Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko e Mahuʻinga ʻo e Talangofuá ʻi hono ʻOmi e Niʻihi Kehé kia Kalaisí: Talangofua ʻi he Ngāue Fakafaifekaú

“Ko e Mahuʻinga ʻo e Talangofuá ʻi hono ʻOmi e Niʻihi Kehé kia Kalaisí: Talangofua ʻi he Ngāue Fakafaifekaú,” Fuakava Motuʻá – Tohi Lēsoni ʻa e Faiako Seminelí (2026)

“Ko e Mahuʻinga ʻo e Talangofuá ʻi hono ʻOmi e Niʻihi Kehé kia Kalaisí: Talangofua ʻi he Ngāue Fakafaifekaú,” Fuakava Motuʻá – Tohi Lēsoni ʻa e Faiako Seminelí

Teuteu Ngāue Fakafaifekaú: Lēsoni 200

Ko e Mahuʻinga ʻo e Talangofuá ʻi hono ʻOmi e Niʻihi Kehé kia Kalaisí

Talangofua ʻi he Ngāue Fakafaifekaú

Sister missionaries teaching family outside in Bolivia

Ko e fili ko ia ke talangofua koeʻuhí he ʻoku tau ʻofa ʻi he Tamai Hēvaní mo Sīsū Kalaisí ko ha konga mahuʻinga ia ʻo ʻetau fononga fakamatelié (vakai, Sione 14:15). ʻOku mātuʻaki mahuʻinga ʻetau talangofua fakatāutahá ʻi he taimi ʻoku tau fakafofongaʻi ai ʻa e Fakamoʻui ko Sīsū Kalaisí ʻi heʻetau hoko ko e kāingalotu ʻo Hono Siasí mo ha kau faifekau taimi kakató. ʻE lava ke tokoni ʻa e lēsoni ko ʻení ke fakatokangaʻi ʻe he kau akó ʻa e mahuʻinga ʻo e talangofuá ʻi hono fakahoko e ngāue ʻa e Fakamoʻuí ʻi heʻenau hoko ko e kau faifekaú.

Teuteu ʻa e tokotaha akó: Fakaafeʻi e kau akó ke toe vakaiʻi ha niʻihi ʻo e ngaahi tuʻunga moʻui ki he ngāue fakafaifekaú ʻoku maʻu ʻi he Konga 3 ʻo e “Ngaahi Tuʻunga Moʻui Fakafaifekau maʻá e Kau Ākonga ʻa Sīsū Kalaisí” ʻi he Gospel Library. ʻE lava ke talanoa ʻa e kau akó mo ha taha naʻe ngāue fakafaifekau pea fehuʻi ange pe ko e hā ha ngaahi tuʻunga moʻui ʻo e ngāue fakafaifekaú ʻoku nau manatuʻí.

Ngaahi ʻEkitivitī Ako ʻOku Ala Fakahokó

Ngaahi tuʻunga moʻui fakafaifekaú

Fakakaukau ke kamata ʻa e lēsoní ʻaki hono fakaʻaliʻali ha ʻata ʻo ha faifekau mo e maʻuʻanga tokoni Ngaahi Tuʻunga Moʻui Fakafaifekau maʻá e Kau Ākonga ʻa Sīsū Kalaisí mei he ChurchofJesusChrist.org. Te ke lava ʻo fakamatalaʻi ki he kau akó ʻoku fiemaʻu ke muimui ʻa e kau faifekaú ki ha ngaahi tuʻunga moʻui pau lolotonga ʻenau fakafofongaʻi ʻa e Fakamoʻuí.

Ko e hā ha niʻihi ʻo e ngaahi tuʻunga moʻui ʻoku fiemaʻu ke talangofua ki ai ʻa e kau faifekaú?

Kapau ʻe fiemaʻu, te ke lava ʻo vahevahe ha niʻihi ʻo e ngaahi tuʻunga moʻui fakafaifekau ʻoku hiki atu ʻi laló, mei hoʻo aʻusia pē ʻaʻau, pe ko ha niʻihi kehe ʻoku maʻu ʻi he Konga 3 pe Konga 7 ʻo e Ngaahi Tuʻunga Moʻui Fakafaifekau maʻá e Kau Ākonga ʻa Sīsū Kalaisí mei he ChurchofJesusChrist.org. Te ke lava ʻo fakamahinoʻi ange ʻoku fiemaʻu foki ke muimui e kau faifekaú ki he faleʻi ʻa honau kau taki fakamisioná ʻi heʻenau tataki e ngāue ʻa e ʻEikí ʻi he māʻoniʻoní.

Ngaahi tuʻunga moʻui fakafaifekau ʻe niʻihi:

Angaʻofa, fakakaukau lelei, mo langaki moʻui.
Nofo maʻu pē mo ho hoa faifekaú.
Fakaʻehiʻehi mei he ngaahi tūkunga ʻe ala fakatuʻutāmaki fakaesino pe fakalaumālié. ʻOua naʻá ke fakaʻaongaʻi ha ngaahi meʻangāue ʻuhila, ngāue ʻaki ha ngaahi mīsini mamafa, pe heka ʻi ha ngaahi palau, ngaahi taulani, pe ngaahi loli uta.
Fakaʻehiʻehi mei he televīsoné, faivá, keimi vitioó, mo e ngaahi vitiō ʻoku ʻikai fakangofuá.
Fakangatangata ʻa e fetuʻutaki fakaesino mo ha tokotaha ʻoku ʻikai ke mo tuʻunga tangata pe fefine tataú ki ha lulululu pē.

Ko e hā ka faingataʻa ai ki ha faifekau ke talangofua ki ha niʻihi ʻo e ngaahi tuʻunga moʻui ko ʻení? Ko e hā nai ʻe mahuʻinga ai ke muimui ki ai e kau faifekaú?

Te ke lava ʻo fakaafeʻi ha niʻihi ʻo e kau akó ke vahevahe ha sīpinga ʻo ha faifekau ʻoku nau ʻilo, ngaahi tuʻunga moʻui naʻe kole ange ke nau tauhi, pea mo e founga naʻe tāpuekina ai kinautolu ʻe he Fakamoʻuí ʻi heʻenau ngaahi ngāué.

Angatonu fakatāutahá mo e talangofuá

Te ke lava ʻo vahevahe ʻa e fakamatala ko ʻeni meia ʻEletā Soālesí ke tokoni ki he kau akó ke nau ʻiloʻi ha foʻi moʻoni fekauʻaki mo e vā fetuʻutaki ʻo e talangofuá mo e ngāue fakafaifekaú.

ʻI he lea ʻa ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ki he kau faifekaú, naʻá ne akoʻi:

Ko e māʻoniʻoni fakatāutahá ko e taha ia ʻo e ngaahi taukei mahuʻinga taha ke fakafofongaʻi ʻa e Fakamoʻuí ʻi he ʻao ʻo e māmaní. ʻOkú ne fakafeʻungaʻi foki kitautolu ke tau maʻu ʻa e takaua ʻo e Laumālie ʻo e ʻEikí. …

Kapau te tau fili ke ʻoua te tau talangofua, he ʻikai ke tau lava ʻo fakafofongaʻi ʻa e Fakamoʻuí ʻo fakatatau mo ia, pe te tau maʻu ʻa e Laumālie ʻo e ʻEikí. … Koeʻuhí ke ke lava ʻo hoko ko ha ivi tākiekina lelei ʻi he moʻui ʻa e niʻihi fakafoʻituitui ʻokú ke akoʻí, kuo pau ke ke maʻu ʻa e Laumālie ʻo e ʻEikí. …

Kapau te ke talangofua ʻi he loto-fiemālie, te ke fakahaaʻi ai ki he ʻEikí hoʻo loto-fiemālie ke muimui kiate Iá, ko hoʻo ʻofa kiate Ia mo ʻetau Tamai Hēvaní. ʻE tupulaki ange hoʻo fakalakalaka fakalaumālié. Te ke ʻiloʻi ʻa e Fakamoʻuí, pea ʻe hoko ʻeni ko ha liliu lahi ʻi ho misioná pea ʻi hoʻo moʻuí. (Scott Tayler, “Obedience Is Critical for Missionaries to Fulfill Their Responsibilities, Elder Soares Teaches,”newsroom.ChurchofJesusChrist.org, Mar. 29, 2021)

Ko e hā ʻoku tau ako meia ʻEletā Soālesi fekauʻaki mo e mahuʻinga ʻo e talangofuá?

ʻE lava ke fakaʻaongaʻi ʻe he kau akó ʻenau lea pē ʻanautolu ke ʻiloʻi ha foʻi moʻoni hangē ko e angatonu fakatāutahá mo e talangofuá ʻokú na fakafeʻungaʻi kitautolu ke tau fakafofongaʻi ʻa e Fakamoʻuí pea maʻu ʻa e takaua ʻo e Laumālié.

ʻE ala tokoni ke fakamatalaʻi ange ʻoku kau ʻi he talangofuá ʻa hono tauhi ʻetau ngaahi fuakava mo e Tamai Hēvaní mo Sīsū Kalaisí. Ko e talangofuá ko ha konga mahuʻinga ia ʻo e angatonu fakatāutahá pea mo hono fakahaaʻi ʻo e ʻofa ki he Tamai Hēvaní mo Sīsū Kalaisí (vakai, Sione 14:15).
Ko e hā ha ngaahi tāpuaki kuó ke mamata ai ki ha foaki ʻa e Tamai Hēvaní mo Sīsū Kalaisi ki ha taha ʻoku feinga ke talangofua kiate Kinaua?
Kuó ke fakatokangaʻi fēfē nai ʻa e ngaahi tāpuaki ko ʻení ʻi hoʻo moʻuí pe ʻi ha moʻui ʻa ha taha ʻokú ke ʻiloʻi?

Fakaʻaongaʻi ha kiʻi taimi ke ke fakakaukau ai ʻi he faʻa lotu ki hoʻo ngaahi feinga lolotonga ke talangofua ki he Tamai Hēvaní mo Sīsū Kalaisí. Fakaafeʻi ʻa e Laumālie Māʻoniʻoní ke tokoni atu ke ke fakatokangaʻi ʻa e ngaahi meʻa ʻokú ke fakahoko leleí pe mahalo ʻe fiemaʻu ke ke fakaangaanga ke fakahaaʻi lelei ange hoʻo ʻofa kiate Kinauá pea ʻomi ʻa e niʻihi kehé kiate Kinaua.

Talangofua faivelenga ʻi he ngāue fakafaifekaú

Ke tokoni ke ʻilo ʻe he kau akó ʻa e founga ʻe lava ke tokoniʻi ai kitautolu ʻe he talangofuá ke ʻomi ʻa e niʻihi kehé kia Kalaisí, fakakaukau ke aleaʻi ʻa e fakamatala ki he ivi tākiekina ʻo Taniela ʻi he Tuʻi ko Talaiasí mei he Taniela 6. Mahalo kuo ako ʻe he kau akó ʻa e talanoa ko ʻení ʻi he Lēsoni 145: “Taniela 6.” Te ke lava ʻo fakamatalaʻi fakanounou ʻa e talanoá ʻaki ʻa e palakalafi ko ʻení.

Neongo naʻe nofo pōpula ʻa Taniela ʻi Pāpilone mo Peasia, ka naʻá ne ngāue faivelenga maʻá e ʻEikí. Naʻe fiemaʻu ʻe he Tuʻi ko Talaiasí ʻa Taniela “ke fokotuʻu ki muʻa ʻi he kau pule mo e kau houʻeiki” ʻi hono puleʻangá “koeʻuhí naʻe ʻilo ʻa e ʻatamai lelei ʻia [Taniela],” (Taniela 6:3). ʻI he feinga ʻa e kau palesiteni kehé ke fakaongoongokoviʻi ʻa Taniela ʻi he ʻao ʻo e Tuʻi ko Talaiasí, naʻa nau faʻu ai ha palani ke fakameleʻi e mateaki ʻa Taniela ki he Tuʻi ko Talaiasí mo e ʻOtuá. Naʻa nau teke ʻa Talaiasi ke fanongonongo ko e lotu ki he ʻOtuá pe ko ha taha pē ʻe lotu makehe meia Talaiasi ʻoku tautea mate ia ʻi he ʻana ʻo e fanga laioné (vakai, Taniela 6:4–9). Neongo e fakatuʻutāmakí, ka naʻe fakahaaʻi ʻe Taniela ʻene loto-fiemālie ke talangofuá ʻaki ʻene hokohoko atu ke lotu ki he ʻOtuá. ʻI he taimi naʻe lipooti ai e ngaahi lotu ʻa Tanielá, naʻe momou ʻa Talaiasi ke lī ia ki he ʻaná.

Lau ʻa e Taniela 6:18–28, ʻo kumi e ola ʻo e talangofua ʻa Taniela ki he ʻEikí ʻa ia naʻe ongo ki he Tuʻi ko Talaiasí.

Ko e hā e meʻa naʻá ke ʻiló?
ʻE lava fēfē ʻe heʻetau feinga ke talangofua ki he ʻEikí ʻo maʻu ha ola lelei ki he anga e vakai ʻa e niʻihi kehé ki he Tamai Hēvaní mo Sīsū Kalaisí?

Vahevahe ʻa e meʻa kuó ke akó

Faʻu ha fokotuʻutuʻu ʻe lava ke fakaʻaongaʻi ke fai ʻaki ha lea miniti ʻe tolu ki he nima ʻi he mahuʻinga ʻo e talangofuá ʻi hono vahevahe ʻo e ongoongolelei ʻa e Fakamoʻuí mo e niʻihi kehé.

Fakakau ha meʻa ʻe tolu mei he ngaahi meʻá ni ʻi hoʻo fokotuʻutuʻú.

Ko ha potufolofola fekauʻaki mo e talangofuá mo e founga ʻe lava ke fakaʻaongaʻi ai ki hono vahevahe ʻo e ongoongolelei ʻo Sīsū Kalaisí.
Ko ha sīpinga mei he moʻui pe ngaahi akonaki ʻa Sīsū Kalaisí ʻe lava ʻo tokoni ki ha taha ʻoku feinga ke talangofua.
Ko ha sīpinga ʻi onopooni ʻo e mahuʻinga ʻo e talangofuá mo e founga ʻe faitāpuekina ai ʻe he Tamai Hēvaní mo Sīsū Kalaisi ʻetau ngaahi ngāué.
Ko ha kupuʻi lea nounou mei ha taki ʻo e Siasí ʻokú ne fakamamafaʻi ʻa e feinga ke talangofuá pea mo e ngaahi tāpuaki ʻi hono fai iá.
Ko hoʻo ngaahi ongo fakataautaha fekauʻaki mo e ʻuhinga ʻoku mahuʻinga ai ʻa e talangofuá ʻi he taimi ʻoku tau fakafofongaʻi ai ʻa e Fakamoʻuí ʻi heʻetau hoko ko e kāingalotu ʻo Hono Siasí mo ʻEne kau faifekaú.

Te ke lava foki ʻo ʻoange ki he kau akó ʻa e laʻipepa tufa hono ua ʻi he lēsoni ko ʻení ke fokotuʻutuʻu ʻa e hokohoko ki heʻenau leá. Te nau lava ʻo fakakau ha hingoa ʻi he puha ʻuluakí, ko ha talateu faingofua ki heʻenau leá, ko e ngaahi meʻa ʻe tolu ne nau fakakaukau ke fakakau mei he lisi ʻi ʻolungá ʻi he puha ʻe tolu ka hokó, pea mo ʻenau fakamoʻoní ʻi he puha fakaʻosí.

Hili hono faʻu ʻe he kau akó ʻenau fokotuʻutuʻú, te nau lava ʻo ngāue mo ha hoa ke akoako pe fakaleleiʻi ʻenau leá. Te ke lava ʻo fakaafeʻi ha kau ako ʻe loto-fiemālie ke vahevahe ʻenau leá mo e kalasí. Mahalo he ʻikai ongoʻi fiemālie ha kau ako ʻe niʻihi ke vahevahe leʻolahi. Te ke lava ʻo poupouʻi kinautolu ke ʻalu mo ʻenau fokotuʻutuʻú ki ʻapi ʻo akoʻi ha mēmipa ʻo e fāmilí pe kaungāmeʻa.

Fakakaukau ke vahevahe hoʻo fakamoʻoni ki he mahuʻinga ʻo e māʻoniʻoni fakatāutahá ʻi heʻetau fakafofongaʻi ʻa e Fakamoʻuí mo ʻEne ongoongoleleí ki he niʻihi kehé.

Ngaahi Maʻuʻanga Tokoni Kehé

ʻOku fakahaaʻi fēfē ʻetau ʻofa ki he ʻEikí ʻi hono pukepuke ʻetau tuʻunga moʻuí?

Naʻe akoʻi ‘e ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku meimei ke faʻa fakatokangaʻi ʻa e ʻofa ʻi he ʻEikí ʻi he fanga kiʻi tōʻonga fakaʻahó, ko e fanga kiʻi ngāue iiki mo hokohoko ke tauhi e ngaahi fuakavá: ki he toʻu kei talavoú, ko hono fakaʻaongaʻi ʻo e mītia fakasōsialé ke langa hake kae ʻikai holoki hifó; ko e mavahe mei he pātí, heleʻuhilá, pe ʻekitivitī ʻe ala poleʻi ai e ngaahi tuʻunga ʻulungāngá; ko e fakaʻapaʻapaʻi e ngaahi meʻa toputapú. (“Ko e Fakafehokotaki ʻo e Ongo Fekau Lalahí,” Liahona, Mē 2024, 105)

Ko e hā ʻoku mahuʻinga ai ke tau ako ʻa e talangofuá ʻi heʻetau teuteu ke vahevahe ʻa e ongoongoleleí mo e niʻihi kehé?

ʻI he lea ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ki he kau faifekau foʻoú, naʻá ne fakamanatu ange:

Ko e talangataʻá ko e angatuʻu ia ki he ʻOtuá mo ʻEne ngaahi taumuʻá pea ʻokú ne ʻai ke tau mamaʻo mei he ivi tākiekina ʻo e Laumālie Māʻoniʻoní. … ʻOku ʻikai mavahe ʻa e Laumālie Māʻoniʻoní meiate kitautolu; ka, ʻi heʻetau talangataʻá ʻoku tau mavahe ai mei he ivi tākiekina ʻo e Laumālie Māʻoniʻoní. (Scott Tayler, “7 Lessons Elder Bednar Has Learned About Obedience Over Past 50 Years,”newsroom.ChurchofJesusChrist.org, June 27, 2022)

Naʻe akonaki ʻa ʻEletā Leli S. Kesa ʻo e Kau Fitungofulú ʻo pehē:

10:21

ʻI heʻetau ʻunu ʻo tui moʻoni kia Sīsū Kalaisí, ʻe kamata leva ke liliu ʻetau tūkunga fakakaukaú. ʻOku tau ʻiloʻi ko e talangofua mo e tui ki he Fakamoʻuí te tau maʻu maʻu ai pē Hono Laumālié. ʻOku ʻikai leva ke toe fakakounaʻi e talangofuá, kae hoko ia ko ha meʻa ke tulifua ki ai. ʻOku tau ʻiloʻi ko e talangofua ki he ngaahi fekau ʻa e ʻOtuá ʻoku malava ai ke Ne falala mai kiate kitautolu. ʻOku maʻu leva ha maama lahi ange ʻi he maʻu ʻEne falalá. ʻOku tākiekina ʻe he maama ko ʻení ʻetau fononga he moʻuí mo fakaʻatā ke tau sio lelei ange ki he hala ʻoku totonu ke tau fouá. (“Tuʻunga ʻo e Tuí,” Liahona, Mē 2022, 25) (time code 4:05 to 4:39)

Ngaahi ʻEkitivitī Fakalahi ki he Akó

Ko e ngaahi tāpuaki ʻo e ngāue fakafaifekau talangofuá

ʻE ala tokoni ke fakaʻaongaʻi ʻe he kau akó ha ngaahi tūkunga ke tokoni ke nau fakatokangaʻi ʻa e founga ʻe lava ke liliu ai ʻe heʻetau ngaahi fili māʻoniʻoní ʻa ʻetau malava ke vahevahe ʻa e ongoongolelei ʻa e Fakamoʻuí mo e niʻihi kehé. Fakakaukau ke ʻoange ʻa e ngaahi tūkunga ko ʻení pe ko ha meʻa tatau mo ia.

ʻI he hoko ʻa Sisitā Keli mo Sēpeti ko e ongo faifekaú, ʻokú na ʻilo ko e taimi foki ki ʻapi ʻi he misioná ko e 9:00 efiafi, ka ʻokú na fie nofo pē ʻo aʻu ki he 9:30 mo ha fāmili ʻokú na kei akoʻi.
Kuo fuʻu ongosia ʻaupito ʻa ʻEletā Pālati ʻi heʻene ʻā hake ʻi he taimi ngāue fakafaifekau angamahení ʻi he 6:30 a.m. ʻOkú ne fakakaukau ʻe lahi ange hono ivi ki he ʻahó ʻo ka fuoloa ange ʻene mohé.
ʻOku pehē ʻi he ngaahi lao ʻo e misioná ʻoku ʻikai ngofua ke ʻalu ʻa e kau faifekaú ki he matātahí. Ka neongo ia, kuo fakaafeʻi ʻa ʻEletā Mila mo Sāmita ʻe he kāingalotu ʻo ha kolo fakalotofonua ke nau fakataha mo ha niʻihi ʻo honau ngaahi kaungāʻapi kuo nau fehuʻi fekauʻaki mo e Siasí pea te nau kau atu ki he paati matātahí.

Te ke lava ʻo fokotuʻutuʻu ʻa e kau akó ki ha ngaahi hoa ke aleaʻi ʻa e tūkunga naʻa nau filí. ʻE lava ke fakaʻaongaʻi ʻe he kau akó ha fepōpoakiʻaki ʻoku hokohoko ke faʻu ʻaki ha fepōtalanoaʻaki. ʻE lava ke fakakaukauloto ʻa e kau akó kuo kole ʻe he tokotaha ʻi he tūkungá ʻenau faleʻí. Te nau lava ʻo faʻu ha fepōtalanoaʻaki, ʻo vahevahe ʻa e meʻa kuo nau ako fekauʻaki mo e talangofuá mo e ngāue fakafaifekaú.

Lelei pe ʻikai fuʻu lelei

Hili hono toe vakaiʻi ha niʻihi ʻo e ngaahi tuʻunga moʻui ʻo e misioná, ʻe ala ʻaonga ki he kau akó ha fealeaʻaki fekauʻaki mo e tuʻunga ʻoku totonu ke ʻi ai ʻa e talangofua ʻi he ngāue fakafaifekaú. Ke fai ʻení, te ke lava ʻo huluʻi ʻa e “Preparation Day Safety,” mei he taimi 1:58 ki he 6:15. Te ke lava ʻo kiʻi taʻofi hili e fakaʻaliʻali takitaha ʻo e ngāue fakafaifekaú pea fakaafeʻi e kau akó ke nau tali e fakaafe ʻa e tokotaha naʻá ne tokangaʻí ke fakapapauʻi pe ʻoku lelei pe ʻikai lelei e ngaahi ʻekitivitií.

16:41

ʻOku ʻuhinga ʻa e talangofuá ke tau fakatokangaʻi ʻa e ngaahi fehalākí, fakatomala, pea toe feinga pē

Kapau ʻoku faingataʻa ke ongoʻi falala ʻa e kau akó te nau lava ʻo talangofua, pe hohaʻa kapau kuo fakamolemoleʻi kinautolu koeʻuhí ko ha ngaahi fehalaaki he kuohilí, te ke lava ʻo vahevahe ʻa e foʻi vitiō “Transformed Through the Love of Jesus Christ” (2:26). Te ke lava ʻo fakamatalaʻi ange kapau ʻoku tau feinga fakamātoato ke fai hotau lelei tahá, neongo ʻoku tau fai ha ngaahi fehalaaki, ʻe lava ke fakamolemoleʻi kitautolu ʻi he Fakalelei ʻa e Fakamoʻuí. Fakakaukau ke fakaafeʻi e kau akó ke hiki ha kiʻi fakamatala nounou ʻi heʻenau tohinoá ʻo fakahaaʻi ʻenau loto-fiemālie ke feinga ke talangofuá, kau ai ʻa e fekau ke fakatomala ʻi he taimi ʻoku nau fai ai ha ngaahi fehalākí.

2:27