Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Fili ke Ngāue Fakafaifekaú: Ko e Ngaahi Tāpuaki ʻo e Ngāue Fakafaifekaú

“Fili ke Ngāue Fakafaifekaú: Ko e Ngaahi Tāpuaki ʻo e Ngāue Fakafaifekaú,” Fuakava Motuʻá – Tohi Lēsoni ʻa e Faiako Seminelí (2026)

“Fili ke Ngāue Fakafaifekaú: Ko e Ngaahi Tāpuaki ʻo e Ngāue Fakafaifekaú,” Fuakava Motuʻá – Tohi Lēsoni ʻa e Faiako Seminelí

Teuteu Ngāue Fakafaifekaú: Lēsoni 198

Fili ke Ngāue Fakafaifekaú

Ko e Ngaahi Tāpuaki ʻo e Ngāue Fakafaifekaú

Ko ha faingamālie fakaʻofoʻofa ʻa e ngāue fakafaifekau maʻá e ʻEikí. ʻOku tāpuekina ʻe he Tamai Hēvaní ʻa e kau faifekaú ʻi heʻenau tokoni mo akoʻi ʻa e kakai ʻi honau tūkui koló pea mo e funga ʻo e māmaní. Ka neongo ia, ʻe lava pē ke faingataʻa ʻa e fili ke ngāue fakafaifekaú. ʻE lava ke tokoni ʻa e lēsoni ko ʻení ke ongoʻi ʻe he kau akó ha loto-holi lahi ange ke ngāue maʻá e ʻEikí ko ʻEne kau faifekau.

Teuteu ʻa e tokotaha akó: Fakaafeʻi e kau akó ke fehuʻi ki ha taha ʻoku nau ʻiloʻi naʻe ngāue fakafaifekau pe ko e hā ha ngaahi tāpuaki naʻa nau fakatokangaʻi naʻe foaki ange ʻe he ʻEikí koeʻuhí ko ʻenau ngāué. Te nau lava ʻo fakahoko tonu ʻeni, ʻi he telefoní, pe ʻi he text pe ʻīmeilí. Kole ange ke nau omi mateuteu ke vahevahe ʻa e meʻa ne nau akó.

Ngaahi ʻEkitivitī Ako ʻOku Ala Fakahokó

Ko e ngāue fakafaifekau taimi kakató

Fakakaukau ke kamata e kalasí ʻi ha founga ʻe tokoni ki he kau akó ke nau fakakaukau ki he ngāue maʻá e ʻEikí ko ʻEne kau faifekau taimi kakató. Te ke lava ʻo hivaʻi ʻa e “Fanongo ko e ʻEiki ʻoku Ui” (Ngaahi Himí, fika 153) pea kole ki he kau akó ke vahevahe pe ko hai ʻoku nau ʻiloʻi kuo ngāue pe lolotonga ngāue fakafaifekau pea mo e feituʻú. Pe te ke kole ki ha niʻihi ʻo e kau akó kimuʻa he kalasí ke nau ʻomi ha fakatātā ʻo ha taha ʻoku nau ʻiloʻi ʻoku ngāue fakafaifekau maʻá e ʻEikí.

Ko e hā kuo akoʻi ʻe he ʻEikí fekauʻaki mo e fatongia ʻo e kau talavoú mo e kau finemuí ke nau hoko ko ha kau faifekaú?

ʻI he tali ʻa e kau akó, fakapapauʻi ʻoku mahino kiate kinautolu ʻa e ngaahi meʻa ko ʻení.

Naʻe akonaki ʻa Palesiteni Lāsolo M. Nalesoni ʻo pehē:

Kuo kole [mai] ʻe he ʻEikí ki he talavou moʻui taau kotoa pē ʻe malavá, ke teuteu ke ngāue fakafaifekau. … Kiate kimoutolu kau finemui ʻoku malavá, ko ha faingamālie mālohi lahi foki e ngāue fakafaifekaú, ʻo ka ke ka loto ki ai. (“Malangaʻi e Ongoongolelei ʻo e Melinó,” Liahona, Mē 2022, 6)

ʻOku kau heni ʻa e malangá mo e ngāue fakafaifekau tokoní.

Te ke lava ʻo hiki ʻa e ngaahi fehuʻi ko ʻení ʻi he palakipoé pea kole ki ha kau ako tokolahi ke vahevahe ʻenau ngaahi fakakaukaú ki ha taha ʻo e ongo fehuʻí:

Ko e hā ha ngaahi ʻuhinga ʻe ala fie ngāue fakafaifekau ai ha taha?
Ko e hā ha ngaahi ʻuhinga ʻe lava ke faingataʻa ai ke fili ke ngāue fakafaifekaú?

Kapau ʻe ʻaonga, fakamatalaʻi ange kuo fehangahangai ha niʻihi tokolahi mo ha ngaahi meʻa ne nau hohaʻa ki ai. Hangē ko ʻení, ʻi he taimi naʻe fakakaukau ai ʻa Palesiteni M. Lāsolo Pālati (128–2023) ʻo e Kōlomu ʻo e Kau ʻAposetolo ʻe Toko Hongofulu Mā Uá ke ngāue fakafaifekaú, naʻe ʻikai mālohi ʻene ongomātuʻá ʻi he Siasí (vakai, “Kuo Tāpuekina ʻe he Ngāue Fakafaifekaú ʻEku Moʻuí ʻo Taʻengata,” Liahona, Mē 2022, 8). Naʻe vahevahe ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá “naʻe ʻikai ha tukufakaholo fakafaifekau ʻi [hono] fāmilí” (vakai, “My Mission Influence” [3:31] mei he taimi 2:01 ki he 2:16 ʻoku ChurchofJesusChrist.org). Naʻe ʻikai mālohi e tamai ʻa ʻEletā Kuenitini L. Kukí ʻi he Siasí peá ne poupouʻi hono tokouá ke ʻalu ki he akoʻanga fakafaitoʻó kae ʻikai ko e ngāue fakafaifekaú (vakai, “Conversion to the Will of God,” Liahona, Mē 2002, 54).

Fakaʻaongaʻi ha kiʻi taimi ke ke hiki ai ʻi hoʻo tohinoa akó ʻa e ongo ʻokú ke maʻu fekauʻaki mo e ngāue fakafaifekau taimi kakató pea mo hono ʻuhingá.

ʻI hoʻo ako ʻa e lēsoni ko ʻení, fekumi ki ha fakahinohino mei he ʻEikí ke tokoni atu ʻi hoʻo fili pe te ke ʻalu ʻo ngāue fakafaifekau taimi kakató mo e founga ke tali ʻaki e ngaahi meʻa ʻokú ke hohaʻa ki aí.

ʻI he taimi ʻoku tau talangofua ai ki he ʻEikí

Lau ʻa e Teutalōnome 28:1–6, 9, ʻo kumi ʻa e meʻa naʻe talaʻofa ʻe he ʻEikí ʻo fakafou ʻia Mōsese kapau te tau fai ʻa e meʻa ʻokú Ne kole mai ke tau faí.

Fakaafeʻi ʻa e kau akó ke vahevahe ʻa e meʻa naʻa nau maʻú. Fakakaukau ke kole ki he kau akó ke vahevahe ha ngaahi sīpinga ʻo e ngaahi tāpuaki kehekehe naʻe talaʻofa ʻe he ʻEikí ʻi he ngaahi veesi ko ʻení. Mahalo ʻe tokoni ke ʻiloʻi ʻoku ʻuhinga ʻa e “fua ʻo ho sinó” (Teutalōnome 28:4) ki he hakó.

Ko e hā ʻoku ʻaonga ai ke ʻiloʻi ʻa e ngaahi tāpuaki kehekehe lahi ʻoku talaʻofa mai ʻe he ʻEikí kapau te tau fai ʻa e meʻa ʻokú Ne kole maí?
ʻOkú ke pehē ʻe lava ke fakaʻaongaʻi fēfē ʻa e ngaahi talaʻofa ʻa e ʻEikí ʻi he ngaahi veesi ko ʻení ki heʻetau talangofua ke tauhi kiate Ia ko ʻEne kau faifekaú?

Naʻe akonaki ʻa Palesiteni Lāsolo M. Nalesoni ʻo pehē:

Siʻoku ngaahi kaungāmeʻa kei talavou, ʻoku mou mahuʻinga kotoa ki he ʻEikí. Naʻá Ne tuku fakatatali kimoutolu ki he taimí ni ke tokoni ki hono tānaki ʻo ʻIsilelí. Ko hoʻo fili ko ia ke ngāue fakafaifekaú, neongo pe ko ha ngāue fakafaifekau malanga pe faifekau tokoni, ʻe tāpuekina ai koe mo e niʻihi kehé. (“Malangaʻi e Ongoongolelei ʻo e Melinó,” Liahona, Mē 2022, 6)

Fakakaukau ke hiki ʻi he palakipoé: ʻE tāpuakiʻi kitautolu ʻe he ʻEikí mo ha niʻihi tokolahi kehe ʻi he taimi ʻoku tau fili ai ke ngāue fakafaifekaú.

ʻE lava ke tokoni ʻetau maʻu ha mahino ki ha niʻihi ʻo e ngaahi tāpuaki ʻoku foaki mai ʻe he ʻOtuá ʻi heʻetau fili ke ngāue fakafaifekaú.

Lau ha niʻihi pe kotoa ʻo e ngaahi potufolofola mo e ngaahi fakamatala ʻi he laʻipepa tufa “Ngaahi Tāpuaki ʻOku Foaki ʻe he ʻOtuá ki Heʻene Kau Faifekaú,” pe kumi ha toe ngaahi potufolofola pe fakamatala kehe. Fakakaukau ke fakaʻilongaʻi pe siakaleʻi ʻa e ngaahi tāpuaki ʻoku ʻuhingamālie kiate koé. Fakatokangaʻi ange ʻoku foaki ʻe he ʻEikí ʻa e ngaahi tāpuaki ko ʻení lolotonga mo e hili ʻa e ngāue fakafaifekaú.

Teuteu ha meʻa te ke lava ʻo vahevahe mo ha taha ʻokú ne fakakaukauʻi pe ʻe ngāue fakafaifekau nai maʻá e ʻEikí. Fakakau ha meʻa ʻe ua pe lahi ange heni:

Ko ha tāpuaki ʻe taha pe ua naʻá ke ako ʻoku foaki mai ʻe he ʻOtuá ʻi heʻetau ngāue fakafaifekau taimi kakató mo e ongo ʻokú ke maʻu kiate kinautolú.
Ko ha sīpinga ʻo ha taha ʻokú ke ʻilo naʻá ne maʻu ha taha ʻo e ngaahi tāpuaki ʻa e ʻOtuá naʻá ke ʻiloʻi ʻo fakafou ʻi heʻenau ngāue fakafaifekaú.
Founga ʻoku uesia ai ʻe he meʻa naʻá ke akó ʻa hoʻo holi ke ngāue maʻá e ʻEikí ko ha faifekau taimi kakató.
Ko e meʻa naʻá ke ako fekauʻaki mo e Tamai Hēvaní mo Sīsū Kalaisi ʻe lava ʻo tokoni ki ha taha ke fili ke ngāue fakafaifekau taimi kakató.

Hili e teuteu ʻa e kau akó, fakaafeʻi e hoa takitaha ke vahevahe ʻena pōpoakí ki ha konga ʻe ua. ʻAi ke na fili pe ko hai ʻiate kinaua te ne vahevahe ʻa e konga fē. (Hangē ko ʻení, ʻe lava ke vahevahe ʻe ha taha ha tāpuaki mo ʻenau ngaahi ongo fekauʻaki mo iá, pea vahevahe leva ʻe he tokotaha ha sīpinga pea mo e founga ʻe ala tokoni ai ʻa e tokanga taha ki he Tamai Hēvaní mo Sīsū Kalaisí.) Fakakaukau pe ʻe lelei ange ke fakamatala ʻa e ngaahi hoá ʻi muʻa ʻi he kalasí, pe ʻe lelei ange ke na fakamatala ʻiate kinaua pē ʻi ha fanga kiʻi kulupu iiki. Kapau te nau kau ʻi ha fanga kiʻi kulupu iiki, te ke lava ʻo fehuʻi ange ʻamui pe ko e hā naʻe mahuʻingamālie kiate kinautolu ʻa ia naʻa nau fanongo ai mei ha taha kehe pe ne nau vahevahe ʻiate kinautolú.

Ko hoʻo filí

Fakaʻaongaʻi ha kiʻi taimi ke kuikui ai ho matá mo fakakaukau ki he Tamai Hēvaní. Manatuʻi ʻEne ʻofa kiate koé. Kau finemui, fakakaukauloto ki Heʻene ongo ʻi hoʻo feinga ke ʻiloʻi Hono finangalo fekauʻaki mo e ngāue fakafaifekaú. Kau talavou, fakakaukau ki he meʻa ʻoku finangalo e Tamai Hēvaní ke ke fai he taimí ni ke teuteu ai ke hoko ko ha faifekau lelei pe tokangaʻi ha faʻahinga meʻa ʻokú ke hohaʻa ki ai fekauʻaki mo e ngāué.

Fekumi ki he tokoni ʻa e Tamai Hēvaní ʻi hoʻo hiki ʻi hoʻo tohinoa akó ʻa e meʻa naʻá ke akó pe ko e meʻa te Ne finangalo ke ke manatuʻi mei he lēsoni ko ʻení ʻi hoʻo fakakaukau ke ngāue maʻá e ʻEikí ko ha faifekau taimi kakató.

Fakakaukau ke fakaafeʻi ha kau ako ke vahevahe ʻa e meʻa ne nau ako pe ongoʻi ʻi he lēsoni ko ʻení. Vahevahe foki mo hoʻo ngaahi fakakaukaú mo e fakamoʻoní.

Ngaahi Maʻuʻanga Tokoni Kehé

Ko e hā kuo akoʻi ʻe he ʻEikí fekauʻaki mo e fatongia ʻo e kau talavoú mo e kau finemuí ke nau hoko ko ha kau faifekaú?

Naʻe toe fakapapauʻi mai ʻe Palesiteni Lāsolo M. Nalesoni e uiuiʻi ʻa e ʻEikí ke hoko ko ha kau faifekaú.

5:34

ʻOku ou toe fakapapauʻi mālohi atu he ʻahó ni e meʻa ne kole mai ʻe he ʻEikí ki he talavou moʻui taau kotoa pē ʻe malavá, ke teuteu ke ʻalu ʻo ngāue fakafaifekau. Ki he kau talavou ʻo e Siasí, ko e ngāue fakafaifekaú ko ha fatongia ʻo e lakanga fakataulaʻeikí. Kuo fakatatali mai kimoutolu kau talavou ki he kuonga ko ʻeni ne talaʻofa mai ʻe fakahoko ai hono tānaki ʻo ʻIsilelí. ʻI hoʻo ngāue fakafaifekaú, ʻokú ke kau ai ʻi he fatongia mātuʻaki mahuʻinga ko ʻení!

Kiate kimoutolu kau finemui ʻoku malavá, ko ha faingamālie mālohi lahi foki e ngāue fakafaifekaú, ʻo ka ke ka loto ki ai. ʻOku mau ʻofeina ʻa e kau faifekau fefiné mo talitali lelei moʻoni kinautolu. ʻOku fakaofo moʻoni e meʻa ʻoku mou ʻomi ki he ngāué ni! Lotua ke ke ʻiloʻi pe ʻoku finangalo e ʻEikí ke ke ngāue fakafaifekau, pea ʻe ʻoatu ʻe he Laumālie Māʻoniʻoní e talí ki ho lotó mo e ʻatamaí. (“Malangaʻi e Ongoongolelei ʻo e Melinó,” Liahona, Mē 2022, 6)

Ko e hā ʻa e ngāue fakafaifekau tokoni?

ʻE lava ke uiuiʻi ʻa e kau talavou mo e kau finemui moʻui taau ʻoku ʻikai ke lava ʻo ngāue fakafaifekau malanga ʻi ha ngaahi ʻuhinga fakatuʻasino, fakaʻatamai, fakaeloto pe ha ngaahi ʻuhinga kehé ke nau ngāue fakafaifekau tokoni. ‘E ngāue ʻa e kau faifekau ngāue tokoní ma‘á e ʻEikí ‘i ha ngaahi ngāue kehekehe, kau ai e ngaahi kautaha tokoni ʻofá, ʻo fakafou ʻi he ngaahi ngāue ʻa e Siasí, mo e ngaahi faingamālie kuo tuku mai ʻi he siteikí. Ke vakai ki ha sīpinga, fakakaukau ke mamata ʻi he “Service Missions: Elder Quadeʻs Story” (5:19).

5:19

Ki ha fakamatala lahi ange, fekumi ki he ngaahi fakaikiiki ʻoku maʻu ʻi he ChurchofJesusChrist.org/service-missionary pe ʻi he polokalama Gospel Library.

Ngaahi ʻEkitivitī Fakalahi ki he Akó

Ngaahi ʻuhinga ke ngāue fakafaifekaú

Hili hono fakakakato ʻe he kau akó ʻa e laʻipepa tufa “Ngaahi Tāpuaki ʻOku Foaki ʻe he ʻOtuá ki Heʻene Kau Faifekaú”, te ke lava ʻo huluʻi ha taha ʻo e ngaahi vitiō ko ʻení. Fakaafeʻi e kau akó ke kumi ha ngaahi ʻuhinga ʻe fili ai ha taha ke ngāue fakafaifekau.

“Value of a Full-Time Mission” (5:22)

5:23

Ko ha sīpinga ʻo hono fakakaukauʻi ʻe ha toʻu tupu pe ʻe ngāue fakafaifekaú

Kapau ʻe tokoni ke vahevahe ha sīpinga ʻo ha toʻu tupu ʻoku fili ke ngāue fakafaifekau mo fakamoʻoni ki he ngaahi tāpuaki naʻá ne maʻú. Vakai, ʻEletā Ganesh Vardhanapu, “The Decision to Serve a Mission” (Liahona, Māʻasi 2020, fakaʻilekitulōnika pē).

Fakahoko ha faleʻi

ʻI he taimi ʻe niʻihi, ʻoku ʻomi ʻe he ngaahi makasini ʻa e Siasí ha ngaahi fehuʻi, pea ʻoku tohi ʻe ha toʻu tupu kehekehe ʻi he funga ʻo e māmaní ha ngaahi tali ʻe lava ʻo tokoni. Fakaafeʻi hoʻo kalasí ke nau fakakaukauloto naʻe ʻoange kiate kinautolu ʻa e fehuʻi ko ʻení: Te u fili fēfē pe te u ʻalu ʻo ngāue fakafaifekaú? ʻOange ha ngaahi miniti siʻi ke nau hiki ai ha tali ʻoku kau ai ha potufolofola pe fakamatala mei ha palōfita pe taki ʻo e Siasí. Fakaafeʻi leva kinautolu ke lau ʻa e ngaahi tali ʻi he “How do I decide whether to serve a mission?” (New Era, Dec. 2019, 44–45).

Kapau ʻoku maʻu ʻe he kau akó ha holi ke ngāue ka ʻoku nau hohaʻa he ʻikai ke nau lava

Kapau ʻoku ʻi he tūkunga ko ʻení ʻa e kau akó, fakakaukau ke fakaafeʻi kinautolu ke lau ʻa e Mātiu 28:19–20; 1 Nīfai 3:7; Mōsaia 4:27, ʻo kumi ha ngaahi tefitoʻi moʻoni kehekehe ʻe ala tokoni kiate kinautolu. Fakamatalaʻi ange foki te nau lava ʻo vahevahe ha faʻahinga meʻa ʻoku nau hohaʻa ki ai mo ʻenau mātuʻá, kau taki lakanga fakataulaʻeikí, mo e kau mataotao ki he moʻui leleí ʻa ia te nau lava ʻo faleʻi kinautolu ʻi he meʻa te nau lava ʻo faí.

Founga ʻoku liliu ai ʻe heʻetau ofi ange ki he Fakamoʻuí ʻa ʻetau holi ke vahevahe ʻa e ongoongoleleí

Kapau ʻe ʻaonga, fakaafeʻi e kau akó ke fakakakato ʻa e “Ako Fakafoʻituituí pe Ako Faka-Hoá” ʻi ʻolunga ʻi he peesi tolu ʻi he Malanga ʻAki ʻEku Ongoongoleleí. Te nau lava ʻo fakalaulauloto ki he founga ʻoku liliu ai ʻe heʻenau ofi ange ki he Fakamoʻuí ʻenau holi ke vahevahe ʻa e ongoongoleleí mo ngāue fakafaifekau taimi kakató.