Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko e Fatongia ʻo e Laumālie Māʻoniʻoní ʻi he Ngāue Fakafaifekaú: “Fakaava Ho Ngutú, pea ʻE Fakafonu Ia”

“Ko e Fatongia ʻo e Laumālie Māʻoniʻoní ʻi he Ngāue Fakafaifekaú: ‘Fakaava Ho Ngutú, pea ʻE Fakafonu Ia,’” Fuakava Motuʻá – Tohi Lēsoni ʻa e Faiako Seminelí (2026)

“Ko e Fatongia ʻo e Laumālie Māʻoniʻoní ʻi he Ngāue Fakafaifekaú: ‘Fakaava Ho Ngutú, pea ʻE Fakafonu Ia,’” Fuakava Motuʻá – Tohi Lēsoni ʻa e Faiako Seminelí

Teuteu Ngāue Fakafaifekaú: Lēsoni 199

Ko e Fatongia ʻo e Laumālie Māʻoniʻoní ʻi he Ngāue Fakafaifekaú

“Fakaava Ho Ngutú, pea ʻE Fakafonu Ia”

Neongo kuo kole mai ʻe he Tamai Hēvaní ke tau vahevahe ʻa e ongoongolelei ʻo Sīsū Kalaisí mo e niʻihi kehé, ka ʻoku ʻikai ke Ne ʻamanaki mai ke tau fakahoko toko taha ia. ʻI heʻetau ako ke ʻiloʻi mo muimui ki he Laumālié, te Ne tataki kitautolu ʻi heʻetau ngaahi ngāue fakafaifekaú. ʻE lava ke tokoni ʻa e lēsoni ko ʻení ke vakaiʻi ʻe he kau akó ʻa e ngaahi founga ʻe lava ke tokoniʻi ai kinautolu ʻe he Laumālié ke vahevahe ʻa e ongoongolelei ʻo Sīsū Kalaisí mo e niʻihi kehé.

Teuteu ʻa e tokotaha akó: Fakaafeʻi e kau akó ke kole ki ha taha ʻosi ngāue fakafaifekau ke vahevahe ha aʻusia ne tokoniʻi ai ia ʻe he Laumālie Māʻoniʻoní ʻi heʻene ngāue fakafaifekaú. Pe ko ha fakakaukau ʻa e kau akó ki ha ngaahi aʻusia kuo nau maʻu ʻi he taimi naʻe tokoniʻi ai kinautolu ʻe he Laumālie Māʻoniʻoní ke vahevahe ʻa e ongoongoleleí mo e niʻihi kehé.

Ngaahi ʻEkitivitī Ako ʻOku Ala Fakahokó

ʻOku mahuʻinga ʻa e Laumālie Māʻoniʻoní

Fakakaukau ke kamata e kalasí ʻaki hano ʻoange ki ha tokotaha ako ha ngāue he ʻikai lava ke fakakakato taʻe ʻi ai ha meʻa pau. Hangē ko ʻení, te ke lava ʻo fakamaʻu ha foʻi sikalu ʻi ha konga papa pea kole ki ha tokotaha ako ke ne taʻaki ia kae ʻoua naʻa ʻoange ha meʻangāue ke ne fakahoko ʻaki ia. Hili ʻa e ʻikai lava ʻe he tokotaha akó ʻo fakakakato ʻa e ngāué, ʻoange kiate ia ʻa e meʻa ʻoku fiemaʻú, hangē ko ha meʻangāue vete sikalu (screwdriver).

Ko e hā ha ngaahi ngāue he ʻikai lava ke fai taʻe kau ai ha meʻa pau?

Makehe mei he fakamatala ko ʻeni mei he Palōfita ko Siosefa Sāmitá, mahalo te ke fakakaukau ke fakaafeʻi e kau akó ke lau ʻa e Tokāteline mo e Ngaahi Fuakava 42:14, ʻo kumi ʻa e fiemaʻu tatau.

Lau ʻa e lea ko ʻeni mei he Palōfita ko Siosefa Sāmitá (1805–44), ʻo kumi ha meʻa ʻoku tau fiemaʻu ke vahevahe lelei ai ʻa e ongoongolelei ʻo Sīsū Kalaisí.

Kuo pau ke malanga ʻaki ʻa e Ongoongoleleí ʻe he tokotaha kotoa pē ʻi he mālohi ʻo e Laumālie Māʻoniʻoní; pea he ʻikai ke lava ʻe ha taha ʻo malanga ʻaki ʻa e Ongoongoleleí taʻe kau ai ʻa e Laumālie Māʻoniʻoní. (Ngaahi Akonaki ʻa e Kau Palesiteni ʻo e Siasí: Siosefa Sāmita, 383)

ʻOkú ke pehē ko e hā he ʻikai ke tau lava ai ʻo malanga ʻaki e ongoongolelei ʻo Sīsū Kalaisí taʻe kau ai e Laumālie Māʻoniʻoní?

Lisi ʻi hoʻo tohinoa akó ʻa e ngaahi founga lahi taha te ke lava ʻo fakakaukau ki ai ʻe lava ke tokoniʻi kitautolu ʻe he Laumālie Māʻoniʻoní ke malanga ʻaki ʻa e ongoongoleleí.

Fakapapauʻi ki he kau akó ʻoku sai pē kapau ʻoku ʻikai ke nau lava ʻo fakakaukau ki ha ngaahi founga lahi. Kole ange ke nau tānaki atu ki heʻenau lisí ʻi heʻenau ako e lēsoni ko ʻení. Poupouʻi foki kinautolu ke fekumi ki ha tataki fakalaumālie ki he founga ʻe lava ke tokoniʻi ai kinautolu ʻe he Laumālie Māʻoniʻoní ʻi heʻenau moʻuí he taimí ni pea ʻi he kahaʻú foki.

Ko e ngaahi fatongia ʻo e Laumālie Māʻoniʻoní

ʻOku tokoniʻi kitautolu ʻe he ʻEikí ke vahevahe ʻEne ongoongoleleí mo e niʻihi kehé ʻaki hono fekauʻi mai kiate kitautolu ʻa e Laumālie Māʻoniʻoní (vakai, Tokāteline mo e Ngaahi Fuakava 79:1–2). ʻOku akoʻi kitautolu ʻe he folofolá ki he founga ʻe lava ke tokoniʻi ai kitautolu ʻe he Laumālie Māʻoniʻoní ʻi heʻetau ngāue fakafaifekaú.

Kimuʻa pea kamata e kalasí, hiki e ngaahi fakahinohino ko ʻení ʻi he palakipoé. Fakakaukau ke vahe ha ngaahi hoa ke lau ha ngaahi veesi kehekehe.

Mahalo te ke fie fakamatalaʻi ange ki he kau akó ʻoku faʻa ʻuhinga ʻa e folofolá he taimi ʻe niʻihi ki he Laumālie Māʻoniʻoní ʻi ha ngaahi hingoa kehekehe. “Ko e ngaahi huafa kehe ʻoku faʻa ʻuhinga ki he Laumālie Māʻoniʻoní ko e Laumālie ʻo e ʻOtuá, Laumālie ʻo e ʻEikí, Fakafiemālié, mo e Laumālié” (vakai, Bible Dictionary, “Holy Ghost”).

ʻE ala tokoni foki ke fakamatalaʻi ange ʻoku ʻuhinga ʻa e “nau” ʻi he ʻAlamā 17:3 ki he ngaahi foha ʻo Mōsaiá, pea ʻuhinga ʻa e “au” ʻi he 3 Nīfai 28:11 kia Sīsū Kalaisi.

Fakaʻaongaʻi e ngaahi potufolofola ko ʻení ke fakakakato ʻaki e fakamatalá: ʻE lava ʻe he Laumālie Māʻoniʻoní ʻo …

Mōsese 6:32, 34
2 Nīfai 33:1
ʻAlamā 17:3
3 Nīfai 28:11
Tokāteline mo e Ngaahi Fuakava 31:11
Te ke lava ʻo fakaafeʻi ʻa e kau akó ke nau tohi ʻi he palakipoé ʻa e founga ne nau fakakakato ai e fakamatalá. Te nau ala fakamatalaʻi ʻa e ngaahi fatongia ʻo e Laumālie Māʻoniʻoní hangē ko ʻení: ʻE lava ʻe he Laumālie Māʻoniʻoní ʻo …
- Tokoni ke tau ʻilo e meʻa ke lea ʻakí (Mōsese 6:32, 34).
- ʻAve ʻa e pōpoaki ʻa e ʻEikí ki he loto ʻo e niʻihi kehé (2 Nīfai 33:1).
- Tokoniʻi kitautolu ke tau faiako ʻaki e mālohi mo e mafai ʻo e ʻEikí (ʻAlamā 17:3).
- Fakamoʻoni ki he Tamai Hēvaní mo Sīsū Kalaisi (3 Nīfai 28:11).
- Tokoni ke tau ʻiloʻi ʻa e meʻa ke faí mo e feituʻu ke ō ki aí (Tokāteline mo e Ngaahi Fuakava 31:11).
Hili e tohi ʻa e kau akó ʻi he palakipoé, te ke lava ʻo fakaafeʻi kinautolu ke vahevahe ha ngaahi fatongia kehe ʻe lava ke fakahoko ʻe he Laumālie Māʻoniʻoní ʻi heʻetau vahevahe ʻa e ongoongoleleí.

Mahalo te ke fie fai ha fehuʻi hangē ko ʻení ke tokoni ke mahino ki he kau akó ʻoku fiemaʻu ha ngāue fakalaumālie kae lava ke maʻu e takaua ʻo e Laumālie Māʻoniʻoní.
Ko e hā ha ngaahi ngāue te tau lava ʻo fai ke maʻu ai e takaua ʻo e Laumālie Māʻoniʻoní?

ʻE lava ke vahevahe ʻe he kau akó ha ngaahi meʻa hangē ko e lotu fakamātoató, ako folofola maʻu peé, tauhi e ngaahi fuakavá, mo e talangofua ki he ngaahi fekau ʻa e ʻOtuá (vakai, Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí [2023], 113).

ʻE lava ke tokoni ʻa e aʻusia ko ʻeni meia ʻEletā Lasipení ke ʻilo ʻe he kau akó ʻa e founga ʻe lava ke tokoniʻi ai kitautolu ʻe he ngaahi fatongia ko ʻeni ʻo e Laumālie Māʻoniʻoní ke vahevahe e ongoongolelei ʻa e Fakamoʻuí. Te ke lava ʻo huluʻi ha kiʻi konga mei he “Tuku ke Taki ʻa e Laumālie Māʻoniʻoní,” mei he taimi 4:43 ki he 5:59, ʻo kiʻi taʻofi tuʻo ua pe tolu ke aleaʻi ʻa e feituʻu ʻoku mamata ai ʻa e kau akó ki he ivi tākiekina ʻo e Laumālie Māʻoniʻoní.

Lau ʻa e fakamatala ko ʻeni meia ʻEletā Lainolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo kumi e feituʻu ʻokú ke sio ai ki he ivi tākiekina ʻo e Laumālie Māʻoniʻoní ʻi he aʻusia ʻa ʻEletā Lasipeni ʻi hono vahevahe ʻo e ongoongolelei ʻo Sīsū Kalaisí.

15:43

Ne ʻi ai ha pongipongi māfana ʻi Siulai ne u ongoʻi mo hoku hoá ke ma kumi ha fiefanongo ʻi he Temipale Sikueá. Ne ma tukituki atu he ʻapi ʻo ʻEleuti Sikeifá. Ne fakafisingaʻi kimaua ʻe hono uaifí.

ʻI he kamata ke ne tāpuniʻi e matapaá, ne u ongoʻi ke fai ha meʻa ne teʻeki ke u fai kimuʻa, pea kuo teʻeki pē ke u toe fai kimui ai! Ne u mono atu hoku vaʻé he matapaá mo fehuʻi ange, “ʻOku toe ʻi ai ha taha te ne ngali tali ʻema pōpoakí?” Ne tokanga mai hona ʻofefine taʻu 16 ko Maʻatí, pea naʻá ne lotua lahi he ʻaho kimuʻá ke maʻu ha fakahinohino. Ne mau feʻiloaki mo Maʻati, pea aʻu ki ha taimi ne kau mai mo ʻene faʻeé ki he lēsoní. Ne na kau lōua ki he Siasí.

Kuo papitaiso ʻeni ha toko 136, ko e ola ʻo e papi ʻa Maʻatí, kau ai ha konga lahi hono fāmilí, pea kuo nau fai ha ngaahi fuakava ʻi he ongoongoleleí. ʻOku ou houngaʻia heʻeku fakafanongo ki he Laumālié ʻo mono atu hoku vaʻé he matapaá, he ʻaho māfana ko ia ʻi Siulaí. (“Tuku ke Taki ʻa e Laumālie Māʻoniʻoní,” Liahona, Mē 2017, 94)

Naʻá ke vakai fēfē ki he ivi tākiekina ʻo e Laumālie Māʻoniʻoní ʻi he aʻusia ʻa ʻEletā Lasipení?

Kimuʻa pea fai ʻa e ngaahi fehuʻi ko ʻení, fakakaukau ke ke lea ʻaki ha meʻa hangē ko ʻení: “Hili ʻeku fai ʻa e ngaahi fehuʻi takitaha ka hokó, te u ʻoatu ha sekoni ʻe 30 ke ke fakakaukau ai kimuʻa peá ke toki talí.” Fai ʻa e fehuʻi ʻuluakí pea sio ʻi ha uasi pe lau fakalongolongo pē kiate koe kimuʻa pea fakaafeʻi ha ngaahi fakamatalá. Hili e vahevahe ʻa e kau akó, toe fai pē ʻa e meʻa tatau ki he fehuʻi hono uá. ʻI hono ʻoange ha taimi ki he kau akó ke nau fakakaukau ai ki he ngaahi fehuʻí kimuʻa pea fakaʻatā ha ngaahi fakamatalá, ʻe lava ke fakaafeʻi ai ʻa e Laumālie Māʻoniʻoní, ʻoange ha faingamālie lahi ange ki he kau akó ke nau fakakaukau ki ha tali, pea faʻa iku ke fanongo mei he kau ako ʻoku ʻikai ke nau faʻa vahevahé.
Ko e fē ha taimi kuo tokoniʻi ai koe pe ko ha taha ʻokú ke ʻilo ʻe he ʻEikí ke vahevahe ʻa e ongoongolelei ʻo Sīsū Kalaisí ʻi he tokoni ʻa e Laumālie Māʻoniʻoní?
Ko e fē ha taimi kuó ke ongoʻi ai ʻa e ivi tākiekina ʻo e Laumālie Māʻoniʻoní ʻi he taimi naʻe vahevahe atu ai ʻe ha taha ʻa e ongoongoleleí kiate koe?

Fekumi ki he Laumālie Māʻoniʻoní ʻi heʻetau vahevahe ʻa e ongoongolelei ʻo Sīsū Kalaisí

Ko e hā ha ngaahi faingamālie te ke ala maʻu ke vahevahe ʻa e ongoongolelei ʻo Sīsū Kalaisí mo e niʻihi kehé?

ʻE lava ke vahevahe ʻe he kau akó ha ngaahi meʻa hangē ko e taimi ʻoku fakafehuʻia ai ʻenau tui fakalotú ʻe ha kaungāmeʻa, taimi ʻoku nau fakafiemālieʻi ai ha mēmipa ʻo e fāmilí, taimi ʻoku nau akoʻi ai ha lēsoni ʻi he lotú, taimi ʻoku tohi ai ʻi he mītia fakasōsialé, mo e ngaahi meʻa peheé. ʻI he tali ʻa e kau akó, te ke lava ʻo hiki ʻenau ngaahi talí ʻi he palakipoé.

Fakakaukau ke vahevahe e kalasí ki ha fanga kiʻi kulupu iiki pea fakaafeʻi kinautolu ke fakakakato e ʻekitivitī ko ʻení. ʻE lava ke vahevahe ʻe he kau akó ha potufolofola, hangē ko ia ʻi he konga kimuʻa ʻo e lēsoní, ʻe lava ʻo tokoni ke nau manatuʻi ʻa e founga ʻe lava ke tokoniʻi ai kinautolu ʻe he Laumālié ʻi he ngaahi tūkunga ko ʻení.

Fili ha tūkunga ʻe ua te ke lava ai ʻo vahevahe ʻa e ongoongolelei ʻo Sīsū Kalaisí mo e niʻihi kehé. Aleaʻi ʻa e ngaahi fehuʻi ko ʻení ki he tūkunga takitaha:

Te ke lava fēfē ʻo fekumi mo muimui ki he ivi tākiekina ʻo e Laumālie Māʻoniʻoní ʻi he tūkunga ko ʻení?
ʻE tokoniʻi fēfē koe ʻe he ʻEikí ke ke vahevahe ʻa e ongoongolelei ʻo Sīsū Kalaisí ʻi he tūkunga ko ʻení ʻo fakafou ʻi he Laumālie Māʻoniʻoní?

Fakaafeʻi e kau mēmipa ʻo e kulupu takitaha ke vahevahe ha meʻa mei heʻenau fealēleaʻaki fakakulupú. Te ke lava ʻo fehuʻi ki he kau akó pe ko e hā ha meʻa kuó ne tokoniʻi kinautolu ke nau ako ʻa e founga ʻoku lea ai ʻa e Laumālie Māʻoniʻoní kiate kinautolú. Fakakaukau ke vahevahe hoʻo fakamoʻoni ki he mahuʻinga ʻo e Laumālie Māʻoniʻoní ʻi heʻetau vahevahe ʻa e ongoongolelei ʻo Sīsū Kalaisí.

Te ke lava ʻo fakamatalaʻi ki hoʻo kau akó ʻoku akoʻi ʻe he Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí ko e ako ko ia ke fakatokangaʻi ʻa e ivi tākiekina ʻo e Laumālie Māʻoniʻoní “ko ha founga māmālie ia ʻoku fiemaʻu ai ʻa e ngāue faivelengá mo e faʻa kātakí” (119). Poupouʻi kinautolu ke nau faʻa kātaki ʻi heʻenau feinga ʻi he ʻaho takitaha ke ʻiloʻi mo falala ki he Laumālie Māʻoniʻoní. ʻI heʻenau fai iá, te nau hoko ai ko ha faifekau mālohi ʻi he toʻukupu ʻo e ʻEikí.

Ngaahi Maʻuʻanga Tokoni Kehé

Ko e hā ha ngaahi founga ʻe lava ke tokoniʻi ai au ʻe he Laumālie Māʻoniʻoní ʻi heʻeku ngāue maʻá e ʻEikí ʻi Hono Siasí?

Naʻe akoʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻE toe ʻomi foki ʻe he Laumālie Māʻoniʻoní ha fakahā ʻi hotau ngaahi fatongiá mo e ngāué. ʻI he ngaahi meʻa kuó u aʻusiá, ʻoku lahi hono maʻu e fakahinohino fakalaumālie mahuʻingá ʻi he taimi ʻoku tau feinga ai ke tāpuekina ʻa e niʻihi kehé ʻi he fakahoko hotau ngaahi fatongiá. …

ʻOku ou fakapapauʻi atu ʻe lava ke maʻu ʻa e fakahinohinó ʻi he fakahā, ʻe kitautolu takitaha, ʻi heʻetau ngāue ʻi he loto fakatōkilalo ʻi he ngoue vaine ʻa e ʻEikí. (“Ko e Tāpuaki ʻo e Hokohoko e Maʻu Fakahaá mo e Fakahā Fakafoʻituituí ke Tataki ʻEtau Moʻuí,” Liahona, Mē 2020, 99)

Naʻe pehē ʻe Palesiteni Lāsolo M. Nalesoni:

Ko e meʻa ʻe taha kuo toutou ʻomi ʻe he Laumālié ki heʻeku fakakaukaú talu mei hoku uiuiʻi foʻou ko e Palesiteni ʻo e Siasí, ko e hōifua koia ʻa e ʻEikí ke fakahā ʻEne fakakaukaú mo Hono finangaló. Ko e faingamālie ke maʻu e fakahaá, ko e taha ia ʻo e ngaahi meʻaʻofa lelei taha ʻa e ʻOtuá ki Heʻene fānaú. …

Fakakaukauloto ki he mana ko iá! Tatau ai pē pe ko e hā hotau uiuiʻi ʻi he Siasí, te tau kei lava ʻo lotu ki he Tamai Hēvaní pea maʻu ha tataki mo ha fakahinohino, pea maʻu ha fakatokanga fekauʻaki mo e fakatuʻutāmakí mo e ngaahi meʻa te ne tohoakiʻi ʻetau tokangá, pea ke tau malava ʻa e ngaahi meʻa he ʻikai pē ke tau lava ʻo fai ʻiate kitautolú. Kapau te tau maʻu moʻoni ʻa e Laumālie Māʻoniʻoní mo ako ke fakafaikehekeheʻi mo mahino ʻEne ngaahi ueʻí, ʻe tataki kitautolu ʻi he meʻa siʻisiʻi pe lahi kotoa pē. (“Fakahā maʻá e Siasí, Fakahā ki Heʻetau Moʻuí,” Liahona, Mē 2018, 94)

Te u ako fēfē ʻa e founga ʻoku folofola mai ai ʻa e Laumālié kiate aú?

ʻOku pehē ʻi he Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí:

ʻI hoʻo feinga mo muimui ki he fakahinohino ʻa e Laumālie Māʻoniʻoní, hoʻo malava ke ʻilo mo mahino ʻEne ngaahi ueʻí, ʻe tupulaki ʻi he fakalau atu ʻa e taimí (vakai, 2 Nīfai 28:30). ʻI ha ngaahi founga ʻe niʻihi, ko e fakaʻau ko ia ke femahinoʻaki ange mo e lea ʻa e Laumālié ʻoku tatau ia mo ha ako ʻo ha lea fakafonua kehe. Ko ha founga māmālie ia ʻoku fiemaʻu ai ʻa e ngāue faivelengá, mo e faʻa kātakí. (Malanga ʻAki ʻEku Ongoongoleleí: Ko Ha Fakahinohino ki Hono Vahevahe ʻo e Ongoongolelei ʻo Sīsū Kalaisí [2023], 119)

Ko e fē ha feituʻu te u lava ʻo ako lahi ange ai fekauʻaki mo e Laumālie Māʻoniʻoní mo Hono fatongia ʻi he ngāue fakafaifekaú?

Vakai, “Vahe 4: Fekumi mo Falala ki he Laumālié” ʻo e Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí.

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Te ke lava ʻo fakaʻaliʻali ʻa e fakamatala mei he Palōfita ko Siosefa Sāmitá kae fetongi ʻa e ongo taimi ʻoku ʻasi ai ʻa e “Laumālie Māʻoniʻoní” ʻaki ha ongo laine ʻatā, kae ʻoua ʻe fakaʻaongaʻi ʻa e lēsoni fakataumuʻá ʻi he kamataʻanga ʻo e lēsoní. Fakaafeʻi e kau akó ke vahevahe ha ngaahi foʻi lea ʻe lava ke fakaʻaongaʻi ke fakafonu ʻaki e ngaahi konga ʻoku ʻataá. Te nau lava ʻo fakamatalaʻi ʻa e ʻuhinga ʻoku nau ongoʻi ai ʻe lava ke tokoni ʻenau ngaahi talí ʻi he taimi ʻoku malangaʻi ai ʻa e ongoongolelei ʻo Sīsū Kalaisí. Hili e vahevahe ʻa ha kau ako tokolahi, te ke lava ʻo hiki ʻa e “Laumālie Māʻoniʻoní” ʻi he ongo feituʻu ʻoku fakaʻatā atú.

Ko ha ako ʻoku fakalahi fekauʻaki mo e ngaahi fatongia ʻo e Laumālie Māʻoniʻoní

Makatuʻunga ʻi he ngaahi fiemaʻu hoʻo kau akó, te ke lava ʻo fakaʻaongaʻi ha taha ʻo e ngaahi potufolofola ko ʻení ko ha fetongi pe tānaki atu ʻi he konga ʻoku ui “Ko e ngaahi fatongia ʻo e Laumālie Māʻoniʻoní.”

Fakahinohinoʻi kitautolu (Nehemaia 9:20).
Fakafiemālieʻi kitautolu, akoʻi ʻa e moʻoní, mo tokoni ke tau manatuʻi ʻa e ngaahi moʻoni ko iá (Sione 14:26).
Tataki kitautolu ki he moʻoní (Sione 16:13).
Tokoniʻi kitautolu ke ongoʻi e ʻofa ʻa e ʻOtuá (Loma 5:5).
Fakamoʻoni ki he meʻa ʻoku tau fakamoʻoniʻi ki he niʻihi kehé (Tokāteline mo e Ngaahi Fuakava 100:5–8).

Tokoni ke mahino ki he kau akó ʻa e founga ke ongoʻi mo ʻiloʻi ai ʻa e Laumālié

Te ke lava ʻo fakaʻaongaʻi ha taimi ke tokoniʻi e kau akó ke nau ʻiloʻi ha ngaahi founga kehekehe ʻoku folofola mai ai ʻa e Laumālié kiate kitautolu takitaha. Fakatokangaʻi ange: Mahalo te ke fie fakamanatu ʻa e Lēsoni 70: “1 Samuela 3,” ʻa ia ʻoku nofotaha ʻi hono tokoniʻi e kau akó ke nau ʻiloʻi ʻa e leʻo ʻo e ʻEikí. Ko ha fili ʻeni ʻe ua ʻe lava ʻo tokoni ki he kau akó:

Te ke lava pe ko hoʻo kau akó ʻo fili ha foʻi vitiō ʻe taha pe ua mei he ʻū vitiō “Fanongo Kiate Ia,” ʻa ia ʻoku vahevahe ai ʻe he kau taki ʻo e Siasí ha ngaahi aʻusia ʻo e founga ʻoku nau fanongo ai ki he leʻo ʻo e ʻEikí.
ʻE lava ke fakakakato ʻe he kau akó ha ʻekitivitī ako fakataautaha ʻoku maʻu ʻi he “Vahe 4: Fekumi mo Falala ki he Laumālié” ʻo e Malanga ʻAki ʻEku Ongoongoleleí: Ko ha Fakahinohino ki Hono Vahevahe ʻo e Ongoongolelei ʻo Sīsū Kalaisí. Fakatokangaʻi ange ko e laʻipepa tufa ʻi he Lēsoni 70: “1 Samuela 3” ko ha tatau fakafaingofuaʻi ia ʻo e ʻekitivitī ako fakataautaha ko ʻení ʻi he Malanga ʻAki ʻEku Ongoongoleleí.