“Patriyarkal nga mga Panalangin: Usa ka Pagpahayag sa Gugma sa Dios ug Deklarasyon sa Linya sa Kaliwatan,” Manwal sa Magtutudlo sa Seminary sa Daang Tugon (2026)
“Patriyarkal nga mga Panalangin: Usa ka Pagpahayag sa Gugma sa Dios ug Deklarasyon sa Linya sa Kaliwatan,” Manwal sa Magtutudlo sa Seminary sa Daang Tugon
Alang sa Kalig-on sa mga Kabatan-onan: Paghimo og mga Pagpili: Leksiyon 175
Patriyarkal nga mga Panalangin
Usa ka Pagpahayag sa Gugma sa Dios ug Deklarasyon sa Linya sa Kaliwatan
Ang pagdawat sa patriyarkal nga panalangin mahimong usa sa labing mahinungdanong mga panghitabo sa atong kinabuhi. Pinaagi sa atong patriyarkal nga mga panalangin gipadayag sa Langitnong Amahan ang Iyang kabubut-on para nato, motabang nato nga mabati ang Iyang gugma, ug nagpahayag sa atong linya sa kaliwatan sa balay sa Israel. Kini nga leksiyon makatabang sa mga estudyante nga masabtan kon sa unsang paagi ang patriyarkal nga mga panalangin mao ang usa ka pagpahayag sa gugma sa Dios ug deklarasyon sa ilang linya sa kaliwatan sa balay sa Israel.
Pagpangandam sa estudyante: Ikonsiderar ang pagdapit sa mga estudyante nga himoon ang usa sa mosunod sa wala pa ang klase: (1) basahon ang ilang patriyarkal nga mga panalangin o (2) hangyoa kadtong mga nakadawat na sa ilang patriyarkal nga mga panalangin nga ipakigbahin kon unsang paagi nakatabang nila ang ilang mga panalangin.
Posibleng mga Kalihokan sa Pagkat-on
Patriyarkal nga mga panalangin
Timan-i: Nadawat na sa pipila ka estudyante ang patriyarkal nga panalangin, samtang nangandam pa ang uban para makadawat. Kini nga leksyon naghisgot sa duha ka grupo sa mga estudyante. Tinguhaa ang tabang gikan sa Espiritu Santo aron masayod kon unsaon nimo sa pagtubag sa lainlaing panginahanglan sa imong mga estudyante. Samtang hisgotan sa mga estudyante ang kaugalingon nilang patriyarkal nga mga panalangin, pahinumdomi sila nga dili ipakigbahin ang pihong mga detalye sa ilang panalangin.
Sa dili pa magtuon mahitungod sa pagpanalangin ni Jacob sa iyang pamilya, pwede nimong sugdan ang leksiyon pinaagi sa pagdapit sa mga estudyante nga hunahunaon ang ilang kasamtangang pagsabot sa patriyarkal nga mga panalangin. Usa ka paagi nga mahimo nimo kini mao ang pagsulat sa hugpong sa mga pulong nga patriyarkal nga mga panalangin diha sa pisara, uban sa tulo ka kolum nga gihulagway sa ubos.
Dapita ang mga estudyante sa pagpamalandong unsa ang ilang nahibaloan bahin sa patriyarkal nga mga panalangin ug unsa nga mga pangutana nga tingali aduna sila. Usa ka paagi sa pagbuhat niini mao ang pagdapit sa mga estudyante sa paghimog tulo ka kolum sa usa ka panid sa ilang journal sa pagtuon.
-
Unang kolum: Unsay akong nahibaloan bahin sa patriyarkal nga mga panalangin
-
Ikaduhang kolum: Unsay akong gustong mahibaloan bahin sa patriyarkal nga mga panalangin
-
Ikatulong kolum: Unsay akong nakat-onan bahin sa patriyarkal nga mga panalangin
Pwedeng sulatan sa mga estudyante ang unang duha ka kolum karon. Dugangan sa mga estudyante ang ikatulong kolum sa tibuok leksiyon.
Sa wala pa siya mamatay, gipundok sa propeta ug patriyarka nga si Jacob ang iyang pamilya.
Basaha ang Genesis 48:8–9 ug Genesis 49:1–2, nga pangitaon kon unsay iyang gibuhat alang nila. (Timan-i: Ang pulong isulti nagtumong sa unsay iyang isulti sa iyang mga panalangin.)
-
Unsay imong nakaplagan?
Ang mga panalangin nga gihatag ni Jacob sa iyang mga anak nga lalaki mao ang patriyarkal nga mga panalangin (tan-awa ang Genesis 48:9–22; 49:1–28). Sa atong panahon, “Ang matag takos, nga miyembro nga nabunyagan angayan nga modawat og patriyarkal nga panalangin, diin naghatag og dinasig nga direksiyon gikan sa Langitnong Amahan” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 18.17, Librarya sa Ebanghelyo).
Si Elder Gerrit W. Gong sa Korum sa Napulog Duha ka Apostoles mipakigbahin og mga rason nga makadawat kita og patriyarkal nga mga panalangin sa atong panahon:
Sa tibuok kalibutan, ang halangdong mga patriyarka espiritwal nga mag-andam sa paghatag og patriyarkal nga mga panalangin. Samtang ang patriyarka mopandong sa iyang mga kamot sa inyong ulo, siya mobati ug mopadayag sa gugma sa Dios alang kaninyo. Iyang isulti ang inyong gigikanan sa balay ni Israel. Siya mosulti og mga panalangin gikan sa Ginoo. (“Pagkasakop diha sa Pakigsaad,” Liahona, Nob. 2019, 82)
-
Unsay imong nakat-onan bahin sa patriyarkal nga mga panalangin gikan niini nga pamahayag?
Pwedeng motubag ang mga estudyante og mga kamatuoran nga sama sa mosunod:
Pinaagi sa akong patriyarkal nga panalangin ako makahimo nga:
-
mabati ang gugma sa Dios para nako.
-
makakat-on sa akong linya sa kaliwatan diha sa balay sa Israel.
-
mahibaloan ang mga panalangin sa Dios para nako.
Pahinumdomi ang mga estudyante nga idugang unsa ang ilang nakat-onan mahitungod sa patriyarkal nga mga panalangin diha sa kolum sa “Pagkat-on”. Pwede usab nilang isulat ang ilang mga pangutana diha sa kolum nga “Gustong mahibaloan”.
Ang tibuok bahin sa leksiyon magpunting sa kon sa unsang paagi makatabang nato ang patriyarkal nga mga panalangin aron mabati ang gugma sa Dios ug kon giunsa niini pagpahayag ng atong linya sa kaliwatan sa balay sa Israel. Sa Dugang nga mga Kalihokan sa Pagkat-on niini nga leksiyon, diha sa Librarya sa Ebanghelyo, makita nimo ang materyal kon sa unsang paagi makatabang nato ang patriyarkal nga mga panalangin aron madiskobrehan ang mga panalangin sa Dios para nato.
Ang patriyarkal nga mga panalangin maoy pagpahayag sa gugma sa Dios
Si Elder Kazuhiko Yamashita sa Seventy mipamatuod kon sa unsang paagi ang patriyarkal nga mga panalangin usa ka pagpahayag sa gugma sa Dios:
Mga kaigsoonan, mohatag ko sa akong pagsaksi nga ang Langitnong Amahan ug ang Iyang Hinigugma ug Bugtong Anak, nga si Ginoong Jesukristo, buhi. Sila nahigugma kanato. Ang patriyarkal nga mga panalangin sagradong mga gasa gikan Kanila. Kon kamo makadawat sa inyong panalangin, inyong maamgohan ug mabatyagan kon giunsa Nila kamo sa paghigugma ug giunsa Nila nga matutokan kamo sa tinagsa-tagsa. (“Kanus-a Ka Angay nga Makadawat og Patriyarkal nga Panalangin,” Liahona, Mayo 2023, 90)
-
Sa imong hunahuna sa unsang paagi nga ang patriyarkal nga mga panalangin maoy pagpahayag sa gugma sa Dios?
Aron tabangan ang mga estudyante nga makita ang ehemplo kon sa unsang paagi ang patriyarkal nga mga panalangin maoy pagpahayag sa gugma sa Dios, pwede nimong ipasalida ang “Istorya ni Bethany” gikan sa time code 7:02 hangtod 8:55. Dapita ang mga estudyante sa pagpangita kon sa unsang paagi ang pagtuon sa iyang patriyarkal nga mga panalangin nakatabang niya nga mabati nga nahibalo ang Dios ug nahigugma kaniya.
11:8 -
Sa unsang paagi ninyo nabati ang gugma sa Dios pinaagi sa inyong patriyarkal nga panalangin?
Pahinumdomi ang mga estudyante nga idugang unsa ang ilang nakat-onan mahitungod sa patriyarkal nga mga panalangin diha sa kolum sa “Pagkat-on”.
Gipahayag sa patriyarkal nga mga panalangin ang atong linya sa kaliwatan
Sa dili pa sugdan kini nga seksiyon, pwede nimong dapiton ang mga estudyante nga ipakigbahin unsa ang ilang nahibaloan bahin sa pagdeklarar sa linya sa kaliwatan ug kon nganong importante kini. Pwede usab nga isulat sa mga estudyante ang ilang mga pangutana bahin sa deklarasyon sa linya sa kaliwatan diha sa kolum nga “Gustong mahibaloan” ug pangitaon ang mga tubag samtang magtuon sila.
Si Elder David A. Bednar sa Korum sa Napulog Duha ka mga Apostoles mitudlo bahin sa deklarasyon sa linya sa kaliwatan:
Usa sa nag-uang mga rason nga midawat kita sa patriyarkal nga panalangin mao nga matabangan kitang mas hingpit nga masabtan kon kinsa kita isip mga kaliwat ni Abraham ug makamatngon sa atong responsibilidad. … Kita giorden nang daan didto sa pre-mortal nga kahimtang ug natawo dinhi nga mortal aron matuman ang pakigsaad ug saad sa Dios ngadto ni Abraham. ( “Becoming a Missionary,” Liahona, Nob. 2005, 47)
-
Unsa ang anaa niini nga pamahayag nga pwede ninyong idugang sa kolum nga “Pagkat-on”?
Depende kon unsa ang ipakigbahin sa mga estudyante, pwede nimong basahon o i-summarize ang mosunod nga parapo aron tabangan ang mga estudyante nga masabtan ang koneksiyon ni Abraham ug sa linya sa kaliwatan nga gipahayag diha sa ilang patriyarkal nga mga panalangin.
Ang Dios mihimo og pakigsaad uban sa propeta nga si Abraham nga gitawag og Abrahamic nga pakigsaad. Kini nga pakigsaad gisubli sa Dios ngadto kang Isaac ug Jacob—nga gitawag usab og Israel (tan-awa ang Genesis 26:3–4; 28:12–15). Ang mga anak ni Jacob nailhan ingon nga mga tribo sa Israel. Gipakita sa atong patriyarkal nga mga panalangin sa unsang paagi kita nahimong kaliwat ni Abraham ug sakop sa balay sa Israel. Ang kada sakop sa balay sa Israel, bisag unsa pa ang ilang tribo, makadawat og mga panalangin ug makapakigbahin og mga responsibilidad sa Abrahamic nga pakigsaad.
Kon gitun-an sa mga estudyante ang Leksiyon 23: “Genesis 12:17;” o ang Leksiyon 24: “Abraham 2:9–11,” pwede nimo silang dapiton nga ipakigbahin unsa ang ilang nahinumdoman bahin sa Abrahamic nga pakigsaad.
Ikonsiderar ang pagdapit sa mga estudyante sa pagtuon sa mosunod nga mga bersikulo uban ang gagmayng grupo ug maghimo og listahan diha sa pisara kon unsa ang ilang makaplagan.
Basaha ang Abraham 2:9–11, nga pangitaon ang mga panalangin ug mga responsibilidad nga gisaad sa Ginoo kang Abraham ug sa iyang kaliwat.
-
Unsang mga panalangin ug mga responsibilidad ang kita aduna ingon nga kaliwat ni Abraham?
-
Unsay atong makat-onan bahin sa atong patriyarkal nga mga panalangin aron matabangan kita sa pagtuman niini nga mga responsibilidad?
Ikonsiderar ang pagdapit sa mga estudyante nga nakadawat og patriyarkal nga mga panalangin nga rebyohon kon unsay gitudlo niini bahin sa mga talento o kinaiya nga gihatag sa Dios kanila aron matuman kini nga mga responsibilidad. Kon posible, pwedeng iakses sa mga estudyante ang ilang panalangin diha sa Librarya sa Ebanghelyo.
Pahinumdomi ang mga estudyante nga idugang unsa ang ilang nakat-onan mahitungod sa patriyarkal nga mga panalangin diha sa kolum sa “Pagkat-on”.
Unsay akong nakat-onan
Dapita ang mga estudyante nga rebyohon ang ilang gisulat diha sa kolum nga “Pagkat-on”. Pwede pa gani nilang linginan ang usa o duha ka butang nga mas mipatigbabaw kanila. Pwedeng ipakigbahin sa mga estudyante ngadto sa klase o sa gagmayng grupo ang pipila sa ilang gisulat.
Pwedeng tubagon sa mga estudyante ang usa o kapin pa sa mosunod nga mga pangutana diha sa ilang journal sa pagtuon.
-
Unsay imong nakat-onan o gibati bahin sa Langitnong Amahan?
-
Unsay imong nakat-onan nga nakadasig nimo sa pagtuon sa imong patriyarkal nga panalangin?
-
Unsay imong nakat-onan nga nakadasig nimo sa pagpangandam nga makadawat sa imong patriyarkal nga panalangin?
Ikonsiderar ang pagpakigbahin sa imong mga hunahuna ug mga pagbati bahin sa patriyarkal nga mga panalangin. Dapita ang mga estudyante nga wala pa nakadawat nga mainampoong ikonsiderar kon kanus-a ang hustong panahon aron makadawat. Dapita ang mga estudyante kinsa nakadawat na nga regular kining tun-an.
Kon aduna pa gihapon mga pangutana ang mga estudyante bahin sa patriyarkal nga mga panalangin, dasiga sila nga padayong pangitaon ang mga tubag. Pwede nilang tun-an ang Mga Hilisgotan ug mga Pangutana: Patriyarkal nga mga Panalangin o makig-istorya sa ginikanan o lider sa Simbahan.