Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻĒpalahame 1: “Holi … ke Hoko … ko ha Tokotaha ʻOku Muimui … ki he Māʻoniʻoní”

“ʻĒpalahame 1: ‘Holi … ke Hoko … ko ha Tokotaha ʻOku Muimui … ki he Māʻoniʻoní,’” Fuakava Motuʻá – Tohi Lēsoni ʻa e Faiako Seminelí (2026)

“ʻĒpalahame 1: ‘Holi … ke Hoko … ko ha Tokotaha ʻOku Muimui … ki he Māʻoniʻoní,’” Fuakava Motuʻá – Tohi Lēsoni ʻa e Faiako Seminelí

Sēnesi 12–17; ʻĒpalahame 1–2: Lēsoni 22

ʻĒpalahame 1

“Holi … ke Hoko … ko ha Tokotaha ʻOku Muimui … ki he Māʻoniʻoní”

The painting portrays Abram kneeling, his head bowed. Melchizedek lays his hands on his head blessing him. His eyes are shut and his face looks up. An attendant holds bread and wine.

Naʻe tupu hake ʻa ʻĒpalahame ʻi he faiangahalá mo e tauhi ʻotua tamapuá. Neongo e ngaahi tūkunga ko ʻení, ka naʻe holi ʻa ʻĒpalahame ke muimui kia Sīsū Kalaisi, ʻa ia naʻe ʻiloa ʻi he maama fakalaumālié pea kia ʻĒpalahame ko Sihová. ʻI he tulifua ʻa ʻĒpalahame ki heʻene ngaahi holi māʻoniʻoní, naʻe tāpuakiʻi ia ʻe he ʻEikí ke ne maʻu kinautolu. ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e ʻamanaki lelei ʻe lava ke tokoniʻi kinautolu ʻe he Tamai Hēvaní ke nau maʻu ʻa e ngaahi tāpuaki ʻokú Ne finangalo ke nau maʻú.

Teuteu ʻa e tokotaha akó: Fakaafeʻi e kau akó ke hiki ha lisi ʻo e meʻa ʻoku nau fiemaʻu lahi taha ʻi he moʻuí pea fakakaukau ki he ongo ʻoku maʻu ʻe he Tamai Hēvaní fekauʻaki mo e meʻa ʻoku nau fiemaʻu lahi tahá.

Ngaahi ʻEkitivitī Ako ʻOku Ala Fakahokó

Ko e hā ʻa e meʻa ʻokú ke fiemaʻú?

Kamata e lēsoní ʻaki hono tokoniʻi e kau akó ke fakakaukau ki ha ngaahi tūkunga ʻe faingataʻa ai ke nau tui ʻe lava ke tokoniʻi kinautolu ʻe he ʻEikí ke maʻu ha tāpuaki māʻoniʻoni ʻoku nau fiemaʻu. Ke fai ʻení, te ke lava ʻo vahevahe ʻa e ngaahi tūkunga taʻekakato ko ʻení pea fakaafeʻi e kau akó ke feinga ke ʻiloʻi ha faingataʻa ʻe ala fehangahangai mo e fakafoʻituituí.

ʻOku maʻu ʻe Samanitā ha loto-holi lahi ke muimui ʻia Sīsū Kalaisi ʻaki ʻene malangaʻi ʻEne ongoongoleleí ki he kakai kehé. Ka neongo ia, ʻoku ngali faingataʻa ʻeni he taimí ni koeʻuhí …

ʻOku maʻu ʻe ʻIuseni ha loto-holi lahi ke muimui kia Sīsū Kalaisi ʻaki hono totongi ʻene vahehongofulú. Ka neongo ia, ʻoku ngali faingataʻa ʻeni he taimí ni koeʻuhí …

Naʻe maʻu ʻe Kālosi ha loto-holi lahi ke muimui kia Sīsū Kalaisi ʻaki ʻene papitaiso. Ka neongo ia, ʻoku ngali faingataʻa ʻeni he taimí ni koeʻuhí …

Fakaafeʻi e kau akó ke fakakaukau ki honau ngaahi tūkungá mo e ngaahi faingataʻa te nau ala fehangahangai mo ia ke muimui ʻia Sīsū Kalaisí. Kole ange ke nau fakakakato e ngaahi sitepu ko ʻení ʻi heʻenau tohinoa akó.

ʻI hoʻo tohinoa akó:

Lekooti ai ha niʻihi ʻo e ngaahi tāpuaki ʻokú ke fiemaʻu lahi taha ʻi he moʻuí.
Lisi ai ha ngaahi faingataʻa ʻokú ke fakatokangaʻi ʻi he feinga ke maʻu e ngaahi tāpuaki ko ʻení.

ʻI hono ako ʻe he kau akó ʻa e ʻĒpalahame 1, fakaafeʻi kinautolu ke fekumi ki he tokoni ʻa e Tamai Hēvaní ʻo fakafou ʻi he Laumālie Māʻoniʻoní. ʻE lava ke tokoniʻi kinautolu ʻe he Laumālie Māʻoniʻoní ke ongoʻi ha ʻamanaki lelei te nau lava ʻo muimui kia Sīsū Kalaisi mo maʻu ʻEne ngaahi tāpuakí neongo pe ko e hā e ngaahi faingataʻa te nau fehangahangai mo iá.

Ngaahi tūkunga ʻa ʻĒpalahamé

ʻI he Lēsoni 3: Naʻe ako ʻe he kau akó ʻi he ʻĒpalahame 3, ʻa e tupuʻanga ʻo e tohi ʻa ʻĒpalahamé. Kapau naʻe ʻikai ke ke fakamatalaʻi ʻeni ʻi he Lēsoni 3, te ke lava ʻo fai ia he taimí ni. Kapau ʻoku maʻu ʻe he kau akó ha ngaahi fehuʻi fekauʻaki mo e tupuʻanga ʻo e tohi ʻa ʻĒpalahamé, te ke lava ʻo huluʻi e foʻi vitiō “The Book of Abraham | Now You Know” mei he taimi 0:00 ki he 2:43. ʻOku maʻu ʻa e vitiō ko ʻení ʻi he ChurchofJesusChrist.org.

Mahalo ʻe tokoni ke faʻu ʻe he kau akó ha saati kōlomu ʻe ua. Te nau lava ʻo fakahingoa ʻa e kōlomu ʻuluakí ko e “Ngaahi tāpuaki naʻe fiemaʻu ʻe ʻĒpalahamé” pea mo e “Ngaahi fakafeʻātungia naʻe fehangahangai mo ʻĒpalahamé.” ʻE lava ke tokoni ʻeni ke fokotuʻutuʻu e meʻa ʻoku ako ʻe he kau akó mei he ʻĒpalahame 1:1–7.

Ngaahi tāpuaki naʻe fiemaʻu ʻe ʻĒpalahamé	Ngaahi fakafeʻātungia naʻe fehangahangai mo ʻĒpalahamé
Ngaahi tāpuaki naʻe fiemaʻu ʻe ʻĒpalahamé	Ngaahi fakafeʻātungia naʻe fehangahangai mo ʻĒpalahamé

Lau ʻa e ʻĒpalahame 1:1–7, ʻo kumi e ngaahi tāpuaki naʻe fiemaʻu ʻe ʻĒpalahamé pea mo e ngaahi fakafeʻātungia naʻá ne fehangahangai mo ia ʻi hono maʻu ʻo e ngaahi tāpuaki ko iá.

Ko e hā e meʻa ʻoku makehe kiate koe mei he ngaahi tāpuaki naʻe fiemaʻu ʻe ʻĒpalahamé?
Ko e hā e ʻuhinga ʻe ala hoko ai e ngaahi tāpuaki ko ʻení ko ha meʻa ʻokú ke fiemaʻu foki ʻe koe?
Naʻe founga fēfē ʻa e tokoniʻi ʻe he loto-holi ʻa ʻĒpalahame ke muimui ʻia Sīsū Kalaisí ʻa e ngaahi tūkunga faingataʻa naʻá ne fehangahangai mo iá?

Naʻe tokoniʻi ʻe Sihova ʻa ʻĒpalahame ke ikunaʻi hono ngaahi faingataʻaʻiá

Lau ʻa e ʻĒpalahame 1:15–20, ʻo kumi e founga naʻe tokoniʻi ai ʻe Sihova ʻa ʻĒpalahame ke ikunaʻi ʻa e ngaahi faingataʻa naʻá ne fehangahangai mo iá.

ʻOkú ke pehē ko e hā e meʻa naʻe ako ʻe ʻĒpalahame fekauʻaki mo Sihova mei he aʻusia ko ʻení?
ʻE tokoniʻi fēfē nai kitautolu ʻe he Tamai Hēvaní ke tau ikunaʻi ʻa e ngaahi fakafeʻātungia ki hono maʻu ʻo e ngaahi tāpuaki māʻoniʻoni ʻoku tau fiemaʻú?

Fakamatalaʻi ange ki he kau akó hili hono fakahaofi ʻo ʻĒpalahamé, naʻe faifai pea ʻalu ki Kēnani. Naʻe fakalāngilangiʻi ʻe he ʻEikí ʻa ʻĒpalahame ʻi heʻene ngāueʻi ʻa e ngaahi holi ʻo hono lotó ʻaki hono tāpuakiʻi ia ʻaki e lakanga fakataulaʻeikí mo ha ngaahi tāpuaki mahuʻinga kehe. Naʻe talaʻofa ʻe he ʻOtuá kia ʻĒpalahame ʻa e ngaahi tāpuakí ni ko ha konga ʻo e meʻa ʻoku tau ui ko e fuakava faka-ʻĒpalahamé. ʻE ako lahi ange ʻa e kau akō fekauʻaki mo e fuakava ko ʻení ʻi he ngaahi lēsoni he kahaʻú.

ʻI he konga kimui ʻo e moʻui ʻa ʻĒpalahamé, naʻe ʻaʻahi ʻa e ʻEikí kiate ia peá Ne talaʻofa ange te Ne fakahoko kotoa e ngaahi holi māʻoniʻoni ʻa ʻĒpalahamé (vakai, ʻĒpalahame 2:9–11). Lau ʻa e ʻĒpalahame 2:12–13, ʻo kumi e meʻa naʻe lea ʻaki ʻe ʻĒpalahame hili e aʻusia ko ʻení.

Ko e hā ha ngaahi tefitoʻi moʻoni te tau lava ʻo ako mei he aʻusia ʻa ʻĒpalahamé?

ʻE lava ke ʻiloʻi ʻe he kau akó ha ngaahi tefitoʻi moʻoni kehekehe ʻo kau ai ʻa e: Kapau te tau feinga ke muimui ʻia Sīsū Kalaisi, ʻe foaki mai ʻe he ʻOtuá kiate kitautolu ʻa e ngaahi tāpuaki māʻoniʻoni ʻoku tau fiemaʻú.

Lau ʻa e fakamatala ko ʻení meia Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, pe si oʻi he foʻi vitiō “Ko Ha ʻAmanaki ʻoku Mālohi Haohaoa” mei he taimi 11:09 ki he 11:38. ʻOku maʻu ʻa e vitiō ko ʻení ʻi he ChurchofJesusChrist.org.

17:45

Ko e hā hono ʻuhinga ʻoku totonu ai ke tau ʻamanaki ʻe kei lava pē ke tali lelei mo fakaofo ʻe he ʻOtua ʻo e ʻamanaki lelei kotoa peé ʻa e ngaahi holi māʻoniʻoní mo e ngaahi fakaʻānaua faka-Kalaisí? ʻOku tau fiemaʻu kotoa ke tui ko e meʻa ʻoku tau holi māʻoniʻoni ki aí ʻe ʻi ai pē ʻaho mo e founga te tau lava ke kei maʻu pē ia. (“Ko Ha ʻAmanaki ʻoku Mālohi Haohaoa,” Liahona, Mē 2020, 83)

Fakaafeʻi e kau akó ke nau tauhoa pe fakakulupu iiki ʻo aleaʻi e ongo fehuʻi ko ʻení, pe ʻai ke hiki ʻe he kau akó ʻenau ngaahi talí ʻi heʻenau tohinoa akó. Hili ha taimi feʻunga, ʻe lava ʻe ha kau ako ʻe loto-fiemālie ke vahevahe mo e kalasí ha taha ʻo ʻenau ongo talí pe fakatouʻosi.

ʻOku ʻoatu fēfē ʻe he ngaahi lea ʻa Palesiteni Hōlaní mo e aʻusia ʻa ʻĒpalahamé ha ʻamanaki lelei ʻe lava ke tokoniʻi koe ʻe he ʻEikí ke ke ikunaʻi ʻa e ngaahi faingataʻa ʻo e muimui kia Sīsū Kalaisí?
Ko e fē ha taimi kuo tokoniʻi ai koe ʻe he Tamai Hēvaní pe ko ha taha ʻokú ke ʻiloʻi, ke ikunaʻi ʻa e ngaahi faingataʻa ke muimui ʻia Sīsū Kalaisí?

Fakakaukau ke vahevahe hoʻo aʻusia ʻi ha taimi naʻe tokoniʻi ai koe ʻe he Tamai Hēvaní ke ke ikunaʻi ha fakafeʻātungia ki hono maʻu ha tāpuaki māʻoniʻoní.

Fakaafeʻi e kau akó ke lekooti e meʻa ne nau ako he ʻaho ní ʻi heʻenau tohinoa akó.

Fakakaukau ke fakaafeʻi ha kau ako ʻe loto-fiemālie ke vahevahe ʻa e meʻa ne nau tohí. Fakaʻosi ʻaki hano vahevahe hoʻo fakamoʻoni ki he ngaahi moʻoni ko ʻení.

Ngaahi Maʻuʻanga Tokoni Kehé

Ko e fē ha meʻa te u lava ʻo ako lahi ange ai fekauʻaki mo e tohi ʻa ʻĒpalahamé?

Kuo pulusi ʻe he Siasí ha ngaahi maʻuʻanga tokoni lahi fekauʻaki mo e tohi ʻa ʻĒpalahamé, hangē ko e:

Ko e vahe, “The Book of Abraham” ʻi he The Pearl of Great Price Student Manual (2017).
Ko e tefito ʻi he Hisitōlia ʻo e Siasí, “Liliu ʻo e Tohi ʻa ʻĒpalahamé.”
Ngaahi ʻĒsei ki he Ngaahi Tefito ʻo e Ongoongoleleí, “Translation and Historicity of the Book of Abraham”

ʻI he ʻaho 5 ʻo Siulai 1835, naʻe tohi ai ʻa Siosefa Sāmita fekauʻaki mo hono ʻomi ʻo e tohi ʻa ʻĒpalahamé pea mo e mahuʻinga ʻo e ngaahi tohi faka-ʻIsipite fakakuonga muʻa ko ʻení:

Naʻá ku kamata mo U[iliami] W. Felipisi mo ʻŌ[liva] Kautele ko ha ongo tangata tohi, ʻa hono liliu ʻo ha niʻihi ʻo e ngaahi tohí pe ngaahi tohi faka-ʻIsipite motuʻá, pea mau fiefia lahi, ʻi heʻemau ʻiloʻi ʻi ha taha ʻo e ngaahi takainga tohí ʻa e ngaahi tohi ʻa ʻĒpalahamé. … Te tau lava moʻoni ʻo pehē ʻoku kamata ke fakahā ʻe he ʻEikí ha melino mo ha moʻoni lahi. (Joseph Smith, ʻi he History, 1838–1856 [Manuscript History of the Church], volume B-1, 596, josephsmithpapers.org; naʻe fakatonutonu ʻa e fakaʻilonga leá)

ʻI heʻetau ako e tohi ʻa ʻĒpalahamé, ʻoku mahuʻinga ke fakatokangaʻi ʻa e ngaahi meʻa ko ʻení, ʻoku maʻu ʻi he Tefito ʻi he Hisitōlia ʻo e Siasí “Liliu ʻo e Tohi ʻa ʻĒpalahamé”:

ʻOku felāveʻi e tuʻunga ʻo e tohí ʻi heʻene hoko ko e folofolá mo e ngaahi moʻoni taʻengata ʻokú ne akoʻí pea mo e laumālie mālohi ʻokú ne ʻomí. ʻOku toki maʻu e moʻoni ʻo e tohi ʻa ʻĒpalahamé ʻi hono ako fakalelei hono ngaahi akonakí pea ʻi he lotu fakamātoato pea mo e fakapapau ʻa e Laumālié. (Ngaahi Tefito ʻi he Hisitōlia ʻo e Siasí, “Liliu ʻo e Tohi ʻa ʻĒpalahamé,” Gospel Library)

ʻOku tākiekina fēfē ʻe he ngaahi holi hoku lotó ʻeku moʻuí?

Naʻe akoʻi ʻe Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

ʻOku puleʻi ʻe he meʻa ʻoku tau holi ki aí ʻa e meʻa ʻoku tau fakamuʻomuʻá, pea fakafōtunga ʻe he meʻa ʻoku tau fakamuʻomuʻá ʻa ʻetau ngaahi filí, pea fakapapauʻi ʻe he ngaahi filí ʻa e meʻa ʻoku tau faí. ʻOku fakapapauʻi mai ʻe he ngaahi holi ʻoku tau ngāue ki aí ʻa ʻetau liliú, lavameʻá mo e tuʻunga ʻoku tau aʻusiá. …

… ʻI heʻetau maʻu ha vīsione ʻo e meʻa te tau lava ʻo aʻusiá, ʻe lahi fau leva ʻa ʻetau holi mo e mālohi ke ngāué. (“Holi ʻo e Lotó,” Liahona, Mē 2011, 42, 44)

Fēfē kapau ʻoku hangē ʻoku ʻikai feau ʻetau ngaahi holi māʻoniʻoní?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:51

ʻI heʻeku hoko ko e tamaioʻeiki ʻa e ʻEikí, ʻoku ou palōmesi atu ʻi hoʻo tauhi faivelenga kia Sīsū Kalaisi mo hoʻo ngaahi fuakavá, te ke maʻu ai ha ngaahi tāpuaki ʻi he moʻuí ni ko hano totongi huhuʻi pea te ke maʻu hoʻo ngaahi holi māʻoniʻoní ʻi he ʻitānití ʻo fakatatau ki he finangalo ʻo e ʻEikí. ʻE lava pē ke maʻu ʻa e fiefiá ʻi he fononga fakamatelié ʻo aʻu pē ki he taimi ʻoku ʻikai ke hoko ai ʻo moʻoni ʻa ʻetau ngaahi fakatuʻamelie māʻoniʻoní. (“Ko e Fononga Fakataautaha ʻa ha Fānau ʻa e ʻOtuá,” Liahona, Mē 2021, 47)

ʻOku tau fakatupulaki fēfē ha ngaahi holi māʻoniʻoní?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:42

ʻOku tau ʻiloʻi e Fakamoʻuí ʻi hono fai hotau lelei tahá ke ʻalu ki he feituʻu ʻokú Ne finangalo ke tau ʻalu ki aí, pea lea ʻaki e meʻa ʻokú Ne finangalo ke tau lea ʻakí, mo e tuʻunga ʻokú Ne finangalo ke tau aʻusiá. ʻI heʻetau fakahā angavaivai ʻetau fakafalala kakato kiate Iá, ʻokú Ne fakalahi ai ʻetau malava ke tokoni lelei angé. ʻOku fakafenāpasi māmālie mo kakato ange ai ʻetau ngaahi fiemaʻú pea mo Hono finangaló, pea hoko ʻEne taumuʻá ko ʻetau taumuʻá, ʻo tau aʻu ai ki ha tuʻunga “ʻe ʻikai te ke kole ha meʻa ʻoku taʻehoa mo Hono lotó.” (“Ka Ne Mou ‘Ilo Au,” Liahona, Nōvema 2016, 104)

Ngaahi ʻEkitivitī Fakalahi ki he Akó

ʻĒpalahame 1:11. Ko e faʻifaʻitakiʻanga ʻo e kau finemui angamaʻá

ʻE lava ke fakaʻaongaʻi e ngaahi sīpinga ʻa e kau tāupoʻou angatonu ʻe toko tolú ke tokoni ke mahino ki he kau akó ʻoku ʻikai ke tau faʻa maʻu ʻetau ngaahi holi māʻoniʻoní ʻi he ngaahi founga ʻoku tau ʻamanaki ki aí.

Lau ʻa e ʻĒpalahame 1:11 pea fakafehoanaki ʻa hono fakahaofi ʻo ʻĒpalahamé mo e talanoa ʻo e kau finemui ko ʻeni ʻe toko tolú.

Te ke lava foki ʻo vakai ki he fakamatala ʻa ʻEletā ʻEnitaseni ʻi he Ngaahi Maʻuʻanga Tokoni Kehé fekauʻaki mo e ngaahi holi māʻoniʻoni ‘oku ‘ikai feaú.

Fakaafeʻi e kau akó ke nau fakakaukauloto ki hano ha pōpoaki telefoni honau kaungāmeʻá kiate kinautolu. ʻOku loto-foʻi e kaungāmeʻa ko ʻení koeʻuhí ʻoku teʻeki ke tāpuekina ia ʻe he ʻOtuá ʻaki ha mālohi ke matuʻuaki ha ʻahiʻahi pau (pe ko ha holi māʻoniʻoni kehe kuó ne fāifeinga ki ai). Fakaafeʻi ʻa e kau akó ke fakakaukau ki he founga ʻe lava ke nau tali ai ki honau kaungāmeʻá. ʻE lava ke tokoni e ongo fehuʻi ko ʻení:

ʻOkú ke pehē ko e hā e ʻuhinga ʻoku tali ai e ngaahi holi māʻoniʻoni ʻa ha kakai ʻe niʻihi kae hangē ʻoku ʻikai pehē ha niʻihí?
Te tau lava fēfē ʻo tauhi maʻu ʻetau tui kia Sīsū Kalaisí naʻa mo e taimi ʻoku ʻikai fakahoko ai ʻetau ngaahi holi māʻoniʻoní?

Ngaahi sīpinga kehe ʻo e fekumi ki he ngaahi holi māʻoniʻoní

Ke fakaloloto e mahino ʻa e kau akó ki hono maʻu ha ngaahi holi māʻoniʻoní, te nau lava ʻo fakafehoanaki ʻa ʻĒpalahame ki he niʻihi fakafoʻituitui kehe ʻi he folofolá.

Fakaafeʻi e kau akó ke fili ha taha ʻo e niʻihi fakafoʻituitui ko ʻení pe ko ha taha kehe ʻoku nau fili. ʻAi ke nau kumi e meʻa naʻe fiemaʻu ʻe he tokotahá pea mo e meʻa ʻoku akoʻi ʻe he fakamatalá fekauʻaki mo hono maʻu e ngaahi holi ʻo hotau lotó.

Nīfai: 1 Nīfai 10:17; 11:1
ʻĪnosi: ʻĪnosi 1:2–8
ʻAlamā mo ʻAmuleki: ʻAlamā 14:9–13
Hailame Sāmita: Tokāteline mo e Ngaahi Fuakava 11:8, 15–17, 21–22

Ko e fakafenāpasi ki he finangalo ʻo e ʻEikí

Mahalo ʻe ʻaonga ki he kau akó ha fealeaʻaki lahi ange fekauʻaki mo e ʻikai tali he taimi ʻe niʻihi ʻa e ngaahi holi māʻoniʻoní ʻi he founga ʻoku tau fiemaʻu pe ʻamanaki ki aí. Kapau ko ia, fakakaukau ke huluʻi e foʻi vitiō “Ask in Faith” mei he taimi 10:47 ki he 13:03.

15:9

Fakakaukau ke ʻeke ange ʻa e ongo fehuʻi ko ʻení:

Ko e hā ha meʻa ʻokú ke ako fekauʻaki mo hono fakafenāpasi ʻetau ngaahi holi māʻoniʻoní mo e finangalo ʻo e ʻEikí?
Ko e hā ha faleʻi te ke fai ki ha taha ʻokú ne ongoʻi hangē ʻoku ʻikai tāpuakiʻi kinautolu ʻe he ʻEikí ʻaki ha holi ʻoku māʻoniʻoní?

Ko e mahuʻinga ʻo e folofolá

Ke tokoni ke vakai e kau akó ki he mahuʻinga ʻo e folofolá ʻi heʻetau moʻuí, fakakaukau ke ʻeke e ongo fehuʻi ko ʻení:

Ko e hā hono ʻuhinga ke fakatolonga ha meʻa?
Te ke fakatolonga fēfē nai ha laʻitā pe ko ha tohi mei ha taha ʻokú ke ʻofa ai?

Fakaafeʻi e kau akó ke lau ʻa e ʻĒpalahame 1:28, ʻo kumi e meʻa naʻe maʻu ʻe ʻĒpalahamé. Hili hono lipooti ʻe he kau akó e meʻa ʻoku nau maʻú, fakaafeʻi ke nau lau e veesi 31, pea fehuʻi ange ʻeni:

Ko e hā e meʻa naʻe fakatolonga ʻi he ngaahi lekooti naʻe tauhi ʻe ʻĒpalahamé?
ʻE ʻaonga fēfē nai kiate kitautolu koeʻuhí ko ʻetau ʻiloʻi ʻa e ngaahi moʻoni ko ʻení?

Tokoniʻi e kau akó ke nau ʻiloʻi kuo ui ʻe he ʻEikí ha kau palōfita ke fakatolonga ʻa e folofolá koeʻuhí ko ʻEne ʻofa ʻiate kitautolú. Fakaafeʻi e kau akó ke vahevahe ha ngaahi moʻoni mahuʻinga mei he folofolá ʻoku nau houngaʻia ʻi hono fakatolonga maí.