“Ang Atong Responsibilidad sa Pakigsaad nga Ipakigbahin ang Ebanghelyo: ‘[Ang] Imong Kaliwat Pagapanalanginan ang Tanan nga mga Kabanayan sa Yuta,’” Manwal sa Magtutudlo sa Seminary sa Daang Tugon (2026)
“Ang Atong Responsibilidad sa Pakigsaad nga Ipakigbahin ang Ebanghelyo: ‘[Ang] Imong Kaliwat Pagapanalanginan ang Tanan nga mga Kabanayan sa Yuta,’” Manwal sa Magtutudlo sa Seminary sa Daang Tugon
Pagpagandam sa Misyonaryo: Leksiyon 196
Ang Atong Responsibilidad sa Pakigsaad nga Ipakigbahin ang Ebanghelyo
“[Ang] Imong Kaliwat Pagapanalanginan ang Tanan nga mga Kabanayan sa Yuta”
Samtang kita mopili nga mosunod sa Manluluwas ug maglakaw subay sa dalan sa pakigsaad, Siya misaad kanato sa samang mga panalangin nga gihatag Niya kang Abraham. Kini nga mga panalangin naglakip sa gahom sa pagkapari, mahangtorong mga pamilya, ug usa ka kabilin sa celestial nga gingharian. Isip kabahin niini nga pakigsaad, kita adunay sagrado nga responsibilidad sa pagpakigbahin sa ebanghelyo sa Manluluwas sa tibuok kalibotan aron ang tanan makadawat niining talagsaon nga mga panalangin. Kini nga leksiyon makatabang sa mga estudyante nga mapalawman ang ilang pagsabot mahitungod sa ilang responsibilidad sa pakigsaad nga ipakigbahin ang ebanghelyo ni Jesukristo ngadto sa uban.
Pagpangandam sa estudyante: Dapita ang mga estudyante nga mogahin og pipila ka minuto sa ilang personal nga pagtuon sa kasulatan nga pangitaon ang mga panalangin ug responsibilidad sa pakigsaad ni Abraham. Pwede nilang tun-an ang tudling sa doktrinal nga kahanas nga Abraham 2:9–11 o pangitaon ang “pakigsaad ni Abraham” diha sa Librarya sa Ebanghelyo. Panahon sa leksiyon, pwede nimo silang dapiton nga ipakigbahin ang mga butang nga ilang nakat-onan o ang ilang mga pangutana.
Posibleng mga Kalihokan sa Pagkat-on
Mga pamilya sa yuta
Pag-andam og upat ka sobre, ang matag usa butangan og numero: 1, 2, 3, o 4.
Iprinta ang duha ka bahin nga handout “Ang mga pamilya sa yuta,” atubangan ug likod. Guntinga subay sa tuldok-tuldok nga mga linya, nga maghimo og duha ka bahin nga puzzle. Gamit ang mga numero sa mga ulohan sa likod sa matag piraso, ibutang kini sa sobre nga dunay parehas nga numero. Bahina ang mga estudyante ngadto sa upat ka grupo ug tagai ang kada grupo og lahi nga sobre. Kon ikaw adunay dako nga klase, ikonsiderar ang pagdoble sa mga instruksiyon ug sa pagbahin sa walo ka grupo sa mga estudyante.
Dapita ang matag grupo sa pagtan-aw sa mga hulagway sa mga piraso sa ilang puzzle ug ihatag ang mosunod nga mga instruksiyon.
Isip usa ka grupo, pagpili og usa sa mga hulagway sa usa ka tawo sa mga piraso sa inyong puzzle ug paghimo og mubo nga paghulagway niana nga tawo. Mahimong maglakip kini sa:
-
Ngalan
-
Asa sila gikan
-
Mga detalye mahitungod sa ilang pamilya
-
Mga butang nga maayo sa ilang kinabuhi
-
Mga hagit nga ilang nasinati
Dapita ang matag grupo sa pagpakigbahin ngadto sa klase sa mga detalye sa ilang gihimo alang sa tawo nga ilang gipili gikan sa mga piraso sa ilang puzzle. Human sila mipakigbahin, dapita ang mga estudyante sa pagtan-aw sa tibuok leksiyon kon unsa ang gihangyo sa Ginoo kanato nga buhaton aron mapanalanginan ang mga tawo sa tibuok kalibotan, sama niadtong gihulagway sa matag grupo. Ipasabot nga ang mga estudyante dungan nga mokompleto sa tibuok puzzle sa ulahing bahin sa leksiyon.
Ikonsiderar ang pagdapit sa mga estudyante sa pagtuon sa mosunod nga tudling diha sa ilang mga grupo.
Basaha ang Abraham 2:9–11, nga mangita sa unsay gisulti sa Ginoo kang Abraham nga Iyang buhaton aron mapanalanginan ang mga nasod ug mga pamilya sa yuta. Pahinumdom: Kini nga mga bersikulo naglangkob og porsiyon sa unsay nailhan nga ang pakigsaad ni Abraham.
-
Kinsa ang mga kaliwat ni Abraham? (Tan-awa sa mga bersikulo 10–11.)
-
Unsa ang pipila ka mga paagi nga ang Ginoo makapanalangin sa mga pamilya sa yuta pinaagi sa mga kaliwat ni Abraham?
Ang mosunod nga pamahayag mahimong ipakigbahin aron mosuporta o modugang sa mga tubag sa mga estudyante.
Si Elder David A. Bednar sa Korum sa Napulog Duha ka Apostoles mitudlo sa mosunod mahitungod sa kaliwat ni Abraham:
Kita mga binhi ni Abraham …
Ang misyonaryong buhat usa ka pagpakita sa atong espirituhanong pagkakita ug panulundon. Kita giordinahan nang daan didto sa pre-mortal nga kahimtang ug natawo dinhi nga mortal aron matuman ang pakigsaad ug saad sa Dios ngadto ni Abraham. Ania kita karon dinhi sa kalibutan niining panahona aron sa pagpadayag sa priesthood ug sa pagsangyaw sa ebanghelyo. Mao kini kita, ug kana mao ang hinungdan nganong ania kita dinhi—karon ug sa kanunay. (“Pagkahimong Usa Ka Misyonaryo,” Liahona, Nob. 2005, 47)
-
Unsaon ninyo pag-summarize niini nga pamahayag?
Ang mga estudyante mahimong mosulti og usa ka butang sama sa, isip binhi ni Abraham, kita adunay responsibilidad sa pakigsaad sa pagpakigbahin sa ebanghelyo ni Jesukristo sa tibuok kalibotan. Ikonsiderar ang paggamit sa mga pulong sa mga estudyante sa pagsulat niini nga kamatuoran diha sa pisara.
Aron mas masabtan ang kaimportante niini nga responsibilidad, mahimong dapiton ang mga estudyante sa pagbasa sa unang tulo ka parapo sa pahina 1 sa Isangyaw ang Akong Ebanghelyo ubos sa ulohan nga “Ang Imong Katungdanan sa Pagtudlo sa Gipahiuli nga Ebanghelyo ni Jesukristo.”
-
Ngano kaha ang ubang mga tawo mahinamon niini nga responsibilidad? Nganong ang uban magduha-duha man?
-
Sa unsang paagi kaha nga ang ebanghelyo ni Jesukristo makapanalangin sa mga tawo sama niadtong inyong gihulagway diha sa mga piraso sa inyong puzzle?
Aron matabangan ang mga estudyante nga makita ang bili sa pagpakigbahin sa ebanghelyo, mahimo kang mangutana kon unsay ilang nahinumdoman mahitungod sa pakigsaad ni Abraham o ipasabot ang mosunod (alang sa dugang mga detalye tan-awa sa “Leksiyon 23: ‘Genesis 12; 17’” ug “Leksiyon 24: ‘Abraham 2:9–11’”):
Isip kabahin sa pakigsaad ni Abraham, ang Dios misaad kanato sa mga panalangin sa Iyang pagkapari, mahangtorong mga pamilya, ug usa ka kabilin sa celestial nga gingharian. Kini ang mga panalangin nga Iyang gitinguha alang sa Iyang mga anak, ug kita adunay pribilehiyo ug responsibilidad sa pagpakigbahin niini ngadto sa kalibotan.
-
Sa unsang paagi ang paghinumdom niini nga mga panalangin makadasig nato sa pagpakigbahin sa ebanghelyo ni Jesukristo ngadto sa uban?
Pamalandongi ang inyong personal nga pagbati mahitungod sa pagpakigbahin sa ebanghelyo ngadto sa uban. Padayon sa pagpangita og mga panabot nga makatabang ninyo nga mas masabtan ang mga panalangin ug pribilehiyo niining sagrado nga responsibilidad.
Pagtuman sa atong responsibilidad sa pakigsaad
Ang Isaias 49 naglangkob og mga panagna bahin sa pagpundok sa Israel sa kataposang mga adlaw, lakip ang pagsangyaw sa ebanghelyo. Ang propeta a Basahon ni Mormon nga si Nephi mipasabot nga kini nga mga panagna usa ka pahinumdom nga ang Dios motuman sa Iyang pakigsaad sa pagpanalangin sa mga pamilya sa yuta pinaagi sa mga binhi ni Abraham (tan-awa sa 1 Nephi 22:7–9). Pahinumdom: Ang sulugoon nga gipasabot sa Isaias 49:3 ug 5 mahimong ihulagway sa mga indibidwal kinsa nangulo sa mga tawo ni Kristo, lakip ang mga sakop sa balay ni Israel, mga propeta, ug ang Manluluwas Mismo.
Ipakita ang mosunod nga mga instruksiyon. Mahimong kompletohon sa mga estudyante kini uban sa ilang mga grupo.
Magkat-on mahitungod sa mga panagna ni Isaias pinaagi sa pagbasa sa mga kasulatan ug mga pamahayag sa likod sa mga piraso sa inyong puzzle. Hisgoti ug pangandam sa pagpakigbahin sa mosunod ngadto sa klase:
-
Mga butang nga inyong nakat-onan mahitungod sa atong responsibilidad sa pakigsaad sa pagpakigbahin sa ebanghelyo.
-
Mga paagi nga ang Langitnong Amahan ug si Jesukristo makasuporta kanato samtang atong tumanon kini nga responsibilidad.
-
Ang mga ehemplo kon unsaon kini paggamit pinaagi sa mga misyonaryo ug ubang miyembro sa Simbaan sa Ginoo.
Human sa igong panahon, dapita ang matag grupo nga ipakigbahin sa daklit ang ilang nakit-an diha sa klase. Awhaga ang daghang sakop sa matag grupo sa pagpakigbahin og usa ka butang. Human mopakigbahin ang matag grupo, pwede nilang ibutang ang mga piraso sa ilang puzzle diha sa pisara ubos sa kamatuoran nga gisulat bag-ohay lang. Ang mga piraso sa matag grupo hiusahon aron makahimo og hulagway sa daghang mga tawo ug ang hugpong sa mga pulong nga “Ang mga pamilya sa yuta.” Kon mahuman na sila, ikonsiderar ang pagtan-aw sa “President Russell M. Nelson Introduces Preach My Gospel, Second Edition” gikan sa time code 0:00 hangtod 0:55, anaa saChurchofJesusChrist.org. Mahimong mangita og dugang nga mga panabot ang mga estudyante kabahin sa atong responsibilidad sa pagpakigbahin sa ebanghelyo.
Panapos
Kompletoha ang usa o daghan sa mosunod nga mga pamahayag diha sa inyong journal sa pagtuon ingon nga kini may kalabotan sa atong responsibilidad sa pakigsaad sa pagpakigbahin sa ebanghelyo:
Karon akong nakat-onan nga ang mga tawo sa tibuok kalibotan …
Karon akong nakat-onan nga ako …
Karon akong nakat-onan nga ang Manluluwas …
Dapita ang pipila ka mga boluntaryo sa pagpakigbahin unsay ilang gisulat. Taposa pinaagi sa pagpakigbahin sa imong gibati mahitungod sa atong responsibilidad sa pakigsaad sa pagpakigbahin sa ebanghelyo ni Jesukristo ngadto sa uban. Pahinumdomi ang mga estudyante nga kini ang buhat sa Manluluwas, ug Siya motabang nila sa ilang mga paningkamot.