻaki kinautolú. Hokó, kole ki he kau akó ke siakaleʻi ʻa e foʻi lea ʻe tolu ʻokú ne fakamatalaʻi lelei taha kinautolú. ʻE lava ke vahevahe ha kau ako ʻe niʻihi mo e kalasí.

Ko e hā ha ngaahi founga ʻoku tākiekina ai ʻe he ngaahi meʻa ko ʻení hoʻo tōʻongá?

Naʻe fakamatala ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo hono ʻiloʻi pe ko hai kitautolú:

17:8

Mahalo ʻoku mou saiʻia he mūsiká, ʻatelitá, pe poto he ngāue fakamakēniká, pea ʻe ʻi ai e ʻaho te ke ngāue ʻi ha ngāueʻanga pe ʻi he tafaʻaki fakaʻātí. Neongo ‘oku mahuʻinga e ngaahi ‘ekitivitī mo e ngaahi ngāue maʻuʻanga moʻui ko iá, ka ‘oku ‘ikai te nau fakamahinoʻi pe ko hai ‘a kitautolu. Ko e fika ‘uluaki mo e muʻomuʻa tahá, ko e kakai fakalaumālie ‘a kitautolu. Ko e ngaahi foha [mo e ngaahi ʻofefine] kitautolu ʻo e ʻOtuá pea ko e hako ʻo ʻĒpalahame. (“Becoming a Missionary,” Liahona, Nōvema 2005, 47)

Ko e hā ha meʻa ʻoku makehe kiate koe mei he meʻa naʻe akoʻi ʻe ʻEletā Petinā fekauʻaki mo hotau ngaahi tuʻunga totonu taupotu tahá?

Kapau naʻe ako ʻe he kau akó ʻa e Lēsoni 23: “Sēnesi 12; 17,” fakaafeʻi kinautolu ke fakamatalaʻi fakanounou mo ha kaungā ako ʻa e meʻa ʻoku nau manatuʻi fekauʻaki mo e fuakava faka-ʻĒpalahamé. Tokoni ke ʻilo ʻe he kau akó, ʻi heʻetau hoko ko e hako ʻo ʻĒpalahamé, ʻoku ʻikai ngata pē ʻi hono talaʻofa mai ha ngaahi tāpuaki maʻongoʻongá, ka ʻoku tau fuakava foki ke fakahoko ha ngaahi fatongia maʻongoʻonga. Fakaafeʻi kinautolu ke fakakakato ʻa e sivi-fakaekita ko ʻení.

Fili pe ko e fē ʻi he ngaahi fakamatalá ni ʻoku moʻoni kiate koé:

ʻOku mahino kiate au hoku ngaahi fatongia ʻi heʻeku hoko ko e hako ʻo ʻĒpalahamé.
ʻOku ou feinga ke fakahoko hoku ngaahi fatongia ko e hako ʻo ʻĒpalahamé.
Kuó u maʻu ha fiefia lahi ʻi hono fakahoko hoku ngaahi fatongia ko e hako ʻo ʻĒpalahamé.
ʻOku ʻikai mahino kiate au hoku ngaahi fatongia ʻi heʻeku hoko ko e hako ʻo ʻĒpalahamé.
ʻOku ʻi ai haʻaku ngaahi fehuʻi fekauʻaki mo hoku ngaahi fatongia ʻi heʻeku hoko ko e hako ʻo ʻĒpalahamé.

Fakaafeʻi e kau akó ke nau hiki ha faʻahinga fehuʻi pē ʻoku nau maʻu pe ongo ne nau ongoʻi ʻi heʻenau fakakaukau ki he ngaahi fakamatala ko ʻení. Fakaafeʻi kinautolu ke fekumi ki ha fakahā mei heʻenau Tamai ʻi Hēvaní ʻo fakafou ʻi he Laumālie Māʻoniʻoní ke ʻiloʻi e founga te nau lava ai ʻo fakahoko lelei ange honau ngaahi fatongia ko e hako ʻo ʻĒpalahamé.

Ko e ʻĒpalahame 2:9–11 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.

Lau ʻa e ʻĒpalahame 2:8–11, ʻo kumi hotau ngaahi fatongia ko e hako ʻo ʻĒpalahamé.

Ko e hā ʻa e finangalo ʻo e Fakamoʻuí kiate kitautolú?

Te ke lava ʻo fakaafeʻi e kau akó ke nau ʻeke ha faʻahinga fehuʻi pē fekauʻaki mo e ngaahi vēsí. ʻI hoʻomou aleaʻi e ngaahi fatongia ʻo e fuakava faka-ʻĒpalahamé, tokoni ke ʻiloʻi ʻe he kau akó ha moʻoni hangē ko ʻení: ʻI heʻetau hoko ko e hako ʻo ʻĒpalahamé, kuo foaki mai ʻe he Fakamoʻuí ha fatongia ke tāpuekina e ngaahi fāmili kotoa ʻo e māmaní ʻaki e ngaahi tāpuaki ʻo ʻEne ongoongoleleí.

Mahalo ʻe ʻaonga ki he kau akó ʻenau ʻiloʻi te nau lava ʻo fakahoko honau fatongia fakafuakavá ʻaki ʻenau tokoni ki hono tānaki fakataha ʻo ʻIsilelí.
Ko e hā ha ngaahi founga te tau lava ai ʻo tāpuekina e ngaahi fāmili kotoa ʻo e māmaní ʻaki e ongoongolelei ʻa e Fakamoʻuí?

Lau ʻa e 1 Nīfai 15:18, ʻo kumi e taimi ʻe fakahoko ai e fuakava faka-ʻĒpalahamé.

Naʻe fakamoʻoni ʻa Palesiteni Lāsolo M. Nalesoni ʻo pehē:

Ko hotau fatongiá ke tokoni ke fakahoko e fuakava faka-ʻĒpalahamé. Ko e hako kitautolu naʻe tomuʻa fakanofo mo teuteuʻi ke tāpuekina ai e kakai kotoa ʻo e māmaní. Ko e ʻuhinga ia ʻoku kau ai e ngāue fakafaifekaú ʻi he fatongia ʻo e lakanga fakataulaʻeikí. Hili ha taʻu ʻe 4,000 ʻo e talitali mo e teuteú, ko e ʻaho ʻeni naʻe poloʻi ke ʻave ai e ongoongoleleí ki he faʻahinga ʻo e māmaní. Ko e kuonga ʻeni naʻe talaʻofa ke tānaki ai ʻa ʻIsilelí. Pea kuo pau ke tau kau ai! ʻIkai ʻoku fakafiefia ia? (“Ngaahi Fuakavá,” Liahona, Nōvema 2011, 88)

Ko ha taimi pē ʻoku tau fai ai ha faʻahinga meʻa ʻoku tokoni ki ha taha—ʻi ha tafaʻaki pē ʻo e veilí—ke ne fakahoko mo tauhi ʻene ngaahi fuakava mo e ʻOtuá, ʻoku tau tokoni ai ke tānaki ʻa ʻIsileli. (“Tuku ke Lāngilangiʻia ʻa e ʻOtuá,” Liahona, Nōvema 2020, 92–93)

ʻOku fēfē hoʻo ongo fekauʻaki mo e ongoongolelei ʻo Sīsū Kalaisí?
ʻOkú ke pehē ko e hā e ʻuhinga ʻoku fiemaʻu ai ia ʻe he kakai kotoa peé?
Ko e hā ha ngaahi aʻusia kuó ke maʻu (pe ko e kakai ʻokú ke ʻiló) ʻi hono tānaki fakataha ʻo ʻIsilelí?

Ko hono fakahoko hotau ngaahi fatongiá

Ko e hā ha meʻa naʻá ke fai pe ko e hā e ngaahi palani naʻá ke fai ke tāpuekina e niʻihi kehé ʻaki e ongoongolelei ʻa e Fakamoʻuí?
Ko e hā ha meʻa kuó ke ongoʻi naʻe ueʻi koe ke ke fai ʻi he ngaahi ʻaho mo e uike ka hoko maí ke:
- Tokoniʻi e niʻihi kehé ke nau fakahoko pe tauhi e ngaahi fuakavá?
- Vahevahe e Ongoongolelei ʻa e Fakamoʻuí?
- Tokoni ki he kakai ʻi he tafaʻaki ʻe taha ʻo e veilí?

Fakakaukau ke fakamoʻoni ki hotau fatongia mahuʻinga ko e hako ʻo ʻĒpalahamé, ke vahevahe ʻa e ngaahi tāpuaki ʻo e ongoongolelei ʻa e Fakamoʻuí ki he kakai kotoa pē.

Ako Ma‘uloto

Mahalo te ke fie tokoni ki he kau akó ke ako maʻuloto ʻa e fakamoʻoni fakafolofola ki he fakataukei fakatokāteliné mo e kupuʻi lea mahuʻinga ʻo e potufolofolá lolotonga ʻa e lēsoni ko ʻení pea toe vakaiʻi ia ʻi he ngaahi lēsoni ʻi he kahaʻú. Ko e kupuʻi lea folofola mahuʻinga ki he ʻĒpalahame 2:9–11 ko e “Naʻe talaʻofa ʻe he ʻEikí kia ʻĒpalahame ʻe ʻi hono hakó hono ‘ʻave … ʻa e ngāue mo e Lakanga Fakataulaʻeiki ko ʻení ki he ngaahi puleʻanga kotoa pē.’” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Toe Vakaiʻi ʻo e Fakataukei Fakatokāteliné.”

Ngaahi Maʻuʻanga Tokoni Kehé

Ko e hā hoku ngaahi tuʻunga totonú?

Naʻe akonaki ʻa Palesiteni Lāsolo M. Nalesoni ʻo pehē:

Sai, tau ʻomi angé e fehuʻí kiate koé. Ko hai koe?

ʻUluaki mo mahuʻinga tahá, ko ha fānau koe ʻa e ʻOtuá.

Uá, ʻi hoʻo hoko ko e mēmipa ʻo e Siasí, ko e fānau koe ʻo e fuakavá. Pea tolú, ko ha ākonga koe ʻo Sīsū Kalaisi. (“Ngaahi Fili ki he Taʻengatá” [fakataha lotu fakaemāmani lahi maʻá e kakai lalahi kei talavoú, 15 Mē 2022], Gospel Library)

Ko e hā hoku fatongia ʻi heʻeku hoko ko e hako ʻo ʻĒpalahamé?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e moʻoni, ʻoku ʻi ai ha ngaahi fatongia maʻongoʻonga ʻoku fuesia ʻe he hako ʻo ʻĒpalahamé ʻi he ngaahi ʻaho kimui ní. …

… Ne tomuʻa fakanofo kitautolu ʻi he maama fakalaumālié pea fāʻeleʻi ki he matelié ke fakahoko e fuakava mo e talaʻofa ne fai ʻe he ʻOtuá kia ʻĒpalahamé. ʻOku tau ʻi heni ʻi he māmaní ʻi he kuongá ni ke poupouʻi e lakanga fakataulaʻeikí pea malanga ʻaki e ongoongoleleí. Ko hotau tuʻungá ia pea ko e ‘uhinga ia ‘oku tau ‘i heni aí. (“Becoming a Missionary,” Liahona, Nōvema 2005, 47)

Naʻe pehē ʻe Palesiteni Lāsolo M. Nalesoni:

61:35

ʻOkú ma loto ke mou meaʻi ʻoku ʻuhinga moʻoni e tānaki fakataha ʻo ʻIsilelí ki hono ʻoatu e ongoongolelei ʻo Sīsū Kalaisí ki he fānau ʻa e ʻOtuá ʻi he ongo tafaʻaki ʻo e veilí ʻa ia kuo teʻeki ke nau fakahoko ʻa e ngaahi fuakava mahuʻinga mo e ʻOtuá pe maʻu ʻa e ngaahi ouau pau mahuʻingá.

ʻOku fiemaʻu ʻe he fānau kotoa pē ʻa e Tamai Hēvaní ha faingamālie ke nau fili ke muimui kia Sīsū Kalaisi, ke tali mo maʻu ʻEne ongoongoleleí mo e kotoa hono ngaahi tāpuakí—ʻio, ʻa e ngaahi tāpuaki kotoa kuo talaʻofa ʻe he ʻOtuá ki he hako ʻo ʻĒpalahamé, ʻAisake mo Sēkopé, ʻa ia naʻe ʻiloa ko ʻIsilelí. (“ʻAmanakiʻanga ʻo ʻIsilelí,” [fakataha lotu fakaemāmani lahi ʻa e toʻu tupú, 3 Sune 2018], Russell M. Nelson mo Wendy W. Nelson, Gospel Library)

Naʻe akoʻi ʻe Palesiteni Kamila N. Sionisoni, ko e Palesiteni Lahi ʻo e Fineʻofá, ʻo pehē:

10:19

Ko hotau tāpuaki fakafuakavá ke ngāue fakataha mo Sīsū Kalaisi ʻi hono fai ha fakafiemālie, fakatuʻasino mo fakalaumālie fakatouʻosi, ki he fānau kotoa ʻa e ʻOtuá. ʻOku tau hoko ko ha founga ʻokú Ne ʻomi ai ʻa e fakafiemālié.

Pea hangē ko e ngaahi kaungāmeʻa ʻo e tangata mahaki teté, ʻoku tau “tokoniʻi ʻa e vaivaí, hiki hake ʻa e ngaahi nima ʻoku tautau ki laló, pea fakamālohi ʻa e ngaahi tui ʻoku vaivaí” [Tokāteline mo e Ngaahi Fuakava 81:5]. ʻOku tau “fefuaʻaki [ʻetau] kavengá pea fakamoʻoni ai ki he fono ʻa Kalaisí” [Kalētia 6:2]. ʻI heʻetau fai iá, ʻoku tau ʻiloʻi ai Ia, hoko ʻo hangē ko Iá, pea maʻu ʻEne fakafiemālié. (“Ko Sīsū Kalaisi ʻa e Fakafiemālié,” Liahona, Mē 2023, 83)

Ngaahi ʻEkitivitī Fakalahi ki he Akó

Ngaahi founga kehe ke fakahoko ʻaki hotau ngaahi fatongiá

Te ke lava ʻo fakakau ʻa e ngaahi fili ko ʻení ko ha ngaahi feituʻu akoʻanga kehe ki he ʻekitivitī ʻi he lēsoní.

Vahevahe ʻa e Tohi ʻa Molomoná. Ko e Tohi ʻa Molomoná ko e meʻangāue ia ʻa e ʻOtuá ki hono tānaki fakataha ʻo ʻIsilelí. Fakakaukau ki ha taha te ke lava ʻo vahevahe ki ai e Tohi ʻa Molomoná. Te ke lava ʻo fakaafeʻi kinautolu ke download ʻa e polokalama ʻo e Tohi ʻa Molomoná. Hiki pe vahevahe hoʻo fakamoʻoni ki he Fakamoʻuí mo e Tohi ʻa Molomoná pea fili ha potufolofola te ke lava ʻo vahevahe. Palani ʻa e taimi te ke vahevahe ai ʻa e Tohi ʻa Molomoná mo e tokotahá ni pe ʻave kiate kinautolu ha pōpoaki he taimí ni.

Kau ki he kongakau ʻa e toʻu tupu ʻa e ʻEikí. Fili ha taha ʻo e ngaahi fakaafe ko ʻeni pe ko ha ngaahi fakaafe lahi ange meia Palesiteni Lāsolo M. Nalesoni. Naʻá ne fai ʻa e ngaahi fakaafe ko ʻení ke tokoni ki he toʻu tupú ke nau teuteu ke kau ʻi hono tānaki ʻo ʻIsilelí:

Taʻofi hono ngāue ʻaki ʻo e mītia fakasōsialé ʻi ha ʻaho ʻe fitu.
Feilaulauʻi fakauike ho taimí ki he ʻEikí ʻi he uike ʻe tolu.
Fai ha sivi fakaʻauliliki ʻo e moʻuí ke fakapapauʻi ʻokú ke ʻi he hala ʻo e fuakavá.
Lotu fakaʻaho ke malava ʻe he fānau ʻa e ʻOtuá ʻo maʻu ʻa e ngaahi tāpuaki ʻo e ongoongolelei ʻo Sīsū Kalaisí.
Ke ke makehe pea kehe. Ako pea vahevahe ʻa e kiʻi tohi Ki Hono Fakamālohia ʻo e Toʻu Tupú. (Toʻo mei he lea ʻa Russell M. Nelson mo Wendy W. Nelson, “ʻAmanakiʻanga ʻo ʻIsilelí” [fakataha lotu fakaemāmani lahi ʻa e toʻu tupú, 3 Sune 2018], Gospel Library)

Te ke lava ʻo maʻu ha fakaikiiki lahi ange ke vahevahe mo e kau akó fekauʻaki mo e fakaafe takitaha ʻi he fakataha lotu ʻa Palesiteni Nalesoni mo Sisitā Uenitī W. Nalesoni ko e “ʻAmanakiʻanga ʻo ʻIsilelí.”

Ngaahi Vitiō

Te ke lava ʻo fakaʻaongaʻi e ngaahi vitiō ko ʻení ke tokoni ki he kau akó ke ʻiloʻi e ngaahi founga te nau lava ai ʻo tokoni ke faitāpuekina e ngaahi fāmili kotoa ʻo e māmaní ʻaki e ongoongolelei ʻa e Fakamoʻuí.

ʻOku huluʻi ʻi he foʻi vitiō “Fakaafeʻi e Niʻihi Kehé ke ‘Haʻu ʻo Nofo’” (1:39) ha ngaahi founga ʻe lava ke fetokoniʻaki ai ʻa e kau akó ke nau ongoʻi ʻoku talitali lelei kinautolu ʻi he lotú.

1:40

ʻOku fakahaaʻi ʻe he ongo foʻi vitiō “Ko Hono Fakaafeʻi ʻo e Taha Kotoa ke Haʻu kia Kalaisí: Ko Hono Vahevahe ʻo e Ongoongoleleí” (4:30) mo e “Inviting Others to ‘Come and See’” (1:17) ha ngaahi founga ʻe lava ke fakaafeʻi ai ʻe he kau akó e niʻihi kehé ke kau mai ki he ngaahi ʻekitivitī ʻa e Siasí.

4:23

1:18

ʻE lava ke tokoni ʻa e foʻi vitiō “All the Families of the Earth” (2:55) ke ongoʻi ʻe he kau akó ʻoku ueʻi kinautolu ke kau ʻi he ngāue fakatemipalé mo e hisitōlia fakafāmilí.

2:50